ኢትዮጵያውያን ስደተኛታት ጽዒና ዝነበረት ጃልባ ኣብ ማያት ታንዛንያ ጥሒላ

ኣብ ማያት ታንዛንያ ብሰንኪ ዘጋጠመ ናይ ጃልባ ምግምጣል ሓደጋ ሸውዓተ ኢትዮጵያውያን ስደተኛታት ከም ዝጠሓሉ፡ ኣገልግሎት ዜና ሮይተርስ ሓቢሩ።

እታ 13 ሰባት ጽዒና ዝነበረት ጃልባ፡ ኢትዮጵያውን ጺዒና ምንባራ፡ ሓደ ኣዛዚ ፓሊስ ሰሜናዊ-ምብራቕ ዞባ ታንጋ ብምጥቃስ ሮይተርስ ሓቢሩ።

"ካብቶም ኣብታ ጃልባ ዝነበሩ 13 ሰባት፡ እቶም 12 ኢትዮጵያውያን፡ ሓደ ሰብ ድማ ካፕቴን ናይታ ጃልባ'ዩ። ሃለዋቱ ስለዘይተረኽበ መንነቱ ኣይተጻረየን ዘሎ" ክብል ኣዛዚ ፓሊስ ኤድዋርድ ቦኮምበ ተዛሪቡ።

ሓሙሽተ ካብቶም ስደተኛታት ከም ዝደሓኑን፡ ነቲ ገና ሃለዋቱ ዘይተፈልጠ ኣብ ምድላይ ከም ዝርከቡን እቲ ኣዛዚ ፖሊስ ገሊጹ።

ክፍሊ ኢሚግረሽን ታንዛንያ፡ ብዛዕባ ስነስርዓት ቀብሪ ናይቶም ግዳያት ንምዝርራብ ምስ ኤምባሲ ኢትዮጵያ ከም ዝተራኸበ'ውን ሓቢሩ።

እቶም ስደተኛታት ናብ ደቡብ ኣፍሪቃ ንምእታው እናተጓዕዙ እንከለዉ እቲ ሓደጋ ከም ዘጋጠሞም እቶም ዝደሓኑ ንፓሊስ ተዛሪቦም።

ኣዛዚ ፓሊስ ቡኮምበ ከም ዝበሎ፡ ነቲ ጉዕዞ ዘወሃሃደን ዝመወለን መን ምዃኑ ንምፍላጥ ዛጊድ ብመርመርቲ ኣይተፈልጠን።

ፓሊስ ታንዛንያ ናብ ደቡብ ኣፍሪቃ ዝጓዓዙ ኢትዮጵያውን ናይ ቁጠባ ስደተኛታት ምሓዝ ልሙድ ምዃኑ ኣብሪሁ።