துபை - இஸ்ரேல் விமானத்தில் நடுவானில் விமானிகள் மோதல் - ஆபத்தில் சிக்கிய பயணிகள் மீண்டது எப்படி?

துபையில் இருந்து இஸ்ரேல் சென்ற ஒரு விமானம், விமானிகளுக்கு இடையே ஏற்பட்டதாகக் கூறப்படும் மோதலைத் தொடர்ந்து சௌதி அரேபியாவில் அவசரக்கால அடிப்படையில் தரையிறக்கப்பட்டது.

அந்த விமானத்தில் பயணித்த இஸ்ரேல் பயணி ஒருவர் செய்தியாளர்களிடம் பேசியபோது, விமானப் பணியாளர்கள் உதவி கேட்டதைத் தொடர்ந்து, பயணிகள் இணைந்து விமானிகளில் ஒருவரைக் கட்டுப்படுத்தி, கட்டிப் போட்டதாகத் தெரிவித்தார்.

ஃப்ளைதுபை விமானம் தொடர்பான இந்தச் சம்பவம் குறித்து இஸ்ரேல் பிரதமர் பெஞ்சமின் நெதன்யாகு வெளியிட்ட ஓர் அறிக்கையில், "கத்திக் குத்து தாக்குதலை நடத்திய விமானி கைது செய்யப்பட்டுள்ளார். அவர் தற்போது சௌதி அதிகாரிகளால் விசாரணைக்கு உட்படுத்தப்பட்டு வருவதாக" தெரிவித்துள்ளார்.

ஃப்ளைதுபை விமானம் புதன்கிழமை காலை புறப்பட்டது. விமானங்களின் பயணத்தைப் பின்தொடரும் ஃப்ளைட்ரேடார்24 இணையதளத்தின் தகவல்படி, புறப்பட்டு சுமார் இரண்டு மணிநேரத்திற்குப் பிறகு அந்த விமானம் ஒரு அவசரக்கால சிக்னலை வெளியிட்டது.

சில நிமிடங்கள் கழித்து, அது கடத்தல் குறியீடாக மாற்றப்பட்டது. இருப்பினும், பின்னர் அது மீண்டும் வழக்கமான அவசர நிலை சிக்னலாக மாற்றப்பட்டது.

பெயர் வெளியிட விரும்பாத இஸ்ரேல் அதிகாரிகள் ஊடகங்களிடம், ஒரு விமானி மற்றொரு விமானியைக் கத்தியால் குத்தியதாகத் தெரிவித்தனர். அந்த அதிகாரிகளின் கூற்றுப்படி, தாக்குதல் நடத்திய விமானி விமானத்தைக் கடத்தவோ அல்லது அதை விபத்துக்கு உள்ளாக்கவோ திட்டமிட்டிருந்தார்.

இருப்பினும், தாக்குதல் நடத்திய விமானியின் நோக்கம் இன்னும் தெளிவாக இல்லை. மேலும், இந்த விவகாரம் தொடர்பாக இதுவரை எந்த அதிகாரபூர்வ அறிக்கையும் எங்களுக்குக் கிடைக்கவில்லை.

- இது, பிபிசிக்காக கலெக்டிவ் நியூஸ்ரூம் வெளியீடு