You’re viewing a text-only version of this website that uses less data. View the main version of the website including all images and videos.
தமிழ்நாடு, இந்தியா, இலங்கை, உலகம் மற்றும் விளையாட்டு தொடர்பான சமீபத்திய நிகழ்வுகள் பற்றிய தகவல்களை இந்த பக்கத்தில் பார்க்கலாம்.
"தேர்தலில் வாய்ப்பு வழங்கப்படாததை விட உடல்நலமின்றி இருக்கும் என்னை யாரும் பார்க்க வராதது தான் வருத்தமாக உள்ளது" என அதிமுகவின் அவிநாசி(தனி) தொகுதி சட்டமன்ற உறுப்பினரும் தமிழ்நாடு சட்டப்பேரவை முன்னாள் தலைவருமான தனபால் எக்ஸ் தளத்தில் பதிவு
2026 தமிழ்நாடு சட்டப் பேரவை தேர்தலுக்கான காங்கிரஸ் வேட்பாளர்கள் அறிவிக்கப்பட்டுள்ளனர்.
திமுக கூட்டணியில் காங்கிரஸ் கட்சிக்கு 28 தொகுதிகள் ஒதுக்கப்பட்ட நிலையில், 27 தொகுதிகளுக்கு வேட்பாளர்கள் அறிவிக்கப்பட்டுள்ளனர்.
மேலூர் தொகுதிக்கு மட்டும் வேட்பாளர் அறிவிக்கப்படவில்லை.
ஸ்ரீபெரும்புதூர்(தனி) செல்வப்பெருந்தகை
கிள்ளியூர் - ராஜேஷ்குமார்
காரைக்குடி - மாங்குடி
வேளச்சேரி - ஹசன் மவுலானா
பென்னாகரம் - தமிழ்க்குமரன் உள்ளிட்ட பலர் வேட்பாளர்களாக அறிவிக்கப்பட்டுள்ளனர்.
அமெரிக்கா மற்றும் இஸ்ரேல் இரானின் முக்கிய கட்டமைப்புகள் மீதான தாக்குதலை அதிகரித்ததை தொடர்ந்து, இரான் இஸ்ரேல் மற்றும் வளைகுடா நாடுகள் மீது புதிய தாக்குதல்களை நடத்தியுள்ளது.
குவைத்தில், டிரோன் தாக்குதலுக்குப் பிறகு மினா அல்-அஹ்மதி எண்ணெய் சுத்திகரிப்பு நிலையத்தில் தீ விபத்து ஏற்பட்டது. அங்கு எந்த காயமும் ஏற்படவில்லை என தெரிவிக்கப்பட்டுள்ளது.
மேலும், குவைத்தில் உள்ள கடல்நீரைக் குடிநீராக்கும் நிலையம் மீது இரான் தாக்கியதாக அதிகாரிகள் தெரிவித்துள்ளனர்.மத்திய கிழக்கு நாடுகள் குடிநீரின் சுமார் 90 சதவீதத்தை இதுபோன்ற நிலையங்களை நம்பியே உள்ளன.
இரானில் உள்ள 'மிகப் பெரிய பாலம்' மீது அமெரிக்கா தாக்குதல் நடத்தியுள்ளது என அமெரிக்க அதிபர் டொனல்ட் டிரம்ப் தனது ட்ரூத் சோஷியல் பக்கத்தில் தெரிவித்துள்ளார்.
இந்த தாக்குதலை இரான் வெளியுறவு அமைச்சர் அப்பாஸ் அராக்சி உறுதிப்படுத்தியுள்ளார். ஆனால் இத்தகைய தாக்குதல்கள் இரானை சரணடையச் செய்யாது என அவர் கூறியுள்ளார்.
பிபிசியின் அமெரிக்கக் கூட்டு நிறுவனமான சிபிஎஸ் நியூஸ் தகவலின்படி, அமெரிக்கப் பாதுகாப்புச் செயலர் பீட் ஹெக்ஸெத், ராணுவத் தலைமைத் தளபதி ராண்டி ஜார்ஜை அவரது பதவியிலிருந்து விலகுமாறு கேட்டுக்கொண்டுள்ளார்.
பென்டகனின் தலைமை செய்தித் தொடர்பாளர் ஷான் பார்னெல் சமூக ஊடகத்தில் வெளியிட்ட ஓர் அறிக்கையில், ஜார்ஜ் "41வது ராணுவத் தலைமைத் தளபதி பதவியிலிருந்து உடனடியாக ஓய்வு பெறுகிறார்" என்று கூறியுள்ளார்.
ராணுவத் தலைமைத் தளபதி பொதுவாக நான்கு ஆண்டு காலத்திற்குப் பதவி வகிப்பார். வெஸ்ட் பாயிண்ட் ராணுவ அகாடமியில் பட்டம் பெற்ற, தொழில்முறை ராணுவ அதிகாரியான ஜார்ஜ், 2023-ல் முன்னாள் அதிபர் ஜோ பைடனால் இந்தப் பதவிக்குப் பரிந்துரைக்கப்பட்டார்.
இரானுடனான அமெரிக்க-இஸ்ரேல் போர் "மிக விரைவில்" முடிவுக்கு வரும் என்று நாட்டு மக்களுக்கு ஆற்றிய உரையில் டிரம்ப் கூறியதைத் தொடர்ந்து இந்த சமீபத்திய மாற்றங்கள் நிகழ்ந்துள்ளன.
ஜார்ஜ் முதல் வளைகுடாப் போரிலும், ஈராக் மற்றும் ஆப்கானிஸ்தானில் நடந்த சமீபத்திய மோதல்களிலும் காலாட்படை அதிகாரியாகப் பணியாற்றினார். அவர் ஏன் பதவி விலகுமாறு கேட்டுக்கொள்ளப்படுகிறார் என்பது உடனடியாகத் தெளிவாகத் தெரியவில்லை.
"அவரது சேவைக்கு நாங்கள் நன்றியுள்ளவர்களாக இருக்கிறோம், ஆனால் ராணுவத்தில் ஒரு தலைமை மாற்றத்திற்கான நேரம் வந்துவிட்டது," என்று பெயர் குறிப்பிடப்படாத ஒரு மூத்த பாதுகாப்பு அதிகாரி சிபிஎஸ்ஸிடம் கூறினார்.
பென்டகன் செய்தித் தொடர்பாளர் பார்னெல் கூறியதாவது: "ஜெனரல் ஜார்ஜ் நமது தேசத்திற்கு ஆற்றிய பல தசாப்த கால சேவைக்கு போர் துறை நன்றியுடையதாக உள்ளது. அவரது ஓய்வுக்காலம் சிறப்பாக அமைய வாழ்த்துகிறோம்."
அமெரிக்க ஊடகங்களின்படி, அவருக்குப் பதிலாக ராணுவத் துணைத் தலைமைத் தளபதி ஜெனரல் கிறிஸ்டோபர் லானேவ் தற்காலிக ராணுவத் தலைமைத் தளபதியாகப் பொறுப்பேற்பார்.
அமெரிக்க அதிபர் டொனால்ட் டிரம்ப், தனது நீண்டகால கூட்டாளியும், தனது நிர்வாகத்தின் தீவிர ஆதரவாளருமான அட்டர்னி ஜெனரல் பேம் பாண்டியைப் ( Pam Bondi) பணிநீக்கம் செய்துள்ளார்.
அமெரிக்காவில், அட்டர்னி ஜெனரல் என்பவர் நாட்டின் மிக உயர்ந்த சட்ட அமலாக்க அதிகாரியாகக் கருதப்படுகிறார். 'ட்ரூத் சோஷியல்' தளத்தில் வெளியிட்ட ஒரு பதிவில், டிரம்ப் பேம் பாண்டியைப் பாராட்டியதுடன், அவர் இனி தனியார் துறையில் ஒரு புதிய பொறுப்பை ஏற்கவுள்ளதாகத் தெரிவித்தார்.
நீதித்துறையில் பேம் பாண்டி வகித்த பதவிக்காலம், ஜெஃப்ரி எப்ஸ்டீன் தொடர்பான கோப்புகளை வெளியிடுதல் மற்றும் அந்தத் தண்டிக்கப்பட்ட பாலியல் குற்றவாளி மீதான விசாரணை ஆகியவற்றைச் சூழ்ந்த சர்ச்சைகளாலேயே பெரும்பாலும் சூழ்ந்திருந்தது.
சமீபத்திய வாரங்களில், டிரம்ப் நிர்வாகத்திலிருந்து பணிநீக்கம் செய்யப்படும் இரண்டாவது உயர் அதிகாரி இவராவார். கடந்த மார்ச் மாதம், கிறிஸ்டி நோம் என்பவர் உள்நாட்டுப் பாதுகாப்புத் துறைத் தலைவர் பதவியிலிருந்து நீக்கப்பட்டார். டாட் பிளான்ச், பேம் பாண்டிக்கு பதிலாக அப்பதவியை ஏற்கவுள்ளார்.
தனது பொறுப்புகளை பிளான்ச்சிடம் ஒப்படைக்கும் பணியில் "சோர்வின்றி உழைப்பேன்" என்று பாண்டி கூறினார்; மேலும், இப்பதவியை வகித்தது தனது வாழ்வின் "பெருமைக்குரிய விஷயம்" என்றும் அவர் குறிப்பிட்டார்.
தனியார் துறையில் தான் ஏற்கவுள்ள புதிய பொறுப்பிலும், "அதிபர் டிரம்ப் மற்றும் அவரது நிர்வாகத்திற்காகத் தொடர்ந்து போராடுவேன்" என்றும் அவர் தெரிவித்தார். எனினும், தனது புதிய பொறுப்பு என்னவாக இருக்கும் என்பதை அவர் திட்டவட்டமாகத் தெரிவிக்கவில்லை.
ஆர்டெமிஸ் 2 திட்டம், ஓரியன் விண்கலத்தை நிலவுக்கான அதன் பயணத்தில் உந்திச் செலுத்தவிருக்கும் ஒரு முக்கியமான எஞ்சின் எரிப்பை நிறைவு செய்துள்ளது.
நிலவை நோக்கிய இந்த உட்செலுத்து எரிப்பு, (translunar injection burn) இந்திய நேரப்படி வெள்ளிக்கிழமை காலை 5:19-க்கு தொடங்கி, சுமார் ஆறு நிமிடங்கள் நீடித்தது. "மனிதகுலம் தங்களால் என்ன செய்ய முடியும் என்பதை மீண்டும் ஒருமுறை நிரூபித்துள்ளது," என்று கனடிய விண்வெளி வீரர் ஜெர்மி ஹேன்சன், இதற்கு பிறகு தனது முதல் செய்தியில் கூறினார்.
"நிலவைச் சுற்றியுள்ள இந்தப் பயணத்தில், எதிர்காலம் குறித்த உங்கள் நம்பிக்கைகளே இப்போது எங்களை முன்னோக்கிச் செலுத்துகின்றன," என்று அவர் கூறினார். "நிலவை நோக்கிச் செல்லும் இவ்விடத்தில் நாங்கள் அனைவரும் மகிழ்ச்சியாக உணர்கிறோம்," என்று ஹேன்சன் நாசாவின் நேரலையில் கூறினார்.
இந்த முழு செயல்முறையும் "எந்தத் தடங்கலும் இன்றி" நடந்ததாகவும், அனைத்து விண்வெளி வீரர்களும் "மிகவும் நலமாக" இருப்பதாகவும் நாசா தெரிவித்தது.
பிபிசியின் அறிவியல் செய்தியாளரின் கூற்றுப்படி, விண்கலம் புவியின் சுற்றுப்பாதையின் மிகக் குறைந்த புள்ளியில் இந்த எரிப்பைத் தொடங்கியது. இந்த பயணத்தின் போது யாரும் நிலவில் தரையிறங்க மாட்டார்கள். ஓரியன் விண்கலம் சந்திரனை வெறுமனே சுற்றி வரும்.
இரானிய வெளியுறவு அமைச்சகத்தின் செய்தித் தொடர்பாளர் இஸ்மாயில் பாகேய், ‘தாக்குதல் நடத்தும் தரப்புடன் தொடர்பில்லாத’ கப்பல்கள் ஹோர்மூஸ் நீரிணை வழியாக செல்ல அனுமதிக்கப்படுவதாகக் கூறினார்.
‘நியூஸ்ரூம் ஆப்பிரிக்கா’ தொலைக்காட்சி சேனலுக்கு அளித்த பேட்டியில், ‘எங்கள் அதிகாரிகளுடனான முறையான ஒருங்கிணைப்புக்குப் பிறகே’ கப்பல்கள் நீரிணை வழியாக செல்ல அனுமதிக்கப்படும் என்று பாகேய் கூறினார்.
மோதலைக் குறிப்பிட்ட அவர், ‘போர், பேச்சுவார்த்தைகள் மற்றும் போர்நிறுத்தம் என இந்த தீய சுழற்சியை’ இரான் பொறுத்துக்கொள்ளாது என்று கூறினார்.
"அவர்கள் (அமெரிக்கா) நிறுத்தலாம் எனச் சொன்னார்கள், அதனால் நாங்கள் நிறுத்தினோம், பின்னர் ஒன்பது மாதங்களுக்குப் பிறகு அவர்கள் மீண்டும் தொடங்கினார்கள்," என்று பாகேய் கூறினார்.
கடந்த ஜூன் மாதம் இரான் மற்றும் இஸ்ரேல் இடையே நடந்த 12 நாள் மோதலின் போது, அமெரிக்கா இரானின் பல அணுசக்தி மற்றும் ராணுவ தளங்கள் மீது தாக்குதல் நடத்தியது குறிப்பிடத்தக்கது.
பின்னர், பிப்ரவரி 28 அன்று, இஸ்ரேலும் அமெரிக்காவும் இரான் மீது தாக்குதல் நடத்தின. தற்போதைய மோதல் இப்போது ஒரு மாதமாக நீடித்து வருகிறது.
தூத்துக்குடி மாவட்டம் சாத்தான்குளத்தில் கடந்த 2020-ஆம் ஆண்டில் ஜெயராஜ்-பென்னிக்ஸ் காவல்துறையால் தாக்கப்பட்டு உயிரிழந்த வழக்கில், வரும் திங்கட்கிழமை (ஏப்ரல் 06) தண்டனை விவரங்கள் அறிவிக்கப்படும் என நீதிமன்றம் தெரிவித்துள்ளது.
இதனால், இந்த வழக்கில் இருமுறை தண்டனை விவரங்கள் அறிவிப்பு ஒத்தி வைக்கப்பட்டுள்ளது. முன்னதாக மார்ச் 30 அன்றும் இன்றும் (ஏப்ரல் 2) ஒத்திவைக்கப்பட்டது.
முன்னதாக, இன்று மதுரை மாவட்ட கூடுதல் அமர்வு நீதிமன்றத்தில் நீதிபதி முத்துக்குமரன் முன்பாக ஜெயராஜின் மனைவி செல்வராணி, மகள் பெர்சி ஆகியோர் தரப்பு வழக்கறிஞர் ஆஜராகி தங்களது தரப்பு வாதங்களை நீதிபதியிடம் கூறினர்.
கண்ணீர் மல்க நீதிபதியிடம் அன்று நடந்தவற்றை கூறினர். எந்த தவறும் செய்யாத அவரை கொன்றுவிட்டனர் என நீதிபதியிடம் கண்ணீர் மல்க ஜெயராஜ் - பென்னிக்ஸ் குடும்பத்தினர் தெரிவித்தனர்.
உடலில் உள்ள அனைத்து பாகங்களும் தாக்கப்பட்டு உயிரிழந்தார் என, ஜெயராஜின் மகள் பெர்சி தெரிவித்தார்.
தீர்ப்பில் கூறப்பட்டது என்ன?
தூத்துக்குடி மாவட்டம் சாத்தான்குளத்தில் கடந்த 2020-ஆம் ஆண்டில் தந்தையும் மகனும் காவல்துறையால் தாக்கப்பட்டு உயிரிழந்த வழக்கில், இந்த சம்பவம் "கொலை" என தீர்மானிக்கப்படுவதாக மதுரை மாவட்ட கூடுதல் அமர்வு நீதிமன்றம் மார்ச் 23 அன்று தீர்ப்பளித்தது.
நீதிபதி முத்துக்குமரன் தீர்ப்பை வாசிக்கும் போது, தந்தை மகனான ஜெயராஜ் மற்றும் பென்னிக்ஸ் மரணம் கொலை என தீர்மானிக்கப்படுவதாகக் கூறினார்.
உயிரிழந்த தந்தை ஜெயராஜ் மகன் பென்னிக்ஸ் ஆகிய இருவர் மீதும் போடப்பட்ட வழக்கு பொய் வழக்கு என விசாரணையில் தெரிய வந்துள்ளது என்று கூறிய நீதிபதி, வழக்கினுடைய அனைத்து தரப்பு விசாரணைகளின் அடிப்படையில், "குற்றம் சாட்டப்பட்ட அனைவரும் குற்றவாளிகள்" எனத் தீர்ப்பளிப்பதாகக் கூறினார்.
"குற்றம் சாட்டப்பட்ட அனைவருக்கும் தண்டனை விதிக்கப்பட வேண்டியது அவசியமாக உள்ளது" என்று நீதிபதி கூறினார்.
இரான் அதிபர் மசூத் பெசெஷ்கியன், "அமெரிக்க மக்களுக்காக” ஒரு கடிதத்தை எழுதியுள்ளார்; இந்தக் கடிதத்தை அவர் புதன்கிழமையன்று சமூக ஊடகங்களில் பகிர்ந்துகொண்டார்.
இரான் "ஒருபோதும் போரைத் தொடங்கியதில்லை" என்று அந்தக் கடிதத்தில் இரான் அதிபர் குறிப்பிட்டுள்ளார். மேலும், தனது நாடு நீண்ட காலமாக "ஆக்கிரமிப்பு மற்றும் ஆக்ரோஷமான தாக்குதல்களால்" பாதிக்கப்பட்டு வருவதாகவும் அவர் கூறினார்.
"இரானின் புதிய ஆட்சியின் அதிபர்" அமெரிக்காவிடம் போர்நிறுத்தத்தைக் கோரியதாக அதிபர் டிரம்ப் கூறிய சில மணிநேரங்களிலேயே இந்தக் கடிதம் வெளியாகியுள்ளது. எனினும், தாம் யாரைக் குறிப்பிடுகிறார் என்பதை டிரம்ப் தெளிவுபடுத்தவில்லை.
ஒரு சமூக ஊடகப் பதிவில், "ஹோர்மூஸ் நீரிணை திறந்த நிலையிலும், தடையற்றதாகவும், பாதுகாப்பானதாகவும் இருக்கும்போது மட்டுமே" அமெரிக்கா போர்நிறுத்தத்தைக் கருத்தில் கொள்ளும் என்று டிரம்ப் கூறியிருந்தார். "அதற்குள், நாங்கள் இரானை முழுமையாக அழித்திருப்போம்; அல்லது அவர்கள் சொல்வது போல, அதை 'கற்காலத்திற்கே' திருப்பி அனுப்பியிருப்போம்!!!" என்றும் அவர் குறிப்பிட்டிருந்தார்.
ஆனால், பெசெஷ்கியன் தனது கடிதத்தில் போர்நிறுத்தம் குறித்து எதுவும் தெரிவிக்கவில்லை.
அமெரிக்கா, ஐரோப்பா அல்லது அண்டை நாடுகளைச் சேர்ந்த மக்கள் மீது இரானிய மக்கள் எவ்விதத் தீய எண்ணத்தையும் கொண்டிருக்கவில்லை என்று அவர் குறிப்பிட்டுள்ளார். "மோதலா அல்லது பேச்சுவார்த்தையா" என்பதில் எடுக்கப்படும் முடிவே வருங்காலத் தலைமுறையினரின் எதிர்காலத்தைத் தீர்மானிக்கும் என்று கூறி அவர் தனது கடிதத்தை நிறைவு செய்துள்ளார்.
ஹோர்மூஸ் நீரிணையிலிருந்து இந்தியக் கப்பல்களை இந்தியக் கடற்படை பாதுகாப்பாக வெளியேற்றி வருவதாக, பாதுகாப்பு அமைச்சர் ராஜ்நாத் சிங் வியாழக்கிழமை தெரிவித்தார்.
கேரளாவின் திருவனந்தபுரத்தில் நடைபெற்ற "சைனிக் சம்மான் சம்மேளன்" நிகழ்ச்சியில் உரையாற்றியபோது ராஜ்நாத் சிங் இதனை தெரிவித்தார். மேலும், "நாட்டில் பெட்ரோல், டீசல் மற்றும் எரிவாயு சிலிண்டர்களுக்கு எந்தப் பற்றாக்குறையும் இல்லை" என்றும் அவர் கூறினார்.
"மேற்கு ஆசியாவில் நிலவும் மோதல் காரணமாக, சிலர் பல்வேறு பொய்களைப் பரப்பி பீதியை ஏற்படுத்த விரும்புகிறார்கள். நாட்டில் பெட்ரோல்-டீசலுக்கு எந்தப் பற்றாக்குறையும் இல்லை, சமையல் எரிவாயு சிலிண்டர்களுக்கும் எந்தப் பற்றாக்குறையும் இல்லை. எந்தவொரு எரிசக்தி நெருக்கடியையும் சமாளிக்க இந்தியா முழுமையாகத் தயாராக உள்ளது," என்று ராஜ்நாத் சிங் கூறினார்.
"ஹோர்மூஸ் நீரிணையிலிருந்து இந்திய எண்ணெய் கப்பல்களை கடற்படை பாதுகாப்பாக வெளியேற்றி வருகிறது. பிரதமர் மோதி தனது ராஜதந்திரத் திறன்களைப் பயன்படுத்தி ஒவ்வொரு நாளும் இந்தியர்களின் நலன்களைப் பாதுகாத்து வருகிறார்," என்றும் அவர் கூறினார்.
"ஹோர்மூஸ் நீரிணையின் எதிர்காலத்தை இரானும் ஓமனும் மட்டுமே தீர்மானிக்கும்," என்று இரான் வெளியுறவுத் துறை அமைச்சர் சையத் அப்பாஸ் அராக்சி புதன்கிழமையன்று தெரிவித்தார்.
அவரது இந்தக் கூற்று, உலகின் பல்வேறு நாடுகளில் அமைந்துள்ள இரான் தூதரகங்களின் சமூக ஊடகப் பக்கங்களில் பகிரப்பட்டுள்ளது.
இந்தியாவில் உள்ள இரான் தூதரகமும் இச்செய்தியைப் பகிர்ந்ததோடு, மற்றொரு பதிவில், "எங்கள் இந்திய நண்பர்கள் பாதுகாப்பான கைகளில் உள்ளனர்; கவலைப்பட ஏதுமில்லை," என்றும் குறிப்பிட்டுள்ளது.
ஹோர்மூஸ் நீரிணை விவகாரத்தில் இரானும் அமெரிக்காவும் முரண்பட்ட நிலையில் உள்ளன. போர் தொடங்கியதிலிருந்து, இந்தியா, பாகிஸ்தான் மற்றும் சீனா போன்ற தேர்ந்தெடுக்கப்பட்ட சில நாடுகளின் கப்பல்களை மட்டுமே இந்த நீரிணை வழியாகச் செல்ல இரான் அனுமதித்து வருகிறது.
உலகளாவிய எரிசக்தி வர்த்தகத்தில் 20 சதவிகிதம் இந்த நீரிணை வழியாகவே நடைபெறுவதால், இந்த குறுகிய கடல் வழி மூடப்பட்டிருப்பது உலகளவில் எண்ணெய் விலைகள் கடுமையாக உயரக் காரணமாக அமைந்துள்ளது.
இந்தோனீசியாவில் வியாழக்கிழமை காலையில் 7.4 அளவில் சக்திவாய்ந்த நிலநடுக்கம் ஏற்பட்டது; இதைத் தொடர்ந்து சுனாமி எச்சரிக்கை விடுக்கப்பட்டது. எனினும், இந்தோனீசியா, பிலிப்பைன்ஸ் மற்றும் மலேசியாவின் கடலோரப் பகுதிகளில் அலைகள் ஏற்படக்கூடும் என்று முன்னதாகத் தெரிவித்திருந்த அதிகாரிகள், தற்போது சுனாமி எச்சரிக்கைகளை விலக்கிக்கொண்டுள்ளனர்.
அமெரிக்கப் புவியியல் ஆய்வு மையத்தின் தகவல்படி, இந்த நிலநடுக்கம், உள்ளூர் நேரப்படி காலை 6:48 மணிக்கு மொலுக்கா கடற்பகுதியில் ஏற்பட்டது.
இந்த நிலநடுக்கத்தின் மையப்பகுதி, டெர்னேட் (Ternate) நகரத்திலிருந்து சுமார் 120 கிலோமீட்டர் தொலைவில் அமைந்திருந்தது. டெர்னேட் என்பது சிறியதாக இருந்தாலும், 2 லட்சத்துக்கும் அதிகமான மக்கள்தொகையைக் கொண்ட, மக்கள் நெருக்கம் மிகுந்த ஒரு தீவாகும்.
நிலநடுக்கத்தின் மையப்பகுதியிலிருந்து 1,000 கிலோமீட்டர் சுற்றளவுக்குள் அமைந்துள்ள இந்தோனீசியா, பிலிப்பின்ஸ் மற்றும் மலேசியாவின் கடலோரப் பகுதிகளைச் சுனாமி அலைகள் வந்தடைய வாய்ப்புள்ளதாக, ஹவாயைத் தளமாகக் கொண்ட சுனாமி எச்சரிக்கை அமைப்பு தெரிவித்திருந்தது.
இன்று (02-04-2026) மதியம் வரையிலும் நேரலை பக்கத்தில் சமீபத்திய நிகழ்வுகள் குறித்த விவரங்களை சுருக்கமாக தொகுத்து அளிப்பது நந்தினி வெள்ளைச்சாமி.
இரானின் 'புதிய ஆட்சியின் அதிபர்' போர்நிறுத்தம் கோரியதாக டிரம்ப் தெரிவித்துள்ளார். இந்த தகவலை அவர் தனது ட்ரூத் சோசியல் பதிவில் தெரிவித்துள்ளார்.
"இரானின் புதிய தலைவர் முந்தைய தலைவரைவிட தீவிரம் குறைந்தவராகவும் விவேகமானவராகவும் இருக்கிறார். இந்தப் போரை முடிக்க வேண்டும் என அவர் அமெரிக்காவிற்கு அழைப்பு விடுத்துள்ளார்," என அந்தப் பதிவில் குறிப்பிட்டுள்ளார்.
மேலும் அவர், "ஹோர்மூஸ் நீரிணை திறக்கப்பட்டு மிகவும் சுதந்திரமாகவும் பாதுகாப்பானதாகவும் இருந்தால் மட்டுமே நாங்கள் பரிசீலிப்போம். அது நடக்கின்றவரை நாங்கள் இரானை முழுமையாக அழித்து அவர்களை 'கற்காலத்திற்கே' அனுப்பிவிடுவோம்," எனத் தெரிவித்தார்.
புதிய இரான் தலைவர் என டிரம்ப் கூறியுள்ள நிலையில் அவர் யாரை குறிப்பிடுகிறார் என்பதில் தெளிவில்லை.
போரை நிறுத்துவதற்கான பேச்சுவார்த்தையில் ஈடுபட்டதாக வரும் தகவல்களை இரான் தொடர்ந்து மறுத்துவருகிறது. மத்தியஸ்தர்கள் மூலம் அமெரிக்காவிடம் சில தகவல்கள் மட்டுமே பரிமாற்றப்பட்டதாகவும் இரான் தெரிவித்துள்ளது.
இரான் உடனான போரில் இணையாததற்காக நேட்டோவை தொடர்ந்து விமர்சித்து வந்த அமெரிக்க அதிபர் டொனால்ட் டிரம்ப் அந்த அமைப்பில் இருந்து வெளியேற பரிசீலிப்பதாக தெரிவித்திருந்தார்.
அதனைத் தொடர்ந்து செய்தியாளர்களிடம் பேசிய பிரிட்டன் பிரதமர் கீர் ஸ்டாமரிடம் ஐரோப்பா உடனான உறவுகளை வலுப்படுத்துவது பற்றி கேட்கப்பட்டது.
அதற்குப் பதிலளித்த ஸ்டாமர் தான் ஐரோப்பா மற்றும் அமெரிக்கா இடையே தேர்வு செய்யவில்லை எனத் தெரிவித்தார்.
மேலும் அவர், "அமெரிக்கா மற்றும் ஐரோப்பா என இரண்டு தரப்புடனும் வலுவான உறவுகள் கொண்டிருப்பது நமது நலனுக்கானது. ஆனால் பாதுகாப்பு, பொருளாதாரம் போன்ற விவகாரங்களில் ஐரோப்பா உடன் வலுவான உறவுகள் தேவை என்றும் நான் நம்புகிறேன்." என்றும் கூறினார்.
ஐரோப்பா உடனான சிறந்த ஒத்துழைப்பு அமெரிக்கா உடனான உறவுகளையும் வலுப்படுத்தும் என்றும் ஸ்டாமர் தெரிவித்தார்.
ஹோர்மூஸ் நீரிணையை திறப்பது பற்றி இரான் நாடாளுமன்ற உறுப்பினர் இப்ராஹிம் அஸிஸி பேசியுள்ளார். "ஹோர்மூஸ் நீரிணை திறக்கும், ஆனால் அவருக்கு (டிரம்ப்) அல்ல." என்றார்.
இரானிய நாடாளுமன்ற தேசிய பாதுகாப்பு குழுவின் தலைவரான இப்ராஹிம் அஸிஸி, "இரானின் புதிய சட்டங்களைப் பின்பற்றுபவர்களுக்கு மட்டுமே ஹோர்மூஸ் நீரிணை திறக்கும்." எனத் தெரிவித்தார்.
"47 ஆண்டுகால விருந்தோம்பல் நிரந்தரமாக முடிந்துவிட்டது," என தனது எக்ஸ் பக்கத்தில் பதிவிட்டுள்ளார்.
1979-இல் இரானிய புரட்சி நிகழ்ந்ததில் இருந்து தற்போது வரையிலான காலக்கோட்டை குறித்து இதை அவர் தெரிவித்தார்.
டிரம்ப் தனது 'ஆட்சி மாற்றம்' என்கிற கனவை அடைந்துவிட்டதாகக் குறிப்பிடும் அவர், "ஆனால் அந்த மாற்றம் இந்தப் பிராந்தியத்தின் கடல்சார் விதிகளிலே நிகழ்ந்துள்ளது." என்றார்.
ஹோர்மூஸ் நீரிணையைக் கடந்து செல்லும் கப்பல்களிடமிருந்து கட்டணம் வசூலிக்கும் புதிய திட்டத்திற்கு இரானின் தேசிய பாதுகாப்பு குழு சமீபத்தில் ஒப்புதல் வழங்கியுள்ளது.
நேட்டோவில் இருந்து அமெரிக்காவை வெளியேற்றுவதை வலுவாக பரிசீலித்து வருவதாக டெலகிராப் இதழுக்கு அளித்த பேட்டியில் டொனால்ட் டிரம்ப் தெரிவித்துள்ளார்.
நோட்டோ கூட்டணியை "காகிதப் புலி" என அழைத்த டிரம்ப், பிரிட்டனுக்கு கடற்படையே இல்லை என்றும் தெரிவித்தார்.
மத்திய கிழக்கில் நடைபெற்று வரும் மோதலுக்குப் பிறகு நேட்டோ கூட்டணியில் அமெரிக்காவின் சேர்க்கையை மறுபரிசீலனை செய்வீர்களா என்கிற கேள்விக்குப் பதிலளித்த டிரம்ப், "ஆமாம், அது மறுபரிசீலனையையும் கடந்துவிட்டது என்று கூறுவேன். நான் எப்போதுமே நேட்டோவால் ஈர்க்கப்படவில்லை. அவர்கள் ஒரு காகிதப் புலி என்பது எனக்கு எப்போதும் தெரியும். அது புதினுக்கும் தெரியும்." என்றார்.
பிரிட்டன் போர்க்கப்பல்களின் நிலையைக் குறிப்பிட்டு பேசிய டிரம்ப், "உங்களிடம் கடற்படையே இல்லை. நீங்கள் மிகவும் பழமையாகிவிட்டீர்கள் மற்றும் வேலை செய்யாத விமானங்களை வைத்துள்ளீர்கள்." என்று தெரிவித்தார்.
பெட்ரோல் மற்றும் டீசல் விலைகளில் எவ்வித மாற்றமும் இல்லை என்பது தெளிவுபடுத்தப்பட்டுள்ளதாக, இந்திய பெட்ரோலிய துறை அமைச்சகம் தெரிவித்துள்ளது.
அந்த அமைச்சகம் இன்று வெளியிட்டுள்ள அறிக்கையில், “இந்தியாவின் போக்குவரத்துத் தேவைகளுக்குப் பெரிதும் பயன்படும் வழக்கமான பெட்ரோல் மற்றும் டீசல் விலைகளில் எவ்வித மாற்றமும் இல்லை என்பது தெளிவுபடுத்தப்பட்டுள்ளது; அதாவது, டெல்லியில் அவற்றின் விலைகள் முறையே லிட்டருக்கு ரூ. 94.77 மற்றும் ரூ. 87.67 என்ற அளவிலேயே நீடிக்கின்றன. கடந்த ஒரு மாத காலத்தில் உலகளாவிய பெட்ரோலிய விலைகள் 100% வரை உயர்ந்துள்ள நிலையில், 01.04.2026 நிலவரப்படி, பொதுத்துறை எண்ணெய் நிறுவனங்கள் (PSU OMCs) சில்லறை விற்பனை விலையில் (RSP) பெட்ரோலுக்கு லிட்டருக்கு ரூ. 24.40-ம், டீசலுக்கு லிட்டருக்கு ரூ. 104.99-ம் நஷ்டத்தை சந்தித்து வருகின்றன. சர்வதேச சந்தையில் விண்ணை முட்டும் விலையேற்றத்திலிருந்து இந்தியக் குடிமக்களைப் பாதுகாப்பதற்கான பிரதமர் நரேந்திர மோதியின் உறுதிப்பாட்டுக்கு இணங்கவே இம்முடிவுகள் எடுக்கப்பட்டுள்ளன.
சமீபத்தில் லிட்டருக்கு ரூ. 2 என்ற அளவில் செய்யப்பட்ட விலை மாற்றம், 'XP95', 'Power95' மற்றும் 'Speed' போன்ற 'பிரீமியம்' வகை பெட்ரோலுக்கு மட்டுமே பொருந்தும். இவை உயர்-ஆக்டேன் திறன் கொண்ட எரிபொருட்களாகும்; இவற்றின் விலை பதினைந்து நாட்களுக்கு ஒருமுறை மாற்றியமைக்கப்படுகின்றன. மொத்த எரிபொருள் விற்பனை அளவில், இவ்வகைப் பெட்ரோல்களின் விற்பனைப் பங்கு முறையே 2% மற்றும் 5% மட்டுமே ஆகும். வாகன ஓட்டிகள் தாங்களாகவே விரும்பித் தேர்ந்தெடுத்து, கூடுதல் விலை கொடுத்து இவ்வகைப் பெட்ரோல்களை வாங்குகின்றனர்.
உலகம் முழுவதும் உள்ள பல்வேறு நாடுகளில் எரிபொருள் விலைகள் 30% முதல் 50% வரை உயர்ந்துள்ள போதிலும், இந்தியாவில் உள்ள ஒவ்வொரு எரிபொருள் நிலையமும் வழக்கமான பெட்ரோல் மற்றும் டீசலை எவ்வித விலை மாற்றமுமின்றி தொடர்ந்து வழங்கி வருகிறது.” என தெரிவிக்கப்பட்டுள்ளது.
