TOOS, Pakistan oo xaqiijinaysaa ka qaybgalka hoggaanka Maraykanka iyo Iran ee wada xaajoodka, iyo bilawga wada xaajoodka tooska ah

Tebin toos ah

1. 18 Daqiiqadood ka horWasaaradda Waxbarashadu Iiraan oo shaacisay tirada macallimiinta iyo ardaydii lagu dilay dagaalka

   Wasaaradda Waxbarashada ee Iiraan ayaa sheegtay in tirada ardayda iyo macallimiinta lagu dilay dalka intii uu socday dagaalka Mareykanka iyo Israa’iil ay gaartay 344 qof.

   Tiradan la shaaciyay, 277 qof waxay ahaayeen arday, halka 67 ay ahaayeen macallimiin.

   Wasaaraddu waxay sidoo kale sheegtay in 857 dugsi ay waxyeello soo gaartay ama gebi ahaanba la burburiyay tan iyo markii uu dagaalku bilowday.

   Weerarkii lagu qaaday dugsiga Shajare Tayyiba ee ku yaalla magaalada Minab subaxnimadii Sabtida, 29-ka Maarso, qiyaastii afar saacadood kadib markii ay bilaabmeen duqeymaha cirka ee Mareykanka iyo Israa’iil ee Iiraan, ayaa noqday mid ka mid ah arrimaha ugu muranka badan tan iyo bilowga dagaalka, wuxuuna dhaliyay cambaareyn ballaaran.

   Weerarkaasi wuxuu sababay dhimashada tobanaan arday.

   Inta badan dadka dhintay waxay ahaayeen arday wiilal iyo gabdho ah oo da’doodu u dhaxaysay 7 ilaa 12 sano.

   Macallimiin dhowr ah iyo waalidiinta ardayda ayaa sidoo kale lagu dilay weerarka.

   Wasaaradda Waxbarashada ayaa ku dhawaaqday in tirada guud ee macallimiinta iyo ardayda lagu dilay dagaalka ay tahay 344.

2. 38 Daqiiqadood ka horCNN:Shiinaha ayaa isku diyaarinaya inuu nidaamyada difaaca hawada u gudbiyo Iran

   CNN, oo soo xiganaysa saddex “ilo oo xog-ogaal u ah qiimeynta sirdoonka,” ayaa sheegtay in iyadoo lagu salaynayo xogta sirdoonka Mareykanka, Shiinaha uu isu diyaarinayo inuu toddobaadyada soo socda u gudbiyo nidaamyo cusub oo difaaca cirka ah Jamhuuriyadda Islaamiga ah ee Iiraan.

   Shabakadda ayaa sheegtay in ay jiraan tilmaamo muujinaya in Beijing ay isku dayayso inay Shixnadan hubka u marsiiso waddamo saddexaad si loo qariyo halka ay ka yimaadeen.

   Ilo Mareykan iyo Shiine ah weli kama aysan hadlin arrintan.

   CNN ayaa sidoo kale, iyadoo soo xiganaysa ilo aan la magacaabin, sheegtay in Beijing ay diyaarinayso inay wareejiso gantaallo lidka diyaaradaha ah oo ah nooca garabka laga rido.

3. 50 Daqiiqadood ka horTrump ka hor wadahadalada Pakistan: Marinka Hormuz wuxuu furmi doonaa goor dhow

   Madaxweynaha Mareykanka Donald Trump ayaa u sheegay weriyeyaasha, in marin-biyoodka Hormuz la furi doono dhawaan.

   Markii la weydiiyay waxa uu u sheegay ku-xigeenkiisa, J.D. Vance, ka hor safarkiisa Islamabad ee wadahadallada xabbad-joojinta, wuxuu yiri: “Waxaan u rajeeyay guul.”

   Mr. Trump wuxuu sheegay inuusan hubin in wadahadallada Mareykanka iyo Iiraan ay ku dhammaan doonaan hal wareeg ama ay sii socon doonaan toddobaadyada soo socda. Markii la weydiiyay haddii uu jiro qorshe kale, wuxuu yiri: “Looma baahna qorshe kale.”

   Weriyayaal kale ayaa weydiiyay waxa uu u arko heshiis wanaagsan oo lala gaaro Iiraan.

   Mr. Trump wuxuu ku jawaabay: “Inaanay jirin hub nukliyeer ah,” isagoo intaas ku daray inuu aaminsan yahay in isbeddel nidaam uu horey u dhacay.

   Wuxuu sidoo kale sheegay in marin-biyoodka Hormuz la furi doono “si dhakhso ah” iyada oo lala kaashanayo Iiraan ama la’aanteed, inkastoo uu carrabka ku adkeeyay in Mareykanku uusan u baahnayn.

   Isagoo ka jawaabaya wararka sheegaya in Iiraan ay qorsheyneyso inay lacag ka qaaddo maraakiibta mara marin-biyoodkaas, Mr. Trump wuxuu yiri: “Ma oggolaan doonno inay taasi dhacdo.”

4. Saacad ka horDuulimaadka Wafdiga Iran waxaa loogu magac daray 'Minab 168'

   Wafdiga Iiraan ayaa gaaray Pakistan si ay uga qayb qaataan wadahadallada nabadda, iyagoo saarnaa duulimaad loogu magac daray dugsi gabdho oo ku yaalla Iiraan oo la beegsaday maalintii ugu horreysay ee dagaalka, sida ay sheegtay dowladda Iiraan.

   Duulimaadka waxaa loo bixiyay “Minab 168” si loogu maamuuso 168 gabdhood, oo intooda badan carruur ay ahaayeen, kuwaas oo ay masuuliyiinta Iiraan sheegeen in lagu dilay weerar gantaal ah oo lala beegsaday Dugsiga Hoose ee Gabdhaha Shajarat Tayyiba ee ku yaalla magaalada Minab 28-kii Febraayo 2026.

   Warbaahinta ayaa sheegtay in baarayaasha milatariga Mareykanka ay rumeysan yihiin in ciidamada Mareykanka ay u badan tahay inay si aan ula kac ahayn u garaaceen dugsiga, halka Wasiirka Difaaca Mareykanka Pete Hegseth uu hore u sheegay in arrintan ay weli baaritaan ku socoto.

   Ka dib markii ay diyaaraddu ka degtay Pakistan, Guddoomiyaha Baarlamaanka Iiraan Mohammad Baqer Qalibaf ayaa bartiisa X ku daabacay sawir muujinaya afar carruur ah oo sawirradooda lagu dul dhigay kuraasta diyaaradda, mid kastaana uu wato boorso dugsi iyo ubax korka laga saaray, isaga oo yiri: “Kuwani waa saaxiibaday safarkan.”

5. Saacad ka horWadahadalada Iran iyo Mareykanka oo lagu wado inay maanta furmaan

   Ra'iisul wasaaraha Pakistan ayaa sheegay in wadahadallada nabadeed ee Mareykanka iyo Iran ee la qorsheeyay in lagu qabto Islamabad Sabtida ay noqon doonto "fursad masiiri ah" si xal looga gaaro dagaalka.

   Shahbaz Sharif ayaa khudbad uu ka jeediyay telefishinka ku sheegay in wakiilo ka socda labada dal ay ku sugnaan doonaan Islamabad maanta si ay u bilaabaan wada xaajoodyada.

   Waxa uu sheegay in kulanka uu yahay mid aysan ku faani karin Pakistan oo kaliya, balse uu yahay mid loogu faano dunida Muslimka.