'ਨੌਕਰੀ ਲੱਭ ਰਹੀ ਸੀ, ਉਦੋਂ ਹੀ ਗਾਣਾ ਵਾਇਰਲ ਹੋ ਗਿਆ', 'ਛੱਲੜੇ ਛੱਲੜੇ ਵਾਲ' ਗਾਉਣ ਕਰਕੇ ਮਸ਼ਹੂਰ ਹੋਈ ਪੰਜਾਬ ਦੀ ਇਹ ਕੁੜੀ
- ਲੇਖਕ, ਨਾਜ਼ਿਸ਼ ਜ਼ਫ਼ਰ
- ਰੋਲ, ਬੀਬੀਸੀ ਪੱਤਰਕਾਰ
- ਪ੍ਰਕਾਸ਼ਿਤ
- ਪੜ੍ਹਨ ਦਾ ਸਮਾਂ: 6 ਮਿੰਟ
ਪਾਕਿਸਤਾਨ ਦੇ ਪੰਜਾਬ ਦੇ ਮੀਆਂ ਚੰਨੂ ਸ਼ਹਿਰ ਵਿੱਚ ਐਨੇਸਥੀਸੀਓਲੋਜੀ ਦੀ ਪੜ੍ਹਾਈ ਪੂਰੀ ਕਰਨ ਤੋਂ ਬਾਅਦ ਸ਼ਾਨਜ਼ੇ ਸਿਆਲ ਨੌਕਰੀ ਲੱਭਣ ਲਈ ਲਾਹੌਰ ਆਏ ਸਨ।
ਉਸ ਸਮੇਂ ਉਨ੍ਹਾਂ ਨੇ ਸੋਚਿਆ ਵੀ ਨਹੀਂ ਸੀ ਕਿ ਉਨ੍ਹਾਂ ਦਾ ਇੱਕ ਗਾਣਾ ਕੁਝ ਹੀ ਦਿਨਾਂ ਵਿੱਚ ਉਨ੍ਹਾਂ ਨੂੰ ਪਾਕਿਸਤਾਨ ਅਤੇ ਭਾਰਤ ਸਮੇਤ ਕਈ ਦੇਸ਼ਾਂ ਵਿੱਚ ਮਸ਼ਹੂਰ ਕਰ ਦੇਵੇਗਾ।
'ਛੱਲੜੇ ਛੱਲੜੇ ਵਾਲ' ਉਨ੍ਹਾਂ ਨੇ ਗਾਇਕ ਮੋਹਸਿਨ ਲਸ਼ਾਰੀ ਨਾਲ ਮਿਲ ਕੇ ਗਾਇਆ ਹੈ। ਇਹ ਪਹਿਲਾਂ ਗਾਏ ਜਾ ਚੁੱਕੇ ਇੱਕ ਗਾਣੇ ਦਾ ਨਵਾਂ ਰੂਪ ਹੈ। ਇੰਸਟਾਗ੍ਰਾਮ 'ਤੇ ਅਪਲੋਡ ਹੋਣ ਤੋਂ ਬਾਅਦ ਇਸ ਨੂੰ ਹੁਣ ਤੱਕ ਇੱਕ ਕਰੋੜ ਤੋਂ ਵੱਧ ਵਾਰ ਦੇਖਿਆ ਜਾ ਚੁੱਕਾ ਹੈ।
ਇਸ ਗਾਣੇ 'ਤੇ ਹਜ਼ਾਰਾਂ ਰੀਲਾਂ ਬਣ ਚੁੱਕੀਆਂ ਹਨ। ਭਾਰਤ ਅਤੇ ਪਾਕਿਸਤਾਨ ਵਿੱਚ ਸੰਗੀਤ ਦੀਆਂ ਕਈ ਮਸ਼ਹੂਰ ਹਸਤੀਆਂ ਸਮੇਤ ਲੱਖਾਂ ਸੋਸ਼ਲ ਮੀਡੀਆ ਯੂਜ਼ਰਸ ਨੇ ਇਸ ਨੂੰ ਸਾਂਝਾ ਕੀਤਾ ਹੈ। ਇਸ ਦੇ ਅਣਗਿਣਤ ਨਵੇਂ ਰੂਪ ਵੀ ਬਣਾਏ ਜਾ ਚੁੱਕੇ ਹਨ।
ਜਦੋਂ ਲੋਕਾਂ ਨੇ ਕਿਹਾ- 'ਤੁਹਾਨੂੰ ਲੈਅ ਦੀ ਸਮਝ ਨਹੀਂ'
'ਛੱਲੜੇ ਛੱਲੜੇ ਵਾਲ' ਕੋਈ ਨਵਾਂ ਗਾਣਾ ਨਹੀਂ ਹੈ। ਇਸ ਨੂੰ ਪਹਿਲਾਂ ਵੀ ਕਈ ਗਾਇਕ ਗਾ ਚੁੱਕੇ ਹਨ। ਇਨ੍ਹਾਂ ਵਿੱਚ ਪਾਕਿਸਤਾਨ ਦੇ ਪੰਜਾਬ ਸੂਬੇ ਦੇ ਮੀਆਂਵਾਲੀ ਸ਼ਹਿਰ ਵਿੱਚ ਜਨਮੇ ਸ਼ਫ਼ਾਉੱਲਾ ਖ਼ਾਨ ਰੋਖੜੀ ਵੀ ਸ਼ਾਮਿਲ ਹਨ।
ਬੀਬੀਸੀ ਨੂੰ ਦਿੱਤੇ ਇੱਕ ਇੰਟਰਵਿਊ ਵਿੱਚ ਸ਼ਾਨਜ਼ੇ ਨੇ ਦੱਸਿਆ ਕਿ ਉਨ੍ਹਾਂ ਨੂੰ ਬਚਪਨ ਤੋਂ ਹੀ ਗਾਉਣ ਦਾ ਸ਼ੌਕ ਸੀ। ਲੋਕ ਅਕਸਰ ਉਨ੍ਹਾਂ ਨੂੰ ਕਹਿੰਦੇ ਸਨ ਕਿ ਉਨ੍ਹਾਂ ਦੀ ਆਵਾਜ਼ ਸਭ ਤੋਂ ਵੱਖਰੀ ਹੈ।
ਸ਼ਾਨਜ਼ੇ ਮੁਤਾਬਕ, ਉਨ੍ਹਾਂ ਨੇ ਗਾਇਕੀ ਨੂੰ ਸਿਰਫ਼ ਸ਼ੌਕ ਤੱਕ ਹੀ ਸੀਮਤ ਰੱਖਿਆ। ਯੂਨੀਵਰਸਿਟੀ ਵਿੱਚ ਪਹੁੰਚਣ ਤੋਂ ਬਾਅਦ ਤਾਂ ਗਾਉਣ ਨਾਲ ਸਬੰਧ ਹੋਰ ਵੀ ਘੱਟ ਹੋ ਗਿਆ ਸੀ।
ਉਹ ਕਹਿੰਦੇ ਹਨ, "ਮੈਂ ਇੱਕ ਹੱਦ ਤੱਕ ਨਿਰਾਸ਼ ਹੋ ਚੁੱਕੀ ਸੀ, ਕਿਉਂਕਿ ਲੋਕ ਮੈਨੂੰ ਕਹਿੰਦੇ ਸਨ ਕਿ ਤੇਰੀ ਆਵਾਜ਼ ਚੰਗੀ ਹੈ, ਪਰ ਤੈਨੂੰ ਲੈਅ ਦੀ ਸਮਝ ਨਹੀਂ ਹੈ। ਤੂੰ ਲੈਅ ਅਤੇ ਸੰਗੀਤ ਦੇ ਨਾਲ ਨਹੀਂ ਗਾ ਸਕਦੀ।''
'ਭਾਰਤੀ ਗਾਇਕਾ ਨੇ ਸਾਨੂੰ ਸਿਹਰਾ ਦਿੱਤਾ ਤਾਂ ਇਹ ਪਾਕਿਸਤਾਨ ਵਿੱਚ ਵੀ ਵਾਇਰਲ ਹੋ ਗਿਆ'
ਤਸਵੀਰ ਸਰੋਤ, Shanzy_Sial/Insta
ਮੋਹਸਿਨ ਲਸ਼ਾਰੀ ਵੱਖ-ਵੱਖ ਅਜਿਹੇ ਗਾਇਕਾਂ ਨਾਲ ਮਿਲ ਕੇ ਵੀਡੀਓ ਬਣਾਉਂਦੇ ਰਹਿੰਦੇ ਹਨ, ਜੋ ਸ਼ੌਕੀਆ ਤੌਰ 'ਤੇ ਗਾਉਂਦੇ ਹਨ। ਸ਼ਾਨਜ਼ੇ ਨਾਲ ਸੰਪਰਕ ਹੋਣ ਤੋਂ ਬਾਅਦ ਦੋਵਾਂ ਨੇ ਮਿਲ ਕੇ ਇਹ ਗਾਣਾ ਗਾਇਆ। ਸ਼ੁਰੂਆਤੀ ਦਿਨਾਂ ਵਿੱਚ ਵੀਡੀਓ ਨੂੰ ਕਾਫ਼ੀ ਲੋਕਾਂ ਨੇ ਦੇਖਿਆ।
ਸ਼ਾਨਜ਼ੇ ਦੱਸਦੇ ਹਨ, "ਸ਼ੁਰੂ ਵਿੱਚ ਵੀਡੀਓ ਨੂੰ ਇੱਕ ਹੱਦ ਤੱਕ ਚੰਗੇ ਵਿਊਜ਼ ਮਿਲੇ ਸਨ। ਪਰ ਜਦੋਂ ਭਾਰਤ ਵਿੱਚ ਸੁਨੰਦਾ ਵਰਗੀਆਂ ਗਾਇਕਾਵਾਂ ਨੇ ਇਸ ਨੂੰ ਦੁਬਾਰਾ ਗਾ ਕੇ ਸਾਨੂੰ ਸਿਹਰਾ ਦਿੱਤਾ, ਤਾਂ ਪਾਕਿਸਤਾਨ ਵਿੱਚ ਵੀ ਇਹ ਗਾਣਾ ਜੰਗਲ ਦੀ ਅੱਗ ਵਾਂਗ ਫੈਲ ਗਿਆ।"
ਇਹ 'ਛੱਲੜੇ ਛੱਲੜੇ ਵਾਲ' ਦੇ ਵਾਇਰਲ ਹੋਣ ਦਾ ਪਹਿਲਾ ਦੌਰ ਸੀ। ਉਸ ਵੀਡੀਓ ਵਿੱਚ ਗਾਣੇ ਦਾ ਸਿਰਫ਼ ਇੱਕ ਹਿੱਸਾ ਗਾਇਆ ਗਿਆ ਸੀ।
ਇਸ ਤੋਂ ਬਾਅਦ ਮੋਹਸਿਨ ਲਸ਼ਾਰੀ ਦੇ ਕਹਿਣ 'ਤੇ ਪੂਰੇ ਗਾਣੇ ਦਾ ਵੀਡੀਓ ਸਾਂਝਾ ਕੀਤਾ ਗਿਆ। ਇਸ ਨੂੰ ਲੱਖਾਂ ਵਾਰ ਦੇਖਿਆ ਗਿਆ।
ਫਿਰ ਇੰਸਟਾਗ੍ਰਾਮ, ਯੂਟਿਊਬ ਅਤੇ ਟਿੱਕ-ਟੌਕ 'ਤੇ ਸ਼ਾਇਦ ਹੀ ਇਸ ਖੇਤਰ ਦਾ ਕੋਈ ਅਜਿਹਾ ਯੂਜ਼ਰ ਬਚਿਆ ਹੋਵੇ, ਜੋ ਸਰਾਇਕੀ ਜਾਂ ਪੰਜਾਬੀ ਸਮਝਦਾ ਹੋਵੇ ਅਤੇ ਉਸ ਦੀ ਫੀਡ ਵਿੱਚ ਇਹ ਗਾਣਾ ਵਾਰ-ਵਾਰ ਨਾ ਵੱਜਿਆ ਹੋਵੇ।
'ਸੋਚਿਆ ਵੀ ਨਹੀਂ ਸੀ ਕਿ ਰਾਤੋਂ-ਰਾਤ ਮਸ਼ਹੂਰ ਹੋ ਜਾਵਾਂਗੇ'
ਮੋਹਸਿਨ ਅਤੇ ਸ਼ਾਨਜ਼ੇ ਦਾ ਕਹਿਣਾ ਹੈ ਕਿ ਉਨ੍ਹਾਂ ਨੇ ਕਦੇ ਸੋਚਿਆ ਵੀ ਨਹੀਂ ਸੀ ਕਿ ਉਹ ਇਸ ਤਰ੍ਹਾਂ ਰਾਤੋਂ-ਰਾਤ ਮਸ਼ਹੂਰ ਹੋ ਜਾਣਗੇ।
ਸ਼ਾਨਜ਼ੇ ਮੁਤਾਬਕ, ਉਨ੍ਹਾਂ ਦਿਨਾਂ ਵਿੱਚ ਉਹ ਲਾਹੌਰ ਵਿੱਚ ਰਹਿ ਕੇ 'ਓਐੱਲਐਕਸ' 'ਤੇ ਨੌਕਰੀ ਲੱਭ ਰਹੇ ਸਨ।
ਉਹ ਕਹਿੰਦੇ ਹਨ, "ਘਰਦੇ ਕਹਿ ਰਹੇ ਸਨ ਕਿ ਵਾਪਸ ਆ ਜਾ। ਪਰ ਮੈਂ ਇਸ ਤਰ੍ਹਾਂ ਵਾਪਸ ਨਹੀਂ ਜਾਣਾ ਚਾਹੁੰਦੀ ਸੀ। ਕੁਝ ਕਰਕੇ ਹੀ ਘਰ ਪਰਤਣਾ ਚਾਹੁੰਦੀ ਸੀ ਅਤੇ ਉਦੋਂ ਹੀ ਇਹ ਗਾਣਾ ਵਾਇਰਲ ਹੋ ਗਿਆ।"
ਦੋਵਾਂ ਦਾ ਕਹਿਣਾ ਹੈ ਕਿ ਗਾਣਾ ਵਾਇਰਲ ਹੋਣ ਤੋਂ ਬਾਅਦ ਉਨ੍ਹਾਂ ਦੇ ਮੈਸੇਜ ਇਨਬਾਕਸ ਵਿੱਚ ਮਸ਼ਹੂਰ ਹਸਤੀਆਂ ਦੇ ਭਰ-ਭਰ ਕੇ ਸੁਨੇਹੇ ਆਉਣ ਲੱਗੇ।
ਭਾਰਤ ਵਿੱਚ ਇਸ ਗਾਣੇ ਨੂੰ ਲੈ ਕੇ ਕਈ ਮੀਮ ਵੀ ਬਣਾਏ ਗਏ।
ਭਾਰਤ ਦੇ ਇੱਕ ਯੂਜ਼ਰ ਨੇ ਮਜ਼ਾਕ ਵਿੱਚ ਲਿਖਿਆ, "ਅਸੀਂ ਪਾਕਿਸਤਾਨ ਨੂੰ ਕ੍ਰਿਕਟ ਵਿੱਚ ਹਰਾ ਸਕਦੇ ਹਾਂ, ਪਰ ਸੰਗੀਤ ਅਤੇ ਸੁਰੀਲੀਆਂ ਆਵਾਜ਼ਾਂ ਦੇ ਮਾਮਲੇ 'ਚ ਉਸ ਨੂੰ ਪਿੱਛੇ ਨਹੀਂ ਕਰ ਸਕਦੇ।"
ਰਾਤੋਂ-ਰਾਤ ਮਿਲੀ ਪ੍ਰਸਿੱਧੀ ਬਾਰੇ ਦੋਵਾਂ ਦਾ ਕਹਿਣਾ ਹੈ ਕਿ ਲੋਕਾਂ ਤੋਂ ਮਿਲੀ ਇੰਨੀ ਤਾਰੀਫ਼ ਨੇ ਉਨ੍ਹਾਂ ਨੂੰ ਹੈਰਾਨ ਕਰ ਦਿੱਤਾ। ਉਨ੍ਹਾਂ ਦਾ ਮੰਨਣਾ ਹੈ ਕਿ ਇਸ ਵਿੱਚ ਸਰਾਇਕੀ ਭਾਸ਼ਾ ਦੀ ਮਿਠਾਸ ਦਾ ਵੀ ਵੱਡਾ ਯੋਗਦਾਨ ਹੈ।
ਸ਼ਾਨਜ਼ੇ ਕਹਿੰਦੇ ਹਨ, "ਮੈਂ ਪਹਿਲਾਂ ਵੀ ਸਰਾਇਕੀ ਗਾਣੇ ਗਾਉਂਦੀ ਸੀ। ਮੇਰੇ ਦੋਸਤ ਮੈਨੂੰ ਕਹਿੰਦੇ ਸਨ ਕਿ ਆਪਣੇ ਗਾਉਣ ਦਾ ਅੰਦਾਜ਼ ਬਦਲ ਲੈ, ਪਰ ਮੈਂ ਇਹੀ ਕਰਨਾ ਚਾਹੁੰਦੀ ਸੀ।"
ਮੋਹਸਿਨ ਲਸ਼ਾਰੀ ਕੋਲ ਸਿੱਖਿਆ ਦੇ ਵਿਸ਼ੇ ਵਿੱਚ ਡਿਗਰੀ ਹੈ। ਉਹ ਕਹਿੰਦੇ ਹਨ ਕਿ ਉਨ੍ਹਾਂ ਦਾ ਸਬੰਧ ਕਿਸੇ ਸੰਗੀਤਕਾਰ ਪਰਿਵਾਰ ਨਾਲ ਨਹੀਂ ਹੈ, ਪਰ ਉਹ ਸੀਨੀਅਰ ਗਾਇਕਾਂ ਤੋਂ ਸਿੱਖ ਕੇ ਗਾਉਂਦੇ ਰਹੇ ਹਨ।
ਜਦਕਿ ਸ਼ਾਨਜ਼ੇ ਨੇ ਸਕੂਲ ਅਤੇ ਕਾਲਜ ਦੌਰਾਨ ਨਾਤ ਗਾਇਨ ਦੇ ਤਹਿਸੀਲ ਅਤੇ ਜ਼ਿਲ੍ਹਾ ਪੱਧਰ ਦੇ ਮੁਕਾਬਲੇ ਜਿੱਤੇ ਹਨ।
ਦੋਵਾਂ ਨੇ ਇੱਕ-ਦੂਜੇ ਤੋਂ ਕੀ ਸਿੱਖਿਆ?
ਸ਼ਾਨਜ਼ੇ ਨਾਲ ਗਾਉਣ ਬਾਰੇ ਮੋਹਸਿਨ ਲਸ਼ਾਰੀ ਕਹਿੰਦੇ ਹਨ ਕਿ ਉਨ੍ਹਾਂ ਨੂੰ ਸਰਾਇਕੀ ਗਾਣਾ ਗਾਉਣ ਲਈ ਉਨ੍ਹਾਂ ਦੀ ਆਵਾਜ਼ ਬਹੁਤ ਚੰਗੀ ਲੱਗੀ ਸੀ।
ਉੱਥੇ ਹੀ, ਸ਼ਾਨਜ਼ੇ ਨੇ ਲਸ਼ਾਰੀ ਨਾਲ ਮਿਲ ਕੇ ਲੈਅ, ਸੁਰ ਅਤੇ ਸੰਗੀਤ ਦੇ ਮੁਤਾਬਕ ਗਾਉਣਾ ਸਿੱਖਿਆ।
ਆਪਣੇ ਕੋਲ ਆਉਣ ਵਾਲੇ ਸੰਦੇਸ਼ਾਂ ਦਾ ਜ਼ਿਕਰ ਕਰਦਿਆਂ ਦੋਵੇਂ ਗਾਇਕ ਕਹਿੰਦੇ ਹਨ ਕਿ ਉਨ੍ਹਾਂ ਨੂੰ ਅਜੇ ਵੀ ਭਾਰਤ ਤੋਂ ਬਹੁਤ ਪਿਆਰ ਮਿਲ ਰਿਹਾ ਹੈ।
ਸ਼ਾਨਜ਼ੇ ਮੁਤਾਬਕ, ਉਨ੍ਹਾਂ ਨੂੰ ਇੱਕ ਅਜਿਹਾ ਸੁਨੇਹਾ ਵੀ ਮਿਲਿਆ, ਜਿਸ ਵਿੱਚ ਦੱਸਿਆ ਗਿਆ ਸੀ ਕਿ ਇੱਕ ਬਹੁਤ ਬਿਮਾਰ ਦਾਦੀ ਨੇ ਆਪਣੀ ਆਖ਼ਰੀ ਇੱਛਾ ਵਜੋਂ ਇੱਕ ਵਾਰ ਉਨ੍ਹਾਂ ਨਾਲ ਗੱਲ ਕਰਨ ਦੀ ਇੱਛਾ ਜਤਾਈ ਹੈ।
ਮਸ਼ਹੂਰ ਹੋਣ ਤੋਂ ਬਾਅਦ ਆਪਣੀ ਜ਼ਿੰਦਗੀ ਬਾਰੇ ਸ਼ਾਨਜ਼ੇ ਕਹਿੰਦੇ ਹਨ ਕਿ ਉਨ੍ਹਾਂ ਦੇ ਹੋਸਟਲ ਦੇ ਕਮਰੇ ਦਾ ਦਰਵਾਜ਼ਾ ਹਰ ਦੋ ਮਿੰਟ ਬਾਅਦ ਖੜਕਦਾ ਹੈ।
ਲੋਕ ਪੁੱਛਦੇ ਹਨ ਕਿ ਕੀ ਇਹ ਸ਼ਾਨਜ਼ੇ ਦਾ ਕਮਰਾ ਹੈ। ਉਨ੍ਹਾਂ ਨਾਲ ਕਮਰੇ ਵਿੱਚ ਰਹਿਣ ਵਾਲੀਆਂ ਕੁੜੀਆਂ ਵੀ ਹੁਣ ਉਨ੍ਹਾਂ ਨਾਲ ਸੈਲਫ਼ੀਆਂ ਲੈਣ ਲੱਗ ਪਈਆਂ ਹਨ।
ਇਸ ਸਮੇਂ ਕਈ ਰਿਕਾਰਡ ਕੰਪਨੀਆਂ ਨੇ ਦੋਵਾਂ ਗਾਇਕਾਂ ਨੂੰ ਗਾਉਣ ਲਈ ਚੁਣਿਆ ਹੈ। ਉਨ੍ਹਾਂ ਦੇ ਸੰਗੀਤਕ ਪ੍ਰੋਗਰਾਮ ਵੀ ਚੱਲ ਰਹੇ ਹਨ।
ਸ਼ਾਨਜ਼ੇ ਅਤੇ ਮੋਹਸਿਨ ਦਾ ਕਹਿਣਾ ਹੈ ਕਿ 'ਛੱਲੜੇ ਛੱਲੜੇ ਵਾਲ' ਤੋਂ ਬਾਅਦ ਉਨ੍ਹਾਂ ਨੂੰ ਇੱਕ ਦਿਸ਼ਾ ਮਿਲ ਗਈ ਹੈ। ਹੁਣ ਉਨ੍ਹਾਂ ਨੂੰ ਪਤਾ ਹੈ ਕਿ ਉਨ੍ਹਾਂ ਨੇ ਗਾਇਕੀ ਦੇ ਖੇਤਰ ਵਿੱਚ ਹੀ ਅੱਗੇ ਵਧ ਕੇ ਆਪਣਾ ਨਾਮ ਬਣਾਉਣਾ ਹੈ।
ਬੀਬੀਸੀ ਲਈ ਕਲੈਕਟਿਵ ਨਿਊਜ਼ਰੂਮ ਵੱਲੋਂ ਪ੍ਰਕਾਸ਼ਿਤ
