د شمالي قبرس ساحل ته نژدې د مسافر وړونکې کښتۍ د چپه کېدو له امله اته کسان مړه شوي
د شمالي قبرس ساحل ته نژدې د یوې مسافر وړونکې کښتۍ د چپه کېدو له امله لږ تر لږه اته کسان مړه شوي او تر لسو زیات نور لا هم ورک دي، دا خبر ترکیې کړې ده.
د قبرس لومړي وزیر اونال اوستل وویل چې دغې مسافر وړونکې کښتۍ ۲۵۹ مسافر او د عملې اته تنه غړي لېږدول، چې د کیرینیا له ساحلي ښارګوټي له حرکت وروسته اوبو اخیستې وه.
اوستل پر ټولنیزو رسنیو لیکلي چې د کښتۍ کپتان او د عملې اووه تنه نور غړي د دې په اړه د تحقیقاتو د یوې برخې په توګه نیول شوي چې "دا غمیزه څنګه رامنځته شوه".
د هغو مسافرو د موندلو لپاره چې برخلیک یې نه دی معلوم، د لټون او ژغورنې عملیات دوام لري او د ترکیې چارواکي هم ورسره یوځای شوي دي.
دغې شخصي مسافر وړونکې کښتۍ د سیمه ییز وخت له مخې شاوخوا ۱۲:۳۰ بجې (۰۹:۳۰ GMT) د کیرینیا له مشهور تفریحي ساحله حرکت کړی و.
اوستل وویل، ټاکل شوې وه کښتۍ د شنبې په ورځ ترکیې ته سفر وکړي، خو د نامساعدې هوا له امله ځنډېدلې وه.
نوموړي د ترکیې رسنۍ (TRT) ته وویل چې کښتۍ له چپه کېدو وړاندې دوو موجونو وهلې وه.
هغه دغې رسنۍ ته وویل، کله چې د کښتۍ کپتان هڅه کوله کښتۍ له لومړي موجه بېرته برابره کړي، دویمه څپه ورسره ټکر شوه او کښتۍ ته د اوبو ننوتل پیل شول.
سیمې ته هلیکوپټرې او د ساحلي ساتونکو کښتۍ استول شوې دي، په داسې حال کې چې امبولانسونه پر ساحل د ژغورل شویو مسافرو ترلاسه کولو ته چمتو ولاړ دي.
اوستل پر ټولنیزو رسنیو لیکلي چې "اوس مهال تر ټولو لومړیتوب د انسانانو ژوند دی" او زیاته کړې یې ده چې امنیتي ځواکونه، د ژغورنې ټیمونه او د روغتیا مسؤلین ټول صحنه کې موجود دي.
نوموړي زیاته کړه چې د دغې غميزې په اړه به هراړخیزې څېړنې وشي او "آن ډېره وړه غفلت به هم افشا شي".
اوستل وویل: "هېڅوک به ونه بخښل شي، پرته له دې چې دوی څوک دي، که چېرې مقصر یا مسؤل وپېژندل شي."
ارحان اریکلي، د شمالي قبرس د ټرانسپورټ وزیر سیمه ییزو رسنیو ته وویل چې ۱۰۰ مسافر ساحل ته رسول شوي دي.
د ترکیې ولسمشر رجب طیب اردوغان د ترکیې قبرس والو ته خپله خواخوږي څرګنده کړه او ویې ویل د هغو کسانو د موندلو هڅې چې لا هم ورک دي "پرته له ځنډه دوام لري".
هغه د یکشنبې په ورځ په یوه پوځي مراسمو کې وویل: "تر پېښې سمدستي وروسته، موږ د شمالي قبرس د ترکیې جمهوریت له چارواکو سره په همکارۍ د لټون او ژغورنې پراخ عملیات پیل کړل."
مصطفی کوچ د کښتۍ له چپه کېدو وروسته د خپلې کښتۍ په واسطه شاوخوا ۶۵ کسان وژغورل. هغه بي بي سي ته وویل، دی احساس کوي چې عملې باید د سمندر تر ارامېدو پورې انتظار کړی وای.
هغه وویل: "دا د هغوی لپاره خوندي نه وه. سمندر ډېر طوفاني/خوځند و."
کوچ زیاته کړه: "خلک مړه شول. دا سمه نه ده."
هغه وویل چې کښتۍ د شنبې په ورځ کیرینیا ته رسېدلې وه او "په مخکنۍ برخه کې یې لږ زیان لیدلی و."
د عکس سرچینه، Reuters
د سمندري ټرافیک د معلوماتو له مخې، دغه مسافر وړونکې کښتۍ - چې د "فیلو جټ" ۴۰ متره اوږده او ۱۰ متره پلنه لوړ-سرعت لرونکې کښتۍ ده - د ترکیې تر بيرغ لاندې تګ راتګ کوي.
د یکشنبې په ماښام، اریکلي TRT ته وویل چې کښتۍ په مکمل ډول ډوبه شوې ده.
فیلو دنیزسیلیک کمپنۍ، چې دغه چپه شوې مسافر وړونکې کښتۍ چلوي، وویل چې د دې "تراژیدیکې پېښې له امله سخته غمجنه ده".
د مسافرو د کورنیو او خپلوانو لپاره د معلوماتو ورکولو په موخه يو بېړنی ټېلېفوني مرکز فعال شوی دی. په کښتۍ کې د سپارو کسانو تابعیت/قومیت او د ټپيانو روغتیايي حالت تر اوسه څرګند نه دی.
سیمه ییز ټلوېزیون په اوبو کې د سرچپه شوې کښتۍ انځورونه خپاره کړي، چې خلک د ژغورنې واسکټونه اغوستي د هغې پر تنې/خېټه ولاړ دي.
د شمالي قبرس د ترکیې جمهوریت (TRNC)، چې یوازې د ترکیې لخوا په رسمیت پېژندل کېږي، د قبرس ټاپو شمالي درېیمه برخه کنټرولوي، کومه چې له ۱۹۷۴ کال راهیسې وېشل شوې ده.
