Oifis a' Phuist sa Ghearasdan a' dùnadh a-màireach

TG Jones agus Oifis a' Phuist sa Ghearasdan

Tha a' bhùth sa bheil Oifis a' Phuist sa Ghearasdan an-dràsta a' dùnadh

Dùinidh Oifis a' Phuist sa Ghearasdan Disathairne, ach a dh'aindeoin oidhirpean, cha deach àite freagarrach eile a lorg fhathast.

'S ann taobh a-staigh bùth TG Jones a tha e ach tha sin a' dùnadh, agus mar sin feumar àite ùr a lorg dha Oifis a' Phuist.

Ged a tha Oifis Puist eile còig mìle air falbh sa Chorpaich chan eil na h-aon sheirbheisean aca an sin.

"Tha am fear anns a' Chorpaich fada nas lugha na am fear mòr a th' againn anns a' bhaile," thuirt Emma Nic an Lìghiche, a tha a' fuireach sa Ghearasdan.

"Tha mise draghail nach bi comas aig an tè a bhios ag obair ann a bhith ag obair leis an uimhir de stuth a bhios a' tighinn a-staigh thuca."

Bidh an Oifis Puist as fhaisge le làn-sheirbheisean a-nis uair a thìde air falbh le càr, anns an Òban.

Emma Nic an Lìghiche

Tha dragh air Emma Nic an Lìghiche nach bi e furasta do sheann daoine gu h-àraid faighinn gu oifis na Corpaich

Tha dragh ann cuideachd mun bhuaidh a bheir an trafaig anns a' Ghearasdan air a' chothrom aig daoine falbh dhan Chorpaich 'son Oifis a' Phuist a chleachdadh.

Thuirt Emma: "Chan eil na busaichean a' dol ach gach uair de thìde a-mach dhan Chorpaich, agus tha sin doirbh airson nan seann daoine, chanainnsa, a bhios a' cleachdadh na seirbheis as motha."

Tha ceist air muinntir an àite carson nach gabh oifis puist ùr a shuidheachadh ann an tè de na bùithdean falamh ann am meadhan a' bhaile.

Anndra Bacasdair BPA

Tha Anndra Bacasdair BPA draghail gum bi suas ri sia mìosan mus bi làrach eile air a chur air dòigh, 's nach bi an goireas ri fhaotainn sa bhaile san ùine sin

Tha BPA na sgìre, Anndra Bacasdair, air a bhith a' feuchainn ri Oifis a' Phuist a chuideachadh àite eile ach tha dragh air gum bi iad greis às aonais Oifis a' Phuist sa Ghearasdan ged a bhiodh iad soirbheachail.

"Gu mì-fhortanaich tha pròiseas reachdail a' ruith a tha stèidhichte san lagh fo am feum co-chomhairle 12 seachdain a bhith ann aon uair 's gun dùin oifis puist, mus dearbhar làrach ùr," thuirt e.

"Ach tha mi an dòchas gum feuch Oifis a' Phuist ris a' phròiseas sin a ghiorrachadh gus a dhèanamh cho luath 's a ghabhas - no tha eagal orm gum bi sinn às aonais Oifis a' Phuist airson suas ri sia seachdainean."

Thuirt neach-labhairt bho Oifis a' Phuist gu bheil làn-mhothachadh aca air an t-suidheachadh mhalairt dhùbhlanach a tha mu choinneimh TG Jones agus mòran luchd-reic eile air àrd-shràidean na dùthcha an-dràsta.

Thuirt iad cuideachd gu bheil fhios aca cho cudromach 's a tha seirbheisean Oifis a' Phuist do choimhearsnachdan ionadail.

Tha ùidh, thuirt iad, aig maighstir-puist eile ann a bhith stèidhichte sa Ghearasdan, agus gu bheil iad an sàs ann an còmhraidhean gus àite freagarrach a lorg.