An Lord of the Isles air briseadh às ùr

Tha troimhe-chèile às ùr ann air lìonra ChalMac is an Lord of the Isles air briseadh sìos a-rithist.

Bha CalMac air LOTI a chur air an t-slighe eadar an t-Òban, Barraigh is Loch Baghasdail às dèidh dhi tilleadh gu seirbheis nas tràithe na bha dùil air an deireadh-sheachdain.

Tha trioblaid a-nise air tighinn am bàrr le prìomh einnsean air a' bhàta is tha i air a tarraing à seirbheis a-rithist.

Chaidh an MV Isle of Mull a chur eadar an t-Òban is Bàgh a' Chaisteil is tha an MV Clansman a' ruith air clàr-ama ùr eadar-amail eadar Ùige, an Taibeart is Loch nam Madadh.

Aig deas tha an Glen Sannox na tàmh an-dràsta agus trioblaidean a' leantainn le einnsean an t-soithich.

Cha do thill i gu seirbheis ach an t-seachdain a chaidh an dèidh obair-chàraidh air an t-siostam thraoghaidh aice.

Chaidh a toirt a-mach à seirbheis a-rithist Diluain, a' toirt buaidh air seirbheisean eadar an Truthail agus Brodaig ann an Arainn, is cha do sheòl i idir Dimàirt.

Tha dùil ris a' chatamaran an MV Alfred, a tha fhathast air fhastadh aig CalMac bho Pentland Ferries, tilleadh o obair-chàraidh airson slighe an Truthail a dhèanamh bho Dhiciadain air adhart.

A thuilleadh air seo, chan eil seirbheis ann air Caolas na Hearadh Dimàirt is trioblaid air nochdadh leis an Loch Bhrusda.

Tha uallach mòr air a bhith air lìonra ChalMac sna seachdainnean mu dheireadh le grunn bhàtaichean san doc co-dhiù is feadhainn eile air briseadh sìos.

Thuirt CalMac aig deireadh a' Mhàirt gun robh trioblaidean teicnigeach ag adhbharachadh gainne shoithichean cho mòr 's a bh' ann riamh.

Thàinig orra grunn shoithichean a chur air slighean eile airson seirbheisean a chumail ri eileanan, agus iad ag ràdh gu bheil an suidheachadh "ga shìor ath-sgrùdadh".

Gheibhear am fiosrachadh as ùire mu chlàran-ama an seo, taobh a-muigh.