KAI TSAYE, Abubuwan da ke faruwa a Najeriya da sassan duniya

Rahoto kai-tsaye

Isiyaku Muhammed

1. Mintuna 26 da suka wuceZa a gudanar da zanga-zanga a Spain saboda tsadar gidaje

   Ana shirin gudanar da manyan zanga-zanga a biranen ƙasar Spain domin neman a ɗauki mataki kan matsalar ƙarancin gidaje a ƙasar.

   Ana sa ran za a yi mafi girman zanga-zangar a birnin Madrid, inda masu zanga-zangar ke ci gaba da zama a wani babban dandali da tsakiyar birnin.

   Ana ci gaba da samun tashin hankali tun bayan da aka kori wata tsohuwa mai shekara tamanin da bakwai daga gidanta da ke babban birnin ƙasar, bayan da aka ninka mata kuɗin haya.

   A jiya Juma'a, majalisar dokokin kasar ta yi watsi da shirin gwamnatin na dakatar da karin kudin haya da kuma hana korar masu haya da ke cikin mawuyacin hali.

2. Sa'a 1 da ta wuceƳanbindiga sun saki mutum 20 bayan biyan kuɗin fansa

   

   Asalin hoton, Getty Images

   Mutane 20 da aka sace a jihar Benue da ke yankin Arewa ta Tsakiya na Najeriya a ƙarshen watan Satumba sun samu 'yanci bayan iyalansu sun biya kudin fansa tare da kai kayan abinci ga masu garkuwar da su, kamar yadda jaridar yanar gizo mai zaman kanta Daily Post ta ruwaito a ranar 2 ga Oktoba.

   An saki waɗanda aka sace, ciki har da mata, a daren 1 zuwa 2 ga Oktoba bayan an yi garkuwa da su a ranar 25 ga Satumba yayin da suke tafiya zuwa jana'iza.

   Dukkaninsu mazauna ƙaramar hukumar Makurdi ne a jihar Benue.

   Rahotanni sun ce iyalansu sun biya jimillar naira miliyan 8 (kimanin dala 6,000) tare da ba masu garkuwar kayan abinci da kudinsu ya haura naira 500,000, duk da haramcin da gwamnati ta sanya kan biyan kudin fansa ga masu garkuwa da mutane.

   Da farko, masu garkuwar sun nemi a biya su naira miliyan 30 a matsayin kudin fansa.

   Jihar Benue, wadda ke yankin Middle Belt na Najeriya, na fama da tashe-tashen hankula da suka samo asali daga hare-haren ramuwar gayya da kuma satar shanu tsakanin makiyayan Fulani, waɗanda galibinsu Musulmai ne, da kuma al'ummomin manoma, waɗanda galibinsu Kiristoci ne.

   Masu sa ido kan al'amuran tsaro sun danganta wannan rikici da takaddama kan mallakar filaye da amfani da ruwa, da kuma ƙorafe-ƙorafen da ke tasowa daga satar dabbobi da lalata amfanin gona.

3. Sa'a 1 da ta wuceAn gurfanar Iraniyawa biyu a Birtaniya bisa zargin kai hari kan Yahudawa

   

   Asalin hoton, Getty Images

   Ƴansandan Birtaniya sun gurfanar da wasu ƴan kasar Iran guda biyu bisa zargin shirya kai harin bam kan al’ummar Yahudawa a birnin Manchester.

   Jami’an ƴansandan yaƙi da ta’addanci sun bayyana cewa, mutum biyu sun yi yunƙurin samar da kayan ƙera bam, kuma suna shirin kai harin ne a daren ranar bikin Yom Kippur wadda ita ce rana mafi muhimmanci ga Yahudawa.

   Wakilin BBC ya ce ƴansanda sun ce ana zargin mutanen sun haɗa baki da wani mutum na uku, wanda mai yiwuwa yake zaune a Iran.

   A baya dai, Tehran ta musanta zarge-zargen da ke cewa tana da hannu wajen kitsa irin waɗannan hare-haren.

4. Sa'a 1 da ta wuceBarka da ƙarshen mako

   Masu bibiyar wannan shafi, barkan mu da safiyar Juma'atu babbar rana.

   Ku kasance da mu, inda za mu kawo muku labarai masu ƙayatarwa game da Najeriya da ma ƙasashe maƙwabta, da kuma sauran sassan duniya.