Abubuwan da ke faruwa a Najeriya da sassan duniya

Rahoto kai-tsaye

Isiyaku Muhammed

1. Sa'o'i 2 da suka wuceNajeriya ta soki harin da Houthi ta kai wa Saudiyya

   

   Asalin hoton, Asiwaju/Facebook

   Najeriya ta yi Allah-wadau da harin da mayaƙan Houthi suka kai filin jirgin saman King Khalid da ke Riyad babban birnin Saudiyya.

   Cikin wata sanarwa da ma'aikatar harkokin wajen Najeriyan ta fitar a yau, ta ce harin da ya yi sanadin mutuwar mutum 12 tare da jikkata sama da 300 abin Allah wadai ne.

   Sanarwar ta ce harin tamkar "mayar da hannun agogo baya ne a yunkurin da duniya ta ke yi na samar da zaman lafiya mai ɗorewa a Gabas ta Tsakiya, wanda kuma zai ƙara ingiza zaman ɗar-ɗar din da ake yi a yankin, tare da sake jefa rayuwar fararen hula cikin haɗari, da lalata ababan more rayuwa".

   Ƙasar ta yi kira da ɓangarori biyun da ke rikici da juna da su girmama dokokin ƙasa da ƙasa, domin kaiwa ga nasarar samun mafita kan rikicin.

   Haka kuma gwamnatin ta mika sakon ta'aziyya ga gwamnatin Saudiyya da iyalan wadanda suka rasa rayukansu sakamakon harin, tare da yi wa wadanda suka jikkata fatan samun sauki cikin gaggawa.

   Najeriya ta kuma yaba wa gwamnatin Saudiyya bisa yadda ta gaggauta daukar matakan agaji da tsaro bayan harin, tare da amincewa da kokarin da take yi na kare tsaro da jin dadin al'ummarta.

   Har ila yau, Najeriya ta bayyana cikakken goyon bayanta ga duk wani mataki na sasanta rikice-rikice ta hanyar tattaunawa da fahimtar juna, maimakon amfani da karfi da ka iya kara ta’azzara matsaloli.

2. Sa'o'i 7 da suka wuceBa za mu lamunci hare-haren Houthi a filin jirgin Saudiyya ba - Trump

   

   Asalin hoton, Getty Images

   Shugaban Amurka, Donald Trump, ya bayyana harin da aka kai filin jirgin sama Riyadh a ranar Asabar, wanda ya yi sanadin mutuwar aƙalla mutum 12, a matsayin “abin da ba za a aminta da shi ba.”

   Da yake zantawa da manema labarai, Trump ya ce zai yi magana da Yarima Mai Jiran Gado na Saudiyya, Mohammed bin Salman, bayan faruwar harin.

   Trump ya ce: “Abin da ya faru a Saudiyya ba abin da mu aminta ba ne.”

   Jami’an Saudiyya sun ɗora alhakin harin kan mayakan Houthi na Yemen.

3. Sa'o'i 7 da suka wuceUkraine ta kai hari a cibiyar adana bayanai ta Yandex a Rasha

   

   Asalin hoton, Getty Images

   Ukraine ta ci gaba da kai hare-hare kan kayayyakin more rayuwa na Rasha, inda ta sake kai harin jirgi mara matuki kan wata cibiyar adana bayanai ta kamfanin fasaha na Rasha mai suna Yandex.

   Hakan na zuwa ne bayan Shugaban Amurka Donald Trump ya caccaki Vlodymyr Zelensky, inda ya zarge shi da tsawaita yakin da ake yi da Rasha da kuma yin watsi da bukatar Amurka na a daina kai hare-hare kan matatun mai.

   Trump dai ya fuskanci kakkausar suka a Ukraine da Turai, da ma Amurkan bayan amincewa da dage takunkuman da aka kakaba wa fitar da man dizal daga Rasha.

4. Sa'o'i 9 da suka wuceAmurka ta kai hari kan jirgin dakon kaya a gaɓar Tekun Oman

   

   Asalin hoton, Getty Images

   Rundunar sojin Amurka ta ce dakarunta sun kai hari kan wani jirgin ruwan dakon kaya a gaɓar Tekun Oman, bayan da ma'aikatan jirgin suka yi watsi da gargaɗin da aka yi musu.

   Rundunar ta ce ta kai hari kan jirgin ruwan mai suna Ocean Molica, mai tutar Panama, inda ta ce jirgin yana kokarin wucewa ne ta yankin bayan ya tashi daga tashar jiragen ruwa ta Iran.

   Ta ce babu ma'aikacin jirgin da ya jikkata sakamakon harin.

5. 11 Oktoba 2026Fitattun ƴan siyasa huɗu da babu sunansu a ƴan takarar gwamna na INEC

   

   Asalin hoton, Multiple social media

   Hukumar INEC ta fitar da jerin sunayen ƴan takarar gwamna a zaɓen da za a gudanar a Najeriya a ranar 6 ga Fabrairu, 2027, lamarin da ya za a iya cewa ya bar baya da ƙura.

   A cikin jerin sunayen, ba a ga sunayen wasu fitattun ƴan siyasa ba a jerin, lamarin da ya haifar da muhawara, musamman kafofin sadarwa tare da neman cikakken bayani kan abin da ya faru.

   Sai dai rashin bayyana suna a jerin ba ya tabbatar da cewa an soke takarar ko kuma an cire ɗan takara baki ɗaya.

   Karanta cikakken labarin a nan

6. 11 Oktoba 2026Mayaƙan Houthi sun gargaɗin a guji amfani da filayen jirgin Saudiyya

   

   Asalin hoton, Getty Images

   Bayan wani hari mai muni da ya afku a filin jirgin ama na Riyadh, wanda ya yi sanadiyyar mutuwar mutum 12, mayaƙan Houthis na Yemen sun yi gargaɗin a guji amfani da filayen jiragen sama na Saudiyya.

   A cikin wata sanarwa, Houthis sun gargadi ofisoshin tafiye-tafiye, kamfanonin jiragen sama da kuma matafiya da su daina amfani da filayen jiragen sama na Saudiyya saboda dalilan tsaro.

   Ko da yake sanarwar ba ta yi magana kai tsaye kan harin da ya faru a ranar Asabar, 10 ga Oktoba ba, ƙungiyar ta riga ta ɗauki alhakin wasu hare-hare daban da ta ce ta kai kan filin jirgin saman Riyadh a ranar Alhamis, 7 ga Oktoba.

   A cewar Hukumar Kula da Sufurin Jiragen Sama ta Saudiyya, harin da aka kai a daren jiya ya yi sanadiyyar mutuwar mutane takwas da suka haɗa da 'yan Saudiyya biyu, Ba'amurke guda ɗaya, 'yan Bangladesh biyu, ɗan Masar guda ɗaya, ɗan Jordan guda ɗaya da kuma Bafalasɗine guda ɗaya.

   Harin ya kuma jikkata sama da mutane 300, lamarin da ya ƙara ta'azzara damuwa kan tsaro da zirga-zirgar jiragen sama a yankin.

7. 11 Oktoba 2026Kuwait ta dakatar da jiragenta zuwa Riyadh

   Kamfanin jiragen sama na Kuwait Airways ya sanar da soke jirage biyu da aka shirya su tashi a ranar Lahadi zuwa birnin Riyadh da kuma waɗanda za su dawo daga can.

   Kamfanin ya ce an ɗauki wannan mataki ne sakamakon dakatarwar wucin gadi da hukumomin Saudiyya suka yi wa ayyukan filin jirgin saman King Khalid na Riyadh.

   Tun da farko ma, kamfanin Jazeera Airways na Kuwait da kuma kamfanin jiragen sama na Indiya, Akasa Air, sun sanar da tsawaita dakatar da dukkan zirga-zirgarsu zuwa Saudiyya har zuwa ranar 13 ga Oktoba.

   Matakin na zuwa ne yayin da ake ci gaba da samun tangarda ga zirga-zirgar jiragen sama a yankin, lamarin da ya sa wasu kamfanonin jiragen sama ke sauya jadawalin tafiye-tafiyensu ko kuma soke wasu jirage domin tabbatar da tsaron fasinjoji da ma’aikatansu.

8. 11 Oktoba 2026Ya kamata a kawo ƙarshen yi wa yara mata auren wuri - Remi Tinubu

   

   Asalin hoton, Getty Images

   Uwargidan shugaban Najeriya, Sanata Oluremi Tinubu, ta yi kira ga iyaye, shugabanni da al’umma gaba ɗaya da su haɗa kai wajen kawo ƙarshen auren wuri tare da tabbatar da kare haƙƙoƙin ƴaƴa mata.

   Ta bayyana haka ne a saƙon ranar bikin Ranar ‘Yar Mace ta 2026, wanda aka gudanar a ƙarƙashin taken “kawo ƙarshen auren yara da zuba jari a kula da haƙƙoƙin ƴaƴa mata,” inda ta ƙara da cewa buƙatar bai wa kowace yarinya damar samun ilimi, kiwon lafiya da kuma yanayin da zai ba ta damar cimma burikanta.

   Ta jaddada cewa kowace ƴar mace na da haƙƙin yin karatu, girma da kuma gina makomarta ba tare da fuskantar wariya, tashin hankali ko wasu munanan al’adu da ke hana ta cimma burinta ba.

   Sanata Oluremi Tinubu ta yi kira ga iyalai, al’umma, shugabannin addini da na gargajiya, da masu tsara manufofi da su ɗauki matakan kare haƙƙin ‘ya’ya mata tare da kawo ƙarshen auren yara, wanda ke hana yara mata damar cigaba da karatu da samun ingantacciyar rayuwa.

   Ta ce idan aka bai wa ‘ya’ya mata damar bunƙasa da cimma burinsu, hakan zai amfani iyalai, al’umma da kuma ƙasa baki ɗaya.

   “Lokacin da ‘ya’ya mata suka samu damar bunƙasa, iyalai suna samun ci gaba, al’umma suna ƙara ƙarfi, ƙasa kuma tana samun cigaba mai ɗorewa,” in ji ta.

9. 11 Oktoba 2026Farawa

   Masu bin mu a wannan shafi na Kai Tsaye da BBC Hausa ke kawo muku a kowace rana, barka da warhaka.

   Da fatan mun wayi gari lafiya. Kamar kodayaushe, a yau ma za mu ci gaba da kawo muku labarai da rahotanni na abubuwan da ke faruwa a duniya – musamman a Najeriya da ƙasashe maƙwabta.

   Za ku iya garzayawa shafukanmu na sada zumunta – Fesbuk da Tuwita da kuma Instagram inda a nan ma muka wallafa ƙarin labarai da bidiyo.

   Sai ku kasance tare da mu.