IKIBIRIRAHO, Imigumuko mu Bufaransa: Perezida Macron asaba ‘ituze’ inyuma y’intureka zirangwa mu gihugu cose

Amakuru y'ikibiriraho

Bernard Bankukira

1. Haciye isaha 1Igitigiri c’abanduye Ebola muri Kenya caduze gishika ku munani

   Umuyobozi mukuru mu bushikiranganji bw’amagara y’abantu muri Kenya, Dr. Patrick Amoth, yabwiye televiziyo Citizen TV ejo haheze ko ubu bushikiranganji bwapimye abantu 38, maze umwe hatorwa umwe muri bo yanduye umugera wa Ebola wo mu bwoko bwa Bundibugyo.

   Uwo murwayi mushasha ni umukozi ajejwe kwitaho abarwayi bari bashizwe ukwabo.

   Amoth yavuze ko uwo murwayi yashizwe ukwiwe kandi ko ariko aravurwa mu buryo bwihariye, nk’uko bimeze no ku bandi barwayi indwi bari basanzwe baranduye uwo mugera.

   Ibi vyatangajwe haciye umusi umwe gusa Kenya itangaje abandi bane bari banduye Ebola. Muri abo banduye harimwo umugabo afitaniye ubucuti bwa hafi mu muryango n'umurwayi wa mbere yanduye iyo ndwara muri ico gihugu, hamwe n'abakozi batatu bo mu gisata c'amagara y'abantu bari bamuvuye igihe yari mu bitaro.

   Amoth kandi yahumurije abanyagihugu ku bijanye n'uko iyo ndwara ishobora gukwiragira mu kibano, akavuga ko akaga k’uko abantu bashizwe ukwabo bashobora kuba baranduje abandi imbere y'uko bashirwa ukwibo ari gato.

   Yagize ati: “Batanguye kwerekana ibimenyetso vy'indwara haciye igihe kirekire, ku musi ugira icenda canke icumi. Ivyo bisigura ko igihe bari bakiri mu kibano ata bimenyetso vy'indwara bari bafise. Ni co gituma urugero rwo kwanduza abandi bantu rwari turo cane.”

   Kenya yemeje umuntu wa mbere yanduye Ebola kw'igenekerezo rya 6 Gitugutu (10). Uwo murwayi wa mbere yari umugabo yaba muri Repubulika ya Demokarasi ya Congo (RDC).

   Vyongeye, kubera ko abandura Ebola muri Kenya baguma biyongera, inama mpuzamakungu yerekeye uburimyi (Africa International Agricultural Expo 2026, AIAE), yari itegekanijwe kubera mu nyubakwa ya KICC i Nairobi, yarungurujwe gushika mu mwaka uza.

   Ayandi makuru kuri Ebola ushobora gusoma:

   Ebola: Iby'ingenzi wamenya kuri iyi ndwara yica iri muri DRC na Uganda OMS yavuze ko iteje inkeke ku isi

2. Haciye amasaha 2Human Rights Watch: Ingabo za Mali n’abacangero b’Abarusiya bagirizwa kwica abasivire

   Icegeranyo c’ishirahamwe Human Rights Watch kivuga ko ingabo za Mali hamwe n’abacangero b’Abarusiya bagandaguye abasivire mu bikorwa vya gisirikare vyo kurwanya imihari yitwaje ibirwanisho vyabaye mu mezi aheze.

   Iri shirahamwe riharanira agateka ka zina muntu rivuga ko abantu bikekwa ko bafasha abo barwanyi ari bo bakozweko ibitero, harimwo no mu bitero bibiri vy’indege zitajamwo abadereva (drones) vyasambuye ikigo c’ivuriro hamwe n’isoko ryo mu karere ka Kidal, mu buraruko bwa Mali.

   Iki cegeranyo cagiriza kandi imirwi y’abitwaje ibirwanisho amabi akomeye, harimwo iyicarubozo be no kwica abasirikare ba Mali bafashwe canke batagishoboye kwirwanira.

   Igisirikare ca Mali ntaco kiravuga kuri ibi birego, ariko abo bitwaje ibirwanisho basanzwe bafitaniye isano n’umuhari wa Al-Qaeda barahakana ko ari bo bategetse ubwo bwicanyi.

   Aya mabi avugwa muri iki cegeranyo yabaye inyuma y’aho abo barwanyi biyitirira idini rya Isilamu hamwe n’abarondera kwiyonkora ku gihugu bakoze ibitero rusangi mu ntango z’uno mwaka.

3. Haciye amasaha 4Trump: Zelensky nta cipfuzo afise co guhagarika iyi ntambara

   Perezida Donald Trump wa Reta Zunze Ubumwe za Amerika yashize ku rubuga nyagiro rwiwe, Truth Social, ubutumwa burebure buvuga ku migenderanire iheruka hagati ya Ukraine n'Uburusiya, harimwo n'ibindi yagirije Perezida Volodymyr Zelensky wa Ukraine.

   Trump yavuze ati: "Ingingo mfata ku Burusiya iroroshe cane. Ndiko ndagerageza kugarukana amahoro hagati y'Uburusiya na Ukraine, kandi sinshaka gukora ikintu na kimwe cotuma Uburusiya buva muri ibi biganiro.”

   Perezida wa Amerika yavuze ko hamaze kuba “intambwe zifatika”, harimwo n'ibiganiro bibandanya vyerekeye guhanahana imbohe.

   Yavuze kandi ko Uburusiya ubu butagifasha cane Iran, anongerako ati: "Ndashaka ko bibandanya gutya, kandi ni ko bizoguma, kiretse habaye abantu bamwe bamwe b'ibijuju baje kubibangamira."

   Trump abandanya avuga ko ibitero Ukraine igaba ku bigo vy’Uburusiya bitunganya igitoro bituma igiciro ca mazutu ciyongera kw'isoko mpuzamakungu, kandi bigatuma ibiciro vy'igitoro muri Amerika biduga. Ashimangira ko naho ibi bigo biterwa, Uburusiya bubandamya burungika amamiriyoni y'amatoni ya mazutu kw’isoko mpuzamakungu.

   Yagize ati: "Zelensky ntaco bimubwiye." Ni mu gihe imigenderanire yiwe na Zelensky imaze iminsi itifashe neza, cane cane inyuma y'aho Amerika ihagarikiye ibihano vyari vyafatiwe mazutu iva mu Burusiya.

   Mu kwibutsa ko Uburayi buriko buratanga amafaranga menshi cane yo gufasha Ukraine, hamwe n'imfashanyo zatanzwe n'uwahoze ari umukuru w’igihugu ca Amerika, Joe Biden, Trump yasozereye ubutumwa bwiwe agira ati: "We (Zelensky) ntashaka ko iyi ntambara ihagarara kandi kumbure ntavyo yigeze yipfuza kuva mu ntango."

   Yongeyeko ati: "Mu myaka ibiri iheze yari gushobora gushika ku masezerano meza kurusha ubu. Igihugu ciwe kigeze ahatemba, igice kinini c'ubutaka bwaco caragiye, ntikigisigaranye inzira igishikana ku biyaga n’ibahari nk'uko vyahora, kandi abagabo benshi bo muri Ukraine baragabanutse cane, barakomeretse canke barapfuye. NIRIFUZA KO IYI NTAMBARA IHAGARA!"

   Ku wa Mungu, Zelensky yabwiye ikimenyeshamakuru NBC co muri Amerika ko ingingo ubutegetsi bwa Trump buherutse gufata, zirimwo kwemera kuguramazutu y’Uburusiya no guhagarika ibihano, zishobora kubangamira Ukraine.

   Yavuze ati: "Ari nka hamwe Reta Zunze Ubumwe za Amerika zoja ku ruhande rw'Uburusiya ku mugaragaro, canke ibihugu vyompi bikunga ubucuti, nta nkeka ko Ukraine itoshobora gutsinda iyi ntambara canke kubandanya yihagazeko."

   Ayandi makuru ushobora gusoma:

   Trump ati: ' Ukraine ikeneye uwundi mukuru w'igihugu', inyuma y'aho Zelensky aneguriye amasezerano ajanye n'ibitoro

   Nta kimenyetso na kimwe cerekana ko Putin yoba yiyumvira guhagarika intambara muri Ukraine

   Rosenberg: Inkeke iteruye ya Putin ku Bwongereza iri muri gahunda y'Uburusiya yo guhangana n'Uburengerazuba

4. Haciye amasaha 5Macron yanse imihoho y’umushikiranganji w’intwaro yo hagati inyuma y’intureka zabaye mu Bufaransa

   Perezida Emmanuel Macron w’Ubufaransa yanse imihoho yatanzwe n’Umushikiranganji w’intwaro yo hagati mu gihugu, Laurent Nunez, inyuma y’intureka zaranze impera z’indwi irangiye mu bice bitandukanye vy’igihugu.

   Macron yavuze ko Nunez akwiye kuguma mu mabanga yiwe kandi agashiraho uburyo bushasha bwo guhangana vyihuta n’abateza intureka.

   Yavuze kandi ko ubwo bugizi bwa nabi bwatewe ahanini n’ukunanirwa kw’inzego z’umutekano mu gutegura neza ingene zokwitwara hamwe no mu bikorwa vy’igendereza vyari gutuma zitahura kare ivyari biriko birategurwa.

   Izo ntureka zakurikiye imyiyerekano ikomeye yabaye mu gihugu cose yo kwiyamiriza iduga ry’ibiciro hamwe n’ibikorwa vya reta bibandanya bisubira inyuma birimwo n’ivyerekeye amashure.

   Bitegekanijwe ko inama yihutirwa ya Reta iba mu masaha ari imbere kugira yihweze ico kibazo.

   Mw’ijambo yashikirije kuri televiziyo ku wa Mungu, Macron yongeye gushimangira ko abazokwagirwa n’ivyaha bijanye n’izo ntureka bazoshikirizwa ubutungane.

   Yongeye kuvuga ko hakwiye gutandukanywa abitavye imyiyerekano bafise ivyo basaba vyumvikana n’abafashe ingendo yo gusambura, kwonona no gusahura amatungo y’abandi.

5. Haciye amasaha 5Hampande y’Ubufaransa, imigumuko iravugwa mu Butaliyano no muri Albania, iterwa n'iki?

   Umushikiranganji wa mbere w’Ubutaliyano, Giorgia Meloni, ategekanya inama yihutirwa y’umutekano kuri uyu wa mbere inyuma y’aho abari mu myiyerekano bataniye mu mitwe n’abapolisi mu gisagara ca Milan.

   Intureka zatanguye ku mugoroba wo ku wa gatandatu zikabandanya gushika ku wa Mungu, inyuma y’aho abantu barenga 5.000, benshi muri bo bakaba ari abanyeshure, bitavye imyiyerekano yo kwiyamiriza iduga ry’ibiciro vy’ubuzima.

   Bamwe mu bari muri iyo myiyerekano bateye abapolisi amabuye, intebe n’ibisandugu vy’imicafu, abapolisi na bo baca bakoresha ibimodoka bitera amazi, banakoresha kandi n’ivyuka biryana mu maso.

   Meloni yavuze ko "abagizi ba nabi" bikitse inyuma y’iyo myiyerekano maze bakwiragiza akajagari.

   Hagati aho ku wa Mungu, no muri Albania haradutse imyiyerekano ikomeye ku mugwa mukuru, Tirana, imyiyerekano yo kwiyamiriza ubutegetsi, aho abantu isinzi babandanya gusaba ko Umushikiranganji wa mbere Edi Rama kuva ku butegetsi.

   Abari muri iyo myiyerekano bavuga ko batishimiye ingene igihugu kirongowe hamwe n’ibibazo vy’ubutunzi n’imibano bihanze abanyagihugu, bagasaba ihinduka mu ntwaro y’igihugu.

   Ayandi makuru ushobora gusoma:

   Meloni na Trump: Ingene bacanyemwo n'ingene bigoye kwigarura

   Ingene rurangiranwa wa Cameroun yahinduye ubuzima bwa Buffon

   'Gukorakora ku gitsina c'uwundi amasegonda adashika 10 si ikubagurwa' - Ingingo y'umucamanza mu Butaliyano

6. Haciye amasaha 6Kenya: Pasitori Paul Mackenzie yagirizwa kwica abana 191 yiteze gusomerwa kuri uno wa mbere

   Bitegekanijwe ko kuri uyu munsi hasomwa urubanza rw’umupasitori wo muri Kenya yagirizwa uruhara mu rupfu rw’abantu hafi 200, benshi muri bo bakaba ari abana, muri bumwe mu bugizi bwa nabi bukomeye cane muri kahise k’iki gihugu bushingiye ku madini y’ivyaduka.

   Paul Mackenzie yagirizwa kuba yarumvishije amajana y’abanywanyi biwe kwisonzesha gushika bapfe kugira ngo bashobore kubona Yezu/Yesu.

   Vyongeye uno mupasitori yahimirije abanywanyi biwe kwanka imiti ya none, mbere no kwanka amashure.

   Mu nyigisho ziwe, yakunda kugabisha abantu ko umuhero w’isi wari wegereje kandi ko shetani yari yarinjiye mu buzima bwa none.

   Mackenzie arahakana ivyo yagirizwa, kandi ko atigeze ahatira abanywanyi biwe kwisonzesha.

   Mu mwaka wa 2023, igipolisi catoye ibisigarira vy’ibiziga vy’abantu barenga 400 mw’ishamba rya Shakahola, hafi y’inkengera z’ibahari Indiyano muri Kenya, ibintu vyatumye hatangura amatohoza n’imanza zimaze imyaka.

   Igipolisi kiracabandanya n’ibipimo vy’uturemangingo ndangasano (DNA) kugira hamenyekane neza amamuko y’ibi bisigarira.

   Ayandi makuru ushobora gusoma: Kenya: mwenewabo na Pasitori Mackenzie yavuye mu gacerere

   Idini ryo kwiyicisha inzara muri Kenya: ‘Umugore wanje n’abana 6 bakurikiye Pasitori Mackenzie’

   Kenya: Umupastori w'ibitangaza by'impinja' yapfiriye mu mpanuka

7. Haciye amasaha 7Intambara yo muri Ukraine: Zelensky avuga ko Trump ariko agerageza guhatira Ukraine kumanika amaboko

   Perezida Volodymyr Zelensky avuga ko Perezida Donald Trump wa Reta Zunze Ubumwe za Amerika ariko agerageza guhatira Ukraine kwemera kumanika amaboko imbere y’Uburusiya.

   Mu kiganiro yahaye ikinyamakuru Bloomberg, Zelensky yavuze ko yari yemeye guhagarika ibitero ku bigo bitunganya igitoro vy’Uburusiya mu gihe Amerika yari kwihutira kurungikira Ukraine ibisasu vya misire vyo mu bwoko bwa Patriot bikoreshwa mu kwivuna ibitero vyo mu kirere, ariko ko inyishu yahawe na Amerika ari uko ivyo bitero bikwiye guhagarara ata kindi gisabwe.

   Zelensky yavuze ati: “Mbona ko hari ingingo zafashwe zigamije gutuma Ukraine imanika amaboko. Si mvuga ko incuti zacu zafashe iyi ntumbero. Kandi sinoshima kwiyumvira ko Amerika ibona ko iyi ntambara ikwiye kurangira vuba bishoboka Ukraine ikaba ari yo ivyishura. Ariko bisa nk’aho ari ko bimeze”.

   Yavuze kandi ko imigenderanire hagati ya Ukraine n’ubutegetsi bwa Amerika, imaze iminsi irangwamwo ukutumvikana, ishobora guhinduka inyuma y’amatora y’inama nshingamateka na nkenguzamateka za Amerika ategekanijwe mu ntango z’ukwezi kwa Munyonyo (11).

   Zelensky yavuze ati: “Mu gihe c’amatora, ibikorwa vya politike biba bikaze cane. Ubu birashushe cane, ariko amatora niyarangira ubuzima buzobandanya kandi nibaza ko ibintu bizosubira mu buryo.”

   Abanyamakuru ba Bloomberg babajije Zelensky ku ngingo zafashwe na Amerika zishobora kugabanya ubushobozi bwa Ukraine bwo kwivuna, harimwo ukugabanya umuvuduko w’itumatumanako rikoresha ikigendajuru ca Starlink, hamwe n’ugukwega amaguru mu guha Ukraine ibisasu vya Patriot.

   Perezida wa Ukraine yashimangiye ko amakuru yakuye ku masoko yizeye avuga ko ingingo yerekeye Starlink yafashwe n’“abategetsi, Maison Blanche/White House”, kandi ko ivyo guteba kurungikira igihugu ciwe izo misire kitari ikibazo c’ubuhinga.

   Ati: “Ibi birwanisho twarabirihiye. Hari ivyo Amerika yemeye kurungika, ariko hari ibindi itemeye kurungika. Rero iki si ikibazo c’ubuhinga.”

   Ayandi makuru:

   Ukraine: Igituma Moscou yanka kuvuga menshi ku bijanye n'agahengwe gaherutse gutangazwa na Trump

   Trump ati: ' Ukraine ikeneye uwundi mukuru w'igihugu', inyuma y'aho Zelensky aneguriye amasezerano ajanye n'ibitoro

   Nta kimenyetso na kimwe cerekana ko Putin yoba yiyumvira guhagarika intambara muri Ukraine

8. Haciye amasaha 7Imigumuko mu Bufaransa: Perezida Macron asaba ‘ituze’ inyuma y’intureka zirangwa mu gihugu cose

   Perezida Emmanuel Macron w’Ubufaransa atera akamo abanyagihugu gutekana no kwubahiriza amategeko inyuma y’umunsi w’imyiyerekano minini yahindutse intureka, n’ugusahura ku wa gatandatu, mu gihe akajagari kabandanije mu bice vy’umugwa mukuru Paris ejo ku wa Mungu.

   Mw’ijambo yashikirije igihugu ari ku kirimba c’Umukuru w’Igihugu, Élysée, Macron yagabishije abagize uruhara muri izi ntureka ko batobandanya bunyura ibintu, avuga ati: “Twese twumva ishavu n’isoni.”

   Abantu bashika ku bihumbi 550 baritavye imyiyerekano, basaba gutorera umuti ikibazo c’iduka ry’ibiciro vy’ibitoro, ubuzima bubandanya buzimba hamwe n’ibikorwa vya reta bibandanya bisubira inyuma birimwo n’ivyerekeye amashure.

   Ubushikiranganji bw’intwaro yo hagati buvuga ko abantu bababa 2.400 bamaze gufatwa.

   Perezida Macron yavuze ko ata kintu na kimwe gishobora gusigura ibikorwa vy’ubugizi bwa nabi ndengakamere vyabonetse muri iyo myiyerekano, yongerako ko ababikoze bazoshikirizwa ubutungane.

   Mu bisagara vya Paris, Marseille n’ahandi, abagumutsi bamwe bari bambaye imyambaro yirabura kandi bipfutse mu maso baraturiye imodoka n’inyubakwa zitandukanye.

   Ejo ku wa Mungu, ibikorwa bibi vy’ugusahura n’ukutana mu mitwe n’abapolisi vyarabandanije mu bice bimwe vya Paris no mu gisagara ca Lyon.

   Itororokanirizo ry’amakuru AFP rivuga ko abapolisi bakoresheje ivyuka biryana mu maso mu gusanzaza abantu, mu gihe bamwe mu bari muri iyi myiyerekano basubiye gutera amacupa n’amabuye abapolisi.

   Ivyabaye ejo ku wa Mungu vyatumye ibisagara bitandukanye mu gihugu cose bihangana n’ingaruka z’imwe mu ntureka zikomeye zibaye mu Bufaransa muri ibi bihe vya vuba.

   Mu gisagara ca Limoges, inyubakwa ndangakaranga yubatswe mu kinjana ca 19 yarahiye iratokombera ku wa gatandatu ituriwe n’abari muri iyi migumuko.

   Ibikorwa vy’ugusahura vyarakwiragiye mu bisagara vya Paris, Marseille na Lille hamwe no mu tundi turere twinshi.

   Macron avuga ko hazoba “isuzuma rizokorwa ku mugaragaro” ku kungene abapolisi bitwaye mu guhangana n’abari mu myiyerekano.

   Mu mpera z’indwi, abapolisi bakoresheje imyuka iryana mu maso n’ibiduga bitera amazi ku bantu benshi, kandi babonetse bakubita abantu bakoresheje amahiri ahatari hake.

   Ubushikiranganji bw’intwaro yo hagati buvuga ko abapolisi bababa 1000 bakomeretse ku wa gatandatu honyene, muri bo indwi bakaba barasinzikaye.

   Ibintu vyagiye vyunyuka muri iyi myiyerekano y’abanyeshure yatanguye mu kwezi guheze, inyuma y’aho amashirahamwe y’abakozi hamwe n’iyindi migwi iterekwa ubutegetsi bifatanije nabo.

   Ayandi makuru ushobora gusoma:

   Ubufaransa: Abaharurwa muri mirongo bafashwe n'igipolisi mu gihe hatanguye imyiyerekano mu gihugu cose

   Ubufaransa: Intureka, ugusahura hamwe n'iturirwa ry'inyubakwa, mu gihe abarenga 1200 bafashwe inyuma y'imyiyerekano

9. Haciye amasaha 7Mwaramutse

   Ikaze kuri BBC Gahuzamiryango, aho tubashikiriza amakuru yo mu karere no mu mahanga mu buryo bw’ikibiriraho.