IKIBIRIRAHO, Amerika na Iran bemeranyije ku gahenge k'ibyumweru bibiri gafite ibisabwa hamwe no gufungura umuhora wa Hormuz

Amakuru y'ikibiriraho

Didier Bikorimana na Gisèle Berwa

1. Iminota 10 irahezeIbitero birakomeje nubwo Amerika na Iran byatangaje agahenge

   Ibitero byatangajwe mu bihugu byinshi nyuma y'uko agahenge gatangajwe.

   Muri Iran:

   Ibitangazamakuru byo muri Amerika, bisubiramo amagambo y'umutegetsi wo muri Israel, byatangaje ko Israel igikomeje kugaba ibitero kuri Iran kugeza mu gitondo cyo ku wa gatatu.

   Ibi bibaye nubwo uko bigaragara ibiro bya perezida w'Amerika - byitwa White House - byahamirije ibiro ntaramakuru AFP ko Israel na yo yemeye amasezerano y'agahenge.

   Israel yavuze ko yemera agahenge ariko "katarimo Libani".

   Muri Israel:

   Ibitero byatangajwe i Yerusalemu/Yeruzalemu, aho abanyamakuru ba BBC bari muri uwo mujyi bavuga ko bumvise kandi bakanyeganyezwa n'ibiturika byinshi. Hari n'ubutumwa bwo kuburira abaturage bwatanzwe.

   Muri Bahrain:

   Minisiteri y'umutekano mu gihugu yatangaje ko “inzogera yavugijwe”, isaba abaturage gushaka aho bikinga.

   Muri Qatar:

   Minisiteri y'ingabo ya Qatar yatangaje ko misile zari zigiye muri icyo gihugu zahagaritswe zitaragerayo.

   Muri Emira Zunze Ubumwe z'Abarabu (UAE):

   Minisiteri y'ingabo ya UAE yatangaje ko igihugu “kirimo guhangana n'ibitero bya misile n'indege zitarimo abapilote [drone] biturutse muri Iran”.

   Muri Saudi Arabia/Arabie Saoudite:

   Mu masaha macye ashize, abashinzwe ubwirinzi bw'abaturage muri Saudi Arabia batanze amabwiriza nibura abiri yo kwitwararika. Ku kuburira kwa mbere, nyuma hatanzwe ubutumwa bwemeza ko nta kibazo kiriho, nkuko byatangajwe ku mbuga nkoranyambaga z'ubuyobozi bw'ubwirinzi bw'abaturage bwa Saudi Arabia ndetse n'umunyamakuru wa BBC uri mu murwa mukuru Riyadh.

   Izindi nkuru wasoma:

   Amerika na Iran bemeranyije ku gahenge k'ibyumweru bibiri gafite ibisabwa hamwe no gufungura umuhora wa Hormuz

   Isesengura: Isubukurwa ry'ibitero by'aba-Houthi bo muri Yemen rizaba ikibazo kuri Israel

   Iran ivuga ko umukuru w'ubutasi yishwe n'igitero cya US na Israel, mu gihe Trump yakangishije 'ukuzimu' niba nta masezerano

2. Haciye isaha 1Trump avuga ko agahenge k'Amerika na Iran ari 'intsinzi yuzuye'

   Perezida w’Amerika Donald Trump avuga ko nta gushidikanya guhari ko Amerika yageze ku “ntsinzi yuzuye”, nyuma yo kwemeranya na Irani agahenge k’ibyumweru bibiri.

   Mu kiganiro yagiranye n’ibiro ntaramakuru AFP nyuma yo gutangaza ako gahenge, yavuze ko muri ayo masezerano gahunda ya Irani yo gutunganya uranium “izitabwaho neza cyane”.

   Ati: “Iyo bitaba ibyo sinari kuba nemeye.” Nta makuru arambuye yatanze ku kuntu bizagendekera iyo uranium.

   Abajijwe niba azasubira ku bikangisho bye bya mbere byo gusenya ingomero z’amashanyarazi za gisivile za Irani hamwe n’amateme yayo ya gisivile igihe ayo masezerano yaba adakurikijwe, yavuze gusa ati: “Ibyo uzabyibonera.”

   Trump, biteganyijwe ko agirira uruzinduko mu Bushinwa mu kwezi gutaha aho azahura na Perezida w’Ubushinwa Xi Jinping, yagize ati: “Numva ko ari yego”, ubwo yari abajijwe niba Ubushinwa bwaragize uruhare mu gutuma inshuti yabwo Irani yemera ako gahenge.

   Izindi nkuru wasoma:

   Xi yabwiye Trump ati: "Witonde" mu guha intwaro Taiwan

   Ibyo tuzi kuri 'operation' yo gutabara umupilote wa F-15 ya Amerika yarasiwe muri Iran

   Kubera iki Ubushinwa buri mu nzira yo kwemeza itegeko rishasha rishira imbere 'ubumwe bw'amoko'?

3. Haciye isaha 1Amerika na Iran bemeranyije ku gahenge k'ibyumweru bibiri gafite ibisabwa hamwe no gufungura umuhora wa Hormuz

   Perezida w’Amerika Donald Trump avuga ko nyuma y’ibiganiro n’ubutegetsi bwa Pakistan hazabaho agahenge hagati y’Amerika na Iran niba Iran yemeye ko ingendo ziba mu muhora wa Hormuz.

   Yagize ati: “Nemeye guhagarika kumisha ibisasu no gutera Iran mu gihe cy’ibyumweru bibiri.”

   “Aka kazaba ari AGAHENGE k’impande ebyiri!”

   Mu butumwa bwe ku rubuga nkoranyambaga rwe rwa Truth Social, Trump yakomeje avuga ko azemera agahenge k’ibyumweru bibiri “kagengwa no kuba Repubulika ya Kisilamu ya Irani yemera BYUZUYE, AKA KANYA, kandi MU MUTEKANO GUFUNGURA Umuhora wa Hormuz.”

   Mu itangzo yasohoye ku rubuga nkoranyambaga rwa X mu izina ry’inama y’ikirenga y’umutekano ya Irani, Minisitiri w’ububanyi n’amahanga wa Irani Abbas Araghchi yagize ati: “Niba ibitero kuri Irani bihagaritswe, Ingabo zacu Zikomeye zizahagarika ibikorwa [operations] byazo by’ubwirinzi.”

   Yongeyeho ko mu gihe cy’ibyumweru bibiri, bizaba bishoboka kunyura mu muhora wa Hormuz mu mutekano, ku buhuzabikorwa bw’ingabo za Irani ndetse hanazirikanwa neza aho ubushobozi bw’ibya tekinike bugarukira.

   Minisitiri w’intebe wa Pakistan Shehbaz Sharif yatangaje ku rubuga nkoranyambaga rwa X ko Irani n’Amerika byemeye agahenge gatangira aka kanya, “karimo na Libani n’ahandi” ndetse ko Pakistan izakira ibiganiro by’impande zombi ku wa gatanu mu murwa mukuru Islamabad.

   Israel yavuze ko ishyigikiye agahenge ariko “ntikarimo Libani”.

   Intambara y’Amerika-Israel na Irani yatangiye ku itariki ya 28 Gashyantare (2) uyu mwaka.

   Izindi nkuru wasoma:

   Igihe ntarengwa cya Trump ku muhora wa Hormuz kiregereje ariko ibihugu byo muri Aziya byamaze kugirana amasezerano na Iran

   Uko Pakistan yumvishije Trump kugira ibe umuhuza atari yitezwe mu ntambara ya Iran

   Hormuz: Impamvu uyu muhora ari ingenzi cyane ndetse Khamenei yawuvuzeho mu itangazo rye rya mbere

4. Haciye isaha 1Mwaramutse neza!

   Ikaze kuri BBC Gahuzamiryango, aho tubagezaho amakuru yo mu karere no mu mahanga mu buryo bw'aka kanya.