DR Congo - Ituri: Inyeshyamba za ADF 'zongeye kwica no gushimuta' abantu
Ahavuye isanamu, ISLAMIC STATE PROPAGANDA
Sosiyete sivile yo mu ntara ya Ituri muri DR Congo iramagana ibitero bikekwa ko byakozwe n’inyeshyamba za ADF kuwa gatandatu no ku cyumweru bikicirwamo abantu bataramenyekana neza umubare.
Ibinyamakuru muri DRC bivuga ko abantu barenga 20 baburiwe irengero n’inzu zigera kuri 30 zigatwikwa mu gitero cya ADF kuwa gatandatu ahitwa Lumamisa muri teritwari ya Mambasa muri Ituri.
Dieudonné Lossa ukuriye sosiyete sivile muri Ituri yabwiye BBC Gahuzamiryango ko muri iki gitero “tumaze kumenya ko hishwe abantu batanu, barimo abagore babiri n’abagabo batatu”.
Yongeraho ati: “Abantu benshi kugeza ubu baburiwe irengero, dukeka ko bashimuswe n’izo nyeshyamba”.
BBC yagerageje kuvugana n’ingabo muri aka karere ariko kugeza ubu ntibyashoboka.
Lossa avuga ko mu ijoro ryo ku cyumweru izi nyeshyamba zateye no muri teritwari ya Irumu zigakora ubugizi bwa nabi, ati: “Umubare w’abishwe kugeza ubu nturamenyakana”.
Mu cyumweru gishize inyeshyamba za ADF, ziyitirira idini ya Islam, zavuzwe mu gitero kuri gereza y’i Butembo zifungura imfungwa zirenga 800 zirimo bamwe mu barwanyi bazo.
Hashize umwaka urenga ingabo za DRC n’iza Uganda zitangiye ibitero bya gisirikare zihuriyeho byo kurandura uyu mutwe washinzwe n’abarwanya ubutegetsi bwa Kampala.
Ibikorwa nk’ibi byakozwe n’ingabo zombi mu myaka umunani ishize ntabwo byaranduye uyu mutwe wa ADF.
Dieudonné Lossa ati: “Ntabwo twakomeza kureba bica abantu gutya, turasaba leta gushyira imbaraga mu kurandura uyu mutwe w’inyeshyamba zo muri Uganda ziri ku butaka bwacu, zikomeje kutujujubya.”
