Rwanda: Imvo n'Imvano ku iteka rya minisitiri ku kurengera umutungo bwite mu by'ubwenge

Ndabashuhuje mwese abakurikiye BBC, uyu ni umwanya w'ikiganiro Imvo n'Imvano. None ni ku wa gatandatu tariki 16 y'ukwezi kwa gatanu, umwaka wa 2026. Uyu munsi turaganira ku iteka rya minisitiri rifasha ishyirwa mu bikorwa ry'itegeko rirengera umutungo bwite mu by'ubwenge.

Iri teka rigena uburyo bw'ikusanya n'isaranganya ry'amafaranga n'ibindi byavuye ku gukoresha ibihangano, uburenganzira bw'abahanzi bushamikiyeho.

Iri teka ryitezweho igisubizo ku ikoreshwa ry'ibihangano by'abahanzi bakunze kumvikana bijujutira kuba uburenganzira bwabo buhonyangwa.

Biteganyijwe ko mu gihe cya vuba hazashyirwaho ikigo gishinzwe gukurikirana uburyo bw'ikusanya n'isaranganya ry'amafaranga, n'ibindi byavuye ku gukoresha ibihangano by'abahanzi n'abanyabugeni.

Mbere hahozeho ikigo kizwi nka 'Rwanda Society of Authors' ariko cyaje gushinjwa n'abahanzi kutuzuza inshingano. Mu myaka 13 cyamaze mbere yo guseswa mu 2025, bivugwa ko cyasaranganyije amafaranga abahanzi inshuro enye gusa ndetse icyo gihe abahanzi bakavuga ko bahawe amafaranga y'intica ntikize.

Turaganira na bamwe mu bahanzi, abanyabugeni n'impuguke mu mategeko batubwire uko bakiriye iryo teka, uburyo rizashyirwa mu bikorwa n'icyo rije gucyemura mu guha abahanzi uburenganzira bwabo.

Iki kiganiro mwagiteguriwe kandi murakigezwaho na Yves Bucyana.