Abategetsi ba Libani n'aba Israel bagiye guhurira muri Amerika ku wa kabiri

Inyandiko gusa
Umugore urimo gukwega igitambaro cye cyo mu mutwe no mu ijosi, ahagaze arimo kureba inyubako yashenywe n'igitero cya Israel cyo mu kirere, i Beirut, mu murwa mukuru wa Libani. Ifoto yo ku itariki ya 9 Mata (4) mu mwaka wa 2026.

Ahavuye isanamu, Reuters

Insiguro y'isanamu, Israel yakomeje kugaba ibitero ahantu hanyuranye muri Libani, ishimangira ko Libani itarebwa n'agahenge ko muri Irani
    • Umwanditsi, Raffi Berg na Samantha Granville, i Beirut
  • Igihe co gusoma: iminota 4

Ambasaderi wa Israel muri Amerika n'ambasaderi wa Libani muri Amerika bemeranyije mu kiganiro cya mbere bagiranye kuri telefone ko bazahurira i Washington ku wa kabiri, mu gushaka ko habaho itangazwa ry'agahenge n'itariki yo gutangira ibiganiro bitaziguye.

Ibiro bya perezida wa Libani ni byo byatangaje uko guhura kwabo ku wa gatanu. Mbere yaho, umutegetsi wo ku rwego rwo hejuru wo mu biro bya perezida yabwiye BBC ko ibiganiro bishobora kubaho ari uko gusa hari agahenge.

Ambasaderi wa Israel i Washington nyuma yemeje ko "ibiganiro by'amahoro byeruye" hagati ya Israel na Libani bizatangira, ariko yongeraho ko Israel yanze kuganira ku gahenge hagati yayo n'umutwe wa Hezbollah, ukorera muri Libani ufashwa na Irani. Minisitiri w'intebe wa Israel Benjamin Netanyahu yari yatanze uruhushya rwuko habaho ibiganiro bitaziguye, nyuma y'icyo yise "ubusabe bwa kenshi bwa leta ya Libani".

Ibitero bya Israel byo mu kirere kuri Libani birakomeje, mu gihe minisiteri y'ubuzima ya Libani yavuze ko abiciwe mu gitero cy'ibisasu byinshi cyo ku wa gatatu biyongereye bagera ku bantu 357, naho abandi 1,223 barakomereka.

Iyo minisiteri y'ubuzima yagize iti: "Umubare [w'abapfuye] nturaba ntakuka, kubera ko gukuraho ibyasenyutse gukomeje kandi hakaba hari ibisigazwa byinshi cyane by'imirambo."

Ingabo za Israel zavuze ko urukurikirane rw'ibitero byazo muri Libani byishe "abaterabwoba nibura 180 ba Hezbollah".

Ku wa gatanu, saa tatu z'ijoro (21:00) ku isaha yo muri Libani, ni ukuvuga saa mbili z'ijoro (20:00) ku isaha yo mu Rwanda no mu Burundi, ambasaderi wa Israel i Washington n'ambasaderi wa Libani i Washington bagiranye ikiganiro cya mbere cyo kuri telefone hamwe n'ambasaderi w'Amerika i Beirut, umurwa mukuru wa Libani.

Muri icyo kiganiro, bemeranyije guhurira muri minisiteri y'ububanyi n'amahanga y'Amerika, nkuko ibiro bya perezida wa Libani byabivuze.

Skip Ibisomwa cane and continue reading
Ibisomwa cane

End of Ibisomwa cane

Intumwa z'impande zombi zizahura ku wa kabiri ziganire ku bisabwa ngo haboneke agahenge. Nizemeranya kuri ibyo bisabwa, ubwo ibiganiro bizakomeza ku yindi tariki no mu kindi gihe, nkuko umutegetsi wo hejuru wo mu biro bya perezida wa Libani yabivuze.

Ibiganiro bitaziguye hagati ya Libani na Israel ni ikintu kidasanzwe na gato. Mu mateka y'ibyo bihugu, byagiye biganira bibinyujije ku bandi bantu. Umuhate wo gutuma habaho ibiganiro wari usanzwe uriho kuva habaye amasezerano y'agahenge mu kwezi kw'Ugushyingo (11) mu 2024, mbere intumwa z'Amerika ni zo zabaye abahuza mu biganiro biziguye hagati y'impande zombi.

Umugabo n'umugore barimo kureba inyubako yangiritse cyane, mu mbuga hari imodoka yahiye, mu mujyi wa Nahariya, muri Israel. Ifoto yo ku itariki ya 17 Werurwe (3) mu 2026.

Ahavuye isanamu, Reuters

Insiguro y'isanamu, Hezbollah yagabye ibitero bya rokete kuri Israel mu mirwano ya vuba aha yatangiye mu ntangiriro ya Werurwe (3) uyu mwaka

Hari ukutavuga rumwe gukomeye kujyanye no kumenya niba Libani irebwa n'amasezerano y'agahenge yagezweho hagati y'Amerika na Irani, yatangajwe ku wa kabiri na Perezida w'Amerika Donald Trump.

Pakistan, yabaye umuhuza watumye habaho ako gahenge, hamwe na Irani, bivuga ko Libani na yo iri muri ako gahenge, mu gihe Amerika na Israel bivuga ko katayireba. Ku wa kane, Minisitiri wungirije w'ububanyi n'amahanga wa Irani Saeed Khatibzadeh yabwiye BBC ko ibitero bya Israel kuri Libani ari "ihonyora rikomeye" ry'agahenge.

Ariko, ubwo ku wa gatatu yavugiraga mu murwa mukuru Budapest wa Hongrie, Visi Perezida w'Amerika JD Vance yagize ati: "Ntekereza ko Abanya-Iran batekerezaga ko agahenge karimo na Libani, kandi rwose ntiyari irimo."