Portugal yoba itanguye guha umugongo Ronaldo ?

Umusatirizi rurangiranwa Cristiano Ronaldo yagumye ku ntebe y'abasubirizi igihe umurwi nserukiriragihugu wa Portugal watsinda uwa Norvège 2-1 mu rukino rwa UEFA Nations League (twogereranya na Ihiganwa mpuzabihugu rya UEFA) rwabaye ku wa 27 Nyakanga (9) 2026.

Ronaldo ntiyakinye n'umunota n'umwe muri urwo rukino naho yari yashizwe ku rutonde rw'abandi bakinyi. Bwari bugize gatatu ashirwa ku ntebe y'abasubirizi.

Vyongeye, bwabaye ubwa mbere mu myaka irenga 18 Ronaldo amara iminota 90 yose y'urukino rwa Portugal ari ku ntebe y'abasubirizi ntaronke akaryo ko kwinjira mu kibuga mu rukino mpuzamakungu rutari urwa kivandimwe.

Aho vyaherukira, hari mu rukino rw'igikombe ca Bulaya co mu 2008 (Euro 2008), igihe Portugal yatsindwa n'Ubusuwisi.

None ni kubera iki umumenyereza yamusize ku ntebe?

Umumenyereza w'umurwi nserukiragihugu wa Portugal, Jorge Jesus, yavuze ko Ronaldo agifise ikibanza gihambaye mu migambi yiwe.

Jesus yasiguye ko uno mukinyi rurangiranwa yahoze akinira Manchester United, Real Madrid na Juventus yari yakinye hafi iminota 70 mu ntsinzi y'igitsindo 1-0 Portugal yatsinzemwo Pays de Galles ku wa 24 Nyakanga.

Kubera ko hagati y'izi nkino zombi hari haciye imisi itatu gusa, Jesus yabonye ko bitari vyiza ko Ronaldo atangura mu kibuga mu nkino zibiri zikurikirana, aca afata ingingo yo kumuruhurira.

Yagize ati: "Ronaldo yakinye hafi iminota 70 mu rukino na Pays de Galles, kandi nabonye ko bitari kuba vyiza ko akina inkino zibiri zikurikirana".

Jesus yongeyeko ko mu ntango yari yateguye kwinjiza Ronaldo mu gice ca kabiri c'urukino, ariko uko urukino rwagenda ni ko yagenda abona ko bitari ngombwa ko yinjira mu kibuga, aca afata ingingo yo kumugumiza ku ntebe y'abasubirizi gushika urukino rurangire.

Mu rukino rwa UEFA Nations League rwahuje Portugal na Norvège, Portugal yatanguje mu kibuga Gonçalo Ramos nk'umusatirizi, ari kumwe na João Félix. Ramos yatsinze igitsindo kimwe kandi yabaye mu bakinyi bagize uruhara runini mu gutuma Portugal itahukana intsinzi.

Jesus yavuze ko mbere yari yavuganye na Cristiano Ronaldo ku bijanye n'ingene yomwinjiza mu kibuga hasigaye nk'iminota 30 ngo urukino rurangire. Ariko kubera ko urukino rwariko rugenda neza nk'uko yari yabiteguye, yabonye ko ata mvo yo gukuramwo Ramos, kuko yariko arakina neza.

Jesus yari yavuze ko itorwa ry'abakinyi ryari kuvana n'ukuntu bazoba bitwara mu kibuga, kandi ko izina canke icubahiro umukinyi afise bitari kuba impamvu yo kumuha ikibanza mu bakinyi atanguza mu kibuga. Nubwo yavuze uko, amaze kugenwa nk'umumenyereza wa Portugal, yahisemwo guhamagara Ronaldo mu murwi nserukiragihugu.

Ni co gituma ingingo yokumugumiza ku ntebe y'abasubirizi mu rukino rwahuje Portugal na Norvège yabonetse cane nk'iyishingiye ku mukenyuro, aho kuba ikimenyetso c'uko uwo mukinyi ata kibanza kinini yoba agifise.

Ronaldo amaze gukinira Portugal inkino zingahe?

Cristiano Ronaldo amaze gukinira umurwi nserukiragihugu w'abakuze wa Portugal inkino 234, ibi bikaba bituma aba umukinyi amaze gukinira igihugu ciwe inkino nyinshi kurusha abandi bose muri kahise ka Portugal.

Muri izi nkino zose, amakuru yegeranijwe na National Football Teams yerekana ko yatangujwe mu kibuga incuro 215.

Ivyo birerekana ko, naho imyaka iriko iramujana, Ronaldo aguma ari umwe mu bakinyi kirumara kandi bafite kahise kadasanzwe muri Portugal.

No mu mwaka wa 2026, imbere y'urukino rwahuje igihugu ciwe na Norvège, ibiharuro vya Opta vyerekana ko Ronaldo yari yatangujwe mu kibuga mu nkino umunani zose yari amaze gukinira Portugal muri uwo mwaka. Yari amaze kwinjiza ibitsindo bitatu muri uwo mwaka nyene, nk'uko amakuru yegeranijwe gushika ico guhe avyerekana.

Ni incuro zingahe Portugal imaze kugumiza Ronaldo ku ntebe y'abasubirizi?

Mu rugendo rwiwe rurerure mu murwi nserukiragihugu wa Portugal, Cristiano Ronaldo amaze gusigara ku ntebe y'abasubirizi adahawe akaryo ko kwinjira mu kibuga incuro zitatu gusa. Ibi ni ibintu bitari bikunze kuba kuko akenshi, igihe yaba yatanguye ari ku ntebe y'abasubirizi, vyaza kurangiza yinjiye mu kibuga.

Ng'izi incuro Ronaldo yagumijwe ku ntebe y'abasubirizi ntakinishwe na gato:

Mu rukino rwa Portugal n'Ubusuwisi, Ruheshi (6) 2008: Mw'ihiganwa ry'igikombe ca Bulaya co mu 2008 (Euro 2008), Portugal yari yamaze kuronka itike yo kuja mu gice gikurikira c'ihiganwa.

Kubera ivyo, umumenyereza w'ico gihe yafashe ingingo yo kuruhurira bamwe mu bakinyi nyamukuru b'umurwi, harimwo na Ronaldo yakurikiye urwo rukino rwose ari ku ntebe y'abasubirizi.

Mu rukino rwa Portugal na Croatie, Ruheshi (6) 2024: Imbere y'uko Euro 2024 itangura, Portugal yarakinye urukino rwa kivandimwe na Croatie. Muri urwo rukino, Ronaldo yasigaye ku ntebe y'abasubirizi kandi ntiyigeze aronka akaryo ko kwinjira mu kibuga.

Mu rukino rwa Portugal na Norvège, Nyakanga 2026: Vyarasubiriye kuba kandi mu rukino rwa UEFA Nations League rwahuje Portugal na Norvège.

Umumenyereza mushasha wa Portugal, Jorge Jesus, yasize Ronaldo ku ntebe y'abasubirizi mu minota 90 yose y'urukino atigeze amukinisha.

Bwabaye ubwa mbere mu myaka 18 Ronaldo yagumijwe ku ntebe y'abasubirizi mu rukino mpuzamakungu rwose rw'umurwi nserukiragihugu wa Portugal rutari urwa kivandimwe.

Gusa, hari n'izindi nkino yatanguriye ku ntebe y'abasubirizi ariko akaza kwinjira mu kibuga. Nk'akarorero, ku wa 8 Nyakanga 2024 mu rukino Portugal yakinye na Ecosse, Ronaldo yinjiye avuye ku ntebe y'abasubirizi kandi arinjiza igitsindo ku munota wa 88.

Ronaldo amaze kwinjiriza Portugal ibitsindo bingahe?

Cristiano Ronaldo amaze kwinjiriza Portugal ibitsindo 146 mu nkino 234. Ibi vyatumye Ronaldo aza ubwa mbere mu bakinyi bamaze kwinjiriza imirwi nserukirabihugu yabo muri kahise k'umupira w'amaguru, hagakurikira Lionel Messi afise ibitsindo 125 mu nkino 207.

Muri 2026 honyene, imbere y'urukino rwa Nations League na Norvège, Ronaldo yari amaze gutsindira Portugal ibitsindo bitatu.

Intango y'igihe gishasha muri Portugal

Urukino rwabereye i Oslo (umugwa mukuru wa Norvège) rwabaye nk'ikimenyetso c'igihe gishasha gitanguye ku murwi nserukiragihugu wa Portugal.

Umumenyereza mushasha Jorge Jesus ariko aragerageza guhuza ubunararibonye bwa Ronaldo n'inguvu z'abakinyi bakiri bato nka Gonçalo Ramos na João Félix.

Mu rukino na Norvège, Portugal yatahukanye intsinzi y'ibitsindo 2-1 Ronaldo atigeze akandagira mu kibuga. Ramos, yari yatanguye mu kibanza ciwe, ni umwe mu bakinyi bafashije cane umurwi gutsinda urwo rukino.

Ariko ivyo ntibizibira na gatoyi ikibanza ca Ronaldo muri kahise k'umupira w'amaguru muri Portugal. Mu nkino 234 amaze gukinira igihugu ciwe, amaze gutsinda ibitsindo 146 – gushika ubu ni ntagereranywa kw'isi yose mu rwego rw'imirwi nserukirabihugu ku bitsindo amaze kwinjiza.

Ni co gituma Abanyaportugal bazokwama bibuka intererano yiwe ikomeye mu murwi nserukiragihugu, kandi benshi ubu bakaba bibaza vyinshi ku gihe azofatira ingingo yo gukukuruka burundu ku rwego mpuzamakungu.