Côr Iau ABC yn ennill Côr Plant y Byd yn Eisteddfod Llangollen

Roedd dathlu mawr ym mhafiliwn Eisteddfod Ryngwladol Llangollen nos Fercher 8 Gorffennaf, wrth i Gôr Iau ABC ennill teitl Côr Plant y Byd.

Ar ôl ennill categori'r Côr Plant Agored yn gynt yn y dydd, roedd y côr o blant o Gaerdydd a Bro Morgannwg yn gymwys i gystadlu am brif dlws y noson.

Er bod corau plant rhyngwladol hefyd wedi cystadlu yn ystod y dydd - gan gynnwys o'r Unol Daleithiau ac Wcráin - tri chôr o Gymru oedd yn y rownd derfynol, wedi i Ysgol Pen Barras ddod yn fuddugol yng nghategori y Côr Plant Iau, a Heol y March wedi ennill y Côr Plant Hŷn.

Wedi mynd yno am y profiad o ganu ar lwyfan ryngwladol oedd y côr, eglurai'r arweinydd Elin Llwyd, felly mae dod adref gyda dau dlws yn arbennig iawn i'r plant.

"O'dden nhw hollol wrth eu boddau. O'n i wedi eu paratoi nhw i beidio â disgwyl unrhywbeth, achos mae dod yn 4ydd, 5ed, 6ed yn Llangollen yn wych.

"Do'n i ddim ishe iddyn nhw deimlo bod rhaid iddyn nhw fynd i ennill – o'n i jest ishe iddyn nhw fynd i berfformio ar eu gorau a dangos ABC ar eu gorau. Yn rhyfeddol, roedd e wedi talu ar ei ganfed.

"O'dd e mor annisgwyl – o'dd ennill y categori yn un peth, wedyn i ennill Côr y Byd..."

Oherwydd "safon anhygoel" y corau oedd yn eu herbyn, doedd Elin ddim wedi disgwyl y byddai'n rhaid aros ar faes yr Eisteddfod er mwyn canu eto.

Felly ar ôl y canlyniad cyntaf, roedd llawer o ruthro o gwmpas y lle, meddai, wrth iddi "geisio corlannu 100 o blant a rhieni" a sicrhau fod y pedwar bws a oedd wedi eu cludo i'r gogledd yn fodlon aros amdanyn nhw!

"Erbyn i ni ganu, oedd hi'n 8.30pm neu'n hwyrach, ac oedden ni wedi gadael ers 7am, felly o'n i'n gweld eu bod nhw wedi dechrau blino, ac o'n i'n meddwl fod y canolbwyntio am fynd.

"'Nes i jest ddweud wrthyn nhw ei fod e'n gyfle arall i berfformio eto a joio bod ar y llwyfan, a chael eu rhieni i'w gweld nhw eto.

"Ond bydd 'na blant blinedig iawn yn ysgolion Caerdydd a'r Fro heddiw!"

Cafodd yr academïau perfformio ABC yn ardal Caerdydd a'r Fro eu sefydlu yn 2014.

Roedd Côr Hŷn a Chôr Iau ABC yn cystadlu'n erbyn ei gilydd yn Llangollen eleni. Ethos yr academïau yw i roi profiadau perfformio gwahanol i'r plant mae hi'n eu hyfforddi, eglurai Elin.

"O'n i eisiau mynd â nhw i blatfform rhyngwladol, iddyn nhw gael gweld y gorau o'r byd sy'n teithio i Langollen yn flynyddol.

"O'n i'n gobeithio y byddai hwnna'n brofiad fyddai'n aros gyda nhw. Fues i'n cystadlu yn Llangollen o oedran ifanc. O'n i'n gobeithio rhoi'r un ysbrydoliaeth iddyn nhw â ges i wrth ymweld â Llangollen, achos mae e'n llwyfan ac yn ddigwyddiad mor unigryw, anhygoel a lliwgar.

"Ac i gael beirniaid rhyngwladol hefyd; ni gyd yn gwybod beth yw gwerth hynny."

Un o'r plant a oedd yn y côr buddugol oedd Osian o Gaerdydd. Eglurai ei fam, Casi, ei bod hi wedi bod yn ddiwrnod hir a phoeth iddyn nhw i gyd, ond yn ddiwrnod bythgofiadwy i'r plant... a'r rhieni.

"Canodd y ddau gôr yn rili da, ac roedd hi'n sioc enfawr pan glywon ni fod y rhai bach wedi ennill. Roedd hi'n ddiwrnod hir, ond 'naethon nhw'n hollol anhygoel.

"Wedyn ennill Côr y Byd; y plant bach mor excited ac Elin mor shocked!"

Ynghyd â thariannau y Côr Plant Agored a Chôr Plant y Byd, roedd Elin Llwyd hefyd yn mynd â thlws Arweinydd Mwyaf Ysbrydoledig y Corau Plant yn ôl adref gyda hi, sy'n gwbl haeddiannol, meddai Casi.

"Mae beth mae hi wedi ei wneud gyda'r plant bach 'ma yn hollol wych. Cant o blant o dan 11, gyda'r 'fenga' yn saith oed, ddim yn tynnu eu llygaid oddi wrthi; pob nodyn yn berffaith, pob symudiad yn berffaith. O'dd e'n ffantastig!

"O'dd e'n rili emosiynol i fi, achos pan o'n i tua'r un oedran, 'nes i ennill yn Llangollen gyda chôr Ysgol Gerdd Ceredigion, felly 'nes i lefen lot ddoe!"

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.