Ystyried hollti ysgol uwchradd Gymraeg yn ddwy yn sgil pryderon ariannol

Fe allai pryder am sefyllfa ariannol ysgol uwchradd Gymraeg yn Sir Caerffili arwain at sefydlu ail ysgol uwchradd yno.

Yn ôl adroddiad i bwyllgor craffu addysg y cyngor, mae angen i Ysgol Gyfun Cwm Rhymni fynd i'r afael â "diffyg ariannol a fyddai'n cynyddu o flwyddyn o flwyddyn heb weithredu".

Mae 'na 1,800 o ddisgyblion yn yr ysgol, sydd wedi ei lleoli ar ddau safle.

Mae un yn Fleur de Lys ger y Coed Duon, a'r llall saith milltir i ffwrdd yn y Gwyndy ar gyrion tref Caerffili.

Mae adroddiad swyddogion yn nodi fod y drefn bresennol o gynnal un ysgol ar ddau safle yn creu nifer o heriau, gan gynnwys dyblygu staff ac addysgu rhai pynciau.

Tra bod nifer o opsiynau wedi eu hystyried, mae'r adroddiad yn dweud y byddai rhai ohonyn nhw wedi golygu gostyngiad sylweddol yn nifer y staff, ehangder y cwricwlwm a chyfleoedd i ddysgwyr, ac y byddai hynny'n cael effaith ar ansawdd yr addysg.

Mae swyddogion yn dweud bod yna fanteision i sefydlu dwy ysgol ar wahân.

Byddai disgyblion yn parhau i fynd i'r un safle a byddai tîm rheoli gwahanol yn y ddwy ysgol i ganolbwyntio ar eu hanghenion a'u blaenoriaethau nhw.

Mae'r adroddiad yn nodi fod ymchwil yn awgrymu y byddai'r ddwy ysgol yn gynaliadwy yn ariannol ac y byddai bwrw ymlaen â'r cynllun yn cynyddu capasiti addysg uwchradd cyfrwng Cymraeg yn y sir, gan gyfrannu ar dargedau'r cyngor a Llywodraeth Cymru ar gyfer addysg cyfrwng Cymraeg.

Maen nhw'n ychwanegu eu bod wedi rhagweld y byddai'r Gwyndy yn datblygu yn ysgol ar wahân maes o law cyn i'r safle agor ym Medi 2013.

Mae'r cyngor yn rhybuddio er hynny y bydd angen strategaeth ar wahân i fynd i'r afael â'r diffyg ariannol, oedd yn £2.7m ar ddiwedd y flwyddyn ariannol ddiwethaf.

Heb weithredu, maen nhw'n dweud y gallai'r ddyled barhau i gynyddu gymaint â £1m y flwyddyn.

Mae swyddogion wedi argymell fod y cabinet yn cymeradwyo'r cynllun ac yn bwrw ymlaen gydag ymgynghoriad.

Bydd pwyllgor craffu addysg y cyngor yn ystyried y cynllun ddydd Mawrth.

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.