KALLATTIIN, Netaaniyaahuun paayileetiin balaliisaa biraa waraanuun xiyyaara Israa'el deemaa ture kuffiisuuf yaale to'atamuu hime

Haguuggii Tamsaasa Kallattii

1. 30 Fuulbaana 2026Paayilatiin qilleensarratti paayilatii biraa waraane xiyyaara kuffisuuf ture jedhe MM Netaaniyaahuu

   

   Madda suuraa, EPA

   Ministirri Muummee Israa'el Benjamiin Netaaniyaahuu ibsa miidiyaaleef kenneen Xiyyaara osoo gara Tel Aviiv balali'aa jiruu Paayilatiin tokko isa biraa albeen waraanuun xiyyaaricha kuffisuuf turee jedhe.

   Paayilatiin gochicha raawwate to'atamee aanga'oota Saawudiin qoratamaa jira jedheera Netaaniyaahuun.

   Haala kutaa teessoo Paayilatii keessa ture fi akkaataa miseensonni balalii kaan Paayilatii balaa geessisa to'atanii xiyyaara daandiitti deebisan ibseera. Warra xiyyaarichaa fi lubbuu namoota achi keessa turanii baraares galateeffateera.

   Ministirri Ittisaa Israa'el Israa'el Kaatz ammoo wanti mudate ''haleellaa shororkaa Jihaadistootaatii jedhe.

   Qorannoo hanga ammaa jiruun Paayileetichi xiyyaara kuffisuun imaltoota hunda galaafachuu kaayyeeffachuu agarsiisa jedhe.

   Taateen sun yaalii shororkeessummaa Jihaadistootaati jechuun imaltoota Israa'el paayilatii balaa raawwatetti duulan jajeera.

2. 30 Fuulbaana 2026Imaltoonniifi 'paayiletiin gooti' balaa guddaa uumamuuf ture oolchan -Ambaasaaddara Israa'el

   

   Madda suuraa, Reuters

   Dhaabbata Biyyoota Gamtoomanii (UN)tti ambaasaaddarri Israa'el paayiletiin "gooti" xiyyaara Flydubai gara Tel Aviivitti balali'aa osoo jiruu kallattii jijjiirsifamee imaltoota oolchuudhaaf " akka leencaatti lola" jedhe.

   "Imaltoonni har'a balalii xiyyaaraa Dubaay irraa gara Israa'el taasiserra turan muraannoofi gargaarsa barbaachisu taasisuun balaa hamaa dhufuuf ture hambisaniiru," jechuun fuula X isaarratti barreesse Daanii Daanon.

   "Galanni Paayiletii Emireetii goota kanaa akka leencaatti loluun lubbuu imaltootaa oolche kun guddaadha," jedhe itti dabaluun.

   "[Paayiletiin] kun dafee akka fayyu, imaltoonni hundi ammoo nagaan gara mana isaaniitti akka galan nan hawwa."

3. 30 Fuulbaana 2026Peep Gaardiyoolaa gareesaa duraanii Maanchister Siitii waliin akka dhaabatu hime

   

   Madda suuraa, Getty Images

   Maanchister Siitiin seera faayinaansii Piriimiyeer Liigii Ingilz cabsuun himannaawwan 115n badiin irratti argamuu booda kilabicha waggoota sagaliif kan leenjise Peep Gaardiyoolaa gareesaa duraanii waliin akka dhaabatu hime.

   ''Deeggartootni Maanchister Siitii marti guutuu addunyaarra jirtan akka beektan kaniin barbaadu isin waliinin jira, yoomiyyuu caala'' jechuun barreesse.

   ''Duraan, ammas, fuula duraattis kilaba koo, abbaa qabeenyaa, durataa'aakoo, Feraan, taphattootaa, garee leenjistootaa, leenjisaa Enzoo fi deeggartoota adda taatan kana duukaan dhaabadha'' jedhe Gaardiyoolaan.

   Waan tokkon ifa isinii godha. Waan kan waliin taanee keessa dabarra'' jechuunis hime.

   ''Isinin jaaladha'' jechuunis barreesse.

   Himatni Siitiirratti dhiyaate yeroo bara 2009 hanga 2018 kan jiru yoo ta'u Gaardiyoolaan bara 2016 Siitii leenjisuu eegale. Kan bara 2017/18 dabalatee waancaa liigichaa jaha mo'ateera.

4. 30 Fuulbaana 2026Paayilatootni qilleensarratti wal reeban, tokko waraaname xiyyaarris kallattii jijjiirrate

   

   Madda suuraa, Reuters

   Xiyyaara Dubaayii ka'ee gara Tel Aviiv imalaa ture irratti paayilatoota gidduu walitti bu'insi dhalatee paayalatiin tokko waraanamuu booda imalli xiyyaaraa gufate.

   Xiyyaarri silaa gara Israa'el qajeele Israa'el qajeele deebi'ee Saawudi Arabiyaa qubachuuf dirqameera.

   Miidiyaaleen Israa'el paayiletoota gidduu walitti bu'insi dhalachuu himaniiru.

   Guutummaa oduu kanaa asiin argattu

5. 30 Fuulbaana 2026MM Abiy sagantaa ijaarsa warshaa boba'aa jalqabsiisuu irratti hirmaachuuf Keeniyaa jiru

   

   Madda suuraa, FBC

   Ministirri Muummee Itoophiyaa Abiy Ahmad sagantaa ijaarsa giddugala boba'aa qulqulleessu irratti argamuuf Keeniyaa jiru.

   Giddugalli kun Keeniyaa, Laamuutti abbaa qabeenyaa Aliikoo Daangooteetiin ijaarama. Doolaara biiliyoona 16n ijaarama.

   Ijaarsa giddugala kanaa jalqabsiisuuf sagantaa qophaa'erratti MM Abiy, Pirezidantiin Keeniyaa Wiiliyaam Ruutoo fi aanga'oonni kaan ni argamu.

   Giddugalli Baha Afrikaa keessatti isa guddaa ta'e kun guyyaatti boba'aa baarmeela kuma 700 qulqulleessa jedhame.

   Ijaarsi giddugalaa kanaa eegalamuun labsamuu dura jiraattonni naannoo beenyaa ga'aa hin arganne jechuun mormii dhageessisaniiru.

   Biiliyeenarri Afrikaa Aliikoo Daangootee dhimma kanarratti wayita BBCtti dubbatu, dantaa namoota faayidaa barbaadaniitu keessa jira jechuun mormii kana gatii dhabsiise.

   Pirojektiin kun akkuma karoorfametti bara 2030 xumuramee tajaajila eegala jedhe.

   Dureessi Afrikaa kun Itoophiyaa keessaas pirojektiiwwan gurguddoo qaba.

   Isaan keessaa ijoon warshaalee simintoo fi xaa'ooti.

   Warshaan xaa'oo dolaara biliyeena 2.5 baasu Naannoo Somaalee, Godee keessatti ijaaramaa jira.

   Yeroo xumuramu warshaawwan xaa'oo gurguddoo Afrikaa keessaa tokko ta'a jedhamees eegama.

   Mootummaan Itoophiyaafi dureessi Afrikaa lammii Naayijeeriyaa ta'e Aliikoo Daangotee waliin ta'uun warshaa xaa'oo guddaa ijaaruuf waliigaltee kan mallatteessan Hagayya 29, 2025 ture.

   Warshicha gahee abbaa qabeenyummaa dhibbeentaa 60 kan Dangote Group yoo ta'u dhibbeentaa 40 ammoo kan Itoophiyaa ta'a.

   MM Abiy dureessa Afrikaa Aliikoo Daangootee waliin Caamsaa darbe wayita iddoo warshaan kun itti ijaaramaa jiru daawwatan, Aliikoon nama kutannoo qabu ta'uu ibsuun jajan.

   ''Aliikoo Daangotee nama kutannoo qabudha. Waadaasaa eeguun maallaqa, yeroo, hojjettoota... hunda hojiitti galcheera. Nutis itti dhiheenyaan hordofuun rakkoo Itoophiyaa keessa jiru furuun hojii kana ni milkeessina,'' jedhan.

   

   Madda suuraa, Getty Images

6. 30 Fuulbaana 2026Kantiibaa Finfinnee ta'uun irra deebiin kan filataman Aadde Adaanech Abeebee eenyu?

   

   Madda suuraa, EBC

   Godina Arsii Aanaa Asakoo keessatti dhalatanii kan guddatan Aadde Adaanach Abeebee, dubartoota dirree siyaasaa Itoophiyaa keessatti adda durummaan mul'atan keessaa tokko.

   Kantiibaa magaalaa Finfinnee ta'uu dura Ministeera Haqaa fi Minsteera Galiiwwanii dabalatee dhaabbilee mootummaa sadarkaa garagaraatti waggootaaf hooggananiiru.

   Ammas irra deebiin kantiibaa magaalaa Finfinnee ta'uun filatamaniiru.

   Kanneen isaan dinqisiifatan 'Aadde Adaanech nama iddoowwan deemanitti waan baay'ee jijjiiran' jedhanii isaan jaju.

   Isaanis "hamma sammuun kootis, Waaqnis beekutti fedhii ykn faayidaa dhuunfaa hinqabu, akka lammii tokkootti yoo ta'e malee," jedhan.

   'Akka lammii tokkotti yoo ta'e malee fedhii dhuunfaa hinqabu' - Aadde Adaanech

7. 30 Fuulbaana 2026Ameerikaan kubbaaniyyaawwan Raashiyaa bittaa meeshaalee waraanaa Iraan waliin hidhata qabu jette irra qoqqobbii keesse

   

   Madda suuraa, Reuters

   Qoqqobbiin Ameerikaan Raashiyaarra keesse kun kubbaaniyyaawwan lama, namoota dhuunfaa hedduu fi dhaabbilee garaagaraa irratti xiyyeeffate.

   Biiroon maallaqaa Ameerikaa qoqqobbii kana Raashiyaarra kan kaa'e.

   Bittaa meeshaalee waraanaa Iraan waliin hidhata qabu jechuun qoqqobbiin labsame kun kubbaaniyyaawwan Raashiyaa keessa jiran dabalatee namoota dhuunfaa Hoong Koong, Chaayinaa fi Paakistaan keessatti argaman 13 kan ilaallatuudha.

   Ameerikaan akka Iraan dhiibbaa diinagdee jala galtuuf duulli gaggeessitu itti fufuu ibsiti.

   Kubbaaniyyaawwan Raashiyaa qoqqobbiin irra kaa'ame keessaa maashinoonni gurguddoon meeshaalee waraanaa geejjibsiisan fi warshaaleen oomisha xiyyaarotaa isaan ijoo ta'uu Rooyitars gabaaseera.

   Kanaan dura Raashiyaan diroonii fi meeshaalee waraanaa kaan Iraaniif kennuu gabaasonni mul'isan ba'aa turan.

   Raashiyaan weerara Yukireen irratti eegaluu hordofee hariiroon Tehraan fi Moskoo akkaan dabaleera.

   Bara jalqabaa waraanni Yukireen jalqabe Iraan dirooniiwwan ''Shahid'' jedhaman Raashiyaaf kennitee turte.

   Gatii kanaa ammoo Raashiyaan wayita Iraan US waliin waraanatti jirtu Tehraan bira dhaabbatte.

   Pirezidantiin Raashiyaa Vilaadmiir Puutin walitti bu'iinsa Ulaa Hormuuz irratti US fi Iraan gidduutti taasifamu hunda keessatti Iraan deeggaruu akka itti fufan ibsaniiru.

   Akkasumas meeshaalee barbaachisan hunda Iraaniif akka dhiheessan ibsaniiru.

8. 30 Fuulbaana 2026Xiyyaarri Dubaay irraa gara Israa'el balali'aa ture paayileetonni wal reebnaan Sa'uudii qubate

   

   Madda suuraa, LightRocket via Getty Images

   Xiyyaarri Flydubai Flight FZ1073 jedhamu kun Roobii Fulbaana 30, 2026 UAE, magaalaa Dubaay irraa gara Israa'el, Tel Aviiv balali'aa ture.

   Garuu gidduutti balaliistonni waan wal reebaniif osoo Tel Aviiv hin ga'in Sa'uudii Arabiyaa qubateera.

   Qondaalonni Israa'el taateen kun kan mudate sababa xiyyaarri butameef (hijack) osoo hin taane, dhibdeen paayileetota gidduutti waan uumameef ta'uu ibsan.

   Dubbi himaan daandii qilleensichaa xiyyaarri kun osoo gara Tel Aviiv balali'aa jiruu ''taatee'' isa mudateen buufata xiyyaaraa kaaba lixa Sa'uudii Arabiyaatti argamu Tabuk jedhamu qubachuu ibse.

   Taatee kana booda imaltoonni xiyyaaricha keessa turan hunduu nagaa taate ibse dubbi himaan kun.

   Qondaalli mootummaa Israa'el eenyummaasaa dhoksuun Rooyitarsiif yaada kenne, taateen kun sababa paayileetonni wal reebaniif mudachuu dubbate.

   Paayileetota wal lolan kunneen keessaa tokkoonsaanii xiyyaarri kun gara Sa'uudii akka goruuf dantaa qabaachuun ifa miti.

   Intalli isaa Miriyaam jedhamtu xiyyaaricha keessa turuu kan hime Yasmin Abuu Kasis intallisaa waan argitee itti himte akkanaan dubbate.

   ''Jalqaba sagalee iyyu dhageenye. Namni tokko albee qabateera. Paayileetii tokko lafatti kuffise. Sana booda lafti hundi dhiiga ta'e.''

   Waajjirri Ministira Muummee Beenjaamiin Neetaaniyaahuu dhimma kana irratti dubbachuu fi ''taateen mudates to'annoo jala ooluu'' ibse.

   Lammiilee Israa'el xiyyaaricha keessa turan biyyatti deebisuuf tattaaffiin eegaleera jedhe.

   Israa'el hariiroo dippiloomaasii gaarii fi seera qabeessa ta'e Sa'uudii waliin hin qabdu.

   Flydubai guyyuu tajaajila balalii Dubaay fi Tel Aviiv gidduutti kan kennu yoo ta'u, lammiilee Israa'el biratti akkaan beekama.

   Isaantu irra guddaa itti fayyadamas.

   Balaliin UAE fi Israa'el gidduutti taasifamu wayita Sa'uudii Arabiyaa qubatu kun kan jalqabaa miti.

   Fulbaana 2025 taateen walfakkaataan mudatee ture.

   Yeroo sababa rakkoo fayyaan walqabatuun xiyyaarri Dubaay irraa gara Tel Aviiv balali'aa ture Riyaaditti goruun tasa qubatee ture.

9. 30 Fuulbaana 2026Adde Adaanech Abeebee kantiibaa magaalaa Finfinnee ta'uun irra deebiin filataman

   

   Madda suuraa, FBC

   Manni maree afraffaa Magaalaa Finfinnee kora isaa jalqabaa Roobii, Fulbaana 30, 2026 gaggeesseen Aadde Adaanech Abeebee kantiibaa magaalichaa gochuun irra deebiin filateera.

   Aadde Adaanech waggoota shanan darbaniif kantiibaa magaalattii ta'uun kan tajaajilaa turan yoo ta'u, bara bulchiinsa isaanii guddinni magaalattii akka biyyaattis akka Afrikaattis ajaayibsiifannaa argateera.

   Aadde Adaanech waadaa galuun wayita haasaa taasisan misooma magaalattii daran saffisiisuun akkaataa jiraattonni magaalattii irraa fayyadamanii milkeessuuf akka hojjetan ibsaniiru.

   Korri mana maree magaalaa Finfinnee kun muudama adda addaa ni raggaasisa jedhamee eegama.

   Marii biyyaalessaa dhiheenya gaggeeffamerratti dhimmi magaalaa Finfinnee akkaan falmisiisaa ture.

   Wayita dhimma magaalattii falmisiisaa ta'ee jirutti kantiibaa magaalattii ta'uun hoji manee gudaa ta'uunsaa waan oolu miti.

10. 30 Fuulbaana 2026Manni Maree Magaalaa Finfinnee kora mootummaa haaraa hundeessuu eegale

    

    Madda suuraa, FBC

    Manni Maree Magaalaa Finfinnee erga filannoon waliigalaa torbaffaan gaggeeffamee kora isaa jalqabaa eegale.

    Korri Mana Maree 4ffaan miseensonni filataman kan itti mootummaa haaraa hundeessaniidha.

    Korri kun Afa-yaa'ii haaraa filachuun kan eegale yoo ta'u, kantiibaa haaraa dabalatee muudama adda addaa ni raggaasisa jedhamee eegama.

    Waggoota shanan darbaniif Afa-yaa'ii mana marechaa kan turan Aadde Buzeenaa Alkadir ammas irra deebiin filatamaniiru.

11. 30 Fuulbaana 2026Qataar akka US fi Iraan waliigalaniif dhiibbaa uumaa jiraachuu ibsite

    

    Madda suuraa, Anadoulu

    Qataar Iraan fi Ameerikaa gidduutti waliigalteen nagaa akka milkaa'uuf dhiibbaa dippilomaasii gochuu beeksifteetti.

    Dubbi himaan Ministeera Dhimma Alaa Qataar Majiid Al-Ansaarii “gama lachuunuu ergaa wal jijjiiraa jirra. Waliigaltee walitti bu’iinsa kanaa irraa hunda keenya baraaruu danda’u ijaaruuf hojjechaa jirra,” jedhan.

    Ji'oota saddeetiif waraanatti kan jiran Ameerikaa fi Iraan, hanga yoonaa mari'atanii waliigaluu hin dandeenye.

    Kora UN torban darbe gaggeeffame irratti tattaaffiin dippilomaasii cimee kan ture ta’us, dhimma Ulaa Hormuuz ilaalchisee garuu waliigalteen irra ga'ame hin jiru.

    Waliigaltee dhukaasa dhaabuu Waxabajjii darbe mallattaa'e mijeessuu keessaa ga'ee kan qabdu Qataar, ammas waraanni akka dhaabbatuuf tattaaffii gochaa jirti.

    Kibxata, Fulbaana 29, 2026 qondaaltonni U.S fi Iraan mariisistoota Qataar waliin mari'ataniiru.

    Haa ta'u malee, mariin kun itti fufee gaggeeffamuu fi dhiisuu isaa hanga ammaatti wanti beekame hin jiru.

    Traamp irra deddeebiin Iraan meeshaa niwukilaraa qabaachuu akka hin dandeenyee fi waldhabdeen kun yeroo dhiyootti akka xumuramu ibsa..

    Walitti bu'iinsi kun humna ittisaa Iraan irratti miidhaa guddaa kan geessise yoo ta'u, diinagdeen biyyattii duraanuu laafaa ture daran akka miidhamu taasiseera.

12. 29 Fuulbaana 2026Hogganaan Burkinaa Faasoo bu'aa albuudaa biyyattii keessa argamu oolchuuf warshaa warqee qulqulleessu bane

    

    Madda suuraa, Burkina Faso presidency/Facebook

    Mootummaan waraanaa Burkina Faasoo warshaa warqee qulqulleessu isa jalqabaa bane.

    Qabeenya biyyattiin qabdu biyya keessaatti fayyadamuu fi albuuda ijoo to'achuuf tarkaanfii fudhatame ta'uun himameera.

    Hogganaan waraanaa Ibraahim Tiraayooree warshaan kun kan baname hirkattummaa biyyi isaanii albuuda qopheessuuf biyyoota alaa irratti qabdu hir’isuuf akka ta’e himaniiru.

    "Albuuda keenya hunda asitti ni qopheessina. Gabaa guutuun kan keenya akka ta'u barbaanna," jechuun eebba warshichaa irratti dubbateera.

    Burkina Faasoo Afrikaa keessatti warqee oomishtuu guddaa yoo taatu, mootummaan biyyattii garuu damee albuuda al-seerummaa to'achuu irratti qormaata mudateera.

    Dameen albuudaa fincila jihaadistootaan akka malee miidhameera.

    Mootummaan waraanaa Burkinaa Faasoo gara giddugala warqee itti qopheessanitti jijjiiruuf karoora qaba.

    Omishni warqee dabaluu kanaaf deebii kennuudhaan bulchiinsi Ibraahim Tiraayoree waggaa lama dura dhaabbata albuudaa mootummaan bulchu hundeesse.

    Dhaabbileen albuudaa biyya alaa mootummaaf qooda %15 kennuu kan qaban yoo ta’u, hojjettoota biyya keessaa leenjisuufis dirqama qabu.

13. 29 Fuulbaana 2026Loltoonni Ameerikaa waggoota kurnan lama booda Iraaq gadhiisuuf

    

    Madda suuraa, Reuters

    Loltoonni Ameerikaa hanga Roobii Iraaq keessatti buufata isaanii isa dhumaa hafe keessaa ba’uuf qophaa’aa akka jiran himamaa jira. Waraanni kun bahuun Iraanii fi michoota ishee biratti akka injifannootti ilaalameera.

    Waraanni Ameerikaa waggoota kurnan lamaa oliif Iraaq keessa ture, loltoota isaa 4,500 ol dhabeera.

    Ogeeyyiin nageenyaa Iraaq akka jedhanitti, bahuun pirezidaantii Joo Baayiden jalatti waliigalamee fi bulchiinsi Doonaald Tiraamp waraana Iraan waliin geggeeffamaa jiru gidduutti kan raawwatame yoo ta’u, Tehraanii fi michoota ishee bilisummaa sochii guddaa kennuu fi diinota Ameerikaa biroo kan akka garee Islaamummaa deebisee jabeessuu danda’a.

    Xiinxalaan nageenyaa Iraaq kan gareewwan hidhattoota Iraan waliin hidhata qaban qoratan Jaassim al-Bahadli, ''humnoonni gamtaa kanaa bahuun Iraaniif faayidaa tarsiimoo qabaata, sababiin isaas waraana waggootaaf dhiibbaa Tehran Iraaq keessatti qabduuf akka faallaa ta'ee tajaajilaa ture ni buqqisa,'' jedhan.

    Gareen hidhattootaa Iraan waliin michuu ta'an, Ameerikaan bahuu ishee sochii isaaniif injifannoo akka ta'etti ilaaluu qofa osoo hin taane, haala kana fayyadamuun ''murtee nageenyaa fi siyaasaa irratti dhiibbaa guddaa argachuuf'' akka yaalan tilmaamu.

    Garee Islaamiik Reeziztaansi in Iraaq jedhamu kan hoogganu Abu Mojtaba al-Yasiri, humnoonni Ameerikaa bahuun isaanii “Diddaa Islaamaa Iraaq fi ummata Iraaq guddaaf injifannoo seena qabeessa, pirojektii Ameerikaaf ammoo kufaatii guddaa” jechuun ibsaniiru.

    “Adoolessa 30, 2019, seenaa Iraaq keessatti boqonnaa dukkanaa’aa cufamuu fi weerarri kun fedhii isaa biyya keenya irratti fe’uuf yaaliin godhe fashalaa’uu isaa yaadanna,” jechuun Rooyitarsiif himaniiru.

    "Iraaq abbaa biyyummaa ishee humnoota alaatiin osoo hin taane, qabsoo fi kutannoo ummata isheetiin mirkanaa'uu akka danda'u mirkaneessiteetti," jechuun dabalaniiru.

    Waraanni Ameerikaa Iraaq ifatti weeraruun Saadaam Huseen aangoo irraa kaase Amajjii bara 2003 akka lakkoobsa Awurooppaatti.

14. 29 Fuulbaana 2026Gaazexeessaan Yugaandaa mootii tahuun gonfoo keewwachuuf

    

    Madda suuraa, Ngabo Amon/ BBC

    TV biyyaalessaa Yugaandaa keessaa gaazexeessaan hojjetuufi namni ganna 56, Ilmi Mootii Edwaard Ruukiidii Kijaanaangoomaa Niyaaboongoo 2ffaa bulchiinsa mootummaa aadaa afur biyyattii keessaa mootii mootummaa Tooroo jedhamutt tahuun gonfoo mataarra keewwachuufi.

    Namni umriisaanii ganna sadiitti aangootti dhufanii waggaa 31f kan hogganaan turan Oyoo Niiyimbaa Iguuruu Ruukidii 4ffaa dhukkuba kaansariin umriisaanii ganna 34 lubbuun isaanii darbuun hordofee adeemsi muudamaa atakaaroo keessa seenee ture.

    Aadaa kana keessatti ilma mootii ifatti beekamutu mootii du'e bakka bu'uu danda'a,kuni tahuu dhabuurraan atakaaroon kuni ka'e.

    Maatiin akka jedhanitti mootiin duraanii Oyoon daa'ima xiqqoo kan qabu yoo mootiin itti aanus isa akka tahu dhaame du'e.

    Tahus daa'imni kuni ifatti namatti mul'atee hin beeku kanamalees koreen nama 21 qabus dhimma kana hin mirkaneessine.

    Mootiin inni du'e Oyoon ifatti aangootti hin muudamne waa'ee ijoolleefi haadha warraa isaaniis waanti beekamu hin jiru jedhameera.

    Haa tahu malee haati mootii duraanii akkaatuma ergaa dhaammataniin muudamni taasifamuu qaba jechuun falmu.

    ''Mootii haaraa dhufeef sirni kan taasifame iddoo mucaan koo awwaalamee meetira muraasa siqeeti,'' jechuun dubbiin ''hadhooftuu dha,'' jedhan.

    Haa tahu malee koreen gonfoo kana kennu aadaa Tooroo bu'uura godhachuu jechuudhaan fedhii haadha mootii duraanii kufaa godheera.

15. 29 Fuulbaana 2026MSF namoonni madaa'anii hospitaalota Koram, Allaamaaxaa fi Shireetti yaalamaa jiran 720 ga'uu ibse

    

    Madda suuraa, Doctors without Boarders

    Dhaabbatni Doctors without Boarders jedhamu lola Kaaba Itoophiyaatti gaggeeffamuu eegaleen lakkoofsi namoota madaahanii akkaan dabaluu beeksise.

    Dhaabbatichi ibsa Wiixata Fulbaana 28/2026 baaseen magaalota naannoo Tigraay Allaamaaxaafi Koram jedhamanitti lakkoofsi namoota madaahaanii akkaan dabalaa jiraachuu hime.

    Dhaabbatichi Fulbaana 22 hanga 25 gidduu lakkoofsi namoota lola adeemaa jiruun madaahanii 180 irraa gara 420 guddachuu beeksiseera.

    Madoo hedduun gara hospitaalota Koramiifi Allaamaaxaa yaa'aa waan jiraniif sochii lubbuu baraaruusaa jabeessuu dhaabbatichi ibseera.

    Deeggarsa dhaabbatichaan Fulbaana 25 namoonni miidhaman 300 ta'an hospitaala Kaaba Lixa Tigraay, magaalaa Shireetti argamu, Iskuul Hospitaala jedhamu seenaniiru.

    Doctors without Boarders namootni waraana adeemaa jiraniin madaahan warra waraanatti jiran haata'uu namoota nagaa lola keessa rukutaman haa ta'u adda hin baafne.

    Ammoo hospitaalota Sheraaroo, Shiree fi Koram keessatti fayyaa haadholiifi daa'immanii dabaltee tajaajila fayyaa kennamu cimsuuf tattaafachaa jiraachuu hime.

    Odeessa dabalataa asii banachuun dubbisaa.

16. 29 Fuulbaana 2026Iraan karoora marii Ameerikaaf dhiheessitee deebii eegaa jirti

    

    Madda suuraa, EPA/Shutterstock

    Ministirri dhimma alaa Iraan Abbaas Araagchii biyyi isaanii karoora marii qabxiilee torba qabate karaa mariisistoota Qataar gara Ameerikaatti ergitee deebii eegaa jiraachuu ibsan.

    Kora Dhaabbata Biyyoota Gamtoomaniif wayita Niwu York turan gaazexeessitootti kan dubbatan Abbaas Araagchii, ''karoorri Tehraan qabxii torba qabu Waashingitan gaheera. Waayit Haawus karaa mariisistootaa akka deebii kennitu eegaa jirra,'' jedhan.

    ''Galmi keenya ijoon Ameerikaan haal-dureewwan keenya akka bartuudha. Addunyaan akka Iraan karoora qabdu baruu qabdi. Haal-dureewwan keenya haqa qabeessaa fi sababaan kan deeggarameedha. Ameerikaan furmaata naga qabeessa akka barbaaddu ibsiti. Nutis furmaatuma kana dhiheessine.''

    Ministirri dhimma alaa Abbaas Araagchii biyyisaanii Iraan sagantaa nukilaraa isheerratti ''ejjennoo qabdu laaffisteetti,'' gabaasa jedhu kuffisaniiru.

    ''Hololli dhagahamaa ture. Garuu ejjennoon Iraan akka hin geeddaramne ibsuu feena. Ulaa Hormuuz banuurratti karoorri qabnus ifa,'' jedhan.

17. 29 Fuulbaana 2026Akkam jirtu?

    Tamsaasa kallatttii eegalleerra. Mariin Iraan fi US ammallee gar tokkotti hin baane.

    Dhimma kanaa fi haala Baha Giddugaleessaa akkasumas odeeffannoo biyya keessaa fi addunyaa isin biraan geenya.

    Tamsaasa kallattii armaan duraa asii banachuun odeeffannoo argachuu dandeessu.

    Akkasumas odeessaalee keenya karaa Marsariitii (Website), Instagram, YouTube, Facebook, WhatsApp fi TikTok keenyaas ni argattu.