KALLATTIIN, UAEn haleellaa humnoonni TPLF raawwatan balaaleffachuun walabummaa Itoophiyaa mirkaneessuu akka deeggartu ibsite

Haguuggii Tamsaasa Kallattii

1. Sa'aatii 7 duraPaaspoortiin Itoophiyaa sadarkaa 88ffaa argate

   

   Madda suuraa, Immigration and Nationality Affairs

   Dhaabbatni Passport Index jedhamu gabaasa baaseen bara 2026 keessa jijjiiramoota imaammata viizaa biyyootaa fi dhimmoota kaanis ilaalcha keessa galchuun paasportii biyyoota addunyaaf sadarkaa yoo baasu Itoophiyaa sadarkaa 88ffaarra kaaheera.

   Paaspoortiin UAE viizaa malee biyya 138tti akka imaltu sii hayyama, Biyyoota 44 ammoo battala qubattetti viizaa sii kennisiisa, paasportii kanaan dursitee viizaa qabaachuu dirqama kan godhan biyyoota 16 qofa.

   Kanaanis UAEn paasportii jabaa addunya qabaachuun dursiti.

   Singapooriifi Ispeen itti aanuu jedha dhaabbatichi. Itoophiyaan viizaa malee kan imaluu dandeessu biyya 13tti qofa.

   Biyyoota 34tti yeroo imaltu battala qubatteetti viizaa sii kennu. Biyyootni hafan 147 dursitee iyyattu malee akka seentu sii hin hayyaman.

   Sababa kanaattis kutaan addunyaa ati paasportii Itoophiyaa qabaachuu keetiin qaqqabdu dhibbeenta 26 qofa.

   Kan UAE osoo qabaatte kutaa addunyaa dhibbeentaa 91tti salphaatti deemuu dandeessa.

   Afrikaa keessaa biyyootni jalqabaa paaspoortii jabaa qaban walduraa duubaan Siicheels, Mooriisheesiifi Afrikaa Kibaadha.

   Warri Siisheels biyya 106tti viizaa malee simatamu.

   Biyyootni Itoophiyaan viizaa malee daawwattu ijoon Toogoo, Keeniyaa, Gaambiyaa, Ruwaandaa, Baniin, Baarbadoos, Domeenikaa, Heeyitii, Mikronesiyaa, Filippiins, Singaapoor fa’adha

   Biyyootni Afrikaa shan sadarkaan paaspoorti isaanii kan Itoophiyaatiin gadi ta’eera. Isaanis walduraa duubaan Sudaan, Liibiyaa, Sudaan Kibbaa, Eertiraafi Somaaliyaadha.

2. Sa'aatii 8 duraDhiyeenya Johaanisbargitti reeffi dubartii kan biraa argame

   

   Madda suuraa, Getty Images

   Poolisiin Afrikaa Kibbaa ajjeechaa dubartootarratti raawwatamuun walqabatee qorannoo gaggeessaa wayita jirutti dhiyeenya magaalaa Johaanisbargitti reeffi dubartii biraa argamuu beeksise.

   Kuni ji'oota muraasa gidduutti lakkoofsa dubartoota ajjeefamanii argamanii kudhaniin gaheera.

   Poolisiin ajjeechaawwan kana duba namni ykn gareen addatti xiyyeeffatee dubartoota ajjeesu jira jedhee akka shakku beeksise.

   Reeffii dubartii 10ffaa kanaa kan argame Sambata xiqqaa yoo ta'u hiriyaashee galgala waliin mana dhugaatii turanteen argame.

   Afrikaa keessatti lakkoofsi dubartoota ajjeefamanii argamanii dabaluun biyyattii keessatti dheekkamsa kaaseera.

   Haleellaan dubartoota irratti raawwatamu yeroo kamuu caala dabalaa dhufeera.

3. Sa'aatii 8 duraDr Abrahaam Balaay Komishinira Komishinii Annisaa Niikuleera Itoophiyaa ta'uun muudame

   

   Madda suuraa, Office of the Prime Minister-Ethiopia

   Waajirri Ministira Muummee Itoophiyaa Dr, Abrahaam Balaay komishinara Komishinii Anniiaa Niikuleeraa Itoophiyaa ta'uun muudamuu beeksise.

   Dr Abrahaam amma dura Ministira Ittisaa Itoophiyaa akkasuma hoji gageessaa bulchiinsa yeroo naannoo Tigraay ta'uun sadarka olaanaatti tajaajileera.

   Muummichi Ministeeraa Abiy eebba Hidha Haaromsa Guddicha Itoophiyaa irratti "pirojektoota gurguddoo" mootummaan doolaara biiliyoona 30n ijaaruuf karoorfate keessaa tokko buufata anniisaa niwukilaraa ta'uu beeksisuun isaa ni yaadatama.

   Itoophiyaan Raashiyaa waliin ALI Fulbaana 15, 2018, buufata anniisaa niwukilaraa ijaaruuf waliigaltee mallatteessite.

   Waliigalteen kun kan mallattaa'e Ministirri Muummee Abiy fooramii Atoomawaa irratti hirmaachuuf Raashiyaatti imalanii wayita tureedha.

   Itoophiyaan madda anniisaa kana fayyadamuuf waggoota dheeraaf karoorfattee kan turte yoo ta'u, warshaa anniisaa niwukilaraa akka ijaartu kan beeksiste yoo ta'u, amma dhaabbata mootummaa jalqabaa pirojektii kana bulchu hundeessiteetti.

   Saandookaan Debbebee kan Komishinii Anniisaa Niikuleeraa Itoophiyaa yeroo jalqabaaf akka hoogganu muudame amma garam akka ramadame ifa hin taane.

   Saandookaan Onkololeessa 2025 ture muudamuunsaa kan dhagaahame.

4. 26 Fuulbaana 2026UAE'n haleellaa humnoonni TPLF raawwatan balaaleffachuun walabummaa Itoophiyaa mirkaneessuu akka deeggartu ibsite

   

   Madda suuraa, Prime Minister Office

   Yunaayitid Arabi Emireetis (UAE) TPLF fi michoonni isaa haleellaa humnoota mootummaa federaalaarratti raawwatan jedhe balaaleffachuun walabummaa Itoophiyaa mirkaneessuuf akka deeggartu beeksifteetti.

   Emireetis kana kan jette ibsa Jimaata Fulbaana 25, 2026 fuula Embaasii biyyattii Finfinnee jirurratti baasteenidha.

   TPLF buufataaleen Tigraay sadii naannoo Tigraay keessatti argaman to'achuu fi walitti bu'iinsi gara naannolee Amaaraa fi Affaaritti babal'achuu isaas cimsitee akka balaalleffattu ibsuma kanaan beeksifteetti.

   Mootummaa Itoophiyaa fi TPLF gidduutti Roobii Fulbaana 23, 2026 kan jalqabame yoo ta'u, gama daangaa Amaaraa fi Affaariin waraanni gaggeeffamaa jiraachuun gabaafameera.

   Ministirri dhimma alaa UAE Sheek Shaakbuut Biin Naahiyaan Al - Nahiyaan, taateewwan kunneen tokkummaa Itoophiyaa, walabummaa, akkasumas nagaafi tasgabbii irratti yaaddoo kan fidan ta'uu ibseera.

   Ministirichi UAEn mootummaa Itoophiyaa fi hummata biyyattii cinaa guutummaan guutuutti akka dhaabbattu ibsuun, yaalii sirna heera mootummaa Itoophiyaa humnaan ykn qabsoo hidhannoon jijjiiruuf taasifamu kamiyyu akka hin deeggarre ibseera.

   UAEn walabummaa Itoophiyaa, tokkumaa daangaa, nageenyaa,fi tasgabbii isheetiif deeggarsa addaan hin cinne akka kennitu Sheek Shaakbuut ibseera.

   Yunaayitid Kingidam, Faransaay, akkasumas Ameerikaan haleellaa humnoonni Tigraay naannolee ollaa ta'aniifi kibba Tigraay keessatti raawwatan jedhaniifi buufataleen xiyyaaaraa naannoo Tigraay keessa jiran to'achuu isaanii balaaleffataniiru.

   Itoophiyaatti ambaasaaddarri Ameerikaa Erviin Masiingaa Fulbaana 23, 2026 waraana kaaba Itoophiyaatti baname ilaalchisee aanga'oonni TPLF "haleellaa bal'aa banuu isaanii" qeeqeera.

   Faransaay fi Yunaayitid Kingidam waraana kaaba Itoophiyaatti deebiyee ka'e ilaalchisuun ibsa Kamisa Fulbaana 24, 2026 adda addaan baasaniin gocha TPLF abaaraniiru.

   Ministirri dhimma alaa Yunaayitid Arab Emireetis rakkoon jiran karaa marii fi nagaan akka furamaniif dursi kennamuu akka qabu hubachiiseera.

   Ministirichi itti dabaluun, walitti bu'iinsi kun hatattamaan akka dhaabatuu fi muddamne hammeetes akka tasgabbaa'uuf hubachiiseera.

   Dabalataanis namoota nagaaf eegumsa gochuu, walitti bu'iinsi dabalataa fi haleellaan akka hin uumamne ittisuu, akkasumas waliigaltee nagaa Piritooriyaa kabajuun barbaachisaa ta'uu isaa yaadachiiseera.

   UAE Itoophiyaatti nagaa fi tasgabbii waaraa mirkaneessuuf carraaqqiiwwan taasifaman hunda akka deeggartus Sheek Shaakbuut mirkaneesseera.

   Keessumaa nageenyii fi tasgabbiin Itoophiyaa akka eegamuu, akkasumas naannoo Gaanfa Afrikaatti nageenaaf yaaddoo waanti ta'u dabalataa akka hin uumamneef carraaqqiin taasifaman akka cimanii itti fufanis dubbateera.

   Dura ta'aan Komishinii Gamtaa Afrikaa Maahimud Alii Yusuuf muddamnii fi gaarerfannaan waraanaa kaaba Itoophiyaatti dhalate "baayyisee akka isa yaaddesse" ibsuun, walitti bu'iinsi kun "hatattamaan akka dhaabbatuuf akeekkachiisee ture.

   Aanga'aan Ol aanaa TPLF fi pirezidantiin itti aanaa naannoo Tigraay Obbo Amaanu'eel Asaffaa fuula miidiyaa hawaasaa isaarratti deebii kenneen ibsawwan kennaman kanneenitti "gadduu" ibseera.

   Obbo Amaanu'eel, ambaasaaddara Ameerikaa, akkasumas komishinara Gamtaa Afrikaa, yeroo haleellaawwan qilleensarraa namoota nagaarratti miidhaa geessisan raawwatamanitti callisanii turanii qeeqa amma isaan dhiyeessan "haqa kan hin qabnedha" jedheera.

   Tumsi Misoomaa Biyyoota Afrikaa Bahaa (IGAD) kaaba Itoophiyaatti muddamni hammaachuu "baayyisee akka isa yaaddesse" kan ibse yoo ta'u, Gamtaan Awurooppaas haalli kaaba Itoophiyaatti saffisaan hammaachaa jiruufi dhiibbaa inni ummatarraan ga'aa jiru cimsee akka isa yaaddessu beeksiseera.

   "Muddama kana hatattamaan tasgabbeessuun barbaachisaadha" kan jedhe Gamtaan Awurooppaa, qaamoleen lachuu walitti bu'iinsa bifa waaraa ta'een dhaabuudhaaf waliigaltee irra ga'ameef irra deebiin murannoo qabaachuu isaanii agarsiisuu akka qaban gaafateera. Kanaafis, "yeroon isaa hin darbine" jedheera.

5. 26 Fuulbaana 2026Iraan Ulaa Hormuuz deebistee banuuf waliigaltee US'f dhiyeessite

   

   Madda suuraa, Bloomberg via Getty Images

   Ministirri dhimma alaa Iraan Abbaas Arraagchii biyyisaa waliigalltee haala ittiin Ulaa Hormuuz torban tokko keessatti banuun danda'amu USf dhiyeessuu dubbate.

   Arraagchiin "yoo haalonni barbaachisan guutaman" kun raawwatamuu akka danda'u himuun, haalonni jedhe kunneenis waliigaltee wal hubannoo (MOU) Waxabajji keessa mallatteessan keessa akka jiru Kora UN Niwu Yoork irra osoo jiruu ripportarootaaf ibseera.

   "Amma filannoon harka Yunaayitid Isteetis keessa jira," kan jedhu Arraagchiin karoorri kunis karaa Qaataar USf dhiyaachuu dabaluun dubbate.

   Waan Iraan dhiyeessite kan gaafatame aanga'aan US tokko ammoo, dhimmoota nukilaraa dabalatee karaa jaarsoliitiin mariin qajeelaa ta'e gaggeeffamaa turuu BBC'tti hime.

   US yaada dhiyate kanaaf ammallee deebii idilee hin kenniin jiraatus, Pirezidantiin US Doonaald Tiraamp waliigaltee dhiyaate kana diduu Street Journal gabaasee ture.

   Tiraamp akka dhuunfaatti Iraan fedhiiwwan isaa ni guutti jedhee akka hin amanne kan gabaafame yoo ta'u, irra deebiin haleeluurratti duula gochaa tureera.

   US fi Isra'el Guraandhala 28 ture Iraan irratti haleellaa kana banan. Iraan ammoo israa'el fi Buufataaleen waraanaa US michootashee Galoo Galaanaa fi Galoo Arabaa keessaa qabdurratti haleeluun, akkasumas Ulaa Hormuuz cufuun deebii kennaa turte.

   Waraanni kun osoo hin uumamiin dura boba'aa fi gaaziin uumamaa qulqullaa'e kan addunyaa %20 kan ta'u karaa Ulaa kanaa darbaa ture. Kanaaf, cufachuun ulaa ammoo gatiin boba'aa gabaa addunyaa irratti akka jeeqamu taasiseera.

   Kun ammoo Tiraamp carraa jiru barbaaduun walitti bu'iinsa kana akka dhaabuuf dhiibbaa irratti taassifamu akka dabalu godheera. Keessumaa ammoo, filannoo Kongiresii US Sadaasa keessa gaggeeffamurratti dhiibbaa irratti uumaa jira.

6. 25 Fuulbaana 2026'Hidhattoonni TPLF bobbaase' daangaa Affaarii fi Amaaraatti haleellaa banuu mirkaneesseera- KMNI

   

   Madda suuraa, EHRC

   Koomishinii Mirgoota Namoomaa Itoophiyaa hidhattoonni ''TPLF bobbaase'' jedhe Fulbaana 12/2019 A.L.I halkan keessaa sa'atii 9:00 haleellaa banuu mirkaneesse.

   Koomishinichi ibsa Jimaata har'aa baaseen daangaalee Affaariifi Tigraayi akkasumas Amaaraa iddoowwan godina Waaghimraafi Walloo Kaabaa aanaa Laastaa keessatti lolli dhalachuu eereera. Naannolee duraanuu waldhideedhaan miidhamanitti lolli dhalachuun akka isa yaaddesse himeera.

   Miidhaa lolli kuni fidu hordofaan jiraachuu kan hime koomishinichi lolli kuni mirga lubbuun jiraachuu lammiilee, nageenya qaamaa fi mirga iddoodhaa iddootti socho'uu akkasumas sochii guyyuu irratti dhiibbaa geessiseera jedhe.

   Kanaafis Naannoo Tigraayitti balaliin xiyyaaraa dhaabbachuu akkasumas geejibni konkolaataa addaan cituu eereera.

   Qaamoti lola kanarratti hirmaataniifi Waliigaltee Piriitooriyaa mallateessan waliigalticha akka kabajan gaafataniiru.

   Kanamlees sochii godhan keessatti tarkaanfii namoota nagaa fi bu'uuraale misoomaa miidhuurraa of qusachuun seera idiladdunyaa akka kabajan yaadachiiseera.

   Koomishinichi dabaluunis qaamoti lola irratti hirmaatan gara mariitti akka dacha'an hawaasni idiladdunyaa tattaaffi akka godhu waamicha dhiyeessaniiru.

7. 25 Fuulbaana 2026Hogganooti waraanaa Sa'udii,Turkiifi Paakistaan akkatti Saa'udii gargaaran marii'achuufi

   

   Madda suuraa, Reuters

   Hogganooti waraanaa Saa'udii, Turkiifi Paakistaan waliigaltee waraanaa dhihoo walii mallatteessan bu'uura godhachuun akkatti Saa'udii gargaaran marii'achuuf tahuu Rooyitarsi gabaase.

   Hogganooti amantii Saa'udii hidhattoota Saa'udii Iraanin deeggaraman haleeluuf loltoonni isaanii lubbuu isaanii kennuuf akka of qopheessan himuun booda oduun kuni dhagahame.

   Hidhattoonni Huutii mootummaa Yemen Saa'udiin deeggaramu irratti haleellaa kan banan yoo tahu, Saa'udii irrattis haleellaa bananiiru.

   Kunis Ameerikaa fi Israa'el haleellaa Iraan irratti banan rakkoo walxaxaa fide dabalatee biyya alergii boba'aa Saa'udiis gufachiiseera.

   Warri Huutii Kamisa kaleessaa qiyyaafannoo Saa'udii irratti misaayeelaa fi diroonii dhukaasuu himaniiru. Qondaaloti Huutiis baalaastiik misaayela ja'a fashaleessuu himaniiru.

   Saa'udiin kanaan dura magaalaa qulqulluu Makkaa akkasumas Jiddaa fi magaalaa buufata doonii boba'aa Galaana Diimaatti akeekkachiisa baafteetti.

8. 25 Fuulbaana 2026Biyyootni Awurooppaa lama haleellaa 'TPLF'n baname' jedhame balaaleffatan

   

   Madda suuraa, Reuters

   UK fi Faransaay walitti bu’iinsa kaaba Itoophiyaa keessatti deebi’ee ka’e hordofee ibsa addaa baasaniin, haleellaa humnoota TPLF’n raawwatame jedhan balaaleffataniiru.

   UK’n haleellaa humnootni Tigraay Affaar fi Tigraay kibbaa keessatti raawwatan akkasumas buufataalee xiyyaaraa Tigraay to’achuu isaanii balaaleffatte.

   Ibsi kun gareewwan walitti bu'iinsa keessa jiran hundi walitti bu’iinsa akka hin hammeessine, gara marii fi furmaata siyaasaa nagaa akka deebi’an waamicha dhiyeessera.

   Akkasumas Faransaayis haalli kaaba Itoophiyaa fi Tigraay keessatti hammaachaa dhufuun akka ishee yaaddesse ibsite.

   Buufataalee xiyyaaraa Mekellee, Aksum fi Shiree to’atamuu isaaniis akkasumas haleellaa naannoo Amaaraa fi Affaar keessatti raawwatame jedhaman balaaleffateera.

   Biyyattiin walitti bu’iinsi akka dhaabbatu fi qaanoleen wal lolaa jiran gara mariitti akka deebi’an gaafachuun, carraaqqii araaraa Gamtaa Afrikaa jalatti taasifamu deeggaruuf qophii ta’uu ibsite

9. 25 Fuulbaana 2026Lolli Tigraayitti deebi'ee ka'e sarbama mirgaa geessisuu danda'a- HRW

   

   Madda suuraa, Reuters

   Dhaabbanni mirga namoomaf falmu Hiyuuman Raayits Wooch (HRW) lolli haaraan kaaba Itoophiyaatti deebi'ee eegale, lammiileen nagaa sarbama mirga namoomaa dabalataaf saaxiluu akka danda'u yaaddoo qabu ibse.

   Daarektarri itti-aanaan HRW damee Afrikaa, Latishiyaa Baader, qaamoleen waraanaa irratti hirmaatan kamuu lammiilee nagaa fi bu’uuraalee sivilii haleelurraa akka of qusatan gaafateera.

   Akka ibsa dhaabbatichaatti sarbama mirga namoomaa waraana kaaba Itoophiyaa asiin dura ture irratti raawwataman qaamni itti gaafatame waan hin jirreef ammallee haalli walfakkataan rawwachuu akka danda'u yaaddoo guddaatu jira.

   Kanaaf qaamoleen idil-addunyaa hatattamaan tarkaanfii fudhachuun lammiilee nagaan akka eegamaniif qaamolee lolatti jiran hordofuuf tarkaanfii walabaa barbaachisu akka fudhatan dhaame.

   Dhaabbatichi Fulbaana 22, 2026 irraa eegalee naannolee Tigraay, Amaaraa fi Affaar keessatti humnoota mootummaa Itoophiyaa fi TPLF gidduutti waraannii deebi'ee ka'u ibsera.

10. 25 Fuulbaana 2026Ergaan Pirezidaantiin Chaayinaa Ameerikaa fi Iraaniif dabarsan maali?

    

    Madda suuraa, Getty Images

    Pirezidaantiin Chaayinaa ShiiJinpingi, Chaayinaan Ameerikaa fi Iraan gara “Waliigaltee Waliigalaa Islamabaditti” akka deebi’an kan deeggaru ta’uu ibsan.

    Shiin kana kan jedhan, Pirezidaantii Ameerikaa Donald Tiraamp waliin Kamisa masaraa mootummaa Ameerikaa, waayit Haawus keessatti, yeroo wal arganitti.

    Walga’iinsi isaanii kunis kan adeemsifame yeroo walgahiin Waliigalaa Dhaabbata Biyyoota Gamtoomanii itti fufetti.

    Akka miidiyaaleen mootummaa Chaayinaa gabaasanitti, Shii Jinpingi walga’icharratti Beejingiin Ameerikaa fi Iraan gara waligaltee nagaatti akka deebi’an kan deeggaran ta'uu ibsaniiru.

    Pirezidaantiin Chaayinaa kun erga daawwannaa guyyoota sadiif Waashingitan ga'anii turtii muraasa booda, ibsa miidiyaa mootummaa Chaayinaa irratti maxxanfameen, Chaayinaa fi Ameerikaan walmorkattoota utuu hin taane michoota walii ta’uu Shiin kan dubbatan.

    Daawwannaa kana irratti Tiraamp simannaa ho'aa Waayit Haawusitti taasisaniiru.

    Dureewwaan lamaan gidduutti mariin cimaa dhimmoota daldalaa, teeknooloojii hubannoo namtolchee (AI), dhimmi Taayiwaan fi Iraan dabalatee dhimmoota addaa irratti marii taasisu.

11. 25 Fuulbaana 2026MM Israa'el Beenjaamiin Neetaaniyaahuu kora UN irratti maaltu mudate?

    

    Ministirri Muummee Israa'el Beenjaamiin Neetaaniyaahuu duula waraanaa Iraan, Gaazaa fi biyyoota Baha Giddugaleessaa kaan keessatti gaggeeffamaa jiru sirrii ta'uu ija jabinaan falme.

    Kora UN irratti dhimmoota kunneen kaasuun ejjennoosaa ibsuuf wayita inni waltajjii qabatu namoonni galma keessaa ba'an.

    Neetaaniyaahuun wayita namoonni galma keessaa ba'an eegee, erga haalli tasgabbaa'ee namoota galma keessa hafaniif haasaa taasisuu eegale.

    ''Lola itti fufna. Ni injifanna, filannoo biraa hin qabnu,'' jedhe.

    Wayita inni haasaa taasisu namoonni dhibbaan lakkaa'aman daandii guddicha magaalaa Niwu Yoork irratti ba'uun mormiisaanii dhageessisaa turan.

    Namoonni daandiitti ba'uun dararaa Israa'el Gaazaa keessatti raawwattu morman kunneen hedduunsaanii namoota bebbeekamoodha.

    Kunneen keessaa poolisiin namoota baayyee hidhe.

    Taatoon badhaasa Oskaar injifatte Suuzaan Sarandon, taatoon badhaasa Emmy injifatte Hannaa Einbinder kanneen hidhaman keessaati.

    Akkasumas kaadhimamaan Dimokiraat irraa kongiresiif dorgomtu Dariyaliza Avila Chevaliyer fi miseensi mana maree magaalaa Niwu Yoork Chi Osse hidhamaniiru.

    Neetaaniyaahuun haasaa kora UN irratti taasise keessatti Gaazaa keessatti yakka duguuggaa sanyii raawwateera himannaa jedhu ofirraa faccise.

    Pirezidantiin Filisxeem Mahmuud Abbaas gamasaan imaammata Israa'el, keessattuu qubsuma seeraan alaa West Baank keessatti gaggeessaa jirtu himate.

    Ameerikaan pirezidanticha viizaa waan dhowwatteef kora UN kanarratti qaamaan argamuu hin dandeenye. Kanaaf Viidiyoodhaan ergaa dabarfate.

    Humnoonni Israa'el haleellaa qilleensaa fi lafoon jireenya Filisxeemotaa barbadeessaa jiraachuu himate hoogganaan Filisxeem kun.

    Israa'el furmaata biyyi lama (Israa'el fi Filisxeem) waliin mari'achuun argamu irratti gufuu ta'aa jiraachuus ibse.

    Beenjaamiin Neetaaniyaahuu akka to'atamuuf Manni Murtii Yakkaa Idiladdunyaa xalayaa irratti barreessee jira.

    Isa kanaaf Neetaaniyaahuun biyyoota Awurooppaa kanneen akka Faransaay fi Biriteen komate.

    Kana malees Neetaaniyaahuun Turkiin hidhattoota Hamaas deeggarti jechuun maqaa Pirezidant Resiip Taayib Erdogaan waamuun himate.

    Erdogaan wayita kora UN irratti haasaa taasisu dararaan Gaazaa fi West Baank keessatti raawwatamaa jiru waan dhala namaaf hin malledha jedhee ture.

    Kantiibaan magaalaa Niwu Yoork Zohran Mamdani Neetaaniyaahuun Niwu Yoork seennaan akka hidhu dhaadatee ture, garuu boodarra aangoo kana akka hin qabne ibseera.

    Neetaaniyaahuun isa kanas kaasuun himateera.

    Erga kantiibaan kun filamee Yihuudonni sodaadhaan Niwu York keessa jiraatu jedhe.

    Mamdaniin haasaa Neetaaniyaahuuf deebii kenneen himannaa bu'uura hin qabnee fi duguuggaa sanyii Filisxeemota irratti raawwate ittiin haguuguuf akka ta'e hime.

12. 25 Fuulbaana 2026Mootummaan Xaaliyaanii burqaa fi niqaaba mana barumsaa keessaa dhorke

    

    Madda suuraa, Vincenzo Nuzzolese/SOPA Images/LightRocket via Getty Images

    Mootummaan Xaaliyaanii uffannaa duudhaa amantii Islaamaa ta'e- burqaa fi niqaaba mana barumsaa keessatti akka hin uffatamne dhorke.

    Namoonni Afaan Xaaliyaanii sirriitti hin beeknes manneen barnootaa irraa akka daangeffaman murteesse.

    Keessattuu waggaa tokkoffaa barnoota sadarkaa jalqabaa irratti lakkoofsi daa'imman lammummaa Xaaliyaanii hin qabnee fi afaan biyyattii sirriitti hin beeknee harka 30 akka hir'atu ibse mootummaan.

    Ministirri Muummee Jiyoorjiyaa Meloonii tarkaanfiin kun ''namoota adda qooduuf osoo hin taane akka karaa sirrii fi seera qabeessaan walitti makaman haala mijeesssuuf'' ta'uu himan.

    Paartileen siyaasaa tarkaanfii mootummaa kana mormaniiru.

    Ministirri Barnootaa Giuseppe Valditara daangaan kan kaa'ame ''afaan irratti,'' malee lammummaan daangessuu miti jedhe.

    Dhimmi burqaa fi niqaabaa ammoo walqixxummaa koorniyaa mirkaneessuuf tarkaanfii fudhatamedha jedhe.

    MM Jiyoorjiyaa Meloonii wayita tarkaanfii kana ibsan ''wayita mana barnootaa deemtu fuula kee haguuguu hin qabdu,'' jedhan.

    Ijoolleen shamarranii akkasaan maqaa aadaan of dhoksanii deeman eenyullee murteessuu hin qabu jedhan.

    Dhorkaan kun burqaa fi niqaaba malee hijaaba akka hin ilaallanne ibsameera.

    Hijaabi fuula kan dhoksu miti waan ta'eef.

    Niqaabi fuula kan haguugu yoo ta'u naannoo ijaa qofatu mul'ata. Burqaan ammoo fuulaa fi qaama hunda kan haguuguudha. Ijarratti kan uffatamu garuu kan mul'isuuudha.

    Dhaabbati qorannoo Fondazione ISMU jedhamu manneen barnootaa Xaaliyaanii keessatti barattoonni lammummaa Xaaliyaanii hin qabne dhibbeentaa 11.6 ta'uu ibse.

13. 24 Fuulbaana 2026Jiraattonni Tigraay sodaa lolli hammaachuu danda'a jedhuun miya baay'inaan bituu jalqaban

    

    Madda suuraa, Reuters

    Magaalaan guddoo Naannoo Tigraayi Maqaleetti Roobii kaleessa waraanni jalqabe hammaachuu danda'a sodaa jedhuun nyaataafi meeshaalee bu'uuraa baay'inaan bitachuu jalqabuu Rooyitarsi gabaase.

    Humnooti Tigraayi kaleessa buufataalee xiyyaaraa sadii qabachuun booda haleellaa ''nurratti baname'' jedhan ofirraa ittisuuf loltoonni isaanii ''tarkaanfii akka fudhatan ajajuu'' beeksisaniiru.

    Dhaabbata Biyyoota Gamtoomaniifi Gamtaan Awurooppaa qaamoti lolatti jiran lola dhaabuun Waliigaltee Piriitooriyaa waraana dhaabetti akka deebi'an yaadachiisaniiru.

    Dhimmoota Afrikaa Bahaa irratti gorsaa Ministira Mummee Abiy Ahimadiifi pireezidantiin bulchiinsa yeroo Tigraayi duraanii Obbo Geetaachoo Raddaa ergaa X irratti barreesaniin humnooti TPLF ''waraana banuu isaanii'' ibsaniiru.

    Jiraattonni Maqalee Rooyitaris bilbilaan dubbise ''waan nu barbaachisa jennee yaadnu bitachaa jirra,'' jechuun dubbataniiru.

    Nageenya isaaniif jecha jiraattonni maqaan isaanii hin eeramne akka jedhanitti ''miyoota bu'uuraa guuttachuuf bituunis tahe argachuun rakkisaa taheera,'' jedhaniiru.

    ''Dabalataanis akka lola isa duraanii yoo taheefi gara marfamuutti ce'uu danda'a,'' yaadoo jedhu qabu.

    Jiraattonni kunneen daandii Maqaleerra humnooti nageenyaa akka socho'an, sagaleen diroonii akka dhagahamu miini nyaataaf tahu akka dhibamuu malu dubbataniiru.

    Jiraataan Addigiraat biraan ammoo jiraattonni miya nyaataa baay'inaan waan bitaniif suuqiiwwan qullaa tahaniiru jedhan.

    Jiraattonni lameenuu dargaggoonni dirqamaan waraanatti akka seenan yeroo taasifamu arguu isaaniifi kunis uummata biratti yaaddoo uumuu himaniiru.

    Jiraataan Addigiraat tokko ''waraana yeroo darbeen dargaggoon ganna 18 abbaasaa dhabe dirqamaan fudhatamuu arageera,'' jedhan.

    Waraanni kanaan dura bara 2012 A.L.I jalqabe waggaa lamaaf adeemsifame hanqinni nyaataa, qarshiifi qorichaa akka uumamu taasisee ture.

    Waraanni Tigraayi waggaa lamaaf ture Waliigaltee Piriitooriyaan goolabamuun booda Fulbaana 13 deebi'ee ka'eera.

    Lolli kuni jalqabuun dura Fulbaana 10/2019 A.L.I gara galgalaa gareen hidhattootaa torba ''Tibibbir Lehiliwunnaa,'' hundeessuu isaanii himaniiru.

14. 24 Fuulbaana 2026Iraan waraanni haaraa Ameerikaa waliin jiraatu gara Garba Indiyaatti babal'achuu akka danda'u akeekkachifte

    

    Madda suuraa, Anadoulu

    Gorsaan hogganaa waraanaa ol aanaa tokko Ameerikaan irra deebiin Iraan irratti haleellaa kan bantu yoo ta'e waraanni haaraan hanga GArba Indiyaatti babal'achuu akka danda'u akeekkachiise.

    Gorsaan ol aanaa hogganaa dhimmoota waraanaa Iraan Meejer Jeneraal Yaahiyyaa Raahiim Saafaashii gaafa Kamisaa humni waraanaa biyyattii haalota gara garaatiif karoorawwan qopheesseera jechuu isaa maddi oduu Faars gabaaseera.

    Saafaashiin, " ammuu pirezidantii Ameerikaa Doonaald Tiraamp fi Ministira Muummee Israa'el Benjaamiin Netaaniyaahuu keessa maaltu ta'aa akka jiru ni beekna," jedhe.

    Waraanni Iraan dhaabbileen biyyattii ykn faayidaawwan biyyaalessaa irratti haleellaan Ameerikaa ykn Israa'el dabalataa yoo raawwatamaniif jecha waan hamaa dhufuuf qophaa'uu ibsuun, walitti bu'iinsi kun baballachuu akka danda'u akeekkachiisaniiru.

    "Waraanni kun amma Galoo Galaanaa fi gara Ulaa Hormuuz irraa gara Galanaa Diimaatti babal'ateera. Waraanni itti aansee Ameerikaa waliin taasifamu gara GArba Indiyaatti ykn gara bakka birootti bal'achuu danda'a," jedheera.

15. 24 Fuulbaana 2026Ujummoon Jibuutii gara Itoophiyaa boba'aa dabarsu diriiruufi - MM Abiy

    

    Madda suuraa, Abiy Ahmed Ali

    Ministarri Mummee Abiy Ahimad hojiin ujummoo boba'aa Jibuutii gara Itoophiyaa dabarsu diriirsuun jalqabuu beeksisan.

    MM Abiy Ahimad gara Jibuutii kan deeman Kamisa har'aa yoo tahu turtii isaaniin Jubuutii, Daamarjoorgan gara Itoophiyaa Dawaalee hojii ujummoon boba'aa dabarsuu jalqabuu Feesbuukii isaanii irratti barreessaniiru.

    Itoophiyaan ulaa galaanaa waan hin qabneef daldala alergiifi galchuu buufata doonii fayyadamuun yoo tahu kanaan doolaara biiliyoonaan lakkaa'amu baasti.

    MM Abiy piroojeektii kana Pireezidantii Jibuutii Ismaa'el Omaar Giilee fi abbaa qabeenyaa Aliikoo Daangootee waliin tahuun ergaasaanii dabarsaniiru.

    Ujummoon boba'aa Jibuutii hanga Itoophiyaa diriiru kuni gama lamaaniin tarmiinaal kuusaa akka qabaatu MM Abiy dubbataniiru.

    Misoomni kuni kan adeemsifamu dhaabbata Itoophiyaa Invastimeent Holdiingis fi Daangooteedhaan akka tahe himaniiru.

    Piroojektiin kuni, ''baasii fi boodatti harkifachuu loojistiiksii hir'isuun wabii aannisaa fooyyeessa,'' jedhan MM Abiy.

    ''Dabaluunis daldala Jibuutii fi Itoophiyaa kan saffisiisuufi guddisu dha.'' jedhan.

16. 24 Fuulbaana 2026MM Abiy Ahmad daawwannaa hojiif Jibuutii seenan

    

    Madda suuraa, Office of the Prime Minister-Ethiopia

    ‎Ministiirri Muummee Itoophiyaa Abiy Ahmad daawwannaa hojiif Jibuutii deeman.

    Waajjirri Ministeera Muummee Itooophiyaa fuula miidiyaa hawaasaa isaa gubbaatti akka beeksisetti, MM Abiy Ahmad Jibuutii yoo gahan Pirezidaantii biyyattii Ismaa'el Omaar Giiledhaan simannaan hoo'aan taasifameefii jira.

    Gaggeessitoonni biyyoota lamaanituu walitti hidhamiinsa diinagdee Itoophiyaafi Jibuutii gidduu jiru caalmatti kan cimsu sagantaa baniinsa pirojektii waloo irratti akka hirmaatanis waajjirri MM Abiy Ahmad ibseera.

    MM Abiy Ahmad gara Jibuutii kan imalan yeroo Kaaba Itoophiyaatti waraanni deebi'ee eegaluun dhagahamaa jiruttiidha.

17. 24 Fuulbaana 2026''Qaamoleen dantaa Oromoof qabsaa'an ulee diinaa ta'uurraa of qusachuu qabu''- ABO

    

    Madda suuraa, BB

    Addi Bilisummaa Oromoo (ABO) qaamoleen dantaa Oromoof qabsoofna jedhan ''ulee diinaa ta'uurraa akka of qusatan'' akeekkachiise.

    Ibsa baase keessatti ''qaamoleen dantaa Oromoof qabsoofna jedhan sirna cunqursaa kaleessa ummatni keenya wareegama guddaa itti kafalee of irraa darbate bifa haaraan deebisanii Oromiyaatti harkisan itti gaafatama seenaa jalaa akka hin baane beekuudhaan, deemsa fokkisaa fi qaanfachiisaa akkanaa irraa akka if qusatan,'' hubachiiseera.

    ABOn qaamolee kunneen maqaa eeruu baatus, jaarmiyaa maqaa Oromoon socho'u keessaa tibbana hidhattoota kaan waliin qindoomina kan uume Waraana Bilisummaa Oromoo- ABO-WBO dha.

    Qindoominni hidhattoonni torba uuman garee hidhataa Faannoo, kan godinaalee Wallaggaa fi Horroo Guduruu Wallaggaa keessatti dararaa uummatarratti raawwachuun himataman of keessatti hammata.

    ABO-WBO hidhattoota kunneen waliin qindoomina uumuun namoota hedduu mufachiiseera. ABOnis kanneen mufatan keessaa tokko ta'uu ibsa kanarraa ni hubatama.

    Dhimma kanarratti kan gaafataman gorsaa Ajajaa Olaanaa ABO-WBO Marroo Dirribaa kan ta'an Obbo Jireenyaa Guddataa, tumsi kun adeemsarratti malee tokkoomuu miti jedhan.

    ''Tumsi nuti tolchine adeemsa [procedural] malee... Tokkoffaa, tokko taatan jechuun dogoggora guddaadha. Adeemsa ittiin mariin gaggeeffamu, adeemsa ittiin ummanni keenya bilisa ta'ee gahee mataa isaa ofii isaatiin murteeffatu sana lafa keenye.''

    ''Tumsa Kaabaa'' jechuun kan ibse ABOn imallii fi akeekni isaa Oromiyaa dirree waraanaa taasisuun, dhumaatii kan daranii fi hiraara gara biraa ummata keenyatti fiduudha'' jedhe.

    Akkasumas ''mirgoota haga ammaa gonfataman sharafuu, Oromiyaa deebisanii dhuunfatuun dinagdee biyyaa saamuu, balaa hin hawwamnee fi hin eegamne dachee keenyaa fi ummata keenyatti fiduuf kan sossohamudha,'' jechuun ibse.

    Kanaaf ''ummatni Oromoo mirga saboota Oromiyaa keessaa kabajaa fi tiksaa, garaagarummaa siyaasaa tokko malee qe’ee fi daangaa isaa jabaatee akka tikfatu,'' dhaame.

    Lola Oromiyaa keessaa lubbuu lammiilee hedduu galaafate kanatti furmaata barbaaduuf, araarri dhugaa fi haqa qabeessi dhibamuun lolichi bifa jijjiirrataa akka deemu taasiseera jedhe dhaabi kun.

    ''Kana waan ta’eef, mootummaan paartii Badhaadhinaa (PP), lola Oromiyaa keessaaf furmaata waaraa argamsiisuuf, araara dhugaaf balbala banuu akka qabu ABOn gadi jabeessee gaafata,'' jedhe.

18. 24 Fuulbaana 2026Gamtaan Awurooppaa haala nageenya kaaba Itoophiyaatti yaadda'uu ibse

    

    Madda suuraa, European Union in Ethiopia

    Gamtaan Awurooppaa (AU) haalli nageenyaa kaaba Itoophiyaatti deebi'ee hammaachuusaatti yaaddoo qabaachuu ibse.

    Sochiin waraanaa Naannoo Tigraay keessa jiru, TPLF buufataalee xayyaaraa Maqalee, Aksuum, fi Shiree to'achuun uummataarraan dhiibbaa geessisa jedhe.

    Torbanoota darbaniif Raayyaan Ittisaa Itoophiyaa bakkeewwan naannoo Tigraay keessatti haleellaa gaggeessaa turuu "hordofaan ture" kan jedhe Gamtaan Awurooppaa ibsa fuula miidiyaa hawaasaa isaarratti baasen, garaa garummaan qaamolee lamaanii waraanaan osoo hin taane mariin furamuu akka qabu beeksise.

    "Haala jiru qabbaneessuun barbaachisaadha," jechuun ammayyuu qaamoleen hunduu Waliigaltee Piritooriyaa hojiirra oolchuuf "ammayyuu hin barfanne" jedhe.

    "Waliigaltee Piritooriyaa kutannoodhaan hojiirra oolchuuf ammayyuu hin barfanne. Garaa garummaan furamuu kan qabu mariifi marabbaan malee waraanaan ta'uu hin qabu," jedhe.

    Dabaluunis, Seera Namoomaa Idiladdunyaa kabajuunis murteessaa ta'uu ibse.

19. 24 Fuulbaana 2026Taatewwan ijoo waa'ee waraana kaaba Itoophiyaa deebi'ee ka'e irratti

    

    Madda suuraa, Getty

    Waraanni Kaaba Itoophiyaatti eegaluusaa TPLF beeksisera. Qondaalonni mootummaas akeekaniiru. Roobii, Fulbaana 23, irraa eegalee wantoonni ijoon ta'an maalidha?

    • TPLF Roobii ganama buufata xayyaaraa Aluulaa Abbaa Naggaa magaalaa Maqaleetti argamu to'achuu hordofee Daandiin Qilleensaa Itoophiyaa balaliiwwan gara Tigraayitti taasisu adda kutuu beeksise.
    • Boodarra TPLF ibsa baaseen, "mootummaan federaalaa waraana narratti labse" jechuun, humnoonni Tigraay haleellaa of ittisuu akka taasisan ajaja dabarsuu beeksise.
    • Gorsaa MM Abiy Ahmad kan ta'aniifi pirezidaantiin duraanii Naannoo Tigraay Obbo Getaachoo Raddaa, TPLF daangaa naannoo Affaarifi Amaaraa irratti humnoota mootummaarratti haleellaa banuu ibsan. Halleellaa bane kanaaf ammoo TPL akka itti gaafatamus ibsan Obbo Getaachoon.
    • Itoophiyaatti Ambaasaaddara US kan ta'an Ervin J Maasingaa ibsa baasaniin haleellaa kaaba Itoophiyaatti eegaleef TPLF komatan. "Aanga'oonni TPLF kan jalqaba bara kanaa Yunaayitid Isteetis qoqqobbii irra keesse har'a haleellaa bal'aa banuun murtee dogoggora fudhachuu isaanii arguukootti gaddeera," jedhan.
    • Gamataan Afrikaas waraanni kun hatattamaan akka dhiyaatuuf waamicha dhiyeessera. Dura taa'aan Koomishinii Gamtaa Afrikaa Maahaammud Alii Yuusuuf muddamani waraanaa kaaba Itoophiyaatti dhalate ''akkaan isaan yaaddessuu'' ibsan. ''Lolli kunis hatattamaan akka dhaabbatu,'' yaadachiisaniiru.
    • Waa'ee waraana kaaba biyyattiitti irra deebiin eegalee kana ilaalchisee mootummaan federaalaa hanga ammaa ifatti waan jedhe hin qabu.

20. 24 Fuulbaana 2026Ashamaa!

    Tamsaasa kallattii eegalleerra. Kaaba Itoophiyaatti waraanni irra deebiin eegaluu qondaalonni mootummaafi TPLF ibsaa jiru.

    TPLF mootummaan waraana narratti labse ittisuuf haleellaa of-ittisuu akka taasisan humnootaaf ajaja kennuu beeksise.

    Waa'ee waraana kanaa hawaasi idilaa addunyaa maal jedhan? Odeeffannoo waa'ee waraana Kaaba Itoophiyaa, ofeeffannoowwan biroo biyya keessafi kan idiladdunyaa isin biraan geenya!

    Odeessaalee kanneen karaa Marsariitii, Instagram, YouTube, Facebook, WhatsApp fi TikTok keenyaas ni argattu.