Бу Дмитрий Медведевнинг 11 ойлик президентлиги мобайнида Россия матбуотига берган дастлабки интервьюси

Президент Дмитрий Медведев, Россия фаровонлик эвазига демократиядан воз кечмаслиги керак, деб айтган.

Россиядаги Кремлга мухолиф бўлган саноқли рўзномалардан бири - "Новая газета"га интервью берган жаноб Медведев "барқарор ва аровон ҳаётни ҳеч қачон сиёсий ҳуқуқ ва эркинликларга зид қўймаслик керак", деган.

Суҳбат жаноб Медведев ва унинг иқтисодий фаровонлик йўлида демократияни қурбон қилишга тайёр деб кўрилган ундан олдинги президент Владимир Путин ўртасидаги муносабатларга ойдинлик киритиши мумкин.

Жаноб Медведевнинг суҳбати Кремлни танқид қилиб келган рўзномага "маънавий дастак", деб айтган президент матбуот котибаси.

"Новая газета"нинг редакцион мустақиллиги қимматга тушди - рўзноманинг тўрт журналисти ё ўлдирилди, ё шубҳали ҳолатларда ҳаётдан кўз юмди, деб ёзади Би-би-снинг Москвадаги мухбири Ричард Галпин.

Улар орасида ўзининг журналистик изланишлари билан танилган, Россия армиясининг Чеченистондаги жиноятларини фош этган ва президент бўлган пайтида Владимир Путинни кескин танқид қилган Анна Политковская ҳам бор.

Шу йил бошида газета мухбири Анастасия Бабурова отиб ўлдирилганидан кейин Президент Дмитрий Медведев "Новая газета" Бош муҳаррири Дмитрий Муратов ва рўзнома акционери Михаил Горбачёвни қабул қилган, журналист ўлими муносабати билан ўз таъзиясини изҳор этганди.

Ўшанда жаноб Медведев интервью беришга рози бўлган.

Бу Дмитрий Медведевнинг 11 ойлик президентлиги мобайнида Россия матбуотига берган дастлабки интервьюси бўлди.

Ушбу суҳбат жаноб Медведев Владимир Путинга нисбатан бошқа йўналишни кўзлаётганининг аломати сифатида ҳам кўрилмоқда.

'Медведев мустақил матбуотни ҳурмат қилишини англатмоқчи бўлди'

Рўзнома бош муҳаррирининг Сочи шаҳри ҳокимлиги учун сайлов бораётгандек қилиб кўрсатгандан кўра, уни бекор қилган афзал эмасми, деган саволга жаноб Медведев, Сочида ҳақиқий сиёсий кураш кетаяпти, деб айтди.

Россиядаги фуқаролик жамияти ҳақида гапирган Президент Медведев, мансаб эгалламаган, бироқ мамлакат ҳаётида фаол иштирок этадиган инсонлар институти, деб атаган.

Фуқаролик жамиятини бошқарадиган ноҳукумат ташкилотлари мукаммал эмас, деб айтган 15 апрел куни Фуқаролик жамияти ва инсон ҳуқуқлари бўйича президент кенгашини ўтказган Президент Медведев.

Россияда давлат амалдорлари даромадлари ҳақидаги декларациялар эълон қилинди, "Новая газета"нинг бир неча кун мобайнида қудратли "қашшоқ" эрларнинг бой-бадавлат рафиқалари пайдо бўлгани ҳақидаги саволга жаноб Медведев, агар мансабдорларнинг хотини бизнес билан шуғулланса ва бу мансабдорлар манфаати билан давлат манфаати тўқнашмаса, қўрқинчли жойи йўқ, деб айтган.

"ЮКОС" ширкати устидан мўлжалланган иккинчи маҳкама жараёнининг қандай бўлишини олдиндан айтиб бўлмаслигини айтган Президент Дмитрий Медведев.

Россиядаги сиёсий тизимнинг мукаммалликка эришмагани даври билан тушунтирган жаноб Медведев, бу даврда президентнинг партиясиз бўлгани маъқул, деган, шунинг учун қудратдаги "Бирлашган Россия" партиясига аъзо бўлиб киришни хоҳламаслигини айтган.

Бу суҳбат билан Россия Президенти Дмитрий Медведев мустақил матбуотни ҳурмат қилишини англатишни истади, дея қайд этишди кузатувчилар.