ሓለፍቲ ፀጥታ ትግራይ ምስ ሰራዊት ምክልኻል ተዛትዮም

ገለ ሓለፍቲ ትግራይ ምስ ወተሃደራዊ ሓለፍቲ ሰሜን እዚ ምክልኻል ሃገር ኢትዮጵያ ኣብ ጉዳይ ሓበራዊ ጸጥታ እቲ ክልል ከም ዝዘተዩ ቢሮ ፅጥታን ምምሕዳርን እቲ ክልል ኣብ ፌስ ቡክ ገሊፁ።

ኣብቲ መድረኽ ዘተ፡ ሓለፍቲ ጸጥታ ናይ ኩለን ዞባታት ትግራይን ላዕለዎት ሓለፍቲ እቲ ሰራዊትን ዝተረኸቡ ኾይኖም: ቅድም ክብል ሓቢሮም ዝተለምዎ ፀጥታዊ ምትሕብባር ብዝምልከት ፀብፃብ ኣፈጻጽማ ተገምጊሙ ተባሂሉ።

ምክትል ዋና ኣዛዚ ክፍሊ ኦፕሬሽን ሰሜን እዚ እቲ ሰራዊት፡ ብርጋዴር ጀነራል ኣዳምነው መኮንን: ኣብ ክልል ትግራይ ዘሎ ሰላምን ድሕነትን ዝተሓለወ ምኻኑ ናይቲ ሰራዊት ስራሕ ዘፍኩስን ክቕጽል ዘለዎን ምዃኑ ንኢዱ።

እቲ ሓበራዊ ርክብ ቀፃልነት ክህልዎ ዝግባእ ምዃኑ ዝተዛረበ እቲ ምክትል ዋና ኣዛዚ፡ ኣብ መንጎ እቲ ሰራዊትን መንግስታዊ መዋቕር እቲ ክልልን ዘሎ ርክብ ዝነኣድ ምዃኑ'ውን ከምዝተዛረበ እቲ ሓበሬታ የመልክት።

ኣብቲ መድረኽ ዝተረኸበ ሓላፊ ቢሮ ፀጥታን ምምሕዳርን ክልል ትግራይ፡ ኣይተ ተኪኡ መተኩ ብወገኑ፡ "ነቲ ሕገ መንግስትን ሕገ መንግስታዊ ስርዓትን ንምሕላው ብሓባር ንሰርሕ ኣለና" ኢሉ።

6ይ ክልላዊ ዙርያ መረጻ ንምክያድ ምድላዋት ኩሉ ከምዝተዛዛሙ ዝተዛረበ እቲ ሓላፊ፡ ዝኾነ ነቲ መረጻ ከዕንቅፍ ዝኽእል ኣካል እደንተሃልዩ ንምምካት እኹል ምድላው ከምዝተገብረ ወሲኹ ተዛሪቡ።

"ነዚ ድማ ምክልኻል ሃገር ኣብ ጎንና ጠጠው ኢሉ ይገብሮ ንዘሎ ድጋፍ ክነመስግን ንፎቱ" ኢሉ።