TOOS, Malaayiin qof oo la filayo inay maanta isugu soo baxaan magaalada Tehran si ay uga qeyb galaan munaasabadda aaska Khamanei

Tebin toos ah

1. 24 Daqiiqadood ka horDadweyne tiro badan oo ku sii qulqulaya waddooyinka caasimadda Tehran

   

   Xigashada Sawirka, Getty Images

   Dadweyne aad u tiro badan ayaa buux dhaafiyey waddooyinka caasimadda Iiraan ee Tehran, iyagoo ka qaybgalaya aaska hoggaamiyihii sare ee geeriyooday, Ayatollah Cali Khamenei, kaas la dilay maalintii ugu horreysay ee dagaalkii u dhexeeyey Maraykanka, Israa'iil, iyo Iiraan bishii Febraayo.

   Kadib markii meydkiisa lagu sagootiyey xarunta weyn ee cibaadada Grand Mosalla ee Tehraan, naxashkiisa ayaa hadda lagu wadaa waddo qiyaastii toban kiiloomitir ah oo dhex marta magaalada.

   Waxaa la filayaa in munaasabadda socodka aaska uu socdo in ka badan toban saacadood.

   Munaasabadaha rasmiga ah ee aaska ayaa billowday maalintii Jimcaha, waxaana la qorsheeyey inay socdaan lix maalmood, iyadoo ugu dambayn lagu aasi doono magaalada uu ku dhashay ee Mashhad maalinta Khamiista.

   Dad badan oo daacad u ah Jamhuuriyadda Islaamiga ah ee Iiraan ayaa isugu soo baxay Tehraan si ay uga qaybqaataan munaasabadahaas, kuwaas oo loogu talagalay inay muujiyaan midnimo, awood, iyo adkaysi.

   Sidoo kale akhriso

   Muxuu hoggaamiyaha sare ee Iiraan uga maqan yahay aaska aabbihiis Ayatollah Ali Khamenei?

   Luuqada dahsoon ee uu adeegsan jiray huggaamiyihii Iran Cali Khamenei

   Iiraan: "Haddii Maraykanka iyo Israa'iil ay weeraraan aaska Ayatollah Cali Khamenei waa ka jawaabeynaa"

2. 49 Daqiiqadood ka horFaa'iidada muhiimka ah ee quraacda

   

   Xigashada Sawirka, Getty Images

   Cunista quraac badan iyo casho yar ayaa kaa caawin karta dhimista miisaankaaga, ayay yiraahdeen cilmi-baareyaashu.

   Markii ay saynisyahannadu sameynayeen cilmi-baarista waxay si sax ah u xakameeyeen cuntada dadka, si ay isu barbar dhigaan saamaynta quraacda culus iyo cashada culus.

   Kooxda Jaamacadda Aberdeen waxay dadkii ay tijaabiyeen ka heleen dad dhimay kalooris, si isku mid ah mar kasta oo ay cunaan cuntadooda ugu culus ee maalinta.

   Laakiin, rabitaankooda cuntada ayaa si aad ah hoos ugu dhacay kaddib markii ay billaabeen cunista quraacda culus, taas oo sahlaysa in uu qofka ka taxaddaro dheelitirka cuntadiisa.

   Cilmi-baareyaashu waxaa kale oo u soo baxday hal fikrad oo ah in habeenku uu yahay wakhtiga ugu xun ee cunto la cuno, sababtoo ah saacaddaas dheef-shiidka ayaa cuntada u beddelaya kiimiko, gaar ahaan marka uu qofku hurdo.

   Dadka cilmi barista ka qeyb qaatay oo 30 qof ahaa ayaa dhammaan loo diyaarinayay quraac, qado iyo casho in ka badan labo bil, iyadoo maalintii loogu dararay 1,700 oo kaloori.

   Waxay hal bil cunayeen quraac aad culus iyagoo isticmaalaya ku dhawaad ​​kala bar kalooriga maalinlaha ah, kaddibna waxaa xigay qado iyo casho fudud, halka bisha kalena ay cunayeen cunto culus fiidkii beddelkii subaxdii.

   Sii akhri

3. Saacad ka horTrump oo ka hadlay aaska Ayatollah Cali Khamanei

   

   Xigashada Sawirka, Getty Images

   Shabakadda wararka ee Axios ayaa soo xigatay Madaxweynaha Mareykanka Donald Trump, oo Sabtidii sheegay in wada-hadalladii nabadda la hakiyay muddo toddobaad ah sababo la xiriira munaasabadaha aaska.

   Sida ay sheegtay Axios, Trump wuxuu yiri iyadoo inta badan mas'uuliyiinta sare ee dowladda Iiraan ay ka qayb galayaan aaska, Mareykanku wuxuu "hal mar wada beegsan karaa dhammaantood." Wuxuu intaas ku daray: "Laakiin taas ma sameyn doonno, sababtoo ah markaas cid aan la xaajoonno ma jiri doonto."

   Madaxweynuhu wuxuu kaloo sheegay inuu la yaabay markii uu arkay dadka reer Iiraan oo ooyaya, isagoo sheegay inuu u haystay in dadku ay necbaayeen Khamenei. Wuxuu yiri: "Waxaa laga yaabaa inay yihiin illin been abuur ah."

   Iyadoo ka jawaabeysa hadalka Trump, haweeney baroordiiqeysay oo lagu magacaabo Zahra Safaei, 50 jir ah, ayaa wakaaladda wararka ee Reuters u sheegtay: "47 sano ka hor kacaan uma aynaan sameynin si aan ilmo been abuur ah u daadinno. Shuhadadaas oo dhan uma aynaan hurin nafahooda si aan ilmo been abuur ah u daadinno."

   Hoggaamiyeyaal ay ka mid yihiin Madaxweynaha Iiraan Masoud Pezeshkian ayaa ka qayb galay aaska Hoggaamiyihii Sare ee hore, hase yeeshee Mojtaba Khamenei kama uusan muuqan munaasabadda

   Sida ay weriyeen The Associated Press iyo The Guardian, qaar ka mid ah dadkii ka qaybgalayay munaasabadda Axaddii ayaa ku dhawaaqayay baaqyo lagu dalbanayay geerida Madaxweynaha Mareykanka Donald Trump. Intii lagu jiray gabay la tirinayay ka hor salaadda, gabayaa Mohammad Rasouli ayaa yiri: "Dilka Trump waa mas'uuliyaddeenna."

   Waxaa sidoo kale la maqlayay Rasouli isagoo hoggaaminaya hal-ku-dhegyo ay ka mid ahaayeen "Dhimasho ha ku timaaddo Mareykanka" iyo "Dhimasho ha ku timaaddo Israa'iil."

   Sidoo kale akhriso

   Muxuu hoggaamiyaha sare ee Iiraan uga maqan yahay aaska aabbihiis Ayatollah Ali Khamenei?

   Luuqada dahsoon ee uu adeegsan jiray huggaamiyihii Iran Cali Khamenei

   Iiraan: "Haddii Maraykanka iyo Israa'iil ay weeraraan aaska Ayatollah Cali Khamenei waa ka jawaabeynaa"

4. 2 Saacadood ka horLabaatan iyo shan dal oo qofka baasaboor Soomaaliga wata uu Visa ku qaadanayo garoonkooda

   Wixii ka dambeeyay markii uu bishan January horaanteedii soo baxay liiska kala sarreynta baasaboorrada caalamka, waxay u muuqataa in ay sii badanayaan tirada dalalka soo dhaweynaya baasaboorka Soomaaliya, sida ay shaaciyeen hay’ado kala duwan oo u guul gala qiimeynta aqoonsiyada dal-ku-gal-ka.

   Hay’adaha Reach Immigration iyo Passport Index ayaa soo saaray liis ay isku waafaqsan yihiin oo ah ku sheegeen dalalka u fasaxaya qofka heysta baasaboorka Soomaaliya in uu kasoo dago garoonkooda.

   Waddamadaas oo gaaraya ilaa 25 ayaa qofka aqoonsiga Soomaaliya wata ka doonaya in uu visaha ama dal-ku-gal-ka ku qaato garoonka, marka uu diyaaradda kasoo dago ka dib.

   Dalalkan ayaa ka duwan kuwa ay Soomaalidu ku aadi karaan visa la’aanta ama aan wax oggolaansho ah looga baahneyn marka ay gudaha u galayaan.

   Liiska waddamada uu qofka aqoonsiga Soomaaliya ku safraya ka dagi karo garoonkooda diyaaradaha si uu uga dalbado visa waxaa uu u dhigan yahay sidan:

   Sii akhri

5. 2 Saacadood ka horAaska Khamanei oo maanta si rasmi ah u bilaabanaya

   

   Xigashada Sawirka, Getty Images

   Aaska rasmiga ah ee Cali Khamenei, hoggaamiyihii hore ee Jamhuuriyadda Islaamiga ah, ayaa ka bilaaban doona Tehran Isniinta maanta ah.

   Qabanqaabada gaarka ah ee xafladda ayaa ku kalliftay mas'uuliyiinta magaalooyinka Tehran iyo Qom inay ku dhawaaqaan xeerar gaar ah oo ku saabsan taraafikada iyo diyaargarow ballaaran oo loogu talagalay soo dhawaynta ku meel gaarka ah ee tobanaan kun oo qof.

   Axaddii, Mojtaba Khamenei, hoggaamiyaha cusub ee Jamhuuriyadda Islaamiga ah, ma uusan ka qayb gelin janaasada aabihiis, isaga iyo dhowr xubnood oo qoyskiisa ah.

6. 2 Saacadood ka hor

   Kulan wacan akhaayaareey, ku soo dhowaada tebinta tooska ah ee maanta. Halkan kala socda wararkii ugu dambeeyay ee caalamka iyo Soomaalidaba