පාස්කු ප්‍රහාරය: වරදකරුවන් කෙරුණු විත්තිකරුවන් 15 දෙනාට වසර 200 සිට 260 දක්වා සිර දඬුවම්

සජීවී වාර්තාකරණය

බීබීසී සිංහල

1. 23 සැප්තැම්බර් 2026පාස්කු නඩුවේ විත්තිකරුවන් සිර දඬුවම් ලැබූ ආකාරය

   වසර 200 සිර දඬුවම

   • මොහොමඩ් අන්වර් මොහොමඩ් රිස්කාන් (අබු තාරික්)
   • මොහොමඩ් මන්සූර් මොහොමඩ් සනස්දීන්( අබූ මිසාන්)
   • හුසේනූල් රිස්වි කාලිද් සමීර්
   • මොහොමදු හනීෆා සෙයිනූල් ආබ්දීන් (අබු හිනා)
   • කච්චි මොහොමඩ් ජෙස්මින්

   වසර 220 සිර දඬුවම

   • නවුෆර් මවුලවි හෙවත් මොහොමදු ඊබ්‍රහිම් මොහොමදු නව්ෆර් හෙවත් නවුෆර් මවුලවි
   • මොහොමඩ් රමිෂ් මොහොමඩ් සාරික්
   • අබ්දුල් ලතීෆ් මොහොමඩ් සාෆි (සාෆි මවුලවි / අබූ ෆුර්කාන්)
   • මොහොමඩ් මුස්තාෆා මොහොමඩ් හාරිස් (අබු නන්ජියාර්)
   • රසික් රාසා හුසේන්

   වසර 240 සිර දඬුවම

   • මොහොම්මදු සරිබූ ආදම් ලෙබ්බේ (අබූ හදීක්)
   • හයාතු මොහොමදු මිල්හාන් (අබු සිලා)
   • මොහොමදු ඊබ්‍රහිම් සාදික් අබ්දුල්ලා (අබු උමර්)
   • මොහොමද් ඊබ්‍රහිම් අබ්දුල් හක් (අබූ ෆලා)

   වසර 260 සිර දඬුවම

   • අබ්දුල් මනාෆ් මොහොමඩ් පිරිදවුස්

   නිදොස් කොට නිදහස් කළ විත්තිකරුවන්

   • මොහොමඩ් සවාහීර් මොහොමඩ් හසන් (අබු දාවුද්)
   • මොහොමඩ් ඉෆ්තිකාර් මොහොමඩ් ඉන්සාෆ් (අබු මොහොමඩ්)
   • රෂීඩ් මොහොමඩ් ඉබ්‍රහිම්
   • සෙයිනූල් ආබ්දීන් මොහොමඩ් ජසීන්
   • මොහොමඩ් මුස්තාෆා මොහොමඩ් රිස්වාන්
   • මීරා සහීඩ් මොහමඩ් නෆ්ලි (අබු සනා)
   • මොහොමඩ් අමීන් අයන්තුල්ලා
   • මොහොමඩ් අන්සාර් දීන් හිල්මි
   • මොහොමඩ් අක්‍රම් අහක්කම්

   මියගිය විත්තිකරු

   • යාසිම් බාවා අබ්දුල් රවුෆ්

   මේ සම්බන්ධ සම්පූර්ණ ලිපිය මෙතැනින් කියවන්න...

2. 23 සැප්තැම්බර් 2026සුබ උදෑසනක්!

   පාස්කු ඉරිදා ප්‍රහාරය සම්බන්ධයෙන් විභාග වුණු එක් නඩු කටයුත්තක් ඊයේ රාත්‍රියේ අවසන් වුණු අතර එහිදී විත්තිකරුවන් 15 දෙනෙකුට බරපතළ වැඩසහිත දීර්ඝ සිර දඬුවම් නියම වීම සිදු වුණා.

   මෙම නඩු විභාගයේ සවිස්තර තොරතුරු ඔබ වෙත ගෙන ඒමට අප සූදානමින්...

3. 22 සැප්තැම්බර් 2026පාස්කු ඉරුදින ප්‍රහාරයට වරදකරුවන්වූවන් මාධ්‍යය වෙත පැවසුවේ කුමක් ද?

   පාස්කු ඉරුදින ත්‍රස්ත ප්‍රහාරයට කුමන්ත්‍රණය කිරීම, ආධාර අනුබල දීම ඇතුළු චෝදනාවලට වරදකරුවන් කෙරුණු විත්තිකරුවන් 15 දෙනාට බරපතළ වැඩ සහිත සිර දඬුවම් නියම කිරීමෙන් පසු (සැප්තැම්බර් 23 වැනිදා) අලුයම 2.08 බන්ධනාගාරය වෙත රැගෙන යනු ලැබිණි.

   බන්ධනාගරය වෙත රැගෙන යෑමට සූදානම් වූ අවස්ථාවේදී බන්ධනාගාර බස් රථය තුළ සිට ඉන් කිහිප දෙනෙක් මාධ්‍ය වෙත අදහස් පළ කළා.

4. 22 සැප්තැම්බර් 2026Breaking, වරදකරුවන් වූ 15 දෙනාට වසර 200 සිට 260 දක්වා බරපතළ වැඩ සහිත සිරදඬුවම්

   පාස්කු ඉරුදින ත්‍රස්ත ප්‍රහාර සිද්ධිය සඳහා කුමන්ත්‍රණය කිරීම, ආධාර අනුබල දීම ඇතුළු චෝදනාවලට වරදකරුවන් කෙරුණු විත්තිකරුවන් 15 දෙනාට බරපතළ වැඩ සහිත සිර දඬුවම් නියම කරන ලෙස කොළඹ ත්‍රිපුද්ගල මහාධිකරණ විනිසුරු මඩුල්ල නියම කළා.

   ඒ අනුව, එක් විත්තිකරුවෙකුට බරපතළ වැඩ සහිත වසර 260ක සිර දඬුවම් නියම වුණා.

   ඊට අමතරව, විත්තිකරුවන් පස් දෙනෙකුට වසර 220 බැගින් සිර දඬුවම් ද, තවත් විත්තිකරුවන් පස් දෙනෙකුට වසර 200 බැගින් සිට දඬුවම් ද නියම වුණා.

   තවත් විත්තිකරුවන් සිව් දෙනෙකුට වසර 240 බැගින් සිර දඬුවම් නියම වුණා.

   ඊට අමතරව තීන්දුව පැනවූ අද දින සිට ත්‍රස්තවාදය වැළැක්වීමේ පනත යටතේ විත්තිකරුවන්ට අදාළ නිශ්චල හා චංචල දේපළ සියල්ල රාජසන්තක කිරීමට නියෝග කරන බව ද විනිසුරු මඩුල්ල සඳහන් කළා.

   

   

   

5. 22 සැප්තැම්බර් 2026Breaking, පාස්කු ප්‍රහාරයේ වරදකරුවන්ට දඬුවම් නියම කිරීම රාත්‍රී 9:00 සිට...

   වරදකරුවන් කෙරුණු විත්තිකරුවන් 15 දෙනෙකුට දඬුවම් නියම කිරීම රාත්‍රී 9:00 සිදු කරන බව කොළඹ ත්‍රිපුද්ගල මහාධිකරණ විනිසුරු මඩුල්ල සඳහන් කළා.

   පැමිණිල්ල වෙනුවෙන් පෙනී සිටි අතිරේක සොලිසිටර් ජනරාල් හරිප්‍රියා ජයසුන්දරගේ කරුණු දැක්වීම අවසන් කෙරුණා.

   ඇය අධිකරණයෙන් ඉල්ලා සිටියේ මෙම විත්තිකරුවන්ට නීතියෙන් ලබා දිය හැකි උපරිම දඬුවම් ලබා දීමට පියවර ගන්නා ලෙසයි.

   ඒ අනුව, මෙම විත්තිකරුවන්ට දඬුවම් නියම කිරීම සඳහා මෙම නඩු කටයුත්ත රාත්‍රී 9.00 දක්වා කල් තැබීමට විනිසුරු මඩුල්ල නියම කළා.

6. 22 සැප්තැම්බර් 2026'ඒ අයට නිසි දඬුවම් ලබා දෙන්න කියලා අපි ඉල්ලා සිටිනවා', - කටුවාපිටිය දේවස්ථානයේ පිපිරීමෙන් මියගිය පුද්ගලයෙකුගේ බිරිඳ

   පාස්කු නඩුවේ විත්තිකරුවන්ට එරෙහි තීන්දුව ප්‍රකශයට පත් කිරීමෙන් අනතුරුව කටුවාපිටිය දේවස්ථානයේ පිපිරීමෙන් මියගිය පුද්ගලයෙකුගේ බිරිඳ වන ගීතා ඇන්ටනෙට් සමග කතාබහක නිරත වීමට බීබීසී සිංහල සේවය නියෝජනය කරමින් රොෂාන් චතුරංගට අවස්ථාව ලැබුණා.

   එහිදී ඇය පළ කළේ, මෙවැනි අදහසක්:

   "ඒගොල්ලන්ව අත්අඩංගුවට අරගෙන තීන්දුවක් ලබා දීලා තියෙන්නේ. ඒක හොඳ දෙයක් කියලා අපි දකිනවා. සාධාරණ විසඳුමක් සෑහෙන්න දුරට ලැබිලා තියෙනවා කියලා අපි විශ්වාස කරනවා.

   "අපේ නැති වෙච්ච අය ආපහු එන්නේ නැහැ. මේ වගේ ලේ වැගිරීම් අපේ රටේ නැවත ඇති නොවෙන්න මේවට සම්බන්ධ අය නීතිය ඉදිරියට ගෙනාපු එක වටිනවා. ඒ අයට නිසි දඬුවම් ලබා දෙන්න කියලා අපි ඉල්ලා සිටිනවා."

7. 22 සැප්තැම්බර් 2026Breaking, නවුෆර් මවුලවි ඇතුළු විත්තිකරුවන් 15ක් වරදකරුවන් කරයි

   පාස්කු ඉරු දින ත්‍රස්ත ප්‍රහාර මාලාව සම්බන්ධයෙන් චෝදනා ලබා සිටි නවුෆර් මවුලවි ඇතුළු විත්තිකරුවන් 15 දෙනෙකු වරදකරුවන් කරන බව ත්‍රිපුද්ගල මහාධිකරණ විනිසුරු මඩුල්ල මීට සුළු මොහොතකට පෙර නියම කළා.

   විනිසුරු මඩුල්ල දැනුම් දුන්නේ, අදාල චෝදනා එල්ල වී සිටි සෙසු විත්තිකරුවන් 9 දෙනෙකු නිදොස් කොට නිදහස් කරන බව යි.

   විත්තිකරුවන්ට දඬුවම් නියම කිරීම සඳහා මේ වන විට නඩුව කල් තබා තිබෙනවා.

8. 22 සැප්තැම්බර් 2026'ඒ අපරාධ කරපු අයට නිදැල්ලේ ඉන්න දෙන්නත් එපා', - වින්දිතයෙකුගේ මවක්

   

   තීන්දුව ලබා දීමට පෙර අධිකරණ පරිශ්‍රයේදී බීබීසී සිංහල සමග අදහස් දැක්වූ වින්දිතයෙකුගේ මවක් වන තිඹිරිගස්කටුව ප්‍රදේශයේ පදිංචි ක්‍රිස්ටීන් සුදර්ශනී සඳහන් කළේ, "යළි මෙවැනි අපරාධයක් සිදුවීමට ඉඩ නොතබන," ලෙසයි.

   ඇය මෙසේ ද පැවසුවා.

   "මේ වගේ අපරාධ ආයේ කිසි ම තැනක වෙන්න දෙන්න එපා. ඒ අපරාධ කරපු අයට නිදැල්ලේ ඉන්න දෙන්නත් එපා. ඒ අයට ලබා දෙන්න පුළුවන් උපරිම දඬුවම් ලබා දීලා අපිට සහනයක් ඉෂ්ට කරන්න.

   "මගේ පුතයි ලේලියි කටුවාපිටිය දේවස්ථානයේ සිදුවුණ බෝම්බ ප්‍රහාරයෙන් මිය ගියා. පුතාගේ 34 වැනි උපන්දිනය තිබුනේ බෝම්බය පිපුරණ දවසට පහුවෙනි දා. එයාගේ උපන්දිනය නිසා කටුවාපිටිය පල්ලියට ගියේ ආශිර්වාදය ගන්න කියලා.

   "නමුත් උපන්දිනය දවසේදී ආවේ ගෙදරට ආවේ එයාගේ බොඩි එක. මගේ පුතා මට ගොඩක් උදව් කළා. එයා තමයි මාවයි, මගේ දුවයි එයාගේ පොඩි පුතාලා තුන්දෙනයි බලා ගත්තේ. මම අද ගොඩක් අසරණ වෙලා ඉන්නේ."

9. 22 සැප්තැම්බර් 2026'මේක අපි අවුරුදු 7ක් තිස්සේ බලාගෙන හිටපු දෙයක්' - පාස්කු ඉරුදින ප්‍රහාරයේ වින්දිතයෙක්

   පාස්කු ප්‍රහාරය සම්බන්ධ නඩුවේ තීන්දුව ලබා දීම දැක බලා ගැනීම සඳහා කොළඹ ත්‍රිපුද්ගල විශේෂ මහාධිකරණ පරිශ්‍රය වෙත පැමිණ සිටින පාස්කු ප්‍රහාරයේ වින්දිතයෙකු වන රජිත රත්නායක සමග කතාබහ කිරීමට බීබීසී සිංහල ඩිජිටල් වාර්තාකරු, ජ්‍යෙෂ්ඨ මාධ්‍යවේදී සම්පත් දිසානායකට හැකි වුණා.

   ඔහු සඳහන් කළේ, මෙම නඩු තීන්දුව ලබා දෙන තුරු වසර 7ක් තිස්සේ ඔවුන් බලා සිටි බවයි.

   "මේක අපි අවුරුදු 7ක් තිස්සේ බලාගෙන හිටපු දෙයක්. මේක නඩු තීන්දුවක් විතරක් නෙවෙයි. අපේ මිය ගිය අය සහ තුවාල ලැබූ අය වෙනුවෙන් කෙරෙන සාධාරණයක්. මේ අවුරුදු 7 පුරා ම අපි නිහඬව බලාගෙන හිටියා, අපිට මේකට සාධාරණ තීන්දුවක් හම්බ වේවි කියලා. මේ පරීක්ෂණ නිසියාකාරව කෙරිලා ඉවර වෙලා සාධාරණ තීන්දුවක් හම්බ වේවි කියලා. අද ඒ අවස්ථාව උදා වෙලා තියෙනවා. ඉතින් අපිට එක පැත්තකින් සතුටු යි, අපේ මිය ගිය අය සහ තුවාල ලැබූ අය වෙනුවෙන් සාධාරණයක් ඉෂ්ට වෙනවා කියන දේ ගැන අද අපිට සතුටුයි," ඔහු පැවසුවා.

10. 22 සැප්තැම්බර් 2026නඩු තීන්දුව දෙන අද දවසේ මීගමුවේ සහ කටුවාපිටියේ ජනතාවගේ තත්ත්වය කෙබඳු ද?

    පාස්කු ප්‍රහාර මාලාවේ වැඩි ම මරණ සංඛ්‍යාවක් සිදුවූ මීගමුව, කටුවාපිටිය ප්‍රදේශයේ වින්දිත ජනතාව මුණ ගැසීම සඳහා බීබීසී සිංහල සේවය නියෝජනය කරමින් රොෂාන් චතුරංග මීගමුව ප්‍රදේශයේ සංචාරයක නිරත වුණා.

    එහිදී, සාන්ත සෙබස්තියන් දේවස්ථානය වෙත ගිය ඔහුට නිරීක්ෂණය වී තිබුණේ, දේවස්ථානයේ බැතිමතුන් පිරිසක් අගමික කටයුතුවල නිරත වෙමින් සිටි අතර, දේවස්ථානයේ කටයුතු සාමාන්‍ය පරිදි සිදුවන බව යි.

    පසුව, රොෂාන් චතුරංග බෝම්බ ප්‍රහාරයෙන් මිය ගිය ජනතාව මිහිදන් කර ඇති ස්ථානය වෙත ගිය අතර, එහිද කිසිදු විශේෂත්වයක් දක්නට ලැබී නැහැ.

    ප්‍රදේශ වාසීන් පවසා තිබුණේ, නඩු තීන්දුව දැක බලා ගැනීම සඳහා ඇතැම් පිරිස් කොළඹ ත්‍රිපුද්ගල විශේෂ මහාධිකරණය වෙත ගොස් සිටින බව යි.

    

    

11. 22 සැප්තැම්බර් 2026අධිකරණයෙන් වාර්තා වන තොරතුරු

    නවුෆර් මවුලවී ඇතුළු විත්තිකරුවන් 24 දෙනෙකුට එරෙහිව ගොනු කර තිබෙන නඩුවේ තීන්දුව ප්‍රකාශයට පත් කිරීම කොළඹ ත්‍රිපුද්ගල මහාධිකරණ විනිසුරු මඩුල්ල ආරම්භ කර ඇතැයි අප අධිකරණ වාර්තාකරු පවසනවා.

    ඔහු සඳහන් කළේ, මෙම නඩුකරයේ තීන්දුව පෙරවරුවේ ප්‍රකාශ කරන බව මීට පෙර නිවේදනය කර තිබුණ ද මහාධිකරණ විනිසුරු මඩුල්ල විසින් එය ප්‍රකාශයට පත් කිරීම ආරම්භ කළේ අද දහවල් 12.30ට පමණ බවයි.

    නඩු තීන්දුව මුද්‍රණය කිරීමේදී ඇති වූ තාක්ෂණික දෝෂයක් නිසා මෙම ප්‍රමාදය හටගත් බව තීන්දුව ප්‍රකාශයට පත් කිරීම ආරම්භ කිරීමට පෙර ත්‍රිපුද්ගල විනිසුරු මඩුල්ලේ සභාපති විනිසුරු නවරත්න මාරසිංහ සඳහන් කළ බව අප වාර්තාකරු පැවසුවා.

    ඒ සම්බන්ධයෙන් සියලු පාර්ශවවලට අධිකරණය කණගාටුව පළ කරන බව ද විනිසුරුවරයා ප්‍රකාශ කර තිබුණා.

    ඉන් පසුව තීන්දුව ප්‍රකාශයට පත් කිරීම ආරම්භ කෙරුණු අතර මේ වන විට දිවා ආහාරය සඳහා නඩු විභාගය නතර වී ඇති බව අප වාර්තාකරු වැඩිදුරටත් පැවසුවා.

12. 22 සැප්තැම්බර් 2026පාස්කු ප්‍රහාරයට සම්බන්ධ වුණු බෝම්බකරුවන් කවුද?

    

    ඡායාරූප මූලාශ්‍රය, Ishara S. KODIKARA / AFP via Getty Images

    කොච්චිකඩේ ශාන්ත අන්තෝනි දේවස්ථානය ඉලක්ක කර බෝම්බ ප්‍රහාරය එල්ල කළේ, අහමඩ් මුවාස් නම් පුද්ගලයෙකි. ඔහුගේ සහෝදරයා අත්අඩංගුවට ගැනුණා.

    කටුවාපිටියේ ශාන්ත සෙබස්තියන් දේවස්ථානයේ බෝම්බකරු ලෙස මොහොමඩ් හස්තුන් හඳුනාගෙන තිබෙනවා.

    තෙවන ඉලක්කය වූ කිංස්බරි හෝටලයට බෝම්බ ප්‍රහාරය එල්ල කලේ මොහමඩ් අසාම් මොහොමඩ් මුබාරක් නමැති පුද්ගලයා ය. ඔහුගේ බිරිඳ පොලිස් අත්අඩංගුවේ පසුවෙනවා.

    සමස්ත ප්‍රහාරයන්ට වගකිව යුතු ෂැන්ග්‍රි-ලා බෝම්බකරුවන්ගෙන් එක් අයෙකු වන්නේ සහරාන් හෂීම් ය. අනෙක් පුද්ගලයා ඉල්හාම් අහමර්ඩ් මොහොමඩ් ඉබ්‍රාහිම් ය.

    මඩකලපුවේ පිහිටි සියොන් දේවස්ථානයට මොහොමඩ් නසාර් මොහොමඩ් අසාද් විසින් බෝම්බ ප්‍රහාරය එල්ල කෙරුණා.

    සිනමන් ග්‍රෑන්ඩ් හෝටලයට බෝම්බ ප්‍රහාරය එල්ල කළ පුද්ගලයා ඉල්හාම් ගේ වැඩිමහල් සහෝදරයා වන ඉන්ෂාෆ් අහමඩ් ඉබ්‍රාහිම්ය.

    කොළඹ ටාජ්සමුද්‍රා හෝටලයේ බෝම්බය පුපුරුවා හැරීමට අපොහොසත් වූ නමුත් දෙහිවල පිහිටි කුඩා ලැගුම්ගලකදී බෝම්බය පුපුරුවා හැරියේ බ්‍රිතාන්‍යයේ සහ ඔස්ට්‍රේලියාවේ අධ්‍යාපනය ලැබූ අබ්දුල් ලතීෆ් ය.

    මේ අතර, දෙමටගොඩ මහවිල උද්‍යානයේ නිවසක් පරීක්ෂා කිරීමට පොලිස් නිලධාරීන් කිහිප දෙනෙකු ගිය අවස්ථාවේදී ඉල්හාම් ඊබ්‍රාහිම්ගේ බිරිඳ වූ ෆාතිමා ඊබ්‍රාහිම් බෝම්බයක් පුපුරුවා ගත් අතර, ඉන් පොලිස් නිලධාරීන් තිදෙනෙක්, ෆාතිමා සහ ඇගේ කුසේ සිටි දරුවා මෙන් ම තවත් දරුවන් දෙදෙනෙක් ජීවිතක්ෂයට පත් වුණා.

13. 22 සැප්තැම්බර් 2026නවුෆර් මවුලවි ඇතුළු විත්තිකරුවන් 24 දෙනා කවුද?

    2019 වසරේ පාස්කු ඉරිදා දින සහරාන් හෂීම් ප්‍රමුඛ අන්තවාදීන් පිරිසක් විසින් එල්ල කරන ලද මරාගෙන මැරෙන බෝම්බ ප්‍රහාර මාලාවට ආධාර අනුබල දීම ඇතුළු අධිචෝදනා 23,270ක් යටතේ නීතිපතිවරයා විසින් 2021 ඔක්තෝබර් මස 4 වන දා නවුෆර් මවුලවි ඇතුළු විත්තිකරුවන් 25 දෙනෙකුට එරෙහිව අධිචෝදනා භාර දෙනු ලැබුවා.

    ඉන් යාසින් බාවා අබ්දුල් රාවුෆ් නමැත්තා නඩු විභාගය අතරතුර 2023 වසරේදී මියගොස් තිබුණා.

    සෙසු විත්තිකරුවන් කවුද?

    1. මොහොම්මදු ඊබ්‍රහිම් මොහොම්මදු නව්ෆර් හෙවත් නවුෆර් මවුලවි:

    2. මොහොම්මදු සරිබූ ආදම් ලෙබ්බේ (අබූ හදීක් හෙවත් ගෆූර් මාමා)

    3. හයාතු මොහොමදු මිල්හාන් (අබු සිලා)

    4. මොහොමදු ඊබ්‍රහිම් සාදික් අබ්දුල්ලා (අබු උමර්)

    5. මොහොමඩ් ඊබ්‍රහිම් ෂාහීඩ් අබ්දුල් හක් (අබූ ෆලා)

    6. මොහොමඩ් අන්වර් මොහොමඩ් රිස්කාන් (අබු තාරික්)

    7. මොහොමඩ් මන්සූර් මොහොමඩ් සනස්දීන් (අබූ මිසාන්)

    8. අබ්දුල් මනාෆ් මොහොමඩ් ෆිර්දවුස්

    9. මොහොමඩ් රමිෂ් මොහොමඩ් සජීඩ් හෙවත් සජීඩ් මවුලවි (අබු නජා)

    10. අබ්දුල් ලතීෆ් මොහොමඩ් සාෆි (සාෆි මවුලවි/අබු ෆුර්කාන්)

    11. හුසේනූල් රිස්වි කාලිද් සමීර්

    12. මොහොමඩ් සවාහීර් මොහොමඩ් හසන් (අබු දාවුද්)

    13. මොහොමඩ් ඉෆ්තිකාර් මොහොමඩ් ඉන්සාෆ් (අබූ මොහොමඩ්)

    14. රෂීඩ් මොහොමඩ් ඊබ්‍රාහිම්

    15. මොහොමදු හනීෆා සෙයිනූල් ආබ්දීන් (අබු හිනා)

    16. මොහොමඩ් මුස්තාපා මොහොමඩ් හාරිස් (අබු නාන් සීයාර්)

    17. රසික් රාසා හුසේන්

    18. කච්චි මොහොමඩ් ජෙස්මින්

    19. සෙයිනූල් ආබ්දීන් මොහොමඩ් ජසීන්

    20. මොහොමඩ් මුස්තාපා මොහොමඩ් රිස්වාන්

    21. මීරා සහීඩ් මොහමඩ් නෆ්ලි (අබු සනා)

    22. මොහොමඩ් අමීන් අයන්තුල්ලා

    23. මොහොමඩ් අන්සාර්දීන් හිල්මි

    24. මොහොමඩ් අක්‍රම් අහක්කම්

    මෙහි සවිස්තර වාර්තාව මෙතැනින් කියවන්න...

14. 22 සැප්තැම්බර් 2026අධිකරණ සංකීර්ණයට දැඩි ආරක්ෂාවක්

    කොළඹ ත්‍රිපුද්ගල විශේෂ මහාධිකරණය පිහිටා ඇති අධිකරණ සංකීර්ණය වෙත පිවිසෙන මාර්ග සහ ස්ථානවල ආරක්ෂාව තර කර ඇතැයි එහි සිටින බීබීසී සිංහල ඩිජිටල් වාර්තාකරු, ජ්‍යෙෂ්ඨ මාධ්‍යවේදී සම්පත් දිසානායක පවසනවා.

    ඔහු සඳහන් කළේ, වෙන දා මෙන "පහසුවෙන් කෙනෙකුට අධිකරණ සංකීර්ණය වෙත පිවිසීමට නොහැකි" බවයි.

    අධිකරණ සංකීර්ණය වෙත ඇතුළු වන පුද්ගලයින් දැඩි පරීක්ෂා කිරීම්වලට ලක් කළ බව ද ඔහු පැවසුවා.

    "පොලිසිය, විශේෂ කාර්ය බළකා [සාමාජිකයින්] යොදවමින් ආරක්ෂාව තර කර තිබෙනවා," ඔහු වැඩිදුරටත් සඳහන් කළා.

    මේ අතර, මෙම නඩු විභාගය වාර්තා කිරීමට පැමිණෙන මාධ්‍යවේදීන්ගේ තොරතුරු ඊයේ පොලිසිය විසින් ලබා ගන්නා ලද අතර එම මාධ්‍යවේදීන්ට පමණක් අධිකරණ පරිශ්‍රයට පැමිණීමට අවසර ලැබෙන බව පොලිසිය පැවසුවා.

15. 22 සැප්තැම්බර් 2026මේ දක්වා සිදුවුණේ කුමක් ද?

    2019 වසරේ අප්‍රේල් 21 පාස්කු ප්‍රහාරය සිදුවී මේ දක්වා වසර 7ක් ගත වී තිබෙනවා.

    මේ, එතැන් සිට අද දක්වා වූ සිදුවීම් පිළිබඳව කෙරෙන විමසා බැලීමක්.

    සම්පූර්ණ ලිපිය මෙතැනින් කියවන්න...

16. 22 සැප්තැම්බර් 2026කොළඹ ත්‍රිපුද්ගල විශේෂ මහාධිකරණය අධිකරණය අසල තත්ත්වය

    

    

17. 22 සැප්තැම්බර් 2026Breaking, නවුෆර් මවුලවි ඇතුළු විත්තිකරුවන් 24 දෙනා අධිකරණය වෙත රැගෙන එයි

    නවුෆර් මවුලවි ඇතුළු විත්තිකරුවන් 24 දෙනා අධිකරණය වෙත අධිකරණය වෙත රැගෙන විත් තිබෙනවා.

    එහි සිටින අප වාර්තාකරු සඳහන් කළේ, උදෑසන 7:55ට පමණ ඔවුන් බන්ධනාගාර නිලධාරීන් විසින් අධිකරණයට රැගෙන ආ බවයි.

    මේ වන විට අධිකරණය අවට ආරක්ෂාව සඳහා පොලිසිය සහ විශේෂ කාර්ය බළකා ඇතුළු ආරක්ෂක අංශ සාමාජිකයින් යොදවා ඇති බව ද අප වාර්තාකරු සඳහන් කළා.

18. 22 සැප්තැම්බර් 20262019 අප්‍රේල් 21 සිදුවුණේ කුමක් ද?

    මරාගෙන මැරෙන බෝම්බකරුවන් 9 දෙනෙකු විසින් පහත දැක්වෙන ස්ථානවලදී බෝම්බ පුපුරුවා හැරියා.

    ඉන් දිවි අහිමිවූ පිරිස 270කට අධික ය. ඒ අතරන් 45 දෙනෙක් විදේශිකයින්. ප්‍රහාරවලින් තුවාල ලැබූ පිරිස 500කට අධිකයි.

    

19. 22 සැප්තැම්බර් 2026සුබ උදෑසනක්!

    2019 වසරේ පාස්කු ඉරුදින (අප්‍රේල් 21) කොළඹ ඇතුළු ප්‍රදේශ කිහිපයක සංචාරක හෝටල්, කිතුනු දේවස්ථාන ඇතුළු ස්ථාන ඉලක්ක කරගෙන මරාගෙන මැරෙන ත්‍රස්ත ප්‍රහාර එල්ල කිරීම සඳහා කුමන්ත්‍රණය කිරීම, ආධාර අනුබල දීම ඇතුළු චෝදනා 23,270ක් යටතේ නවුෆර් මවුලවි ඇතුළු විත්තිකරුවන් 24 දෙනෙකුට එරෙහිව පැවති නඩු විභාගයේ තීන්දුව අද ප්‍රකාශයට පත් කිරීමට නියමිතව තිබෙනවා.

    නවරත්න මාරසිංහ, රාමනාදන් කන්නන් සහ සුජීව නිශ්ශංක යන කොළඹ ත්‍රිපුද්ගල මහාධිකරණ විනිසුරු මඩුල්ල විසින් මෙම තීන්දුව ප්‍රකාශයට පත් කිරීමට නියමිතයි.

    වසර පහකට ආසන්න කාලයක් පැවති මෙම දීර්ඝ නඩු විභාගය අගෝස්තු 24 වන දා අවසන් කෙරුණා.

    අද උදෑසන මීට අදාළ නඩු විභාගය ආරම්භ වීමට නියමිත අතර බීබීසී සිංහල කණ්ඩායම එම තොරතුරු කොළඹ අලුත්කඩේ අධිකරණ සංකීර්ණයේ සිට ඔබ වෙත සජීවීව මෙම පිටුව ඔස්සේ ගෙන ඒමට බලාපොරොත්තු වෙනවා.