جانتن مارکس له المانه

	دوديزو اقتصادي مسلو، چې يو وخت به د دغه ډول غونډو د سر موضوع وه، اوس نورو اندېښنو ته ځاى ورپرېيښى

د جي-اته دا سرمشريزه د بدلون په يوۀ پېر کې جوړيږي.

فرانسوى ولسمشر نيکولا سرکوزي او چاپانى لومړى وزير شينزو ابې د لومړي ځل لپاره پکې گډون کوي، اود بريتانوي لومړي وزير ټونې بلېر لپاره چې ډېر ژر له خپلې دندې لرې کېږي، ورستۍ سرمشريزه ده.

غونډه چې کوربنه يې د المان لومړۍ وزېره انگېلا مېرکل ده، به له سړې جگړې راوروسته پېر کې د يوۀ بشپړ ديپلوماتيک لوبغاړي په توگه، د يوموټي جرمني دريځ پياوړى کوي.

د جعمې په ورځ به د لويو مخ پر ودې هېوادو- برازيل، چين، هند، مکسيکو او جنوبي افريقا دولتي او حکومتي مشران د جي اته د ډلې له مشرانو سره په غونډه کې ورگډ شي.

دا يوه نښه ده چې د ډېرى ستونزو حل چې دلته پرې خبرې کيږي، نور نو يوازې د شتمنو هېوادو له وسه نه ده پوره. مهم افريقايي مشران به هم په غونډه کې گډون ولري.

د المان لومړۍ وزېره ټينگه ده چې د جي اته دا سرمشريزه د سوداگرۍ، او د پورونو د سپکولو په اړه د افريقا له لويې وچې سره پر هغو ژمنو يو ځل بيا ټينگار کوي چې دوه کاله مخکې په گلينگل کې د جې اته په سرمشريزه کې شوې وې.

دوديزو اقتصادي مسلو، چې يو وخت به د دغه ډول غونډو د سر موضوع وه ، اوس نورو اندېښنو ته ځاى ورپرېيښى، چې پکې تر ټولو مهمه د نړيوالې تودخې خبر ده، چې د بوش د ادارې له خوا له يو څه خوځښت سره -سره، متحده ايالتونه پکې له نورو جې اته غړيو هېوادو ډېر وروسته پاتې دي.

	د غونډې له پيل سره بيا د سړې جگړې انگازې راپورته شوې چې تر ډېره يې لامل د روسي ولسمشر ولاديمير پوتين هغه گواښ دى چې که امريکا د توغنديز دفاع خپل نظام په پولند او چک جمهوريت کې ودروي دى به د خپلو وسلو مخه اروپا ته ورواړوي

دا سرمشريزه په داسې ځاى کې جوړيږي چې يو وخت کمونيست هېواد، د الماني د موکراتيک جمهوريت و.

او عجيبه ده چې اوس دا دى بيا د سړې جگړې انگازې راپورته شوې، تر ډېره د روسيې د ولسمشر ولاديمير پوتين د گواښونو له امله چې د خپلو وسلو مخه به اروپا ته ورواړوي که چېرې امريکا د توغنديز دفاع خپل نظام په پولند او چک جمهوريت کې ودروي.

له ښاغلي پوتين سره ښايي يو لړ مخامخ لېدنې کتنې وشي. خو د المان لومړۍ وزيره مېرکل به لېواله وي چې پرينږدي د روسيې د ناندريو پر سر لانجه د جي اته مشران د سرمشريزې له اصلي موخو بلې خوا ته واړوي.