خپلواک ساپى کابل

	مرستندويې ټولنې له ډيرو بې وزلو خلکو سره مرستې کولې

د موسسې مشر محمد خان صميمي مطبوعاتو ته ويلي دوى په خپلو کې د سلا مشورې له يوې غونډې وروسته دې پايلې ته رسيدلي چې د فارياب په ولايت کې د دوى د فعاليت په سيمه کې امنيت د ډاډ وړ ندى او همداسې يوې انگيرنې دوى دې ته اړويستې چې دغلته خپل فعاليتونه ودروي .

ښاغلي صميمي د شوې پريکړې د سموالي په تړاوو د ولايت د يوۀ عمومي واټ پر سر په رڼا ورځ د وسله والو کسانو په څو يا کمين کې د دوى د همکارانو د لويدو د بيلگې يادونه وکړه او دا يې ددې نښه وبلله چې د بشري مرستو د سمون دغه موسسه له دې وروسته د فارياب په ليرې پرتو کليوالي سيمو کې د امنيت د کمزورتيا له کبله فعاليت نشي کولى .

د ښاغلي صميصمي ډيره نيوکه پر سيمه يزه چارواکو وه .

مرستندويې ټولنې ته د امنيت ضمانت نه شو ورکولى د فارياب والي

دده په وينا چارواکو ويلي وو چې په کمين کې د دغې موسسې د وژل شوي کارکونکي قاتلان به د قانون منگولو ته سپاري خو اوس په دې کار کې ظاهرا پاتې راغلي دي .

د موسسې مشر په چارواکو دا تور هم لگولى چې گواکې د امنيت له اړخه يې د موسسې د کارکونکو د خونديتوب په تړاوو هيڅ ډول ډاډ او ژمنه نده ورکړې .

د سي اچ اى په نامه د بشري مرستو دغه موسسه د فارياب په ولايت کې ٢٠ روغتيايې کلينيکونه سمبالوي او په دې سربيره يې ١٠٠ داسې روغتيايې رضاکاران هم چمتو کړي چې په بيړنيو حالاتو کې د ولس او روغتيايې کلينيکونو تر مينځ اړيکي جوړوي او خلکو ته مرستې رسوي .

له دغې موسسې سره يوازې د فارياب په ولايت کې ١٢٠٠ روغتيايې کارکونکي په فعاليت بوخت دي .

د موسسې د فعاليت په دريدو سره ټول دغه کارکونکي هم له بې روزگارۍ سره مخامخيدونکي دي .

دوه ورځې وړاندې د فارياب د خواجۀ سبز پوش په سيمه کې ناپيژندل شويو ټوپکوالو د سي اچ اى د موسسې په يوه گاډي بريد وکړ.

ددې په پايله کې د موسسې يو کارکونکى ووژل شو او درې نور کارکونکي ټپيان شول .

د فارياب والي محمد لطيف هم له خپل لورې ويلي چې دوى د فعاليت په تړاوو نوموړې موسسې ته هيڅ ډول امنيتي ضمانت نشي ورکولى خو زياتوي چې د ولايت امنيتي ارگانونو د بريد کونکو په لټه کلکې پلټنې پيل کړې دي .

تر دا مهاله د سي اچ اى پر کارکونکو د تر سره شوي دغه بريد په تور هيڅوک هم ندي نيول شوي .