Dùil ri call còrr is £1m aig ionad turasachd ùr Caisteal Inbhir Nis

Tha dùil gum bi call còrr is £1m aig Caisteal Inbhir Nis sa chiad bhliadhna on chaidh ùrachadh mar ghoireas do luchd-turais.

Thàinig na figearan am bàrr ann an aithisg a chaidh air beulaibh chomhairlichean Diardaoin.

Dh'fhosgail seann Chùirt an t-Siorraidh às ùr san Dùbhlachd an-uiridh an dèidh obair leasachaidh luach mu £47m.

A dh'aindeoin agus gun tàinig 80,000 duine gu ruige seo, tha comhairlichean Gàidhealach air dragh a nochdadh gu bheil sin timcheall air an dàrna leth agus a bhathar a' sùileachadh.

Ghabh Ceannard Comhairle na Gàidhealtachd, Reamonn Bremner, ris gur e "briseadh-dùil" a bh' anns na figearan.

Chaidh na h-uairean fosglaidh agus na tha de luchd-obrach mar-tha a lùghdachadh.

Thuirt Highlife na Gàidhealtachd, a tha a' ruth a' chaisteil, gu bheil iad ag obair air plana leasachaidh.

Thòisich an obair-leasachaidh ann an 2022 airson àite-bìdh agus bùth a thogail, a thuilleadh air taisbeanadh eadar-ghnìomhach a' sealltainn eachdraidh agus cultair na Gàidhealtachd.

Chuala buill Comataidh an Stòrais aig Comhairle na Gàidhealtachd Diardaoin nach deach a rèic de thiceadan ach mu 55% de na bha dùil.

Thuirt an aithisg gur dòcha gum bi 2029 ann mus tèid na leabhraichean a chothromachadh.

A' bruidhinn aig a' choinneimh, thuirt ceannard na comhairle, Reamonn Bremner: "Chan e a-mhàin gu bheil na h-àireamhan nas ìsle na bha dùil, tha iad mòran nas ìsle na bha dùil.

"Dè am plana a th' ann airson dèiligeadh ris agus dè cho luath a ghabhas am plana sin a thoirt gu buil," thuirt e.

Thuirt Àrd-oifigear Highlife na Gàidhealtachd, Steve Walsh, gun robh iad ag obair air ro-innleachd còig bliadhna airson agus gun soirbhich leis an ionad san ùine fhada.

Am measg nan amasan, 's e barrachd de luchd-siubhail nam busaichean-cuairte a tharraing ann.

Dh'fhaodadh cuideachd gun tèid coimhead air prìs nan ticeadan mar dhòigh barrachd dhaoine fhaighinn tro na dorsan.