Taic-airgid airson eaglais eachdraidheil an Inbhir Nis a chàradh

Tha Urras Nàiseanta nan Eaglaisean air taic-airgid luach £36,000 a thoirt do dh'Eaglais Shaor a Tuath an Inbhir Nis a chuidicheas iad leis an obair-chàraidh a tha a dhìth an dèidh mar a rinn stoirm milleadh mòr air an t-seann togalach.

Leag a' ghaoth a thàinig an cois Stoirm Floris as t-samhradh an-uiridh an coilleach-gaoithe air mullach stìobaill na h-eaglaise an cois Abhainn Nis, agus chaidh milleadh luach £100,000 a dhèanamh.

'S e an stìoball am fear as àirde sa bhaile aig còrr air 50 meatair agus 's e an eaglais fhèin an tè as motha le suidheachain gu leòr do 1,400 luchd-adhraidh.

Thuirt Ministear Eaglais Shaor a Tuath, an t-Urramach Aonghas MacRath: "Tha an togalach againn na ghoireas mìorbhaileach dhan bhaile agus dhan choimearsnachd, gu h-àraid gus daoine a thoirt cruinn còmhla.

"Tha fèill mhòr oirre airson bainnsean, tachartasan òigridh agus coimhearsnachd, agus airson cuirmean le còisirean agus ceòl beò."

Ann an 2023 fhuair iad taic-airgid mòr bho Urras Nàiseanta nan Eaglaisean airson guitearan agus pìoban-drèanaidh ùrachadh leis nach robh an fheadhainn a bh' ann dìonach agus bha an t-uisge a bha a' tighinn asta a' milleadh an togalaich.

Bha aghaidh na h-eaglaise ris an abhainn cuideachd a' crìonadh. Chosg an obair sin mu £240,000 uile gu lèir.

Tha an t-Urr. MacRath den bheachd gum bi barrachd sheann togalaichean an Inbhir Nis feumach fhathast air obair-chàraidh air sgàth buaidh athatharrachadh na gnàth-shìde.

Thuirt Mgr MacRath: "Tha grant bho Urras Nàiseanta nan Eaglaisen gar cuideachadh gus pàirt chudromach de dhualchas a' bhaile againn a ghlèidheadh."

Chaidh an eaglais Ghotach a tha clàraichte mar thogalach liosta B a dhealbh leis an ailtire ionadail an Dr Alexander Ross agus chaidh a chrìochnachadh ann an 1893.