Abubuwan da ke faruwa a Najeriya da sauran sassan duniya, Alhamis 22/10/2026

Rahoto kai-tsaye

Rabi'atu Kabir Runka da Zubair Ahmad

1. Sa'o'i 2 da suka wuceBurkina Faso ta dawo da hukuncin kisa kan manyan laifuka

   

   Asalin hoton, Reuters

   Ƙasar Burkina Faso ta sake dawo da hukuncin kisa kan laifuka da suka haɗa da cin amanar ƙasa da ta’addanci da leƙen asiri, matakin da ya haifar da fargabar cewa gwamnatin sojin ƙasar na iya amfani da dokar wajen murƙushe masu sukar ta.

   Majalisar dokokin ƙasar, wadda ba a zaɓe ta ta hanyar dimokuraɗiyya ba, ta amince baki ɗaya da sabon kundin hukunta laifuka a wannan makon, wanda ya sake dawo da hukuncin kisa kan wasu laifuka, ciki har da kashe iyaye da kuma shigo da kayayyakin da wa’adin amfaninsu ya ƙare ko waɗanda aka haramta.

   Wannan mataki na zuwa ne a daidai lokacin da gwamnatin sojin ƙasar, ƙarƙashin jagorancin Kyaftin Ibrahim Traoré, ke fuskantar suka kan takaita ‘yancin jama’a da kuma yadda take tafiyar da yaƙi da matsalar ta’addanci da ta daɗe tana addabar ƙasar.

   Ministan shari’a, Edasso Rodrigue Bayala, ya bayyana cewa wajibi ne a ɗauki matakin domin yaƙi da ta’addanci. Ya yi iƙirarin cewa masu aikata ta’addanci na cin gajiyar sassaucin tsohuwar dokar wajen ɗaukar mayaƙa, domin waɗanda aka kama da laifi za su fuskanci daurin rai da rai maimakon hukuncin kisa.

   Sai dai ƙungiyar kare haƙƙin bil’adama ta Human Rights Watch (HRW) ta yi gargaɗin cewa matakin na iya mayar da hukuncin kisa wata hanya ta yin shiru da masu sukar gwamnati, a wani yanayi na ƙara matsa wa masu bayyana ra’ayoyin da ba su dace da na gwamnati ba.

2. Sa'o'i 2 da suka wuceHukumomin tsaron Intanet na ƙoƙarin shawo kan barazanar farmaki ga intanet a duniya

   

   Asalin hoton, Getty Images

   Hukumomin tsaron intanet a kasashe da dama na kokarin dakile barazanar da wasu manyan kura-kurai da aka gano a manhajar PHP da ka iya haifarwa ga miliyoyin shafukan intanet.PHP wata muhimmiyar manhajar tsara shafukan intanet ce da aka kwashe shekaru ana amfani da ita. Wakilin BBC ya ce tawagar masu kula da tsaro na PHP a sassan duniya na kokarin magance matsalar, domin kaucewa fadawa komar masu kutse intanet da hakan ka iya ba su damar samun bayanai masu matuƙar muhimmanci, ciki har da bayanan asusun ajiya na banki.Masana sun ce akwai wasu kura-kurai masu hadari da suka shafe sama da shekara goma ba tare da an gano su ba a manhajar, sai yanzu da aka yi amfani da fasahar AI.

3. Sa'o'i 2 da suka wuceNew York na shirin haramta hawan keken doki a Central Park

   

   Asalin hoton, Getty Images

   Tun tana yarinya mai shekaru biyar, Alexus Lawson ta kamu da sha’awar keken dawakan na yawon buɗe ido, bayan da ta taɓa ɗaya daga cikinsu a Central Park da ke birnin New York na Amurka.

   Lawson ta shafe shekaru shida tana tuƙin keken doki a wannan shahararren wurin shakatawa, inda dawakan nata ke jan keken. Sai dai ta ce ta shiga damuwa tun bayan da ta samu labarin cewa majalisar birnin ta kaɗa ƙuri’ar haramta amfani da waɗannan kekuna a wannan makon, bisa dalilan kare lafiyar dabbobi da kuma tsaron jama’a.

   “Me ya kamata in yi da dokina?” in ji Lawson mai shekaru 28, tana magana kan dokinta na yanzu mai suna Starlight.

   “Za ku gaya mini cewa ba zan sake aiki da ita ba? Ta yaya zan tabbatar da lafiyarta?”

   Lawson na ɗaya daga cikin kusan mutane 200 da ke tuƙin kekunan na dawaki a Central Park. Wannan al’ada ta shafe sama da shekaru 160 tana gudana, duk da cewa a wasu lokuta tana jawo ce-ce-ku-ce.

   A yanzu kuma ta zama ɗaya daga cikin abubuwan da masu yawon buɗe ido ke sha’awar yi a birnin.

   Ana sa ran majalisar birnin New York za ta amince da dokar haramta kekunan a ranar Alhamis, wadda za ta fara aiki a watan Yunin 2028.

   Magajin garin New York, Zohran Mamdani, na goyon bayan wannan shawara, kuma ya ce zai taimaka wajen samar da wani shiri na sauya sana’a ga ma’aikatan da wannan mataki zai shafa.

   Sai dai wasu daga cikin masu tukin kekunan da suka zanta da BBC sun ce ba sa son a ba su wasu sabbin ayyukan yi a madadin sana’arsu.

   Sun kuma yi watsi da zarge-zargen cewa ana wulaƙanta dawakan da suke amfani da su, duk da cewa da dama daga cikin mazauna New York da masu yawon buɗe ido sun nuna goyon baya ga shirin haramta kekunan.

4. Sa'o'i 3 da suka wuce'Ina da hujjar tsayawa takarar shugaban Najeriya a 2027' - Seyi Makinde

   

   Asalin hoton, Getty/Seyi/X

   Gwamnan jihar Oyo kuma ɗan takarar shugaban ƙasa a ƙarƙashin jam’iyyar APM, Seyi Makinde, ya kare matakin da ya ɗauka na fafatawa da shugaban Najeriya Bola Ahmed Tinubu da ya fito daga yankin tare da shi a zaɓen 2027, yana mai cewa yankin Kudu maso Yamma na iya fitar da ’yan takara fiye da ɗaya ba tare da hakan ya cutar da muradun yankin ba.

   Makinde ya bayyana hakan ne ranar Alhamis a taron tattaunawa da jama’a na jam’iyyar APM a yankin Kudu maso Yamma, wanda aka gudanar a Akure, babban birnin jihar Ondo.

   Ya ce tarihin siyasar yankin ya nuna cewa an taɓa samun ’yan takarar shugaban ƙasa guda biyu daga Kudu maso Yamma a zaɓen shekarar 1999.

   Gwamnan ya bayyana cewa wasu na sukar matakin da ya ɗauka na shiga takarar, bisa hujjar cewa tuni yankin ke da wanda zai tsaya takarar shugaban ƙasa.

   Makinde ya ce: “Na saurari ra’ayoyin mutane. Sun tambaye mu cewa, ‘Seyi Makinde, me ya sa za ka tsaya takara a wannan zaɓe alhali Kudu maso Yamma tuni tana da wanda yake zaune a kujerar shugaban ƙasa?’

   “Na bayyana musu cewa muna da misali a nan yankin Kudu maso Yamma.”

   Ya ce a zaɓen shekarar 1999, yankin ya samar da tsohon shugaban ƙasa Olusegun Obasanjo da kuma wani ɗan takara, Olu Falae, waɗanda duk suka fafata a zaɓen shugaban ƙasa.

5. Sa'o'i 3 da suka wuceBankin Barclays zai sallami ma’aikata 5,000 ya maye gurbinsu da fasahar AI

   

   Asalin hoton, Bloomberg via Getty Images

   Bankin Barclays na Birtaniya zai rage ma’aikatansa da kusan 5,000 yayin da yake ƙara amfani da fasahar basirar na’ura mai kwakwalwa (AI) a ayyukansa.

   Bankin ya ce tuni ya soke guraben ayyukan yi 1,000, kuma yana sa ran kammala rage wasu guraben aiki 4,000 nan da ƙarshen wannan shekara. Wannan zai zama kusan kashi biyar cikin ɗari na dukkan ma’aikatansa a faɗin duniya.

   Matakan rage kuɗaɗen gudanarwa sun fi mayar da hankali ne kan sashen bankin da ke kula da harkokin kwastomomi a Birtaniya. Sai dai wasu ayyukan gudanarwa na bayan fage da suka shafi Birtaniya ana gudanar da su ne a Indiya, inda ake sa ran za a samu kaso mai yawa na ma’aikatan da za a sallama.

   Barclays ya ce wannan sauyi na daga cikin wani shiri da ya daɗe yana aiwatarwa na zamanantar da ayyukansa, inda ya bayyana amfani da fasahar AI a matsayin ƙarin abin da zai inganta dabarun da yake bi.

   Duk da cewa ba dukkan rage guraben ayyukan yi ne ya samo asali daga amfani da AI ba, girman matakin ya sake haifar da damuwa kan tasirin sabuwar fasahar ga ayyukan yi.

   Kamfanoni na ƙara yawan kuɗaɗen da suke kashewa wajen amfani da AI, yayin da ake ci gaba da iƙirarin cewa sabbin kayan aikin fasahar za su iya maye gurbin wasu ayyukan yau da kullum da ma’aikata ke yi, kamar ayyukan gudanarwa da shirye-shiryen kwamfuta.

   Sauran bankunan da suka yi gargaɗin yiwuwar rage ayyukan yi sakamakon amfani da AI a wannan shekara sun haɗa da HSBC da Standard Chartered da kuma Danske Bank.

   Sharon Graham, babbar sakatariyar ƙungiyar ƙwadago ta Unite, wadda ke wakiltar ma’aikatan harkokin banki, ta zargi Barclays da amfani da AI a matsayin hujjar sallamar ma’aikatansa.

   Ta bayyana cewa ya kamata ma’aikata su mayar da hankali wajen ƙara wa ma’aikata ƙwarewa domin su ci gaba da kasancewa cikin aiki yayin da sabbin fasahohi ke sauya yanayin wuraren aiki.

6. Sa'o'i 4 da suka wuceMajalisar Tattalin Arziki ta Najeriya ta amince da shirin rage tsadar rayuwa

   

   Asalin hoton, Getty Images

   Majalisar Tattalin Arzikin Najeriya ta amince da wani shirin kwanaki 90 da nufin rage tsadar rayuwa da sauƙaƙa farashin abinci da jawo masu zuba jari.

   Mataimakin Shugaban Ƙasa, Kashim Shettima, ne ya jagoranci taron majalisar na 161 a ranar Alhamis, inda aka amince da shirin da Ma’aikatar Kuɗi ta Tarayya ta gabatar.

   Shirin ya ƙunshi rage tsadar abinci da daidaita haraji da kammala manyan ayyukan raya ƙasa da kuma warware matsalolin da ke hana zuba jari.

   Majalisar ta kuma amince da kafa tsarin sa ido kan ayyukan raya ƙasa domin tabbatar da gaskiya da riƙon amana, musamman wajen amfani da kuɗaɗen da ake samu bayan cire tallafin man fetur.

   Shettima ya buƙaci gwamnonin jihohi da hukumomin gwamnati su tabbatar da cewa sauye-sauyen tattalin arzikin Shugaba Bola Tinubu sun inganta rayuwar ’yan Najeriya, ciki har da samun sufuri mai araha, kiwon lafiya, ayyukan yi da tsaro na kuɗi.

   Majalisar ta kuma amince da kafa tsarin haɗin gwiwar samar da kuɗaɗe tsakanin gwamnatin tarayya da jihohi domin bunƙasa motocin iskar gas (CNG) da motocin da ke amfani da lantarki. An kuma umarci hukumomi su tattauna da ƙungiyoyin sufuri domin tabbatar da cewa rage kuɗin gudanarwa ya haifar da saukar kuɗin mota ga fasinjoji.

   Wannan saon matakin dai na zuwa daidai lokacin da 'yan ƙasar ke kokawa akan tsadar makamashi da hauhawar farashin kaya, bayan da gwamnatin ta cire tallafin man fetur tare da alƙawarin samar da sassaucin rayuwa tun daga lokacin.

7. Sa'o'i 4 da suka wuceZanga-zangar gama gari na ƙara ƙamari a Faransa

   

   Asalin hoton, Getty Images

   Shugaban Faransa, Emmanuel Macron, ya ce a ranar Asabar za a amince da gudanar da zanga-zangar ƙungiyoyin ƙwadago da hukumomi suka ba izini kawai a garuruwa da biranen ƙasar, bayan zanga-zangar da aka gudanar a faɗin Faransa a ƙarshen makon da ya gabata ta rikide zuwa tarzoma.

   Da yake magana kan matakin, yayin da wasu birane ciki har da Lyon da Nice suka sanya dokar hana zanga-zanga gaba ɗaya, Macron ya ce ba za a amince da zanga-zangar da ba ta halatta ba. Sai dai ya ce za a samar wa ƙungiyoyin ƙwadago wasu hanyoyin gudanar da zanga-zangar domin kare harkokin kasuwanci.

   Manyan zanga-zangar da aka gudanar ranar Asabar da ta gabata kan tsadar rayuwa da yanayin makarantu sun haida koma baya a ƙasar, sakamakon tarzoma da sace-sacen kayayyaki da suka janyo lalata shaguna da kuma gine-ginen tarihi.

   Ministan cikin gida, Jean-Didier Berger, ya ce za a ƙara yawan jami’an ’yan sanda da kashi 20 cikin 100 idan aka kwatanta da na ƙarshen makon da ya gabata. Hakan na zuwa ne bayan gwamnati ta fuskanci zarge-zargen cewa ba ta yi hasashen girman tarzomar ba.

   Jaridar Le Figaro ta ruwaito ministan yana cewa rabin mutanen da aka tsare ba su taɓa samun tarihin aikata laifi a baya ba.

   Macron ya gana da jami’an leƙen asiri da ministocinsa a ranar Alhamis domin shirya matakan tsaro gabanin sabuwar ranar zanga-zangar ƙasa da aka shirya gudanarwa a ranar Asabar.

8. Sa'o'i 4 da suka wuceAlƙali ya umarci Trump ya amsa tambayoyi ƙarkashin rantsuwa a shari'arsa da BBC

   

   Asalin hoton, Getty Images

   Wata kotu a Amurka ta umarci Shugaba Donald Trump da ya amsa tambayoyi a ƙarƙashin rantsuwa, a cikin shari’ar ɓata suna da ya shigar da BBC, kafin ranar 11 ga Disamba.

   Trump ya shigar da ƙarar BBC ne kan wani shiri na Panorama, wanda ya haɗa sassa biyu daban-daban na wani jawabin da ya yi gabanin tarzomar da ta faru a harabar Majalisar Dokokin Amurka a shekarar 2021.

   Charles Tobin, lauya mai wakiltar BBC, ya shaida wa kotu cewa, “har yanzu ba mu samu damar yi wa wanda ya shigar da ƙarar tambayoyi a ƙarƙashin rantsuwa ba,” alhali watanni biyu ne suka rage kafin ƙarshen lokacin tattara hujjoji.

   Trump ya soke wata ganawa da aka shirya yi da shi a ranar 16 ga Oktoba, yana mai cewa akwai “batutuwa masu muhimmanci ga ƙasa,” a lokacin da yake gudanar da yaƙin neman zaɓe a jihar Georgia.

   A tsarin shari’ar Amurka, ana kiran wannan mataki da deposition, wato amsa tambayoyi a wajen kotu a ƙarƙashin rantsuwa, inda ake rubuta amsoshin domin amfani da su a matakan shari’a na gaba.

   Alƙaliyar majistare ta Amurka da ke sauraron shari’ar, Enjoliqué Lett, ta ce dole ne Trump ya amsa tambayoyin a ƙarƙashin rantsuwa kafin ranar 11 ga Disamba, sai dai idan an tsawaita lokacin tattara hujjoji.

   A makon da ya gabata, lauyoyin sun nemi Lett ta tilasta wa Trump ya bayyana domin amsa tambayoyin, bayan da ganawar da aka tsara yi da shi a baya ba ta gudana ba.

   A ranar, Trump ya halarci wani gangamin yaƙin neman zaɓen tsakiyar wa’adi a Dalton, jihar Georgia, da kuma wani taron tara kuɗaɗen yaƙin neman zaɓe a gidansa na Mar-a-Lago da ke Florida.

9. Sa'o'i 5 da suka wuceNajeriya ta ce tana ƙara ƙaimi wajen daƙile yaɗuwar cutar Ebola

   

   Ministan lafiyar Najeriya, Farfesa Muhammad Ali Pate, ya ce hukumomi na ƙara tsaurara matakan da za su hana yaɗuwar cutar Ebola, yayin da ƙasar ke fuskantar bullar cutar ta farko da aka tabbatar cikin sama da shekaru goma.

   Farfesa Pate ya ce majinyaciyar, wadda ke da tarihin tafiye-tafiyen ƙasashen waje, tana samun kulawar likitoci, kuma yanayinta na ƙara inganta.

   Ya ce: “An sanar da mu cewa sakamakon gwaje-gwajen da aka yi mata na nuna gagarumin ci gaba, kuma muna fatan za ta warke nan ba da daɗewa ba.”

   Ya ƙara da cewa ana yin duk mai yiwuwa domin tabbatar da cewa majinyaciyar ta tsira.

   Ministan ya bayyana cewa an fara aikin gano mutanen da suka yi mu’amala da ita, ciki har da waɗanda suka haɗu da ita a asibitoci, wani asibiti mai zaman kansa da kuma gidanta.

   Ya ce an killace mutanen da ake ganin suna cikin haɗarin kamuwa da cutar sosai, yayin da ake ci gaba da sa ido kan sauran waɗanda suka yi mu’amala da ita, bisa shawarwarin masana lafiya.

   Farfesa Pate ya ce gwamnati ta kunna tsarin kula da ayyukan gaggawa domin tunkarar lamarin, inda Cibiyar Kula da Cututtuka ta Najeriya (NCDC) ke aiki kafada da kafada da hukumar Africa CDC da kuma hukumomin lafiya na Babban Birnin Tarayya, Abuja.

   Ya bayyana cewa an yi wa gwamnonin jihohi bayani kan halin da ake ciki, kuma kowace jiha ta tsara matakan tunkarar cutar bisa jagorancin Africa CDC.

   Ya ƙara da cewa gwamnati ta saki ƙarin kuɗaɗe ga NCDC domin tallafa wa ayyukan dakile cutar.

   Ministan ya ce: “Mun tabbatar wa ’yan Najeriya cewa muna da ƙarfin kula da lafiyar jama’a da zai ba mu damar tunkarar wannan cuta.”

   Ya kuma bayyana cewa an sanar da Hukumar Lafiya ta Duniya (WHO) game da lamarin, sannan an gayyato masana domin taimakawa wajen gano yanayin cutar da kuma ɗaukar matakan dakile yaɗuwarta.

   An haɗa shugabannin addinai da na al’umma

   Farfesa Pate ya ce gwamnati na aiki tare da shugabannin al’umma da na addinai domin tallafa wa matakan tunkarar cutar, cikinsu har da mai alfarma Sarkin Musulmi, Alhaji Sa’ad Abubakar III, da shugabannin Ƙungiyar Kiristoci ta Najeriya (CAN) a matsayin waɗanda ake haɗin gwiwa da su.

   Najeriya ta taɓa fuskantar barkewar cutar Ebola a shekarar 2014, lokacin da wani matafiyi ya shigo da cutar cikin ƙasar.

10. Sa'o'i 5 da suka wuceƘungiyoyin ƙwadago sun yi barazanar shiga yajin aiki a faɗin Najeriya

    

    Ƙungiyar ƙwadago ta Najeriya (NLC) da Ƙungiyar Ƙwadago ta TUC sun yi gargaɗin yiwuwar shiga yajin aikin gama-gari a faɗin ƙasar, bayan tattaunawarsu da gwamnatin tarayya kan buƙatun ma’aikata ta gaza haifar da matsaya.

    Ƙungiyoyin sun ce matakin da za su ɗauka na gaba zai dogara ne da sakamakon wata ganawa da aka shirya gudanarwa ranar Talata, 27 ga watan Oktoba.

    Sun ƙara da cewa sun umarci rassansu da majalisun ƙwadago na jihohi su fara shirin yiwuwar ɗaukar matakin ƙwadago, idan gwamnati ta gaza samun gagarumin ci gaba wajen warware matsalolin da suka gabatar.

    Taron, wanda aka gudanar a ma’aikatar ƙwadago ta tarayya da ke Abuja ranar Alhamis, ya tattauna buƙatun da suka haɗa da rage farashin man fetur zuwa matakin da yake a shekarar 2024, sake tattauna mafi ƙarancin albashi na ƙasa da aiwatar da rangwamen haraji da aka amince da shi, da kuma warware saɓanin da ake da shi da ma’aikatan lafiya da sauran ma’aikatan gwamnati.

    A cikin wata sanarwa ta haɗin gwiwa da Babban Sakataren NLC, Benson Upah, da Babban Sakataren TUC, Nuhu Toro, suka sanya wa hannu, ƙungiyoyin sun ce wakilan gwamnati da suka halarci taron ba su da cikakken izinin yin tattaunawa mai ma’ana kan batutuwan da aka gabatar.

    Sai dai ƙungiyoyin sun ce har yanzu a shirye suke su ci gaba da tattaunawa, amma ba za su amince da ci gaba da jan ƙafa wajen magance matsalolin ma’aikata ba.

    Baya ga haka, ƙungiyoyin na neman gwamnati ta aiwatar da rangwamen harajin da aka amince da shi, tare da warware takaddamar da ake da ita da Ƙungiyar Ƙwadago ta Ma’aikatan Lafiya (JOHESU) da kuma Majalisar Tattaunawar Ma’aikatan Gwamnati ta Ƙasa.

11. Sa'o'i 6 da suka wuceAn gano ƙarin waɗanda suka yi mu’amala da mai cutar Ebola a Najeriya

    

    Asalin hoton, Anadolu via Getty Images

    Hukumar kula da lafiyar jama’a ta Afirka (Africa CDC), ta ce ana ci gaba da gano ƙarin mutanen da suka yi mu’amala da matar da aka tabbatar tana ɗauke da cutar Ebola a Najeriya, yayin da ƙasar ke gudanar da bincike kan bullar cutar a karon farko cikin sama da shekaru goma.

    Dokta Wessam Mankoula, shugaban sashen shirin ko-ta-kwana da tunkarar annoba na hukumar Africa CDC, ya shaida wa ’yan jarida a ranar Alhamis cewa an ƙara gano wasu mutanen da suka yi mu’amala da majinyaciyar.

    Ya ce: “A taron safiyar yau da muke nazarin halin da ake ciki, mun samu rahoton cewa an ƙara gano wasu mutanen da suka yi mu’amala da ita.”

    Ya ƙara da cewa mafi yawan waɗannan mutane ma’aikatan lafiya ne a cibiyoyin kiwon lafiya daban-daban da aka yi wa matar magani, baya ga wasu ’yan tsirarun ’yan uwanta.

    Dokta Mankoula ya ce ana ƙoƙarin gano dukkan mutanen da ake ganin suna cikin haɗarin kamuwa da cutar, ciki har da mutum 44 da aka fara tantancewa.

    Masu bincike na duba yiwuwar ko sun haɗu da matar a filin jirgin sama, ko kuma sun taɓa amfani da wasu kayan aiki guda ɗaya da ka iya zama hanyar yaɗuwar cutar.

    A halin yanzu, babu wani tabbataccen bayani da ke nuna cewa matar da ta kamu da cutar a kwanan nan ta yi tafiya zuwa Jamhuriyar Dimokuraɗiyyar Kongo.

12. Sa'o'i 6 da suka wuceBabban kamfanin man Saudiyya ya kwashe ma'aikatansa saboda fargabar hare-haren ƴan Houthi

    

    Asalin hoton, Getty Images

    Rahotanni daga Saudiyya na cewa babban kamfanin mai na kasar, Aramco, ya kwashe ma’aikatansa daga hedkwatarsa da ke birnin Dhahran a gabashin ƙasar, a daidai lokacin da mayakan Houthi na Yemen ke kara kai munanan hare-hare a kasar.

    Majiyoyi da dama sun bayyana cewa an umarci ma’aikatan hedkwatar Aramco da su yi aiki daga gida. Wannan na zuwa ne sa’o’i kaɗan bayan da mutane biyu suka mutu a wani hari da mayakan na Houthi da Iran ke goyon bayan suka ɗauki alhakin kai wa a Filin Jirgin Sama na Sarki Fahd.

    A bangare guda kuma, ƙawancen ƙasashen da Saudiyya ke jagoranta a yaƙi da Houthi a Yemen ya ce ya yi nasarar kakkabo jirage marasa matuƙa huɗu a sararin samaniyar Riyadh da kuma birnin Madina.

13. Sa'o'i 7 da suka wuceJam’iyyar APC a Osun ta yi watsi da kwamitin Adeleke na yaƙin sake zaɓen Tinubu

    

    Asalin hoton, INSTAGRAM/@ADEMOLAADELEKE

    Reshen jam’iyyar APC na jihar Osun da ke Najeriya, ya yi watsi da ƙaddamar da kwamitin kamfen na jihar da aka kafa domin yaƙin neman sake zaɓen Shugaba Bola Tinubu a babban zaɓen shekarar 2027.

    Shugaban APC na jihar, Tajudeen Lawal, ne ya bayyana hakan a cikin wata sanarwa, inda ya zargi ɓangaren Gwamna Ademola Adeleke da gaza tuntuɓar shugabancin jam’iyyar kafin fitar da sunayen mambobin kwamitin ga jama’a.

    Sai dai Lawal ya jaddada cewa jam’iyyar APC na goyon bayan sake zaɓen Shugaba Tinubu a shekarar 2027, yana mai cewa ya kamata a ƙaddamar da kwamitin kamfen ɗin ne bayan bin hanyoyin da suka dace da kuma tuntuɓar shugabannin jam’iyyar.

    Ya ce ba a tuntubi jam’iyyar ba lokacin da ake kafa kwamitin, yana mai jaddada cewa ba a bi ƙa’idojin da suka dace ba.

    Shugaban na APC a Osun ya kuma bayyana cewa, duk da kasancewar jam’iyyar a shirye take ta mara wa Tinubu baya domin sake zaɓensa a 2027, dole ne a kafa kwamitin kamfen ɗin bisa ƙa’idojin jam’iyyar, tare da tuntubar dukkan masu ruwa da tsaki da abin ya shafa.

14. Sa'o'i 7 da suka wuceA karon farko iyalan tsohuwar shugabar Myanmar sun yi magana da ita

    

    Asalin hoton, Reuters

    A karon farko cikin shkaru 5, ɗan tsohuwar shugabar ƙasar Myanmar, Aung San Suu Kyi, ya ce an ba shi damar yin magana da mahaifiyarsa da ake tsare da ita.

    Kim Aris ya bayyana cewa farin ciki ya lulluɓe shi kuma ba zai iya misalta halin da ya samu kan shi a ciki ba, bayan sake jin muryarta.

    An yi wa Aung San Suu Kyi, da ta dauki lambar yabo ta zaman lafiya ta Nobel, daurin talala tun bayan sojojin da Myanmar su ka hamɓarar da gwamnatinta a shekarar 2021.

    Sai dai Mista Aris ya jaddada cewa samun damar magana da ita sau daya, ba ya nufin cewa iyalanta sun samu cikakkiyar damar ziyarta ko magana da ita a koda yaushe ba.Ya kara da cewa mahaifiyarsa mai shekara 81 a duniya na zaman ƙunci ba tare da iyalanta ko gudanar da rayuwa cikin walwala da 'yanci ba.

15. Sa'o'i 8 da suka wuceAn kama masu taimakawa ƙungiyoyin ɓata gari a Italiya

    An kama mutane takwas a ƙasar Italiya kan zarginsu da taimaka wa ƙungiyoyin ɓata gari, wajen karkatar da kuɗaɗen kwangilolin sake gina wuraren da girgizar ƙasa ta lalata a shekarar 2016.

    Haka kuma, an ƙwace kadarori da darajarsu ta haura dala miliyan 60 a lardin Ancona da ke gabashin ƙasar.

    Jami’an tsaro sun gudanar da bincike da sintiri da dama, inda suka bayyana cewa ƙungiyoyin masu aikata manyan laifuka sun kutsa kai wajen samun manyan kwangilolin da gwamnati ta ɗauki nauyinsu.

    Girgizar ƙasar da ta afku a watan Agustan shekarar 2016 ta shafi yankuna da dama a tsakiyar Italiya, kuma ta yi sanadin mutuwar kusan mutane 300.

16. Sa'o'i 8 da suka wuceAdadin waɗanda suka rasu a harin filin jirgin Saudiyya ya ƙaru

    

    Asalin hoton, Getty Images

    Mahukuntan Saudiyya sun ce adadin mutanen da suka mutu a harin da aka kai Filin Jirgin Sama na King Fahd da ke birnin Dammam ya ƙaru zuwa mutum biyu, yayin da wasu takwas suka jikkata.

    Tun da farko, Hukumar Kula da Sufurin Jiragen Sama ta Saudiyya ta ce an kai hari filin jirgin saman da ke gabashin ƙasar a yammacin ranar Laraba.

    A sabuwar sanarwar da ta fitar, hukumar ta ce waɗanda suka mutu ɗan ƙasar Saudiyya ne da kuma wani ɗan ƙasar Indiya.

    Hukumar ta ce har yanzu ana ci gaba da tantance irin barnar da harin ya yi a filin jirgin saman. Zuwa yanzu dai babu wata ƙungiya da ta ɗauki alhakin kai harin.

    Hukumar kula da sufurin jiragen saman ta Saudiyya ta ce hare-haren da mayaƙan Houthi ke kai wa filayen jiragen saman ƙasar na ƙaruwa.

    A cikin makonnin baya-bayan nan, mayaƙan sun ƙara kai hare-hare kan cibiyoyin mai da wasu wuraren fararen hula a Saudiyya. Hare-haren sun janyo rufe babban filin jirgin saman Riyadh da kuma dage wani muhimmin taron zuba jari na shekara-shekara.

    A cewar ƙididdigar kamfanin dillancin labarai na AFP, mutum 22 sun mutu a hare-haren da aka kai filayen jiragen saman Saudiyya cikin kwanaki 30 da suka gabata.

17. Sa'o'i 9 da suka wuceNetanyahu ya musanta cewa Amurka ta hana Isra'ila kai wa Iran hari

    

    Asalin hoton, Getty Images

    Firaministan Isra'ila, Benjamin Netanyahu, ya musanta wani rahoto da jaridar Financial Times ta wallafa cewa shugaban Amurka, Donald Trump, ya hana Isra'ila aiwatar da wani shirin kai hari kan Iran a wannan watan.

    Netanyahu ya shaida wa tashar talabijin ta Channel 7 ta Isra'ila cewa rahoton "ba daidai ba ne". Ya kuma ce ba zai yi tsokaci kan bayanan tattaunawar da ya yi kwanan nan da Trump game da Iran ba.

    A ranar Laraba, Financial Times ta ruwaito daga majiyoyin da ba ta bayyana sunayensu ba cewa sojojin Isra'ila sun shirya kai hare-hare kan Iran a ranakun 10 da 11 ga Oktoba.

    Amma rahoton ya ce Trump ya yanke shawarar cewa kada a kai harin kafin zaɓen tsakiyar wa'adin mulki na Amurka da ke tafe.

    Rahoton ya ce wuraren nukiliya, cibiyoyin gwamnati da wasu cibiyoyin fararen hula kamar tashoshin samar da lantarki na daga cikin wuraren da Isra'ila ta shirya kai wa hari.

    Haka kuma, wata majiya ta ce hare-haren da aka shirya za su kasance mafi tsanani fiye da waɗanda aka gani a lokacin rikicin kwanaki 40.

    A baya dai Trump ya bayyana cewa ba ya shirin kai hari kan Iran kafin zaɓen tsakiyar wa'adin mulki, kuma kwanan nan ya ce ba a tattaunawa tsakanin Amurka da Iran.

18. 22 Oktoba 2026Wace ce matar da aka tabbatar ta kamu da cutar Ebola a Najeriya?

    Shugaban hukumar lafiya ta Afirka ya shaida wa BBC cewa matar da aka tabbatar ta kamu da cutar Ebola ta farko a Najeriya a wannan karon, tun bayan ɓarkewar cutar a Gabashin Afirka a watan Mayu matar wani jami'in diflomasiyya.

    Matar ƴar asalin ƙasar Uganda ce, amma tana zaune a Abuja babban birnin Najeriya, inda yawancin ofisoshin jakadancin ƙasashen duniya suke, sannan ma'aikatan suke zama.

    A cewar shugaban hukumar, Dokta Jean Kaseya, matar ta fara rashin lafiya ne a ranar 3 ga watan Oktoba, kwana uku bayan ta koma babban birnin Najeriya bayan hutun da ta je a Uganda.

    Ministan lafiya na Najeriya ya tabbatar wa BBC cewa majinyaciyar mai shekara 42 ta shafe makonni biyu da rabi a Kampala, babban birnin Uganda, inda ya ƙara da cewa ta kuma yi hutun sa'o'i biyu a babban birnin Habasha bayan dawowarta.

    "Tana cikin kwanciyar hankali, tana samun sauƙi," in ji Muhammad Ali Pate.

    Ministan ya ce hukumomi na aiki don hana yaɗuwar cutar kuma sun gano mutane 44 da suka yi mu'amala da matar, waɗanda aka tabbatar sun kamu da cutar Ebola a ranar Talata.

    "Ba dukkansu sun kasance kusa da juna ba. Mun jefa ragar a fili domin mu iya shawo kanta gwargwadon iyawa," in ji Pate ga BBC.

    Ministan lafiya ya ce babu wani daga cikin waɗanda suka yi mu'amala da matar, wanda yanzu ke killace, da aka san yana da alamun cutar, ciki har da mutumin da suka yi tafiya tare da majinyaciyar, yana ƙara cewa matar ba ta yi tafiya zuwa wani wajen ba, bayan Abuja ba tun komawarta.

    Latsa nan domin karanta cikakken labarin

19. 22 Oktoba 2026Babu wata tattaunawa da ake tsakanin Amurka da Iran - Trump

    

    Asalin hoton, Getty Images

    Shugaban Amurka, Donald Trump, ya ce a halin yanzu babu wata tattaunawa da ke gudana tsakanin ƙasarsa da Iran. Da aka tambaye shi ko ya janye daga tattaunawar da ake yi da Tehran, ya amsa cewa, "Ba ma tattaunawa da Iran a yanzu, amma za mu kai ga matsaya kan wannan batu. Hakan zai faru nan ba da jimawa ba."

    Trump ya ƙara da cewa mafi yawan mutane na ganin za a samu ci gaba kan batun ne bayan zaɓen tsakiyar wa'adin mulki na Amurka da ake sa ran za a yi nan gaba kaɗan.

    Shugaban na Amurka ya ce gwamnatinsa ta yi "abin da ya dace" kan batun Iran, yana mai bayyana takun saƙar da aka yi tsakanin ƙasashen biyu a matsayin "ƙaramin rikici."

    Kalaman Trump na zuwa ne a daidai lokacin da babban kwamandan sojin Pakistan, Field Marshal Asim Munir, wanda ake ganin ya taka rawa wajen shiga tsakanin Amurka da Iran a baya-bayan nan, ya kai ziyara Tehran.

    Haka kuma, kafin wannan ziyara, Ministan Harkokin Wajen Rasha, Sergei Lavrov, ya ziyarci Iran domin tattaunawa da jami'an ƙasar.

20. 22 Oktoba 2026Amurka ta umarci ƴanƙasarta su fice daga Saudiyya

    

    Asalin hoton, Reuters

    Ma'aikatar harkokin wajen Amurka ta umarci jami'an diflomasiyyarta da iyalansu su fice daga Saudiyya saboda barazanar hare-haren da mayaƙan Houthi ke kai wa ƙasar.

    Jami'an Saudiyya sun ce an daƙile wani hari da aka kai ta sama kan wani wurin samar da man fetur.

    Sai dai mutum biyu sun mutu bayan wani jirgi mara matuƙi ya faɗi, yayin da wani mutum ya mutu a wani hari da aka kai filin jirgin saman King Fahad.

    Rikici tsakanin mayaƙan Houthi masu samun goyon bayan Iran da kuma Saudiyya ya ƙara tsananta tun daga watan da ya gabata.

    Houthi na mayar da martani kan hare-haren Saudiyya ta hanyar kai hare-hare kan filayen jiragen sama, cibiyoyin makamashi da sansanonin soji.

    Wani mai magana da yawun Ma'aikatar harkokin wajen Amurka ya ce an umarci ma'aikatan da ba sa gudanar da ayyukan gaggawa su fice daga ƙasar tare da iyalansu.

    Ya ƙara da cewa rikice-rikicen da ke gudana na iya ƙara tsananta cikin gaggawa.

    Rahotanni sun kuma ce mutum takwas sun jikkata sosai a harin da aka kai filin jirgin saman King Fahad.