Abubuwan da ke faruwa a Najeriya da sassan duniya

Rahoto kai-tsaye

Aisha Aliyu Jaafar da Nabeela Mukhtar Uba

1. 13 Oktoba 2026An yanke wa tsohon uban daba Keffe D hukunci kan kisan Tupac

   An yanke wa Duane Davis, wanda aka fi sani da Keffe D, hukuncin ɗaurin shekaru 40 a gidan yari bisa samunsa da laifin shirya kisan fitaccen mawaƙin rap, Tupac Shakur.

   A watan Satumba, wata tawagar alƙalai ta same shi da laifin kitsa kisan kan ta amfani da makami mai haɗari, dangane da harbin da aka yi wa mawaƙin a wani harin kwanton ɓauna da mota a birnin Las Vegas, ranar 7 ga Satumba, 1996.

   Davis ya ce zai ɗaukaka ƙara kan hukuncin.

   Hukuncin da aka yanke wa Davis, mai shekaru 63, shi ne na farko da aka samu a wannan tsohuwar shari'ar kisan da ta ɗauki hankalin masoyan hip-hop tsawon kusan shekaru 30.

   Masu gabatar da ƙara sun bayyana cewa, duk da cewa Davis bai harbe mawaƙin da kansa ba, shi ne ya jagoranci ƙungiyar da ta aikata kisan. A cikin littafin tarihin rayuwarsa da ya wallafa, Davis ya amince cewa shi ne ya samar da bindigar da aka yi amfani da ita wajen aikata laifin.

   Muhimman hujjojin da aka gabatar a shari'ar sun haɗa da kalaman Davis da ya sha furtawa a bainar jama'a, inda ya amince cewa yana cikin wata farar mota kirar Cadillac da aka harba harsasan da suka kashe mawaƙin daga cikinta.

   A lokacin da aka kashe shi, Shakur yana da shekaru 25 kuma yana kan ganiyarsa a fagen waƙoƙin rap, inda ya kasance ɗaya daga cikin mawaƙan da suka fi tasiri a wannan fanni. Ya sayar waƙoƙinsa sama da miliyan 75 a faɗin duniya.

   Tsawon shekaru 30, binciken kisan nasa ya kasance ɗaya daga cikin fitattun shari'o'in kisan da suka daɗe ba tare da an gano waɗanda suka aikata su a Amurka ba.

2. 13 Oktoba 2026Red Cross ta yi gargaɗi kan tashin hankali a Gabas ta Tsakiya

   Ƙungiyar agaji ta Red Cross ta yi kiran a gaggauta rage tashin hankalin da ke ci gaba a yankin Gabas ta Tsakiya, tana mai gargaɗin cewa ci gaba da yaƙe-yaƙe zai zama babbar masifa ga miliyoyin fararen hula.

   Yaƙin da ke gudana a ƙasar Yemen ya sake ƙamari a watan Yuli, watanni bayan fara wani babban rikici a yankin, wanda ya girgiza kasuwannin makamashi tare da jefa Gabas ta Tsakiya cikin rudani.

   Shugabar Kwamitin Ƙasa da Ƙasa na Red Cross (ICRC), Mirjana Spoljaric, ta ce fararen hula ne shiga mawuyacin hali a lokuta irin wannan.

   Mirjana ta ce mutane da dama sun mutu wasu sun jikkata wasu sun rasa muhallansu da tilasta mu su yin gudun hijira a ciki da wajen ƙasashensu. Ta yi nuni da ɓarnar da hare-haren ƴantawayen Houthi na Yemen suka yi a ƙasar Saudiyya, inda sama da mutum 15 suka rasu wasu 300 suka jikkata.

   Ta kuma yi nuni da halin da ake ciki a Yemen, ''Adadin mace-mace, da mutanen da suka rasa matsugunansu da kuma lalacewar muhimman gine-ginen fararen hula, ciki har da na biranen Aden da Sanaa, na ƙaruwa cikin sauri, kuma lamari ne mai tayar da hankali."

   A faɗin Gabas ta Tsakiya kuma, an sha kai hare-hare kan kayayyakin more rayuwa na fararen hula, da suka haɗa da asibitoci da makarantu, da wuraren ibad, hatta kasuwanni ba su tsira ba."

   A makon da ya gabata, hukumar kula da ƴan gudun hijira ta Majalisar Dinkin Duniya ya sanar da cewa sama da mutane 200,000 sun rasa matsugunansu a cikin Yemen tun bayan fara wannan yaƙi.

3. 13 Oktoba 2026Ƴan Najeriya na rayuwa tamkar a ƙasar da babu doka da oda - PRP

   Jam'iyar adawa ta PRP a Najeriya ta yi kira ga gwamnatin shugaba Boala Ahmed Tinubu ta ɗauki matakan da suka dace domin kawo ƙarshen yawan kashe-kashe da garkuwa dan neman kuɗin fansa da ake fama da shi a sassan ƙasar.

   A ciikin sanarwar da shugaban jam'iyyar PRP Hakim Baba Ahmad ya fitar a ranar Talata, ya ce waɗanda ke ci gaba da aikata laifuka, ba tare da tsoro ko shakka ba na cin karensu babu babbaka da nuna tamkar 'yan Najeriya na rayuwa a ƙasar da babu doka da oda.

   Sanarwar ta ce: ''Hakan na bayyana gazawa,da nuna halin ko-in-kula da kuma rashin mutunta jama’a da gwamnatin APC ƙarƙashin jagorancin Shugaba Bola Ahmed Tinubu ke nunawa".

   A kowace rana, ƙarin ’yan Najeriya na rasa rayukansu, da hanyoyin samun abinci, dukiyoyinsu da ’yancinsu saboda wata gwamnati da ta yi nesa da jama’a kuma ba ta da ikon samar musu da sauƙi ko mafita.

   Duk da haka, wannan gwamnatin tana ci gaba da ware makudan kuɗaɗe masu tayar da hankali ga wasu ƙungiyoyi domin neman goyon baya, in ji PRP.

   A ƙarshe sanarwar ta ce ya kamata ƴan Najeriya su yi magana domin yin tir da masu kashe-kashen mutane da sace su da raba su da dukiyoyinsu, da sauran masu cin gajiyar taɓaɓarewar tsaron da ke faruwa.

4. 13 Oktoba 2026An naɗa Maikatanga alƙali a gasar ƴanjarida masu binciken ƙwaƙwaf

   Cibiyar ƴanjarida masu binciken ƙwakwaf ta Wole Soyinka, ta naɗa fitaccen ɗan jarida mai ɗaukar hoto, Sani Mohammed Maikatanga, a matsayin ɗaya daga cikin alƙalan da za su tantance Rahotannin Binciken Ƙwaƙwaf, a gasar da take gudanarwa a duk shekara.

   Wannan ne karo na 21 da ake gudanar da wannan kyauta ta Wole Soyinka da ta ke girmama tare da yaba wa ƴanjaridar Najeriya waɗanda ayyukansu suka nuna ƙwarewa a aikin bincike, jajircewa wajen bin ƙa’ida da kuma nuna bajinta a aikin jaridar da ke kare muradun jama’a.

   A cikin wasiƙar naɗin da Darakta Janar ta WSCIJ, Motunrayo Alaka, ta sanya wa hannu, an bayyana cewa; 'A matsayinka na mamba a Kwamitin Alkalai, za ka taka muhimmiyar rawa wajen tabbatar da sahihanci da martabar wannan kyauta, tare da taimakawa wajen gano da karrama fitattun ayyukan bincike da ƴanjaridar a Najeriya suka yi.”

   Maikatanga ya fara aikinsa na daukar hoto a shekara ta 2000 a matsayin mai ba da rahoto da mai daukar hoto ga mujallar FIM Magazine da ke rawaito wainar da ake toyawa a masana'antar shirya fina-finan Hausa ta Kannywood.

   Daga baya ya yi aiki a matsayin mai daukar hoto mai zaman kansa na Jaridar Leadership daga 2005 zuwa 2006 kafin ya shiga Media Trust, masu wallafa jaridar Daily Trust, a cikin 2009.

   Ya samu lambobin yabo da dama ta hanyar ɗaukar hotuna da suka haɗa da fannin Ilimi, al'adu, lafiya, zaman takewa da nishaɗi.

5. 13 Oktoba 2026Iran na shirye-shiryen kai wa Amurka da ƙawayenta hari

   Wasu rahotanni sun nuna cewa Iran na ƙarfafa tsaronta, tattara masu mara mata baya, tare da barazanar mayar da martani mai tsanani ga Amurka da ƙawayenta a yankin Tekun Fasha.

   Wani rahoto da jaridar The Wall Street Journal ta wallafa ya ce Tehran na shirin tunkarar yiwuwar Amurka ta sake kai mata hare-hare bayan zaɓen tsakiyar wa’adin mulkin ƙasar, kuma matakan da take ɗauka na da nasaba da yunƙurin dakile irin waɗannan hare-hare.

   Za a gudanar da zaɓen tsakiyar wa’adin mulkin Amurka a makon farko na watan Nuwamba.

   Jami’an Iran sun yi gargaɗi a jawabansu na fili da kuma tattaunawar sirri da hukumomin ƙasashen yankin cewa, idan Amurka ta ƙaddamar da sabbin hare-hare, Jamhuriyar Musulunci za ta faɗaɗa rikicin zuwa sassa daban-daban na Gabas ta Tsakiya.

   Jaridar ta kuma ce hotunan tauraron ɗan adam sun nuna cewa Iran na ƙarfafa matakan tsaro a muhimman wurare, ciki har da cibiyoyin nukiliyarta da yankunan da ke kan iyakarta.

   Rahoton ya ƙara da cewa waɗannan matakai na iya zama yunƙurin karkatar da hankalin jama’a daga matsin tattalin arzikin da ƙasar ke fuskanta, musamman bayan da Amurka ta tsaurara takunkuminta a kanta.

6. 13 Oktoba 2026Ma'aikatan jirgin ruwa 11 sun ɓata bayan harin da aka kai jirginsu a tekun Bulgaria

   Ma'aikatan jirgin ruwa 11 sun ɓata, bayan wani hari da aka kai da jirage marasa matuƙa kan jiragen dakon kaya a gaɓar tekun Bulgaria.

   Wakilin BBC ya ce bayan 11 da suka ɓata, akwai wasu da aka ceto.

   An kai hari kan jiragen ruwa biyu, wanda ɗaya daga ciki mallakar Ukraine ne.

   Wannan na daga cikin jerin hare-haren da ya zuwa yanzu suka shafi jiragen ruwa biyar a kusa da yankin ruwan Bulgaria.

   Ukraine na ƙara amfani da wannan ɓangare na Tekun Baharul aswad wajen jigilar kayayyaki ta ruwa.

   Firaministan Bulgaria, Rumen Radev, ya ce hare-haren za su amfani Rasha, kuma ya gayyaci jakadan Rasha domin neman bayani.

7. 13 Oktoba 2026Ƙawancen da Saudiyya ke jagoranta ta ce tana shirya wani 'aiki na musamman' a Yemen

   Mai magana da yawun kawancen da Saudiyya ke jagoranta ya ce an kakkaɓo tare da lalata makamai masu linzami guda uku a arewacin Riyadh.

   Ya kuma ce nan ba da jimawa ba za a fitar da gargaɗi ga mazauna wani yanki a babban birnin Yemen, Sana'a, domin su fice daga wurin kafin abin da ya kira "aiki na musamman", a yankin da mayakan Houthi ke iko da shi.

   Tun da farko, rahotanni sun ce Saudiyya ta fara bincike kan yadda na'urorin kare sararin samaniyarta ya gaza dakile hare-hare uku masu muni da mayaƙan Houthi masu goyon bayan Iran suka kai kan filin jirgin saman Riyadh.

8. 13 Oktoba 2026Gwamnatin Taliban ta dakatar da yaɗa shirye shiryen BBC a gidajen rediyon Afghanistan

   BBC ta ce gwamnatin Taliban a Afghanistan ta dakatar da watsa shirye-shiryen kafar yada labaran a gidajen rediyo a faɗin ƙasar.

   A wata sanarwa, BBC ta ce tana aiki tare da hukumomin Afghanistan domin warware matsalar.

   Ta ƙara da cewa mutane kusan miliyan 5.5 ne ke sauraron shirye-shiryenta a Afghanistan, adadin da ya kai fiye da kashi ɗaya cikin biyar na al'ummar ƙasar.

   BBC na gudanar da shirye-shiryenta ne a harsunan Turanci da Pashto da kuma Dari.

   Tun bayan da Taliban ta sake ƙarbar mulki a Afghanistan shekaru biyar da suka gabata, ƙungiyar ta taƙaita ayyukan kafafen yada labarai masu zaman kansu a ƙasar.

9. 13 Oktoba 2026Tinubu ya sanya gwamnonin hamayya biyu cikin kwamitin yaƙin neman zaɓensa

   Shugaban Najeriya Bola Tinubu ya saka gwamnonin hamayya biyu cikin kwamitin yaƙin neman zaɓensa na 2027.

   A ranar Laraba ne za a ƙaddamar da kwamitin a fadar shugaban ƙasa da ke Abuja.

   Gwamnonin hamayyar da suka samu shiga kwamitin yaƙin neman zaɓen su ne Ademola Adeleke na jam'iyyar Accord, sai kuma Charles Soludo na jam'iyyar APGA.

   Baya ga gwamnonin biyu, kwmaitin ya kuma saka Ministan Abuja Nyesom Wike na PDP cikin kwamitin, inda aka naɗa shi kodinetan Abuja da Rivers.

   Haka ma akwai tsohon gwamnan jihar Gombe kuma sanata a jami'yyar PDP, Ibrahim Danƙwambo, wanda aka bai wa muƙamin mai bayar da shawar a kwamitin.

   Wannan ba abu ne da aka saba gani ba a siyasar ƙasar.

   Da yake jawabi game da batun, Ministan Abuja Nyesom Wike ya ce matakin ya nuna wayewar Shugaban Tinubu na APC a siyasance.

   ''Hakan na nuna burin shugaban ƙasar na haɗa kan mutane, har daga wajen jam'iyyarsa ta APC'', in ji tsohon gwamnan na jihar Rivers.

10. 13 Oktoba 2026Hezbollah za ta bai wa iyalan da yaƙi ya lalata wa gidaje tallafin kuɗi

    Kungiyar Hezbollah ta sanar da cewa za ta bai wa iyalai a Lebanon da gidajensu na asali suka lalace ko kuma suka zama ba za a iya zama a cikinsu ba sakamakon yaƙin da ake yi da Isra'ila a halin yanzu, tallafin da ya kai dala dubu 14.

    Wannan ne karo na farko da ƙungiyar da Iran ke mara wa baya ta bayar da irin wannan tallafin kudi tun bayan da ta harba makamai masu linzami zuwa Isra'ila a watan Maris, lamarin da ya sa gwamnatin Isra'ila ta ƙaddamar da wani sabon farmaki mai girma a Lebanon.

    Matakin na zuwa ne duk da ƙarin matsin lamba da Amurka da kawayenta ke yi na ganin sun katse hanyoyin samun kudaɗen tallafi na Hezbollah, musamman daga Tehran.

11. 13 Oktoba 2026Amurka ta sanya Najeriya cikin ƙasashen da ta zarga da tilasta wa yara shiga ƙungiyoyin ƴanbindiga

    Amurka ta sanya Najeriya cikin jerin ƙasashen da take zargi da amfani da yara wajen yin yaƙi ƙarƙashin dokar hana ɗaukar yara aikin soji wato Child Soldiers Prevention Act.

    Ta yi gargaɗin cewa wannan mataki na iya kai ga Amurkar ta rage bai wa sojojin ƙasar horo, ko sayar mata da makamai, ko bayar da tallafin soji, ko kuma hadin gwiwar tsaro daga ranar 1 ga Oktoba, 2026, sai dai idan Shugaba Donald Trump ya bayar da sassauci.

    Wannan mataki ya biyo bayan rahoto kan safarar mutane na 2026 da Ma'aikatar Harkokin Wajen Amurka ta fitar, wanda ya zargi kungiyoyin Boko Haram da ISIS reshen Yammacin Afirka da ci gaba da ɗaukar yara aiki tare da amfani da su a rikice-rikice a Najeriya.

    Rahoton ya sanya Najeriya cikin jerin kasashe 14 da ake zargi da ɗauka ko amfani da yara sojoji, ciki har da Rasha da Iran da Sudan ta Kudu da Somaliya.

12. 13 Oktoba 2026Tsofaffin sojojin Najeriya na zanga zangar lumana na neman ƙarin kuɗin fansho

    Tsofaffin sojojin Najeriya sun toshe kofar shiga ofishin Hukumar Kula da Fanshon Sojoji da ke babban birnin ƙasar Abuja a ranar Talata, domin neman a biya musu buƙatunsu na sauya tsarin da aka amince da shi wajen biyansu kuɗaden fanshonsu.

    Tsofaffin sojojin sun yi zaman dirshen a kofar shiga ofishin, yayin da sojoji masu ɗauke da makamai suka tare kofar shiga harabar ofishin, kamar yadda jaridar PUNCH ta ruwaito.

    Wannan alamari na zuwa ne makonni bayan zanga zangar da wasu tsofaffin sojojin suka gudanar a Ma'aikatar Tsaro a watan Satumba, inda suka buƙaci a ƙara musu kuɗaden fansho bayan ƙarin albashin da aka yi wa sojojin da ke aiki.

    Ministan Tsaro, Christopher Musa, ya yi alƙawarin cewa wadanda suka yi ritayar za su samu karin kudin fansho a watan Oktoba.

    Shugaban Kungiyar Tsofaffin Sojojin Najeriya, Laftanar Kanal Innocent Azubike, ya zargi hukumar da amfani da tsarin lissafa fansho wanda a cewarsa, bai yi dai dai da abin da ya kamata a rika biyansu ba.

13. 13 Oktoba 2026Jihohi 10 da suka fi fama da talauci a Najeriya

    Kimanin mutane miliyan 123 ne ke barazanar faɗawa cikin matsanancin talauci a Najeriya, kamar yadda wani rahoto na Bankin Duniya ya nuna a 2026.

    Rahotanni na baya-bayan nan da hukumar ƙididdiga ta ƙasar (NBS) ta fitar sun nuna cewa jihar Sokoto ce ta fi fama da talauci a Najeriya, inda aka ƙiyasta kusan kashi 90.5% na al'ummarta suna rayuwa cikin matsanancin talauci.

    Sai dai wani rahoton hukumar raya ƙasashe na Majalisar Dinkin Duniya (UNDP) ya wallafa, ya nuna cewa yawan mutanen da ke fama da talauci a yankuna daban-daban na Najeriya ya bambanta sosai kuma ba jihar Sokoto ke kan gaba ba.

    Karanta cikakken bayanin a nan

14. 13 Oktoba 2026Nan da 2050 masu ciwon mantuwa za su ninka sau biyu - Bincike

    Wani sabon bincike da aka gudanar kan ciwon mantuwa (dementia) ya yi hasashen cewa, nan da shekarar 2050, adadin sabbin mutanen da za a gano suna ɗauke da cutar zai ninka har sau biyu, kuma buƙatar samar da kulawa za ta yi matukar ƙaruwa.

    Wannan bincike—wanda Cibiyar Kula da Lafiyar Kwakwalwa a Lokacin Tsufa ta Jami'ar New South Wales ta gudanar—ya yi nazari kan al'ummomin ƙasashe da yankuna 18.

    Binciken ya nuna cewa a duk faɗin duniya, an samu sabbin mutane kimanin miliyan 11 da rabi da suka kamu da cutar mantuwa a shekarar 2023 kuma nan da tsakiyar wannnan ƙarnin adadin zai haura sama da miliyan 24 da rabi.

    Marubutan binciken sun bayyana cewa ya kamata a ba da fifiko ga lafiyar ƙwaƙwalwar mata.

15. 13 Oktoba 2026Saudiyya ta ƙaddamar da bincike kan yadda ƴan Houthi suka samu nasarar kai mata hari

    Rahotanni sun bayyana cewa Saudiyya ta ƙaddamar da bincike domin gano yadda na'urorin kariyar sararin samaniyarta suka gaza daƙile makamai masu linzami da jiragen yaƙi marasa matuƙa da ƙungiyar Houthi ta harba daga Yemen, lamarin da ya yi sanadin munanan hare-hare uku a filin jirgin saman Riyadh.

    Kamfanin dillancin labarai na Associated Press (AP) ya ce wasu jami'ai biyu daga yankin sun bayyana cewa binciken farko ya nuna mayaƙan Houthi masu samun goyon bayan Iran sun fara harba jirage marasa matuƙa masu yawa ne domin kaucewa na'urorin kariyar sannan su kai hari filin jirgin saman.

    AP ya kara da cewa daya daga cikin jami'an ya bayyana cewa binciken yana kuma ƙokarin gano dalilin da ya sa na'urorin kariyar sararin samaniyar kasar basu bayar da gargaɗin tun da wuri kan harin ba.

16. 13 Oktoba 2026Jami'an shige da fice na Amurka sun kai samame gidan 'yar majalisa Ilhan Omar

    Jami'an shige da fice na Amurka sun gudanar da bincike a gidan 'yar majalisar dokokin Amurka daga jihar Minnesota, Ilhan Omar, a wani ɓangare na binciken aikta laifi da ake yi.

    Mai magana da yawun Ma'aikatar Shari'a ta Amurka ya ce jami'an Hukumar Binciken Tsaron Cikin Gida (HSI) sun aiwatar da umurnin yin bincike ne da wata kotu ta amince da shi a wani gida da ke yankin Washington DC.

    Sai dai bai yi ƙarin bayani kan binciken ba.

    Haka kuma babu tabbacin ko Omar tana gida a lokacin da aka gudanar da binciken, saboda majalisar dokokin Amurka na hutu a halin yanzu.

    Omar, wadda 'yar jam'iyyar Democrat ce kuma mai yawan sukar Shugaba Donald Trump, ta wallafa a shafukanta na sada zumunta cewa matakin wani yunƙuri ne na "musgunawa abokan hamayya na siyasa da kuma amfani da jami'ian gwamnati a matsayin makamin siyasa."

    Da yake magana da manema labarai, Shugaba Trump ya ce ba shi da wata alaƙa da binciken da ma'aikatar shari'a ke yi wa Omar.''

17. 13 Oktoba 2026Jarumin shirin Breaking Bad, RJ Mitte ya rasu

    Fitaccen jarumin fina-finan Amurka RJ Mitte, wanda ya shahara saboda rawar da ya taka a shahararren shirin talabijin na Breaking Bad, ya rasu yana da shekara 34 a duniya.

    Wakilinsa ya shaidawa BBC "Cikin alhini da baƙin ciki ne muke sanar da rasuwar jarumi mai tarin masoya, mai ayyukan jin ƙai, kuma jajirtaccen mai fafutukar kare haƙƙin masu nakasa, RJ Mitte."

    Mitte ya rasu ne a Brownsville da ke jihar Texas ranar Litinin.

    Mai magana da yawunsa ya tabbatar wa kamfanin dillancin labarai na Reuters cewa ya kashe kansa ne.

    Jarumin, wanda ke fama da lalurar ƙwaƙwalwa da ke shafar gaɓoɓi wato cerebral palsy, ya yi amfani da abubuwan da ke faruwa a rayuwarsa wajen taka rawar Walter "Flynn" White Jr. a cikin shirin Breaking Bad wanda ya lashe lambobin yabo na Emmy.

    Jarumi Bryan Cranston, wanda ya taka rawar mahaifinsa a shirin, ya yi masa ta'aziyya a shafinsa na Instagram, yana cewa yana cikin matsanancin alhini bayan samun labarin rasuwar.

    Baya ga aikinsa na fim, Mitte ya kasance jakada na ƙungiyoyin United Cerebral Palsy da Shriners Children's, sannan ya kafa gidauniyar The Mitte domin tallafa wa ayyukan jin ƙai da shirye-shiryen ci gaban al'umma.

    A cewar wakilinsa, ya yi amfani da sunansa da tasirinsa wajen ƙalubalantar wariya da ƙasantarwa da ake yi wa masu nakasa.

18. 13 Oktoba 2026Gwamnatin Kaduna ta ce tana iya ƙoƙarinta na ceto magidanci da iyalinsa da aka sace

    Gwamnatin jihar Kaduna ta ce tana ƙoƙarin ganin an ceto wani magidanci da matarsa da jaririyarsu da ’yan bindiga suka sace a unguwar Millennium City.

    Bidiyon mutanen da aka sace, wanda ya nuna su cikin mawuyacin hali a hannun masu garkuwa da mutanen, ya jawo kakkausar suka daga ƴan Najeriya, ciki har da jagoran ’yan adawa, Atiku Abubakar, wanda ya yi kira da a gaggauta ceto su.

    Gwamnatin jihar Kaduna ta ce tana sane da halin da mutanen ke ciki, kuma tana yin duk mai yiwuwa domin tabbatar da kuɓutar da su.

    Kwamishinan watsa labarai na jihar Ahmed Maiyaki, ya ce bisa umurnin gwamnan jihar suna ci gaba da tattaunawa da jami'an tsaro domin ceto iyalan da ma kara tabbatar da tsaron rayukan alummar yankin.

    Ya ce tun kafin ɓullan bidiyon suna sane da alamarin, kuma tuna a wannan lokaci suka soma ɗaukar matakai.

    Tun da farko rundunar ƴan sandan jihar Kaduna ta ce ta kama wasu da ake zargin suna da alaƙa da garkuwa da iyalin.

19. 13 Oktoba 2026Tattalin arziƙin duniya ya nuna juriya na ban mamaki - IMF

    Yayin da yaƙin da ake yi a Gabas ta Tsakiya ke ci gaba da kawo cikas ga samar da makamashi da sauran kayayyaki a duniya, Asusun Ba da Lamuni na Duniya (IMF) ya bayyana cewa tattalin arziƙin duniyar ya nuna juriya mai ban mamaki.

    A cikin sabon hasashensa, ya sauya matakin matsin da ya ce za a samu ta fuskar tattalin arziƙin manyan ƙasashe da dama—ciki har da Birtaniya—a farkon yaƙin Iran.

    Wakilin BBC ya ce yanzu ana hasashen cewa matakin ci gaban tattalin arziƙin Birtaniya zai kasance na biyu a bayan Amurka cikin manyan ƙasashe bakwai masu ƙarfin tattalin arziƙi a duniya a wannan shekarar.

    Hukumar da ke sa ido kan tattalin arziƙi ta ce akwai yiwuwar ƙasahsen duniya sun koyi yadda za su fuskanci manyan matsalolin da suka shafi tattalin arziƙin ƙasashensu.

20. 13 Oktoba 2026Za a ci gaba da rufe filin jirgin saman Riyadh saboda hare haren Houthi - Saudiyya

    Hukumomin ƙasar Saudiyya sun ce filin jirgin saman ƙasa da ƙasa da ke birnin Riyadh zai ci gaba da kasancewa a rufe har zuwa aƙalla ranar Asabar, sakamakon hare-haren da ƴan tawayen Houthi na Yemen ke ci gaba da kai wa kan birnin.

    Da yammacin jiya Litinin, ƙungiyar ta bayyana cewa ta kai hari kan filin jirgin saman, yayin da rundunar sojin Saudiyya ta ce ta kakkabo wani makami mai linzami da aka harba zuwa birnin na Riyadh.

    Wakiliyar BBC ta ce A Yemen, mayakan Houthi sun tsaurara ƙawanyar da suka yi wa birnin Taiz – wanda ke ƙarkashin ikon gwamnatin da ƙasashen duniya suka amince da ita.

    Yaƙin da ke gudana a yankin yana haifar da damuwa game da tasirin da zai yi ga tattalin arzikin duniya.