Yaƙin Iran da sauran abubuwan da ke faruwa a sassan duniya

Rahoto kai-tsaye

Nabeela Mukhtar Uba da Usman Minjibir da Aisha Babangida

1. 11 Mayu 2026China ta soki takunkumin Amurka kan kamfanoninta uku

   China ta bayyana tsananin adawarta da takunkumin da Amurka ta ƙaƙabawa wasu kamfanonin ƙasar uku, waɗanda Washington ke zargi da taimaka wa ayyukan sojin Iran, tana mai kiran matakin a matsayin haramtacce kuma na ɓangare daya.

   Mai magana da yawun ma’aikatar harkokin wajen China, Guo Jiaqun, ya ce a wani taron manema labarai ranar Litinin cewa China ta kan buƙaci kamfanoninta su gudanar da harkokinsu bisa doka da ƙa’ida, kuma za ta kare hakkoki da muradun halastattun kamfanoninta.

   Ya ƙara da cewa babban abin da ya kamata a bai wa fifiko shi ne hana sake barkewar rikici ta kowace hanya, ba amfani da yaki wajen danganta wasu kasashe da zargi ko bata suna ba.

2. 11 Mayu 2026Kayar da Tinubu abu ne mai sauƙi - Buba Galadima

   Jigo a Jamʼiyyar NDC a Najeriya, Buba Galadima ya ce kayar da Shugaba Tinubu a babban zaɓe mai zuwa abu ne mai sauƙi. Galadima ya kuma yi martani game da zargin raba ƙuriʼun arewacin Najeriya.

3. 11 Mayu 2026Katsewar intanet a Iran ta shiga rana ta 72 a jere

   Kamfanin da ke sa ido kan intanet a duniya NetBlocks ya ce katsewar intanet a Iran ta shiga rana ta 72 a jere, inda tsawon lokacin matsalar ya wuce sa'o'i 1,728.

   Kamfanin ya ce samun damar amfani da intanet cikin ‘yanci haƙƙi ne da ke taimakawa wajen tabbatar da sauran ‘yanci, kuma hana hakan na taƙaita damar jama’a wajen ɗaukar bayanai da tattara hujjoji da kuma bayyana take hakkin bil’adama.

   Mahukuntan Iran sun katse intanet ɗin kasa da kasa tun daga ranar 28 ga Fabrairu, daidai lokacin da hare-haren Isra’ila da Amurka suka fara. Haka kuma ana fuskantar matsala mai tsanani wajen kira ta wayar tarho zuwa da kuma daga wajen Iran.

4. 11 Mayu 2026Tsagaita wuta tsakanin Iran da Amurka na cikin garari - Trump

   

   Asalin hoton, Getty Images

   Shugaban Amurka Donald Trump ya bayyana cewa yarjejeniyar tsagaita tsakanin ƙasarsa da Iran na cikin gagarin, bayan ɓangarorin sun ƙi amincewa da dakatar da yaƙin.

   Trump ya bayyana haka ne a lokacin da yake ganawa da manema labarai, inda ya sake nanata iƙirarin samun "cikakkiyar nasara" a kan Iran.

   A cewarsa, Iran ta yi tunanin zai gaji ne ko kuma ya dakata saboda matsin lamba, inda ya ce babu matsin lamba da yake fuskanta a game da yaƙin.

   Ya kuma bayyana daftarin da Iran ta rubuta na tsagaita wuta da "rashin hankali" bayan da farko ya bayyana cewa ba za ta saɓu ba su amince da yarjejeniyar.

   Har yanzu dai farashin man fetur na ƙara hauhawa saboda rashin samun tabbaci kan tsagaita wuta a yaƙin.

5. 11 Mayu 2026Babu ruwana da tantance ƴantakarar gwamnan Rivers na APC - Wike

   

   Asalin hoton, Lere Olayinka

   Ministan Abuja, Nyesom Wike ya bayyana cewa babu abin da ya shafe shi da tantancewar fitar da ƴantakarar gwamnan jam'iyyar APC da aka yi.

   Wike ya bayyana haka ne a wata sanarwa da mai ba shi shawara kan kafofin sadarwa na zamani, Lere Olayinka ya fitar, inda a ciki ya bayyana cewa shi ba ɗan APC ba ne, don haka ba shi da ta cewa kan tantancewar, sannan kuma babu abin da ya shafe shi da abin da ya faru.

   "Ni ba ɗan APC ba ne, don haka abin da ke faruwa a wajen tantancewar bai dame ni ba. Ko da sun fitar da sakamakon tantancewar ni babu ruwana. Me zai sa in yi magana kan abin da bai shafe ni ba?"

   Sai dai ya ce haɗakar "Rainbow Coalition" ta jihar Rivers an assasa ta ne domin gabatar da tsare-tsaren fuskantar babban zaɓen 2027, musamman a wuraren da suke da ƙarfi domin ciyar da jihar gaba.

   Ya kuma yaba da ƙoƙarin ƴan kwangila a Abuja, inda tsare-tsarensu na ayyukan da za su ƙaddamar domin bikin taya Bola Tinubu murnar shekara uku na tafiya daidai.

6. 11 Mayu 2026Starmer ya sha alwashin tinkarar ƙalubalen shugabanci bayan koma baya a zaɓe

   

   Asalin hoton, Getty Images

   Firaministan Birtaniya Keir Starmer ya sha alwashin fuskantar ƙalubalen shugabancin da ya taso bayan kayin da jam'iyyarsa ta sha a zaɓen makon da ya gabata, yana mai cewa ba zai yi kasadar jefa kasar cikin rudani ba.

   Starmer ya ce ya fahimci dalilan da suka fusata masu jefe ƙuri'a idan aka yi la'akari da sauyin da ka samu a rayuwar yau da kullum.

   Ya ce za a gabatar da kudurorin doka a wannan makon domin baiwa gwamnati karfi don daukar matakin da ya kamata.

7. 11 Mayu 2026Miliyoyin mutane na iya fuskantar yunwa saboda matsalar mashigar Hormuz - MDD

   Shugaban wata tawagar Majalisar Dinkin Duniya da aka kafa domin daƘile wata matsananciyar matsalar jin kai ya yi gargadin cewa dubban miliyoyin mutane na iya fuskantar yunwa da fari idan ba a dawo da jigilar takin zamani ta mashigin Hormuz cikin gaggawa ba.

   Jorge Moreira da Silva, babban daraktan Hukumar Ayyukan Majalisar Dinkin Duniya kuma shugaban tawagar, ya shaida wa kamfanin AFP cewa suna da ‘yan makonni kaɗan ne kawai domin kauce wa wata babbar matsalar jin ƙai.

   Ya ƙara da cewa ana iya fuskantar wani yanayi da zai jefa ƙarin mutum miliyan 45 cikin yunwa da fari.

8. 11 Mayu 2026Afirka ta Kudu ta ayyana matsalar rashin kyawun yanayi a matsayin babban bala'i

   

   Asalin hoton, Lulama Zenzile/Gallo Images via Getty Images

   Gwamnatin Afirka ta Kudu ta ayyana matsalar rashin kyawun yanayi da ke shafar larduna da dama na ƙsar a matsayin babban bala'i a ƙasa.

   Hukumomi a Afirka ta Kudu sun ce an ɗauki matakin bayan mamakon ruwan sama da ambaliya da hadari da walƙiya da iska mai ƙarfi da dusar ƙanƙara da suka lalata gine-gine da muhimman ayyuka a yankuna da dama.

   Zuwa yanzu hukumomi ba su yi ƙarin bayani ba kan irin ta;annatin da rashin kyawun yanayin ya haifar.

   Elias Sithole, shugaban hukumar yaƙi da bala'oi a Afirka ta Kudu ta ayyana lamarin a matsayin babban bala'i a ƙasar.

   Sithole ya yi kira ga gwamnati da ta samar da tallafi ga hukumar don ta samu damar aiwatar da tsare-tsarenta na ganin ta magance matsalolin yanayin.

9. 11 Mayu 2026WHO ta tabbatar da masu cutar Hantavirus bakwai a wani jirgin ruwa

   

   Asalin hoton, Getty Images

   Hukumar lafiya ta duniya ta ce an samu mutum bakwai da aka tabbatar sun kamu da cutar Hantavirus wadanda ke cikin wani jirgin ruwa da aka samu yaɗuwar ƙwayar cutar.

   Wata mata ƴar Faransa ita ce ta baya-bayan nan da aka tabbatar ta kamu da cutar bayan killace ta a birnin Paris.

   Marar lafiyar na kwance a asibitin da ake kula da wadanda suka kamu da cutar inda aka dauki matakai masu tsanani domin ganin an dakile yaduwar cutar.

   Matukin jirgin ya saki wani bidiyo da yake yabawa da jarumtar da fasinjojin jirgin suka nuna a lokacin da suka samu kansu cikin yanayi mai wahala.

10. 11 Mayu 2026Isra’ila ta ce harin ƙungiyar Hezbollah ya jikkata sojojinta uku

    

    Asalin hoton, Getty Images

    Sojojin Isra’ila sun bayyana cewa an jikkata sojojinsu uku a wani hari da aka kai da jirgi mara matuƙi a kudancin Lebanon, sai dai ba su bayar da ƙarin bayani ba.

    Tun da farko,ta sanar da cewa ta kai hari kan wurin da sojojin Isra’ila suka taru a yankin Tayyiba da ke kudancin Lebanon, tana mai cewa an yi amfani da jirage masu saukar ungulu wajen kwashe waɗanda suka jikkata.

    A safiyar yau ma, Isra’ila ta sanar da cewa an kashe ɗaya daga cikin sojojinta a wani hari da aka kai da jirgi mara matuƙi a wani yanki kusa da iyakar Lebanon.

    A gefe guda kuma, Kamfanin Dillancin Labarai na kasar Lebanon ya ruwaito cewa Isra’ila ta kai hari ta sama a ƙauyen Aba da ke arewacin ƙasar da safiyar yau, inda mutum biyu suka mutu sannan biyar suka jikkata.

    Rahoton ya kuma ce jiragen yaƙin Isra’ila sun kai hare-hare sau biyu cikin ƙasa da sa’a guda a yankin Kafr Roman da ke kudancin Lebanon.

11. 11 Mayu 2026Za mu mayar da martani kan harin da aka kai wa jirgin ruwanmu - Koriya ta Kudu

    

    Asalin hoton, Reuters

    Ƙasar Koriya ta Kudu ta bayyana cewa za ta mayar da martani kan harin da aka kai wa wani jirgin dakon kaya mallakin kamfanin ƙasarta a Tekun Fasha, bayan bincikenta ya gano waɗanda ke da hannu a harin.

    A cikin wata sanarwa da Koriya ta Kudu ta fitar, gwamnatin ƙasar ta yi Allah-wadai da harin tare da cewa tana ci gaba da gudanar da bincike kan lamarin.

    Kamfanin dillancin labarai na Reuters ya ruwaito cewa ƙwararrun Koriya ta Kudu sun gudanar da binciken farko domin tantance irin ɓarnar da aka yi wa jirgin. Ma’aikatar harkokin wajen Koriya ta Kudu ta kuma wallafa hotunan jirgin da ya lalace sakamakon harin da aka kai masa a yankin Tekun Fasha.

    Jirgin dakon kayan mai suna HHM Namo, wanda kamfanin sufurin ruwa na HMM ya mallaka, ya fuskanci hari ne da wasu makamai guda biyu da ba a san ko su waye suka harba ba a ranar 4 ga watan Mayu yayin da yake wucewa ta mashigar Hormuz.

    Rahotanni sun ce babu wanda ya rasa ransa a harin.

    Tun da farko dai Iran ta musanta hannu a harin da gobarar da ta tashi a cikin jirgin.

12. 11 Mayu 2026Babu tattaunawa har sai an kawo ƙarshen yaƙi ta ko wanne fanni - Iran

    

    Asalin hoton, tasnim news agency

    Kwamandan hedikwatar rundunar juyin juya halin Iran ya bayyana cewa Iran ba za ta ci gaba da tattaunawa ba har sai an kawo ƙarshen yaƙi ta ko wanne fanni.

    Mohammad Ali Jafari ya ce dole ne a fara cika wasu sharudda kafin komawa teburin tattaunawa, ciki har da ɗage takunkumi, sakin kuɗaɗen da aka ƙwace, da kuma biyan diyya kan barnar da yaƙi ya haifar. Ya kuma jaddada cewa dole ne a amince da ikon Iran kan mashigar Hormuz.

    Ya ƙara da cewa shugaban Amurka ya shiga wani hali na rashin tabbas saboda gazawa wajen cimma manufofinsa, yana mai cewa ana ƙoƙarin maye gurbin nasarar da ba a samu a yaƙi da matakan diflomasiyya.

13. 11 Mayu 2026Shugaba Ramaphosa ya yi allawadai da cin zarafin baƙi a Afirka ta Kudu

    Shugaban Afirka ta Kudu Cyril Ramaphosa ya yi tur da rikicin baya-bayan nan da miyagun ayyuka da ake aikatawa kan bai a wasu yankunan ƙasar.

    Cikin wata sanarwa, Shugaba Ramaphosa ya ce sam ba ya cikin tsare-tsaren gwamnati tare da yin kira ga mutane da su zama masu bin doka da oda a ƙasar.

    Shugaba Ramaphosa ya ce ba za a lamunci irin miyagun laifukan da ake aikatawa ba.

    A baya-bayan nan Afirka ta Kudu ta fuskanci matsin lamba daga Ghana da Najeriya bayan da ƴan ƙasashen suka fuskanci cin zarafi.

    Hukumomi a Ghana da Najeriya sun ce suna kwashe ƴan ƙasarsu da suke son komawa gida.

14. 11 Mayu 2026An kubutar da ƴan Ghana 28 da aka yi yunƙurin safararsu

    Ma'aikatar Harkokin Wajen Ghana ta ce an kuɓutar da ƴan ƙasar 28 da aka yi ƙoƙarin safararsu inda aka kwaso su daga Ivory Coast.

    An kuɓutar da mutanen ne bayan wani samame da aka kai a Abidjan kuma suna taimakawa wajen zurfafa bincike.

    Ma'aikatar harkokin wajen Ghana cikin wata sanarwa ta nuna cewa an kwaɗaitar da mutanen ne da alƙawuran samun damarmakin aiki a Turai sannan an zaƙuli kuɗaɗe masu yawa a hannunsu.

    Ministan harkokin waje Samuel Okudzato Ablakwa, a wani saƙo da ya wallafa a X ya yi kira ga matasan Ghana da su zama masu taka tsan tsan don kaucewa faɗawa hannun miyagu.

    A watan da ya gabata, jami'an shige da fice a Ghana sun kuɓutar da fiye da ƴan ƙasashen yammacin Afirka 300 ciki har da yara fiye da 100 a wani samamen daƙile ayyukan masu safarar mutane a Accra.

15. 11 Mayu 2026Narendra Modi ya nemi ƴan Indiya su taƙaita tafiye-tafiye saboda yaƙin Iran

    

    Asalin hoton, Reuters

    Firaiministan Indiya Narendra Modi ya yi kira ga Indiyawa da su farfaɗo da tsarin yin aiki daga gida sannan su rage siyan zinare su kuma taƙaita tafiye-tafiye zuwa ƙasashe don magance tsadar makamashi saboda rikicin Gabas ta Tsakiya.

    Modi ya ce matakan za su rage yawan man da Indiya ke amfani da shi.

    Masu sharhi sun bayyana kiran da Modi ya yi a wani taro da aka yi a Hyderabad da ke kudancin ƙasar a matsayin mafi tsanani zuwa yanzu.

    Modi ya shawarci mutane da su riƙa amfani da motocin gwamnati tare da kira ga manoma da su rage yin amfani da taki.

16. 11 Mayu 2026Ana fargabar kisan gomman masunta ƴan Najeriya a hare-haren Chadi

    

    Asalin hoton, Getty Images

    Ana fargabar an kashe gomman masunta bayan hare-hare ta sama da sojojin Chadi suka kai wuraren mayaƙan Boko Haram a tafkin yankin Chadi, a cewar wani shugaban ƙungiyar masunta.

    Hare-haren sun faru ne kwanaki bayan da Boko Haram ta ƙaddamar da hare-hare biyu kan sansanin sojin Chadi da ke kusa da tafkin, abin da rahotanni ke cewa ya yi sanadin mutuwar aƙalla sojoji 24 da wasu manyan janar-janar biyu.

    A wata sanarwa da aka wallafa a shafukan sada zumunta, Fadar Shugaban Chadi ta ce sojojinta sun kai hare-hare kan cibiyoyin Boko Haram a Tafkin Chadi a matsayin martani kan hare-haren ranar 4 da 6 ga watan Mayu.

    Shugaban ƙungiyar masunta ƴan Najeriya a yankin, Abubakar Gamandi Usman, ya shaida wa BBC cewa lamarin ya rutsa da farar hula da dama saboda mayaƙan Boko Haram sun daɗe suna aiwatar da miyagun laifuka a Tafkin Chadi.

    Usman ya ce a lokacin da jirage suka fara shawagi, mayaƙan Boko Haram sun tsere sannan wasu masunta sun tsere a ƙananan jiragen ruwa.

    A cewarsa, an shiga tashin hankali a yayin da mutane ke neman wajen tsira.

    Wannan ba shi ne karon farko ba da ayyukan sojojin Chadi a yankin ke janyo zarge-zargen kisan farar hula.

    A Oktoban 2024, an zargi rundunar sojin Chadi da kashe masunta ƴan Najeriya da dama a wasu hare-hare ta sama da aka kai kan mayaƙan Boko Haram a tsibirin Tilma da ke Tafkin Chadi.

17. 11 Mayu 2026Mutum biyu sun kamu da hantavirus bayan sauka daga jirgin da aka samu ɓarkewar cutar

    

    Asalin hoton, Reuters

    Wani Ba'Amurke da ɗan Faransa da suka koma ƙasashensu bayan sauka daga wani jirgin ruwa da aka samu yaɗuwar ƙwayar hantavirus sun kamu da cutar, kamar yadda hukumomi suka shaida.

    Ma'aikatar lafiya ta Amurka ta ce wani Ba'Amurke shi ma ya nuna alamun ya kamu da cutar sai dai alamomin ba su tsananta ba.

    Ministan Lafiya na Faransa Stephanie Rist ta ce akwai wata mata da ke killace a Paris sannan tana fama da rashin lafiya. An kuma gano mutum 22 da suka yi mu'amala da ita.

    A yanzu ana kwashe fiye da fasinjojin jirgin 90.

    Fasinjoji uku da suka shiga jirgin - ma'aurata ƴan Netherlands da wata ƴar Jamus - sun mutu daga baya.

    An tabbatar mutum biyu cikinsu sun kamu da cutar.

    Hantavirus ƙwayoyin cutuka ne da ɓeraye da dangoginsu ke yaɗawa, inda ɗan'adam kan iya ɗaukar cutar ta hanyar shaƙarta a iska daga busasshen ɓurɓushin kashin ɓera.

    Cutar na yaɗuwa ne a lokacin da ƙwayoyinta daga fitsari, kashi ko kuma yawun ɓera suka shiga cikin iska, kamar yadda Cibiyar yaƙi da cutuka masu yaɗuwa ta Amurka (CDC) ta bayyana.

18. 11 Mayu 2026An sake tsige mataimakiyar shugaban Phillipine karo na biyu

    

    Asalin hoton, Getty Images

    Majalisar wakilai a Phillipine ta kaɗa ƙuri'ar tsige Mataimakiyar Shugabar ƙasar Sara Duterte karo na biyu, lamarin da ke barazana ga burinta na son tsayawa takara a 2028.

    A yanzu batun ya koma ga majalisar dattijai inda idan aka same da laidi, Sara wadda ƴa ce ga tsohon Shugaban Ƙasa Rodrigo Duterte za ta rasa damar riƙe wani muƙamin gwamnati.

    A yanzu Sara, mai shekara 47 ce kan gaba a ƙuri'ar jin ra'ayina maye gurbin babban abokin adawarta, Shugaba Ferdinand Marcos Jr.

    Batun tsigewar ya taso ne kan zargin mataimakiyar shugaban ƙasar da wadaƙa da kuɗin gwamnati da kuma barazana ga Marcos, da matarsa da ɗan'uwansa wanda tsohon kakakin majalisar ne.

    Kan dalilan ne aka tsige Duterte a 2025 sai dai Kotun Ƙoli ta toshe yunƙurin. Bara ne kuma aka sake ɗago batun.

    A makon jiya ne, wani kwamitin majalisar da ya yi nazari kan shaidun da aka gabatar kan mataimakiar shugaban ƙasar ya yanke cewa akwai gamsassun dalilai na tsige ta.

    Duterte ta ƙi bayyana gaban kwamitin lamarin da ta ce akwai siyasa a ciki.

19. 11 Mayu 2026Gwamnati ta tilasta yi wa ɗaliban sakandare gwajin ƙwaya a Najeriya

    

    Asalin hoton, @DrTunjiAlausa

    Gwamnatin Najeriya ta bijiro da wasu sabbi kuma tsauraran matakai na yaƙi da ta'ama'li da miyagun ƙwayoyi a makarantun sakandare ciki har da tilasta yi wa ɗalibai gwajin ƙwaya da kuma dakatar da waɗanda aka gano sun ci gaba da shan ƙwaya bayan gyaran halin da aka yi masu.

    A ƙarƙashin sabon tsarin, za a riƙa yi wa duk sabbin ɗalibai a makarantun sakandare gwajin ƙwaya.

    Matakin na ƙunshe cikin wata takarda da ta bayyana wasu jerin matakai da aka ɗauka kan yaƙi da miyagun ƙwayoyi a makarantun sakandare da ke Najeriya kamar yadda jaridar Punch ta ruwaito.

    A cewar takardar, an bijiro da tsarin domin samar da yanayi mai kyau na koyarwa da koyo a makarantu ta hanyar rage mummunan tasirin da ta'amali da miyagun ƙwayoyi ke yi kan lafiyar ƙwaƙwalwa da ƙwazon ɗalibai.

20. 11 Mayu 2026Iran ta saki ƴar fafutukar da ta taɓa cin lambar yabo ta Nobel

    

    Asalin hoton, Reuters

    Hukumomin Iran sun saki 'yar fafutukar nan - Narges Mohammadi - wadda ta taɓa cin lambar yabo ta zaman lafiya ta Nobel.

    An sake ta ne, a matsayin beli ganin yadda yanayin lafiyarta ke ta taɓarɓarewa.

    A makon da ya wuce magoya bayanta suka yi gargaɗin cewa za ta iya mutuwa a gidan yari, bayan da ta gamu da matsalar bugun zuciya har sau biyu a farkon shekarar nan.

    An mayar da ita daga gidan kaso a Zanjan da ke arewacin Iran ɗin, zuwa babban birnin ƙasar, Tehran, kuma an ƙyale likitocinta su yi mata magani.

    A shekara ta 2023 ne, aka ba ta lambar yabo ta Nobel - bayan an tsare ta a gidan sarƙa a kan fafutukar da take yi ta tabbatar da 'yancin mata da kuma neman a soke hukuncin kisa.

    Ta shafe yawancin lokaci a cikin shekara ashirin da ta gabata - a ciki da wajen gidan yari.