Abubuwan da ke faruwa a Najeriya da sauran sassan duniya

Rahoto kai-tsaye

Nabeela Mukhtar Uba

1. 23 Satumba 2026Ukraine ta zargi Rasha da kai har ga fararen hula

   

   Asalin hoton, LightRocket via Getty Images

   Ukraine ta zargi Rasha da ƙara kai hare-hare kan ababen more rayuwa da fararen hula ke amfani da su, bayan wasu sabbin hare-hare da aka kai kan gidajen mai, da harkokin sufurin jiragen ruwa da kuma layukan dogo. An kashe mutane biyu, yayin da sama da 40 suka jikkata a Kyiv, babban birnin ƙasar, inda jirage marasa matuƙa suka shafe mafi yawan yini suna shawagi a sararin samaniyar birnin. Da yake jawabi a wani taron kwamitin sulhu na Majalisar Ɗinkin Duniya, ministan harkokin wajen Ukraine, Andrii Sybiha, ya ce bai kamata a ɗauki yaƙin a matsayin wani abu na yau da kullum ba. Ya ce Ukraine ta amince da tsagaita wuta gaba ɗaya, nan take kuma ba tare da wani sharadi ba, tare da yin kira ga Rasha da ta yi hakan. Jakadan Amurka a Majalisar Ɗinkin Duniya, Mike Waltz, ya yi Allah wadai da duk wani yunƙurin faɗaɗa rikicin.

2. 23 Satumba 2026Iran ta ce ba za ta miƙa wuya ga Amurka ba

   

   Asalin hoton, EPA

   Shugaban Iran, Masoud Pezeshkian, ya aika wa takwaransa na Amurka Donald Trump sako kai tsaye, yayin jawabin da ya gabatar da jawabi a babban taron Majalisar Ɗinkin Duniya, inda ya ce Iran ba za ta taɓa mika wuya ga masu son gallaza mata ba. A farkon jawabin nasa, Mista Pezeshkian ya ɗaga hoton tsohon jagoran addinin kasar Ayatollah Ali Khamenei, wanda aka kashe a ranar farko ta yaƙin da Amurka da Isra’ila suka haɗa kai suka kaddamar kan Iran. A ƙarshen jawabin nasa, Mista Pezeshkian ya ce gwamnatin Iran a shirye take ta shiga tattaunawar diflomasiyya, amma ba za ta amince da yi mata karfa-karfa ba.

3. 23 Satumba 2026Sabon faɗa ya ɓarke a yankin Tigray

   

   Asalin hoton, AFP via Getty Images

   An sake samun barkewar faɗa tsakanin gwamnatin Habasha da jam’iyyar da ke iko da yankin Tigray da ke arewacin ƙasar, lamarin da ya ƙara tayar da fargabar sake komawar ƙasar cikin cikakken yakin basasa. Wani mai ba firaministan Habasha shawara ya zargi Ƙungiyar ’Yantar da Jama’ar Tigray, TPLF, da ƙaddamar da wani gagarumin hari a yankunan Afar da Amhara da ke makwabtaka da Tigray. Sai dai ’yan Tigray sun ce suna yaƙi ne domin kare kansu.

   Yaƙin da aka shafe shekaru biyu ana yi a Tigray ya ƙare a shekarar 2022, amma a cikin ’yan watannin nan, ɓangarorin biyu sun riƙa zargin juna da karya yarjejeniyar zaman lafiya.

   Yaƙin na daga cikin rikice-rikicen da suka yi sanadin mutuwar mutane masu yawa a wannan ƙarni. Mai shiga tsakani na Tarayyar Afirka ya kiyasta cewa kimanin mutane 600,000 ne suka mutu, yayin da yaƙin ya jefa yankin cikin mawuyacin halin yunwa.

   A ranar Lahadi, Tigray People's Liberation Front (TPLF), jam'iyyar da ke mulkin yankin Tigray, ta sanar da ƙulla ƙawance da wasu ƙungiyoyin yaƙi guda shida a Habasha, da nufin kawar da gwamnatin da ke Addis Ababa.

4. 23 Satumba 2026Sauye-sauyen da Saudiyya ta yi game da aikin Hajjin 2026

5. 23 Satumba 2026An samu ƙaruwar cin zarafin mata a Gaza - UNPFA

   

   Asalin hoton, Reuters

   An samu ƙaruwa sosai a rahotannin cin zarafin mata da ‘yan mata a Zirin Gaza, ciki har da auren wuri da kuma auren dole, a cewar wasu rahotanni na baya-bayan nan daga Asusun Kula da Yawan Jama’a na Majalisar Dinkin Duniya (UNFPA).

   Ɗaya daga cikin rahotannin, wanda ya yi nazari kan bayanan da ƙungiyoyi 10 suka tattara, ya ce rikicin da ya daɗe yana addabar Gaza ya “haifar da yanayin da ke ƙara jefa mata da ‘yanmata cikin haɗarin cin zarafi.”

   Rahoton ya kuma yi gargaɗin cewa an samu “ƙaruwa” a yawan ƴanmatan da ake yi wa auren wuri da yi musu auren dole tsakanin Afrilu zuwa Yunin bana. Majalisar Dinkin Duniya na ɗaukar dukkan waɗannan a matsayin nau’ukan cin zarafin mata.

   Wani rahoton kuma, wanda ya ƙunshi bayanan mata 230 da ke zaune a sansanonin ‘yan gudun hijira masu cunkoso a birnin Gaza da Khan Younis, ya bayyana irin cin zarafin da matan suka ce sun fuskanta ko suka gani.

   Wata mata da ta rasa matsuguni wadda kuma take zaune a wata makaranta da ta zama sansani a Gaza, ta yi bayani kan yadda ake aurawa masu fyaɗe matan da suka yi lalata da su don gudun abin kunya.

   Wata matar kuma ta bayyana yadda a bara, lokacin da ake fama da yunwa, "wani mutum ya aurar da ƴarsa mai sekara 14 don ya samu buhun fulawa biyu don kawai shi da sauran ƴaƴana su samu abinci."

   Duk da cewa har yanzu tattara cikakkun bayanai domin tabbatar da ainihin adadin na da wahala, UNFPA ta ce rahotannin auren wuri da auren dole sun ƙaru da kashi 123% a rubu'i na biyu na wannan shekara idan aka kwatanta da rubu'in farko.

6. 23 Satumba 2026Iran ta gargaɗin maƙwabtanta kan mara wa Amurka baya don sanya mata takunkumai

   

   Asalin hoton, IRIB

   Sakataren Majalisar Tsaron Ƙasar Iran, Mohsen Rezaei ya yi gargaɗi ga ƙasashen da ke maƙwabtaka da Iran kan mara wa Amurka baya kan sanya mata takunkumai.

   A wata hira da ya yi da gidan talabijin na ƙasar, Mista Rezaei ya ce Idan makwabtan Iran suka mara wa Amurka baya wajen takunkumin da ta ƙaƙaba a sararin samaniya da filayen jiragenta ba to su ma ba za su iya gudanar da zirga-zirga ba.

   "Za ku hana ƴan kasuwarmu tafiye-tafiye, jiragenmu ba za su iya gudanar da zirga-zirga ba, kayayyakinmu ba za su iya shiga ta jiragen sama ba, kuma kuna aiki tare da Amurka, sannan ku yi tunanin za mu tsaya muna kallo kawai?"

   A yau ne takunkumin da Amurka ta ƙaƙaba kan kamfanonin jiragen saman Iran ya fara aiki.

   Hakan ya sa aka dakatar da jirage da dama na Iran zuwa ƙasashe daban-daban, sai dai har yanzu wasu ƙasashe na ci gaba da bai wa jiragen saman Iran damar amfani da filayen jiragensu.

   Mohsen Rezaei ya kuma ce rahotannin da ke magana kan tattaunawa da wakilai daga ƙasashe daban-daban a gefen taron Majalisar Ɗinkin Duniya:

   "Ba tattaunawar sulhu ba ce, sai dai gabatar da sharuɗɗa kawai," in ji shi.

   Ya ce ba a ƙara ko rage komai daga cikin sharuɗɗan da Iran ta gindaya ba, kuma mashigar Hormuz ba za ta buɗe ba har sai an amince da waɗannan sharuɗɗa.

   Mista Rezaei ya jaddada cewa Iran ta gabatar da sharuɗɗa bakwai ne, ba uku ba."

   Ya ƙara da cewa jami'an Iran sun shafe kwana biyu zuwa uku suna tattaunawa kan batun, inda a ƙarshe aka cimma matsaya cewa za su sanar da masu shiga tsakani irin sharuɗɗan da Iran ta gindaya.

7. 23 Satumba 2026Kun san batutuwan da ake tattaunawa a taron UNGA?

8. 23 Satumba 2026Ƴansiyasar Najeriya sun karkatar da miliyoyin daloli don sayen kadarori a Amurka - Rahoto

   Wani sabon rahoto ya yi zargin cewa wasu manyan ƴan siyasar Najeriya da dama sun karkatar da ɗaruruwan miliyoyin daloli daga kuɗin gwamnati a cikin shekaru 30 da suka gabata wajen sayen kadarori a Amurka.

   Binciken da Cibiyar kare masu kwarmata bayanai a Afirka da gamayyar ƙungiyar yaƙi da rashawa suka gudanar ya gano wasu manyan jami'an gwamnati na yanzu da na baya 61 da ke da alaƙa da wasu kadarori 284 a Amurka da darajarsu ta kai kusan naira biliyan 370.

   Sun yi zargin kadarorin na da alaƙa da manyan jami'an gwamnati tsofafi da waɗanda ke aiki a yanzu, da danginsu da kamfanonin da suke hulɗa da su.

   Rahoton ya yi kira ga hukumomin Najeriya da na Amurka, su gudanar da bincike domin sanin inda aka samo kuɗaɗen sayen kadarorin.

9. 23 Satumba 2026ICC ta samu tsohon shugaban mayaƙan Afirka ta tsakiya da laifukan yaƙi

   Kotun hukunta manyan laifuka ta duniya ICC ta samu tsohon shugaban mayaƙan sa kai a Jamhuriyar Tsakiyar Afirka da aikata laifukan take hakkin ɗan adam, da suka haɗa da azabtarwa da tsare mutane a lokacin yaƙin basasar ƙasar a shekarar 2013.

   Mahamat Said Abdel Kani shi ne babban kwamandan ƴan tawayen Seleka, ƙungiyar da ta hambarar da gwamnatin shugaba Francois Bozizi, lamarin da ya jefa kasar cikin yaki.

   Ma su shigar da ƙara sun ce shi ya kafa wani gidan kaso da ake azabtar da mutanen da ake zargin su a goyon bayan tsohon shugaban ƙasar ta hanyar lakaɗa musu duk da hana su abinci da ruwan sha.

   Sai dai Abdel Kani ya musanta zare-zargen.

10. 23 Satumba 2026Shugaban Iran ya yi kausasan kalamai ga Amurka a taron UNGA

    

    Asalin hoton, Getty Images

    Shugaban ƙasar Iran, Masoud Pezeshkian, ya yi kakkausan martani ga kalaman Trump a jawabin da ya gabatar a taron UNGA da ke gudana a birnin New York na Amurka.

    Mista Pezeshkian ya ce ƙasarsa ta kasance "wadda ke shan wahalar ayyukan ta'addanci", yana mai mayar da martani ga kiran da Shugaban Amurka, Donald Trump, ya yi wa Iraniyawa da ya bayyana su a matsayin "'yan ta'adda".

    Pezeshkian ya zargi Amurka da kai hare-hare kan shugabanninsu da masana kimiyya tare da cibiyoyin ilimi da cibiyoyin lafiya da makarantu da asibitoci da sauran muhimman abubuwan more rayuwa.

    Ya ce an kashe yara marasa laifi a makarantu sakamakon hare-haren.

    Shugaban na Iran ya ce asar na kare kanta ne daga hare-haren da ake kai mata.

11. 23 Satumba 2026Za mu murƙushe dakarun Amurka idan suka shigo ƙasarmu - Iran

    

    Asalin hoton, Getty Images

    Tsohon kwamandan rundunar juyin juya halin Iran (IRGC), kuma mai ba wa Jagoran Jamhuriyar Musulunci shawara, Janar Yahya Rahim Safavi, ya ce a shirye ƙasar ta ke ta gama da sojojin Amurka idan har ta tura su ƙasar.

    "Muna da mayaƙan rundunar Basij miliyan 10 da aka horar, waɗanda za su iya kare kowane yanki a faɗin ƙasarmu."

    Ya bayyana haka ne yayin da yake magana kan yiwuwar Amurka ta tura sojojintaa na ƙasa zuwa Iran.

    "Idan Amurkawa suka turo sojojinsu zuwa ƙasarmi ko'ina aka jibge su, babu shakka za mu murƙushe su."

    Mista Rahim Safavi ya kuma nanata irin ra'ayin da wasu manyan jami'an Iran suka bayyana a baya, inda ya ce:

    "Buɗe mashigar Hormuz zai kasance ne idan aka amince da sharuɗɗan Iran."

    Tsohon kwamandan na IRGC ya yi zargin cewa matsin lambar da Amurka yi shi ne "babban cikas" ga cimma yarjejeniya tsakanin Iran da Oman kan yadda zirga-zirgar jiragen ruwa za ta kasance a mashigar Hormuz.

    Sai dai ya ce yana ganin wannan yanayi zai haifar da sakamakon da ba mashigar Hormuz kaɗai ba ce ba za ta koma yadda take a baya ba.

    ''Har ma da mashigar Bab al-Mandab ba za ta koma yadda take a da ba."

12. 23 Satumba 2026Su wane ne mayaƙan Houthi?

13. 23 Satumba 2026Rikici ya ɓarke a Habasha tsakanin dakarun gwamnati da mayaƙan Tigray

    Mai bai wa Firaiministan Ethiopia shawara, Abiy Ahmed ya ce ƴantawaye a Tigray da ke arewacin ƙasar sun ƙaddamar da gagarumin hari kan wasu cibiyoyin gwamnati da ke yankin.

    Getachew Reda ya kuma ce mayaƙan sun ƙwace iko da filayen jiragen sama lamarin da ya sa aka dakatar da zirga-zirgar jirage.

    Cikin wata sanarwa, gwamnatin yankin Tigray ta ce dakarunta sun shiga yaƙin kare kai inda kuma ta zargi gwamnatin Abiy Ahmed da ƙaddamar da wani shirin yaƙi kan al'ummar Tigray.

    Ta'azzarar rikicin a baya-bayan nan ya haifar da fargabar cewa yankin na iya sake faɗawa cikin yaƙi, shekara huɗu bayan kawo ƙarshen mummunan yaƙin basasa da ya yi sanadin mutuwar mutane sama da 500,000.

14. 23 Satumba 2026An samu jami'an gwamnatin Najeriya da badaƙalar kadarorin naira biliyan 370 a Amurka - Rahoto

    

    Asalin hoton, Getty Images

    Wani sabon rahoto ya yi zargin cewa wasu manyan ‘yan siyasar Najeriya da dama sun karkatar da ɗaruruwan miliyoyin daloli daga kuɗin gwamnati a cikin shekaru 30 da suka gabata wajen sayen kadarori a Amurka.

    Binciken da Cibiyar kare masu kwarmata bayanai a Afirka da gamayyar ƙungiyar yaƙi da rashawa suka gudanar ya gano wasu manyan jami'an gwamnati na yanzu da na baya 61 da ke da alaƙa da wasu kadarori 284 a Amurka da darajarsu ta kai kusan naira biliyan 370.

    Sanarwar ta kuma ce 39 daga cikinsu an taɓa zargin su, wasu kuma an gurfanar da su a kotu, wasu ma an yanke musu hukunci kan cin hanci da rashawa.

    Rahoton mai taken 'Dirty Deeds - Yadda manyan jami'an gwamnatin Najeriya suka sayi kadarori a Amurka', ya yi nazari kan kadarorin da aka saya tun daga 1991 tare da gano kadarori 152 da darajarsu ta kai kusan dala miliyan 177 da aka saya a lokacin da jami'an ke kan mulki, lokacin da rahoton ya ce suke da iko kan kuɗin gwamnati.

    PPLAAF ta ce kusan kashi 81 na kadarorin an saye su ba tare da wata bayyananniyar hanyar samar da kuɗin sayen ba, kamar rancen sayen gida. Ƙungiyar ta bayyana hakan a matsayin ɗaya daga cikin abubuwan da ka iya zama alamun almundahana.

    Sai dai rahoton bai tabbatar da cewa an sayi dukkan kadarorin da kuɗaɗen sata ba, kuma ya buƙaci hukumomin Najeriya da Amurka su gudanar da bincike don gano ta ina kuɗaɗen suka fito.

    Babban Daraktan PPLAAF, Jimmy Kande, ya ce binciken ya fallasa gazawar wasu jami’ai da kuma giɓin da ke bayar da damar zurarewar dukiyar jama’a da aka sata zuwa ƙasashen waje tare da zuba ta a kadarori.

    Jami'an da ke ɓangaren tsaro a Najeriya sune masu kaso mafi tsoka na kadarorin da rahoton ya gano.

    Ƙasar na fama da matsalolin tsaro inda ake samun ƙaruwar garkuwa da mutane da matsalar ƴanbindiga da rikicin masu iƙirarin Jihadi cikin shekaru goma da suka gabata.

    BBC ta tuntuɓi Hukumar EFCC mai yaƙi da cin hanci da rashawa domin jin ta bakinta kan bankaɗar da rahoton ya yi.

15. 23 Satumba 2026Sojin Pakistan sun harbo jirgi mara matuƙi takwas da Taliban ta harba

    Jami'an tsaro a Pakistan sun ce sun harbo jirage marasa matuƙa takwas da ake zargin Taliban ta harba kusa da iyakar ƙasashen biyu.

    Jami'an tsaron sun ce sun daƙile yunƙurin Taliban na kai hari kan wuraren jama'a.

    Lamarin na zuwa ne kwanaki biyu bayan da Pakistan ta kai hare-hare ta sama kan wuraren da ta ce mafaka ce ga mayaƙa a yankin na kan iyaka.

    Afghanistan ta musanta zargin taimakawa mayaƙa da ke kai hare-hare kan sojojin Pakistan.

    Zuwa yanzu Afghanistan ba ta ce komai ba kan batun kuma babu majiya da ta tabbatar da ainahin abin da ya faru a kan iyakar.

16. 23 Satumba 2026Yadda aka gano jirgi mara matuƙi da ake zargin na masu aikata laifi ne a Kano

    

    Asalin hoton, Abdullahi Kiyawa/FB

    Rundunar ’yan sandan jihar Kano ta sanar da gano wani jirgi maras matuƙi da ake zargin na masu aikata laifi ne.

    Kakakin rundunar, CSP Abdullahi Haruna Kiyawa, ya ce an gano jirgin ne yayin wani samame da jami'ansu suka kai kan iyakokin jihar.

    Ya ce jami'ansu sun ci karo da jirgin ne a wani daji a garin Tarau da ke ƙaramar hukumar Bebeji.

    A gefe guda kuma, rundunar ta sanar da kama wani da ake zargi da yin garkuwa da mutane don neman kudin fansa.

    CSP Abdullahi Haruna Kiyawa ya bayyana cewa an kama kasurgumin mai garkuwar da mutanen wanda ake zarginsa da kasancewa mamba a wata ƙungiyar masu aikata miyagun laifuka, wadda ke da hannu wajen garkuwa da mutane, fashi da makami da satar shanu a jihohin Kano da Katsina da kuma Kaduna.

    Ya ce "mutumin ɗan shekara 35, mazaunin Kunkumi a Maƙarfi da ke Kaduna ne kuma bincike ya kai ga kama wani mutum da ke zaune a Kwanar Ɗangora a jihar Kano wanda shi ne ke gayyato mai garkuwa da mutanen inda suke ta'annatin tare."

    Mutumin ya yi bayani kan irin garkuwa da suka yi a baya inda suka sace wata mata har sai da suka karɓi kuɗin fansa naira miliyan 20.

    Haka kuma sun sace wani mutum a garin Gwarzo suka kai shi jihar Kaduna kuma ba su sake shi ba har sai da iyalansa suka biya kuɗin fansa.

    Kakakin ya kuma ce suna ci gaba da gudanar da bincike, inda ya tabbatar da cewa da zarar sun kammala, za su gurfanar da mutanen da aka kama a gaban kotu, sannan kuma ya ce kwararru suna ci gaba da nazarin jirgin da aka kama don gano abubuwan da ya kunsa.

17. 23 Satumba 2026Trump ya yi iƙirarin kawo ƙarshen yaƙi takwas

    

    Asalin hoton, Reuters

    Shugaban Amurka Donald Trump, a jawabin da ya yi a Babban Taron Majalisar Dinkin Duniya, karo na 81, ya ce tun bayan dawowarsa kan karagar mulki a wa’adi na biyu, ya kawo ƙarshen yaƙe-yaƙe takwas.

    Ya ambaci shida daga cikin rikice-rikicen da ya ce ya taimaka wajen kawo ƙarshen su da suka haɗa yaƙi tsakanin Cambodia da Thailand, Kosovo da Serbia, Jamhuriyar Dimokuraɗiyyar Congo da Rwanda, Pakistan da Indiya, Armenia da Azerbaijan da yaƙin Gaza

    A baya, sashen BBC mai tantance sahihancin bayanai ya binciki iƙirarin Trump, inda ya gano cewa wasu daga cikin rikice-rikicen sun ɗauki kwanaki kaɗan ne kawai, duk da cewa sun samo asali ne daga taƙaddamar da ta daɗe tana gudana.

    Duk da cimma yarjejeniyar tsagaita wuta, an ci gaba da samun arangama a Jamhuriyar Dimokuraɗiyyar Congo da kuma Gaza.

    A kalamansa na baya-bayan nan, Trump bai ambaci rikicin kwanaki 12 tsakanin Isra’ila da Iran a watan Yunin 2025 ba, haka kuma bai ambaci “yaƙi” tsakanin Masar da Habasha ba.

    A baya, Fadar White House ta lissafa rikice-rikicen biyu a cikin yaƙe-yaƙe takwas da Trump ya ce ya taka rawa wajen kawo ƙarshensu.

    A batun Masar da Habasha kuwa, a zahiri babu wani yaƙi da ya ɓarke tsakanin ƙasashen biyu. Sun samu saɓani ne kan gina madatsar ruwa a kogin Nilu, amma taƙaddamar ba ta kai ga yaƙi tsakanin ƙasashen biyu ba.

18. 23 Satumba 2026Mutum 11 sun mutu a wani harin ƴanbindiga a Afirka ta Kudu

    

    Asalin hoton, SAPS

    Wasu ƴanbindiga sun harbe aƙalla mutum 11 kusa da Durban da ke Afirka ta Kudu.

    Ƴansanda sun ce wasu mutum uku sun tsira daga harin na ƴanbindiga.

    Mutanen da lamarin ya rutsa da su suna halartar wata liyafa nea wani gida lokacin da maharan suka afka musu tare da buɗe wuta.

    Zuwa yanzu, ba a tantance dalilin kai harin ba.

    Muƙaddashin babban jami'in ɗansanda, Puleng Dimpane, ta ce tuni aka ƙaddamar da binciken gano makisan don hukunta su.

    Afirka ta Kudu ce ƙasa da ake yawan samun kashe-kashe a duniya. Shugaba Cyril Ramaphosa ya kira lamarin da ya zama ruwan dare a matsayin babban ƙalubale.

19. 23 Satumba 2026Ana zaɓen ƴanmajalisa a Morocco

    

    Asalin hoton, Getty Images

    Al'ummar Morocco na kaɗa ƙuri'a a zaɓen ƴan majalisa yayin da tsadar rayuwa da rashin aikin yi da kuma rashin amincewa da jam’iyyun siyasa ke daga cikin manyan batutuwan da suka mamaye zaɓen.

    Sarki Muhammad zai naɗa sabon Firaiminista daga jam'iyyar da ta samu mafi rinjayen kujeru a majalisar mai kujeru kusan 400 sai dai Sarkin ne har yanzu yake da iko kan muhimman shawarwari kan manufofin ƙasar.

    Jam'iyyar National Rally of Independents (RNI) mai matsaikaicin ra'ayi wadda ke jagorantar gwamnatin haɗaka ta yanzu, na daga cikin waɗanda ake hasashen za su iya yin nasara a zaɓen.

    Sai dai tana fuskantar ƙalubale daga jam’iyyun masu ra’ayin mazan jiya da kuma na masu akidar Musulunci.

20. 23 Satumba 2026Salva Kiir ya rusa gwamnatinsa

    

    Asalin hoton, Reuters

    Shugaban ƙasar Sudan ta Kudu, Salva Kiir, ya rusa gwamnati tare da naɗa gwamnatin riƙon ƙwarya, matakin da ya ce zai share fagen gudanar da zaɓen ƙasar na farko a tarihi wanda ake sa ran yi a watan Disamba.

    Masu sukar matakin dai sun yi gargadin cewa hakan zai bai wa shugaban cikakken iko ba tare da wata takura ba.

    A bangare guda kuma, Mista Kiir ya cire dukkan mataimakan shugaban ƙasa da aka naɗa ƙarƙashin yarjejeniyar zaman lafiya ta shekarar 2018 wadda ta kawo ƙarshen yaƙin basasar ƙasar.

    Haka kuma an sallami ministoci, da shugabannin ƙananan hukumomi da kuma jami'an majalisun dokoki na ƙasa da na jihohi.

    'Yan adawa a kasar dai sun yi Allah-wadai da wadannan sauye-sauyen, waɗanda suka soke muhimman tanade-tanaden yarjejeniyar zaman lafiyar, ciki har da haɗa rundunonin sojojin da suka yi gaba da juna da kuma kammala rubuta sabon kundin tsarin mulkin ƙasar.