Yaƙin Iran da sauran abubuwan da ke faruwa a sauran sassan duniya, Lahadi 5/4/2026

Rahoto kai-tsaye

Daga Abdullahi Bello Diginza

1. 5 Aprilu 2026DR Congo za ta karɓi baƙin hauren da aka kora daga Amurka

   

   Asalin hoton, Flex X

   Jamhuriyar Dimokaradiyyar Kwango za ta karbi 'Yan kasashen waje da aka kora daga Amurka, karkashin wata yarjejeniya da gwamnatin Trump.

   Kinshasa ta ce Washington zata biya kudaden da za a yi amfani da su wajen hidimar mutanen da zasu fara isowa a wannan watan.

   An kulla yarjejeniyar ya yin da Washington ke ƙoƙarin sulhu tsakanin Kwango da Rwanda.

   Amurka ta aike da ƴan ƙasashen waje da suka fito daga ƙasashen Afrika da dama da suka hada da Ghana da Kamaru, sai dai wannan mataki ya janyo suka daga kungiyoyin kare hakkin ƴan Adam da kuma masana shari'a.

2. 5 Aprilu 2026Mun yanke ƙauna bayan cire mu daga FA - Van Dijk

   

   Asalin hoton, Getty Images

   Kyaftin ɗin Liverpool Virgil van Dijk ya nemi afuwar magoya bayan ƙungiyar yana mai cewa sun yanke ƙauna tun bayan da Manchester City ta cire su daga gasar FA.

   Yanzu babu abin da ya ragewa ƙungiyar na wata gasa da take sa ran ɗauka sai Champions Lig, bayan kashin da ta sha a filin wasa Etihad 4-0.

   Cikin mintina 45 na farko City ta lallasa Liverpool da ci 2-0, sannan da aka dawo ta ƙara mata wani ci 2-0.

   "Babu abin da zan yi sai baiwa magoya bayanmu hakuri bisa abun da muka yi na rashin ƙoƙari musammam a minti 45 na biyu, in ji ɗan bayan Netherlands din mai shekara 34.

3. 5 Aprilu 2026INEC ta dakatar da shirin sabunta katin zaɓe

   

   Asalin hoton, INEC

   Hukumar zaɓen Najeriya mai zaman kanta INEC ta umarci duka kwamishinoninta da su dakatar da shirin sabunta rijistar zaɓe.

   A makon jiya ne hukumat INEC ta fitar da sanarwar za a sabuntawa masu zaɓe rijista cikin kwanaki 45, a wani mataki na shirye-shiryen tun karar zaɓen 2027.

   Sabunta katin zai shafi mutanen da suka yi rijinsta ne tsakanin 2011 zuwa 2024.

   Wannan lamari dai ya janyo firgici a zukatan 'yan Najeriya, inda wasunsu ke tambayar cewa me matakin sabuntawar yake nufi.

   Wata sanarwa da sakatariyar INEC Rose Oriaran-Anthony ta fitar ta ce, an dakatar da shirin tare da umartar duka kwamishinoninta da su dakata har sai zuwa ranar Alhamis 9 ga watan Afrilun da muke ciki inda za su gudanar da taronsu ta intanet domin sanin mataki na gaba.

4. 5 Aprilu 2026Boko Haram na dab da zama tarihi - Zulum

   

   Asalin hoton, Zulum Media

   Gwamnan jihar Borno a Najeriya, Babagana Umara Zulum, ya ce yana da kwarin gwiwar cewa matsalar Boko Haram na dab da ƙarewa.

   Gwamnan ya bayyana hakan ne cikin wata sanarwar biki Easter da mataimakins kan harkokin yaɗa labarai Dauda Iliya ya fitar.

   Da yake bayani kan yadda gwamnagtinsa ke ƙoƙarin tabbatar da zaman lafiya mai ɗorewa, Zulum ya bayyana cewa ba da jimawa ba Boko Haram za ta zo ƙarshe sannan zaman lafiya da kwanciyar hankali masu ɗorewa su tabbata tsakanin mutane.

   "Abin farin ciki ne ganin yadda mabiya addinan Kirista da Musulunci ke zaune ƙalau a jihar nan tamu. Ina mai ba da shawara ga kowa, mu dage wajen tabbatar da zama lafiya a jihar nan," a cewarsa.

   Ya kuma jaddada ƙoƙarin da gwamnatinsa ke yi wajen bunƙasa harkokin tsaro da walwalar al'umma baki daya a Borno.

   Ya kuma yi kiran ƙarin haɗin kai da hakuri da juna musamman a wannan lokacin da ake zaman dar-dar a siyasance.

5. 5 Aprilu 2026Wani hari ya jikkata mutum huɗu a Isra'ila

   

   Asalin hoton, MDA

   Mutum huɗu sun jikkata a garin Haifa da ke arewacin Isra'ila bayan harin wani roket da aka kai, kamar yadda hukumar ba da agajin gaggawa ta ƙasar ta sanar.

   Magen David Adom ta ce ciki har da "wani mutum ɗan kimanin shekara 82 da wani abu mai nauyi ya faɗowa wanda yake cikin matsanancin hali, sai kuma wasu uku da halin da suke ciki bai tsananta ba."

   Hukumar ta wallafa hotunan wurin da abin ya faru.

   

   Asalin hoton, MDA

6. 5 Aprilu 2026Matar Jega tsohon shugaban INEC ta rasu

   

   Asalin hoton, Jega X

   Matar tsohon shugaban hukumar zaɓen Najeriya INEC, Farfesa Attahiru Jega ta rasu.

   Cikin wata sanarwa da iyalanta suka fitar a yau Lahadi, sun tabbatar da mutuwar ta ta, kuma tuni aka yi jana'izarta a babban masallacin ƙasa da ke Abuja.

   Gabanin mutuwarta Hajiya Hadiza Jega ta yi fice wajen taimakawa harkokin ilimi da ci gaban al'uma musamman a arewacin Najeriya.

   Farfesa Jega wanda ya taɓa zama shugaban Jami'ar Bayero da ke Kano ya ce ya kaɗu da mutuwar mai ɗakin tasa tare da yi mata adduar dacewa da aljanna.

7. 5 Aprilu 2026Amnesty ta zargi sojojin Najeriya da kashe wata ɗaliba a Borno

   

   Asalin hoton, Getty Images

   Ƙungiyar kare haƙƙin bil'adama ta Amnesty International ta buƙaci hukumomin Najeriya su binciki kisan da suka zargi sojojin ƙasar da yi wa wata yarinya a birnin Maiduguri na jihar Borno.

   Ƙungiyar ta ce an kashe yarinyar ne mai shekara 14 a ranar Asabar 4 ga watan Maris bayan da harsashi ya same ta a cikin gidansu.

   ''Bayanai sun ce an harbi yarinyar ne a lokacin da sojoji ke harbin bindiga a wani ɓangare na nuna murna da wani bikin aure da ake yi a kusa da wani zauren taron biki'', kamar yadda wata sanarwa da Amnensty ta wallafa a shafinta na Facebook ta bayyana.

   Ƴan'uwa da dangin yarinyar sun ce marigayiyar na zaune ne tare iyalanta a rukunin gidajen ma'aikatan asibitin koyarwa na Jami'ar Maiduguri lokacin da lamarin ya faru.

   Amnesty International ta yi kiran gudanar da cikakken bincike ba tare da son rai ba domin tabbatar da adalci da dangin yarinyar.

8. 5 Aprilu 2026Bidiyon wasu jiragen yaƙin Amurka da aka lalata a Iran

   Kafofin yaɗa labaran Iran sun wallafa wasu hotuna da bidiyo na tarkacen wasu jiragen da aka lalata a lokacin aikin neman matuƙin jirgin yaƙin Amurka na F-15 a Iran.

   A cewar kafofin yaɗa labaran Amurka, a lokacin aikin ceton wasu jiragen jigilar mayaƙa biyu da ya kamata ya ɗauki kwamandoji da matuƙin jirgin zuwa wuri mai aminci sun fuskanci matsala.

   Jaridar New Yorks Times ta ce kan haka ne ''sojojin Amurka suka lalata jiragen biyu domin kada su faɗa hannun dakarun Iran.''

   To amma a cewar sansanin sojin sama na Khatam Al-Anbia na Iran ya ce dakarun ƙasar sun ''harbi jiragen maƙiya a kudancin Isfahan, ciki har da masu saukar ungulu biyu samfurin Black Hawk da kuma jirgin jigilar dakaru na C-130.

9. 5 Aprilu 2026Matuƙin jirgin da muka ceto ya ji 'munanan raunuka' - Trump

   

   Asalin hoton, EPA

   Shugaban Amurka, Donald Trump ya wallafa wasu bayanai a shafinsa na sada zumunta game da aikin ceto ɗaya matuƙin jirgin yaƙin ƙasar da Iran ta harba.

   Mista Trump ya ce "mun samu nasarar kuɓutar da mutumin, wanda ya samu munanan raunuka, amma kuma ya nuna jarumta, mun same shi a atsakiyar tsaunukan Iran. Su ma sojojin Iran masu yawan gaske na cikin nemansa domin kama shi, kuma saura ƙiris burinsu ya cika''.

   Soja ne mai muƙamin Kalar da Trump ya bayyana da ''wanda ake matuƙar martabawa''.

   "Neman jami'in, aiki ne ne mai cike da fargaba saboda hatsarinsa ga 'mutumin da kuma akayan aiki'.

   Mun yi aikin neman ne bayan nasarar gano jami'in farko wanda shi ne aihinin matuƙin jirgin, bayan kwashe sa'o'i bakwai.

   "Abin burgewa kowa ya nuna jarumta da ƙwarewa, zan gabatar da taron manema labarai tare da sojoji a ofishina ranar Litinin'', in ji shugaban na Amurka.

10. 5 Aprilu 2026Jami'an tsaro sun ƙaddamar da farautar mutanen da aka sace a Zamfara

    

    Asalin hoton, Police

    Hadin gwiwar jami'an tsaron Najeriya sun ƙaddamar da farautar wasu mutane da ƴanbindiga suka sace a garin Kurfa da ke yankin ƙaramar hukumar Bukkuyum a jihar Zamfara.

    A ranar Juma'a ne ɗan majalisar wakilai na tarayya da ke wakiltar yankin ya shaida wa BBC cewa wasu mahara sun shigar garin Kurfa tare da sace fiye da mutum 150.

    Cikin wata sanarwa da kakakin rundunar ƴansandan jihar, DSP Yazid Abubakar ya ce maharan sun je ƙauyen ne a kan babura inda suka riƙa harbin kan mai tsautsayi, lamarin da ya haifar da firgici tsakanin al'ummar garin.

    Sanarwa ta ce haɗin gwiwar jami'an tsaro da suka haɗa da ƴansanda da sojoji da sauran jami'an tsaro na ci gaba da farautar maharan.

    Kakakin ƴansandan ya ci gaba da cewa tawagar jami'an tsaron ta gano wasu mutanen da suka samu kuɓuta daga maharan, waɗanda yanzu haka ke karɓar magani asibiti.

    DSP Yazid ya ce kawo yanzu ba su san haƙiƙanin adadin mutane da ƴanbindigar suka sace ba, yayin da suke ƙoƙarin maido da zaman lafiya a yankin.

    

    Asalin hoton, police

11. 5 Aprilu 2026Sojojin Isra'ila sun ce sun kai harin bama-bamai kan cibiyoyin Hezbollah a Beirut

    

    Asalin hoton, Reuters

    Sojojin isra'ila sun ce sun ƙaddamar da sabbin hare-hare kan cibiyoyin Hezbollah a birnin Beirut bayan gargaɗin da suka yi wa mazauna kudancin babban birnin Lebanon ɗin cewa su tashi cikin gaggawa da safiyar nan.

    A nata ɓangare Hezbolla, wadda ke samun goyon bayan Iran ta ce ta kai hare-haren makamai masu linzami zuwa kudancin Isra'ila, kodayake IDf ta ce ta kakkaɓo su, a cewar kafofin sda zumuntar Isra'ila.

    Musayar wutar na zuwa ne sa'o'i bayan Hezbollah ta ce ta kai harin makamai mai linzami kan jirgin ruwan yaƙin Isra'ila a gaɓar tekun Lebanon cikin dare ta hanyar m

    A cewar kafofin yaɗa labaran Isral'ila, rundunar IDF ta ce ba ta san da labarin harin ba.

12. 5 Aprilu 2026Iran ta ce ta kakkaɓo jirgin Amurka maras matuƙi lokacin neman sojin ƙasar

    Kafofin yaɗa labaran Iran sun bayar da rahoton cewa dakarun juyin juya halin ƙasar sun kakkaɓo wani jirgin Amurka maras matuƙi a lokacin da yake aikin neman sojan saman Amurkan nan da Iran ta harbo jirgin da yake ciki.

    Jirgin marar matuƙi ya faɗo ne a lardin Isfahan da ke kudancin ƙasar, kamar yadda kamfanin dillancin labarai na Fars ya ambato ofishin yaɗa labaran rundunar ta IRGC na cewa.

    Kawo yanzu Amurka ba ta tabbatar da rahotonnin ba.

13. 5 Aprilu 2026Iran na ci gaba da zafafa hare-hare a faɗin yankin Gulf

    

    Asalin hoton, Getty Images

    Iran ta ci gaba da ƙaddamar da hare-hare kan muhimmancin abubuwan more rayuwa a faɗin yankin Gulf a matsayin martani kan abin da ta kira hare-haren Amurka da Isra'ila kan wata cibiyar masana'antun ƙasa.

    A birnin Abu Dhabi na Haɗaɗɗiyar Daular Larabawa, jami'ai sun ce ƙoƙarin kashe gobarar da ta tashi a manyan kamfanonin man fetur, wadda ta tashi sakamakon ɓaraguzan makaman linzami da ƙasar ta kakkaɓo.

    A Kuwait ma jirage marasa matuƙa na Iran sun kai hari tare da lalata cibiyoyin samar da lantarkin ƙasar biyu da cibiyar tace ruwa, lamarin da ya jefa mazauna yankin cikin duhu.

    Haka a Bahrain, kamfanin samar da makamashin ƙasar ya ce harin Iran ya haifar da tashin gobara a ɗaya daga cikin rumbunan ajiyar mai, kodayake daga baya an kashe ta.

    Ko a ranar Asabar ma, wani hari kan cibiyar makamashin man fetur a kudu maso yammacin Iran ya kashe mutum biyar.

14. 5 Aprilu 2026Za mu yi taronmu na ADC ko da INEC ko babu - Atiku

    Jagoran adawar Najeriya, Atiku Abubakar ya ce sabuwar haɗakarsu ta ADC za ta yi tarukanta ko da sahalewar INEC ko babu.

    Cikin hirarsa da BBC, Atiku ya ce abin da doka ta ce shi en su shaida wa INEC aniyarsu ta yi taro.

15. 5 Aprilu 2026Fafaroma Leo na bikin Easter karon farko a matsayin jagoran Katolika

    

    Asalin hoton, Getty Images

    Fafroma Leo na bikin ranar Easter ta farko a matsayinsa na jagoran Cocin Katolika a dandalin St Peters

    Dubban masu ibada ne suka taru a dandalin - wanda aka ƙawata da fulawoyin da aka ƙiyasta za su kai 65,000.

    Bayan taron ibadar, fafaroman zai gabatar da addu'o'i na musamman da ake yi wa laƙabi da ''Urbi et Orbi'' ga birnin Roma da ma duniya baki ɗaya.

    A baya-bayan nan Fafaroma Leo ya yi magana game da fatansa na Shugaba Trump ya duba yiwuwar kawo ƙarshen yaƙin Iran.

    

    Asalin hoton, Getty Images

16. 5 Aprilu 2026Hare-haren Isra'ila sun kashe mutum biyar a Iran

    

    Asalin hoton, Getty Images

    Rahotanni daga Iran na cewa hare-haren sama da Israel ta kai kan wata babbar cibiyar sarrafa sinadarai sun kashe aƙalla mutum biyar.

    Sojojin Isra’ila sun ce sun kai harin ne kan cibiyar Mahshahr saboda ana amfani da ita wajen ƙera muhimman sassan makamai masu linzami.

    Tun da farko a jiya Asabar, an kashe wani jami’in tsaro a wani harin na daban da aka kai kusa da tashar nukiliya ta Bushehr.

    Kamfanin Rosatom na Rasha da ke kula da wurin ya ce ya kwashe kusan ma’aikata 200 daga yankin.

17. 5 Aprilu 2026Iran ta yi watsi da wa'adin kwana biyu da Trump ya sanya mata

    

    Asalin hoton, Getty Images

    Iran ta yi watsi da wa’adin da Shugaban Amurka Donald Trump ya gindaya mata, na cimma yarjejeniya ko kuma buɗe mashigin Hormuz ba tare da ɓata wani lokaci ba.

    Tun da fari, Mista Trump ɗin ya yi barazanar saukar wa ƙasar abin da ya kira “ruwan wuta'' idan har ba ta amince da yarjejeniya cikin kwanaki biyu ba.

    A wata sanarwa, shugaban rundunar ƙoli ta sojin Iran, Janar Ali Abdollahi, ya bayyana Trump ɗin a matsayin “firgici da wauta''.

    Ya kuma gargaɗin cewa abun da Trump ɗin ke fatan saukar wa Iran a ƙarshe zai ƙare ne a kan Amurka''

    Ya ƙara da cewa idan Amurka ta kai hari kan muhimman kayayyakin more rayuwa na Iran, to Tehran za ta kai hari kan wuraren da sojojin Amurka da Isra’ila ke amfani da su “ba tare da wani shamaki ba''

18. 5 Aprilu 2026Amurka ta ceto matuƙin jirginta da ya ɓace a Iran

    

    Asalin hoton, ...

    Shugaban Amurka Donald Trump ya ce sojojin ƙasar sun ceto matuƙin jirgin yaƙin nan na ƙasar da ya ɓace a kudancin Iran, bayan an harbo jirginsa ƙirar F-15 a ranar Juma’a.

    A wani sako da ya wallafa a shafukan sada zumunta, Mista Trump ya ce sojojin sun gudanar da ɗaya daga cikin ayyukan ceto mafi jarumta a tarihin Amurka.

    BBC ta fahimci cewa an yi ƙazamin artabu tsakanin sojojin Amurka da na Iran yayin wannan aiki.

    Wasu hotunan bidiyo a shafukan sada zumunta sun nuna yadda ɗaruruwan mutane ke ta tuɗaɗa zuwa yankin mai yawan tsaunuka a kudu masu yammacin Iran don taimakawa wajen gano inda sojan yake.

19. 5 Aprilu 2026Assalamu alaikum

    Masu bin shafin BBC Hausa kai-tsaye barkanmu da hutun ƙarshen mako.

    Abdullahi Bello Diginza ke fatan sake kasancewa da ku domin kawo muku sabbin labarai.

    Ku biyo mu a shafukanmu na sada zumunta domin tafka muhawara kan labaran da muke wallafawa.