Yatsinzwe nanone – Musk, umuntu ukize kurusha abandi ku isi, ntarimo guhirwa n'imanza, ese azakomeza kuburana?

Elon Musk, umugabo ukize kurusha abantu bose ku isi, ibyo mu nkiko vuba aha ntibyamuhiriye.

Ku wa mbere yatsinzwe urubanza yarezemo kompanyi ya OpenAI n'uwo bafatanyije kuyishinga Sam Altman, byari urundi rubanza yongeye gutsindwa vuba aha.

Umwaka ushize yemeye kumvikana n'abahoze ari abakuru ba Twitter n'abakozi ibihumbi bakoreraga urwo rubuga, yaje guhindura akita X, nyuma y'imanza zamaze imyaka arwana no kugira ngo ntagire icyo abishyura.

Muri Werurwe(3) yatsinzwe urubanza yarezwemo n'abashoye imari muri Twitter, bavugaga ko bashutswe n'amatangazo yakoraga ubwo yaguraga urwo rubuga.

Muri uko kwezi nyine, umucamanza yanze ikirego cye yaregaga abamamaza bafashe icyemezo cyo kureka gukorana n'urwo rubuga.

Muri Gicurasi(5), undi mucamanza yahagaritse ibikorwa bimwe byari bigiye gukorwa na DOGE, ikigo cya leta cyari kigamije kugabanya amafaranga leta ikoresha Musk yafashije gutangiza akanakiyobora umwaka ushize. Umucamanza yavuze ko ibikorwa bimwe by'iki kigo byari "bibujijwe n'itegeko nshinga ndetse birimo ivangura".

Ubu yatsinze urubanza yarezemo OpenAI asaba indishyi za miliyari z'amadorari.

Shubha Ghosh, umunyamategeko n'umwalimu wayo muri Syracuse University yagize ati: "Nta muntu utatsindwa".

Yongeraho ati: "Mu buryo bwnshi, ni undi mushabitsi nk'abandi ushaka uburenganzira bwe."

Iruhande rw'ingorane imbere y'abacamanza, Musk ubutunzi bwo bukomeza kumuhira, ubu byitezwe ko vuba aha azaba umuntu wa mbere ku isi ugeze ku mutungu wa tiriyari y'amadorari bivuye kuri Space X, indi kompanyi ye izajya ku isoko ry'imigabane vuba aha.

Ingano iteye ubwoba y'umutungo we ituma bisa n'aho gutsindwa imanza, zinahenze, bishobora kutamubuza kuregera inkiko nanone mu gihe kiri imbere.

Dorothy Lund, umunyamategeko akaba n'umwalimu wayo muri Columbia Law School agira ati: "Simbona hari ikimuhagarika. Bisa n'aho nta muntu urashobora kumwumvisha ingaruka nyazo cyangwa ibikorwa bye"

Urugero, ihazabu ya miliyoni 1.5 y'amadorari aheruka gucibwa kubera kunanirwa kwerekana uko Twitter yagiye ibona umutungo, ni akantu gato ku muntu nka Musk.

Mu Ukuboza(12) ubwo umucamanza yateshaga agaciro icyemezo cyo kwishyurwa miliyari nyinshi z'amadorari kompanyi ye ya Tesla, Musk yahise yimurira kompanyi yose muri Texas ndetse ahabone ishoramari rinini kurushaho.

Lund ati: "Akora icyo ashatse, wenda rimwe na rimwe agakubitwa agashyi ku kaboko, nonese kuki se yahinduka?"

Ku wa mbere, Musk yanenze icyemezo cy'urukiko ko yatsinzwe na OpenAI, yandika kuri X ko icyo cyemezo gitanze "uburenganzira bwo gusahura imari y'ubugiraneza mu gihe wabokora imyaka bucece".

Yanatutse umucamanza wari ukuriye iburanisha amwita "impirimbanyi mbi" kandi avuga ko azajuririra iki cyemezo.

'Ntacyo atinya'

Ghosh avuga ko Musk atandukanye cyane n'abandi bashoramari.

Kuba yarafashe icyemezo cyo gushyira SpaceX ku isoko ry'imigabane muri iki gihe ari mu rubanza rukomeye na Altman yahoze abereye icyitegererezo. Ibyo byonyine bituma biboneka ko ari umushoramari utandukanye na benshi.

Ubusanzwe, iyo abashoramari bafite kompanyi bashaka gushyira ku masoko y'imigabane, binjira mu gihe gikunze kwitwa "igihe cyo guceceka".

Ni igihe, kigenwa na rwa rwego rwa SEC, aho abakuriye izo kompanyi basabwa kutagira amatangazo bakora. Bityo bavuga bicye cyane muri icyo gihe.

Dorothy Lund avuga ko nta bantu benshi bagereranywa na Musk mu bushobozi bwe, n'ubushake bwe buboneka bwo gukomeza kuburana.

Ati: "Ntabwo atinya icyo rubanda itekereza, ntabwo atinya impinduka zikomeye." Kuri Dorothy ibyo ni ibintu "by'ingenzi mu ishoramari" ariko ko icyumba cy'urukiko gitandukanye n'icyumba cy'inama ya kompanyi.