Ibiganiro by'amahoro by'Amerika na Iran byananiwe kugera ku masezerano mu gihe Washington yatanze 'igishoboka cya nyuma'

Visi Perezida w'Amerika JD Vance avuga ko igihugu cye na Irani byananiwe kugera ku masezerano nyuma y'ibiganiro by'amahoro byari byitezweho byinshi byabereye mu murwa mukuru Islamabad wa Pakistan.

Mbere yo kurira indege ya Air Force 2 ngo asubire muri Amerika, Vance yavugiye mu kiganiro n'abanyamakuru ko Irani yahisemo "kutemera ingingo zacu", yongeraho ko Amerika icyeneye kubona "ukwiyemeza kw'ibanze" ku ruhande rwa Irani kujyanye no kudakora intwaro kirimbuzi za nikleyeri.

Minisiteri y'ububanyi n'amahanga ya Irani yavuze ko ibyo biganiro byari "byimbitse", ndetse yasabye Amerika kwirinda "gusaba ibintu birenze urugero kandi binyuranyije n'amategeko".

Ibyo biganiro amaso ku maso by'impande zombi byanditse amateka.

Mu kiganiro n'abanyamakuru, Vance yagize ati: "Twagiranye ibiganiro byinshi bifatika n'Abanya-Irani, iyo ni yo nkuru nziza. Inkuru mbi ni uko tutageze ku masezerano kandi ntekereza ko iyo ari inkuru mbi kuri Irani cyane kurusha uko ari inkuru mbi kuri Leta Zunze Ubumwe z'Amerika."

"Icyabaye gusa ni uko tutashoboye kugera aho Abanya-Irani bari kugira ubushake bwo kwemera ingingo zacu."

Mu kuvuga ku muvuno w'Amerika muri ibyo biganiro, Vance yabwiye abanyamakuru ati: "Ntekereza ko twari abantu boroshya cyane, twari abantu bemeraga cyane [iby'urundi ruhande]."

Yanavuze ko muri ibyo biganiro yavuganye na Perezida w'Amerika Donald Trump inshuro nyinshi. Ati: "Sinzi inshuro twavuganye na we, nk'esheshatu, izirenga 10 mu masaha 21 ashize."

"Tuvuye hano n'icyifuzo cyoroshye cyane, uburyo bwo gusobanukirwa ko ibi ari cyo kintu cyacu cya nyuma kandi cyiza cyane dushobora gutanga [kwemera]. Tuzareba niba Abanya-Irani bacyemera."

Mbere, umuvugizi wa minisiteri y'ububanyi n'amahanga ya Irani, Esmail Baghaei, yasohoye itangazo avuga ku biganiro by'amahoro n'Amerika.

Mu butumwa yatangaje ku mbuga nkoranyambaga, Baqaei yavuze ko byari ibiganiro "byimbitse" ariko avuga ko kugera ku ntego kwabyo "guterwa no guha ibintu uburemere bwabyo no kuvugisha ukuri kw'urundi ruhande".

Baghaei yanasabye Amerika kwirinda "gusaba ibintu birenze urugero kandi binyuranyije n'amategeko" no kwemera "uburenganzira n'inyungu byemewe n'amategeko" bya Irani.

Mu ngingo zaganiriweho, avuga ko harimo umuhora wa Hormuz, gahunda ya nikleyeri ya Irani, no "kurangiza burundu intambara muri Irani".

Nyuma y'ibyo biganiro, Minisitiri w'ububanyi n'amahanga wa Pakistan yasohoye itangazo ku rubuga nkoranyambaga rwa X avuga ko ari ngombwa ko impande zombi zikomeza kubahiriza ibyo ziyemeje mu masezerano y'agahenge k'ibyumweru bibiri, "hagamijwe kugera ku mahoro arambye n'uburumbuke mu karere kose no hanze yako".

Ubwo butumwa busoza buvuga ko Pakistan izakomeza inshingano yayo yo gutuma habaho ibiganiro hagati y'impande zombi "mu minsi iri imbere".

Umunyamakuru wa BBC Carrie Davies uri i Islamabad avuga ko hari hari umwuka wo gutenguhwa ku kivuye muri ibi biganiro.

Mbere yaho, Perezida Trump yavuze ko "nta cyo bihindura" kuri we niba amasezerano agerwaho kandi ko "hatitawe ku kiba, turatsinda".

Mu gihe Israel ikomeje kurasa ku mutwe witwaje intwaro wa Hezbollah wo muri Libani ufashwa na Irani, Minisitiri w'intebe wa Israel Benjamin Netanyahu avuga ko ashaka amasezerano y'amahoro na Libani "azaramba" ndetse avuga ko igikorwa cya Israel kuri Irani "ntikirarangira".

Intambara y'Amerika-Israel na Irani yatangiye ku itariki ya 28 Gashyantare (2) uyu mwaka.