Magawa: Ya mbeba yabaye icyamamare mu gutegura ibisasu yubakiwe ishusho mu gihugu

Imbeba yamamaye mu gutegura ibisasu ikanahabwa umudali wa zahabu kubera ubwo butwari, yongeye gushimwa ubwo ku nshuro ya mbere imbeba itegura ibisasu yubakiwe ishusho y'icyubahiro.

Magawa, yabayeho imyaka umunani, yabashije kwinukiriza maze yerekana ahantu hari mine zirenga 100 n'ibindi biturika muri Cambodia mu myaka itanu yamaze ikora ako kazi kuva mu 2016.

Ishusho nini yacuzwe mu ibuye ryo muri ako gace yakozwe n'abanyabugeni yamuritswe mu mujyi wa Siem Reap muri Cambodia ku wa gatanu tariki 04 Mata(4), ku munsi mpuzamahanga wahariwe kuzirikana ububi bwa mine.

Mine zitegwa mu butaka ziracyari ikibazo muri Cambodia, naho ku isi ONU ivuga ko abantu barenga miliyoni bagikorera kandi bakaba ku butaka butezwemo za mine zitaraturika.

Magawa, imbeba yavukiye muri Kaminuza y'ubuhinzi ya Sokoine yo mu mujyi wa Morogoro muri Tanzania yatojwe n'umushinga w'ababiligi wa Apopo mbere yo kujyanwa muri Cambodia mu 2016 gufasha gutahura ahari ibisasu ikoresheje kwinukiriza.

PA Media

Ikoresheje ubushobozi bukomeye yari ifite bwo kugaragaza ahari ibiturika, Magawa yahita iburira abashinzwe kubitegura bakabihakura neza.

Mu gihe cyayo, iyi figi yabashije gukiza mine n'ibindi biturika ahantu hari ku buso bwa metero kare zirenga 141,000 – hangana n'ibibuga 20 by'umupira w'amaguru.

Mu minota 20 gusa yabashaga gusaka ibisasu ahantu hangana n'ikibuga cya Tennis.

Mu 2020, Magawa yahawe umudali wa zahabu uzwi nka PDSA kubera "kwitangira umurimo urokora abantu".

Iyo mbeba ni yo ya mbere mu nyamaswa nka yo yahawe uwo mudari mu mateka y'imyaka 77 y'ikigo Apopo gifasha mu gutoza inyamaswa.

Nyuma yo kujya mu kiruhuko cy'izabukuru, Magawa yaje gupfa mu 2022.

Michael Raine, ushinzwe ibikorwa muri Apopo, ku wa gatanu yavzue ko iyi shusho yubakiwe Magawa "iributsa umuryango mpuzamahanga ko hakiri akazi ko gukora hano".

Cambodia ubu ifite intego yo kuba itakirangwamo za mine kugeza mu 2030, nk'uko Michael yabivuze.

Icyo kigo gitoza imbeba ako kazi, zizwi kandi nka HeroRATS, kuva mu myaka ya 1990.

Kubera ubuto bwazo, imbeba ntabwo ziba zishobora gukora cyangwa gukandagira ku gisasu ngo giturika, bigatuma iyo zitojwe ziba uburyo bwiza bwo kubitahura kurusha abantu.

Imbeba zibasha no gutahura indwara y'igituntu, vuba cyane kurusha igisubizo kiva muri laboratoire, nk'uko Apopo ibivuga.

Muri Tanzania, zatojwe no kurwanya ibikorwa byo gutwara ibice by'inyamaswa bitemewe.

Indi mbeba ya Apopo yitwa Ronin, umwaka ushize yaciye umuhigo w'isi mu gihe gito ubwo yari imaze gutahura ibisasu 109 n'ibindi bintu biturika kuva mu 2021.

Ako kazi gatangaje Ronin yakoreye mu majyaruguru ya Cambodia kakuyeho umuhigo wari ufitwe na Magawa.