Dyn 43 oed wedi marw mewn gwrthdrawiad yn Sir Caerffili

Mae dyn 43 oed wedi marw yn dilyn gwrthdrawiad yn Sir Caerffili nos Sadwrn, yn ôl yr heddlu.

Cafodd Heddlu Gwent eu galw am 18:15 i Ffordd Hafodyrynys, sydd rhwng pentref Crymlyn a thref Pont-y-pŵl, i adroddiad am wrthdrawiad oedd yn cynnwys Audi A5 a Volkswagen ID5 - y ddau'n ddu.

Cafodd y dyn ei ddatgan yn farw yn y fan a'r lle gan barafeddygon. Dywedodd yr heddlu fod ei deulu wedi cael gwybod ac yn derbyn cefnogaeth.

Mae'r heddlu yn awyddus i glywed gan unrhyw un a welodd y ddau gerbyd yn teithio yn yr ardal cyn y gwrthdrawiad, neu sydd â deunydd fideo perthnasol.