Sinema Galeri'n gwahardd pobl ifanc heb oedolyn wedi cwynion ymddygiad

Arwydd Galeri ar flaen mynedfa'r adeilad

Mae newidiadau dros dro i bolisi mynediad Galeri wedi cwynion bod rhai pobl ifanc yn camymddwyn yn ystod dangosiadau hwyr y sinema

Mae sinema yng Ngwynedd wedi gwahardd pobl dan 16 oed rhag gwylio ffilmiau sy'n cael eu dangos wedi 19:00 oni bai eu bod "yng nghwmni oedolyn cyfrifol".

Cyhoeddodd sinema canolfan Galeri yng Nghaernarfon eu bod yn cyflwyno "newidiadau dros dro" ar ôl "derbyn mwy a mwy o gwynion am ymddygiad gwrthgymdeithasol gan rai pobl ifanc yn ein sgriniau sinema".

Roedd y cwynion yn cynnwys "difrodi seddi, gweiddi ar gwsmeriaid, ffilmio yn y sgriniau a bod yn fygythiol".

Mewn datganiad ar y cyfryngau cymdeithasol, dywedodd Galeri bod sefyllfa'n "peri pryder mawr i ni fel canolfan, gan ein bod wrth ein bodd yn gweld pobl ifanc yn dod drwy'n drysau ac yn teimlo'n rhan o fwrlwm Galeri".

Dywedodd datganiad y ganolfan eu bod "gyda chalon drom, yn cyflwyno rhai newidiadau dros dro i'n polisïau cynulleidfaoedd er mwyn sicrhau profiad pleserus i bawb".

Dan y trefniant newydd, os nad oes oedolyn cyfrifol yn bresennol, neu os nad oes modd i berson ifanc brofi eu bod dros 16 oed, "ni fydd modd cael mynediad i'r sinema".

Ychwanegodd y datganiad: "Rydym yn ymddiheuro'n fawr am hyn, ac yn gwerthfawrogi eich dealltwriaeth.

"Hoffem bwysleisio mai trefniant dros dro yw hwn, a byddwn yn monitro'r sefyllfa'n agos wrth i ni weithio tuag at ddatrysiad hirdymor."

'Waeth ers y pandemig'

Dywed yr adolygydd ffilm Gary Slaymaker ei fod yn mynd i ddangosiadau bore i osgoi ymddygiad gwrthgymeithasol.

Mae'n teimlo bod y fath ymddygiad wedi gwaethygu ers y pandemig.

"Pan roedd y sinemâu ar gau, troi at Netflix wnaeth llawer ohonon ni ble gallech chi fynd ar eich ffôn a gwneud sylwadau am ffilm tra'n gwylio.

"Rwy'n euog fy hun o wylio'r teledu a defnyddio fy ffôn ar yr un pryd ond mae yna wahaniaeth rhwng gwylio ffilm gartre' yng nghwmni teulu [a mynd i'r sinema]."

Mae wedi sylwi bod mwy o bobl yn defnyddio'u ffonau yn y sinema, gan awgrymu bod hynny yn sgil "newidiadau yn rhychwant sylw pobl".

Y rhai sy'n ymddwyn waethaf mewn sinema, yn ei brofiad yntau, yw pobl "ifanc iawn neu hen iawn".

Merch yn ei harddegau yn defnyddio ffôn symudol mewn sinema, gyda dwy ferch arall yn eistedd wrth ei hochrGetty

Ychwanegodd Gary Slaymaker ei fod wedi gofyn wrth bobl i stopio siarad yn ystod ffilm yn y gorffennol, yn hytrach na dweud wrth aelodau staff.

Mae'n dweud mai myfyrwyr yn aml mewn swyddi rhan amser yw'r staff hynny a "ddylie nhw ddim orfod wynebu'r nonsens yma".

Ond mae'n cydnabod bod yna risgiau wrth herio unigolion swnllyd yn uniongyrchol oherwydd "chi byth yn gwybod pwy ry'ch chi'n eu hwynebu".

Awgrymodd y gallai cloi ffonau symudol mewn bocs yn ystod ffilm fod yn help i wella profiad pawb yno

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i cymrufyw@bbc.co.uk neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.