A dyna ni, diolch am ddilyn y llif byw.

Wedi etholiad y Senedd ym mis Mai - pan ddaeth Plaid Cymru i rym a chynyddodd nifer yr Aelodau yn y Senedd o 60 i 96 - mae'r seremoni wedi nodi cyfnod newydd y Senedd yn ffurfiol.

Dyma ambell i lun o'r dydd, hwyl am y tro.

Ffynhonnell y llun, Comisiwn y Senedd

Ffynhonnell y llun, Comisiwn y Senedd

Ffynhonnell y llun, Comisiwn y Senedd

Ffynhonnell y llun, Comisiwn y Senedd

Ffynhonnell y llun, Comisiwn y Senedd

Cafodd God Save the King ac Hen Wlad Fy Nhadau eu chwarae gan fand pres wrth i'r Brenin a'r Frenhines gamu i fewn i'r car cyn gadael Bae Caerdydd.

Tri oedd wedi teithio lawr i Fae Caerdydd ar gyfer y seremoni yw Sion, Elen a Swyn.

Dywedodd Sion ei bod hi'n "grêt cael presenoldeb y Ffermwyr Ifanc mewn digwyddiad mor hanesyddol."

Ffynhonnell y llun, bbc

Mae Côr CFfI Cymru yn perfformio ar risiau’r Senedd wrth i'r Brenin a’r Frenhines adael.

Maen nhw'n cyfarch pobl ar waelod y grisiau wrth i'r côr ganu fersiwn o gân Bwncath, Fel Hyn ’Da Ni Fod.

Mae'r Brenin a'r Frenhines nawr yn cwrdd â'r gwesteion yn y Senedd, yn eu plith Gareth Jones, a ddangosodd ei lun o Aberfan i'r Brenin.

Cyn i’r Brenin a’r Frenhines adael y Senedd, mae'r Frenhines yn derbyn tusw o flodau gan Noah Jones.

Yn gwmni i Noah mae ei frawd Charlie a’i rieni, Gareth Jones, a Len Moss, aelod o dim achub Aberfan.

Ffynhonnell y llun, Getty Images

Cafodd y Brenin a wgeddill Aelodau'r Senedd wylio perfformiad o'r gân 'O Gymru' gan Gôr Plastaf ar lawr y Siambr fel rhan o'r seremoni.

Mae'n gohebwyr y tu allan i'r Senedd yn dweud bod yr heddlu wedi ceisio symud rhai o'r protestwyr ger yr adeilad.

Roedd yn ymddangos bod un yn gwrthod symud, a bod yr heddlu yna wedi ei orfodi o'r safle mewn gefynnau.

Dywedodd Heddlu'r De eu bod wedi cyflwyno gorchymyn gwasgaru i symud y protestwyr, a bod un person wedi gwrthod cydymffurfio.

Roedd Lucie a Mathew yn digwydd pasio heddiw pan welson nhw'r dorf yn casglu o flaen y Senedd.

Dywedodd Lucie: “Nes i weld pawb yn cymeradwyo felly des i draw, dwi ddim yn cefnogi’r Frenhinaeth ond dal yn meddwl dyle ni ddangos parch at y Brenin.”

Roedd rhai o ddisgyblion Ysgol Llwynypia yn hapus ar ôl iddyn nhw gael gwahoddiad i gyfarch y Brenin a'r Frenhines ar risiau'r Senedd heddiw.

Ar ôl gadael y Siambr, mae'r Brenin a'r Frenhines yn cwrdd ag aelodau Senedd Ieuenctid Cymru:

• Ned Dong, Aelod dros Orllewin Caerdydd
• Awel Lewis, Aelod ar ran Urdd Gobaith Cymru
• Ava Martin-Thomas, Aelod dros Bontypridd
• Hasson Yusuf, Aelod ar ran Race Council Cymru
• Zac Jones Prince, Aelod dros Wrecsam.

Mae'r telynorion Dafydd Huw a Rhianwen Pugh yn perfformio.

Yn ystod y rhan hon o'r seremoni y bwriadwyd i Fardd Cenedlaethol Cymru siarad, ond fel rydym wedi adrodd, ni wnaeth hynny ddigwydd.

Yn unol â'r cynllun, mae 'O Gymru' yn cael ei berfformio gan Ferched Plastaf – côr o dair ysgol cyfrwng Cymraeg yng Nghaerdydd.

"Ble bynnag y gallwn weithio gyda'n gilydd, dylem wneud hynny," meddai'r Prif Weinidog.

"Nid yw'r Senedd yn perthyn i un llywodraeth nac i unrhyw blaid wleidyddol unigol. Mae'n perthyn i bobl Cymru. Mae yma i'w cynrychioli ac i ddeddfu ar ran y bobl," meddai.

"Mae gan bob un ohonom ran i'w chwarae i sicrhau nad yw'r senedd hon yn siambr adleisio," meddai.

Ychwanega fod yr heriau sy'n wynebu Cymru yn sylweddol, a dywed fod y cyhoedd yn disgwyl i'r Senedd "weithio'n galed".

Byddant yn barnu Aelodau'r Senedd yn ôl eu gallu i wella eu bywydau bob dydd, meddai.

Ffynhonnell y llun, Senedd Cymru

Mae'n anrhydedd annerch agoriad seremonïol y seithfed Senedd, meddai'r Prif Weinidog Rhun ap Iorwerth.

"Mae heddiw yn ddiwrnod o ddathlu ac adnewyddu."

Dywed ei fod yn nodi "pennod newydd yn hanes Cymru a'i senedd."

Dywed fod y Senedd bresennol yn wahanol i unrhyw un a fu o'i blaen.

Mae'n ei disgrifio fel "senedd ifanc sydd wedi cyrraedd aeddfedrwydd".

"Mae'n cynrychioli eiliad arwyddocaol yn esblygiad parhaus democratiaeth Cymru."

Dywed fod y Senedd "yn adlewyrchu Cymru'r dyddiau hyn".

Ychwanegodd y Brenin ei fod "bob amser wedi teimlo’n hynod freintiedig ac yn falch o fod wedi cael cysylltiad mor arbennig â Chymru, â’i hiaith, ei diwylliant a’i thirwedd".

"Wrth i chi fwrw ymlaen â’ch tasg o lywodraethu, gwyddom y byddwch bob amser yn cadw’r cryfderau hynny a rennir mewn cof, ac yn tynnu ysbrydoliaeth ohonynt, wrth i chi weithio ar ran pobl y gornel hon o’r ddaear sy’n wirioneddol arbennig."

Ffynhonnell y llun, Senedd Cymru

Mae trychineb Aberfan yn amlwg yn ystod digwyddiadau heddiw, a hithau'n 60 mlynedd ers y digwyddiad, ac fe wnaeth y Brenin gyfeirio at hynny yn ei araith.

Mae un o blant Aberfan, Gareth Jones, wedi teithio i Gaerdydd heddiw gyda llun hanesyddol bwysig.

Yn y llun mae Gareth yn blentyn yn cwrdd â thad y Brenin Charles, Y Tywysog Phillip, wnaeth deithio i Aberfan yn fuan wedi'r drychineb.

Mae Gareth wedi dod â'r llun er mwyn dangos i'r Brenin heddiw.

Dywedodd y Brenin fod llawer o wynebau newydd yn y Senedd, yn ogystal ag wynebau cyfarwydd y gallai rhywun ddychmygu eu bod yn dweud "Yma o Hyd" – gan gyfeirio at gân Dafydd Iwan.

Ni all neb fod wedi methu â sylwi ar y newid yn lliwiau cefn gwlad yn ystod y cyfnod o wres eithafol, meddai.

Dywed ei fod yn sicr bod pawb yn rhannu'r pryder dros yr amgylchedd.

Mae'n canmol yr "ymdeimlad o berthyn" sydd gan bobl Cymru, ac yn dweud y bydd yn ymweld ag Aberfan yr wythnos nesaf. Mae'r Brenin yn dweud ei fod wedi'i gyffwrdd yn fawr bod pobl o'r gymuned honno yma heddiw.

Dyma oedd i'w glywed wrth i'r Brenin a'r Frenhines gamu allan o'u car heddiw ym Mae Caerdydd.

Roedd y gymeradwyaeth gan y mwyafrif o'r dorf yn cael ei foddi gan rai pobl yn protestio yn erbyn y Frenhiniaeth.

Dywedodd Llywydd y Senedd, Huw Irranca-Davies AS:

"Heddiw rydym yn dod ynghyd i nodi dechrau'r Seithfed Senedd, a phennod newydd yn hanes democratiaeth Cymru.

"Mae'n bennod arwyddocaol.

"Am y tro cyntaf, mae'r Siambr hon yn gartref i 96 o aelodau, a etholwyd drwy system newydd sydd wedi'i chynllunio i adlewyrchu dewisiadau pobl Cymru yn fwy manwl.

"Mae'n anrhydedd mawr i ni fod Eu Mawrhydïau y Brenin a'r Frenhines yma i rannu'r achlysur hwn â ni."

Ychwanegodd: "Ac efallai bod ychydig o eiriau Cymraeg syml yn mynegi’r hyn y dylai fod, bob amser, wrth wraidd ein gwaith:

“Gorau Cymru, Cymry.”

"Mae’r Senedd hon yn perthyn iddynt hwy.

"Mae’n perthyn i’r cymunedau rydym yn eu cynrychioli, i’r rhai sydd wedi rhoi eu hymddiriedaeth ynom, ac i’r bobl ifanc hynny a fydd yn etifeddu’r hyn rydym yn ei adeiladu."

Ffynhonnell y llun, Senedd Cymru

Roedd digonedd o weiddi a chymeradwyaeth gan y dorf wrth i'r Brenin gamu allan o'r car ac at risiau'r Senedd, gyda phlant hefyd yn chwifio baneri y tu allan.

Ond roedd pobl hefyd i'w clywed yn gweiddi "not my King" yn uchel wrth i'r Brenin a'r Frenhines gyfarch aelodau.

Yn y Siambr, mae'r Cludwr yn gosod y byrllysg yn ei le.

Mae'r Delynores Frenhinol, Mared Emyr Pugh-Evans yn perfformio.