တိုက်ရိုက်ထုတ်လွှင့်မှု, ရန်ကုန်က ဝမ်းရောဂါပျံ့ပွားမှုကို ထိုင်း စိုးရိမ်

တိုက်ရိုက် ထုတ်လွှင့်ချက်

1. လွန်ခဲ့သော တစ်နာရီ ကမြန်မာကနေတဆင့် ဒေသတွင်းကို သဘာဝဓာတ်ငွေ့ ပို့နိုင်ဖို့ ပူတင်စဉ်းစား

   မြန်မာပြည်တွင်းအပြင် မြန်မာကနေတဆင့် အိမ်နီးချင်းနိုင်ငံတွေကို သဘာဝဓာတ်ငွေ့ တင်ပို့ဖို့ စိတ်၀င်စားတဲ့အကြောင်း ရုရှားသမ္မတ ပူတင်က ပြောလာပါတယ်။

   နေပြည်တော်သမ္မတ ဦးမင်းအောင်လှိုင်နဲ့အတူ မော်စကိုမြို့မှာ မနေ့က ပြုလုပ်တဲ့သတင်းထောက်တွေနဲ့ တွေ့ဆုံပွဲမှာ သမ္မတပူတင်က အခုလိုပြောလိုက်တာဖြစ်ပါတယ်။

   ‘‘မြန်မာကနေတဆင့် အိမ်နီးချင်းနိုင်ငံတွေကို သဘာ၀ဓာတ်ငွေ့ပို့နိုင်တဲ့အလားအလာတွေ မြန်မာမှာ ရှိနေပါတယ်’’ လို့ သူက ပြောပါတယ်။

   လက်ရှိမှာ ရုရှားဟာရေနံနဲ့ သဘာ၀ဓာတ်ငွေ့တွေ တင်ပို့ရောင်းချမှုကနေ နိုင်ငံ့၀င်ငွေအများစုကို ရရှိနေပါတယ်။

   ရုရှားသဘာဝဓာတ်ငွေ့ကို မြန်မာကနေရှိထားပြီးသား ပိုက်လိုင်းတွေကနေတဆင့် တရုတ်နဲ့ ထိုင်းနိုင်ငံကို ပြန်လည်တင်ပို့နိုင်ရေး စိတ်၀င်စားတဲ့အကြောင်း ရုရှားဘက်ကို နေပြည်တော်က အစောပိုင်းကတည်း ပြောထားပါတယ်။

   အခုတော့ ရုရှားသမ္မတ ပူတင်က ရုရှားသဘာဝဓာတ်ငွေ့ကို မြန်မာကနေတဆင့် ဒေသတွင်းနိုင်ငံတွေကိုပါ ပို့ဖို့ စိတ်၀င်စားတဲ့အကြောင်း ပြောလာတာဖြစ်ပါတယ်။

   လက်ရှိမှာ ရုရှားဓာတ်ငွေ့ကို အာရှမှာ တရုတ်နဲ့ ဗီယက်နမ်တို့က ၀ယ်ယူနေပြီး အင်ဒိုနီးရှားကလည်း ၀ယ်ယူဖို့ စိတ်၀င်စားနေပါတယ်။

   သမ္မတ ပူတင်ကတော့ မြန်မာတောင်ပိုင်းမှာ တန်ချိန်များတဲ့သင်္ဘောကြီးတွေ ဆိုက်ကပ်နိုင်မယ့်ရေနက်ဆိပ်ကမ်းစီမံကိန်းကိစ္စလည်း ဆွေးနွေးနေတယ်လို့လည်း ပြောပါတယ်။

   ဘယ်စီမံကိန်းရယ်လို့ သူက မပြောသွားပေမဲ့ နေပြည်တော်ဟာ ဆယ်စုနှစ်တစ်ခုကျော်ကြာ ရှေ့မဆက်နိုင်ဘဲ တန့်နေတဲ့ ဒေါ်လာဘီလျံဆယ်ချီ ထား၀ယ်ရေနက်ဆိပ်ကမ်းစီမံကိန်းကို ရှေ့တိုး လုပ်နိုင်ဖို့ ရုရှားကို တိုက်တွန်း ဖိတ်ခေါ်နေတာဖြစ်ပါတယ်။

   နေပြည်တော်နဲ့ ရုရှားတို့ဟာ ထား၀ယ်ရေနက်ဆိပ်ကမ်းစီမံကိန်းထဲ ကျောက်မီးသွေးဓာတ်အားပေးစက်ရုံ တည်ဆောက်ရေးအတွက် နားလည်မှုစာချွန်လွှာ လက်မှတ်ထိုးထားပြီးဖြစ်ပါတယ်။

   နောက်ပြီး နေပြည်တော်ဟာ ရုရှားကို ရင်းနှီးမြှုပ်နှံမှု အာမခံပေးဖို့ စီမံကိန်းနယ်မြေတွေမှာ လုံခြုံရေးကို လုံခြုံရေးအာမခံပေးဖို့ ကြိုးပမ်းနေပါတယ်။

   စီမံကိန်းနယ်ပယ်တွေဟာ ပြည်သူ့ကာကွယ်ရေးတပ်တွေနဲ့ ဒေသကာကွယ်ရေးတပ်တွေလည်း ဖြန့်ကြက်လှုပ်ရှားတာဖြစ်ပါတယ်။

   နေပြည်တော်က ဒုတိယစစ်ခေါင်းဆောင် ဒုတိယဗိုလ်ချုပ်ကြီး ကျော်စွာလင်းကတော့ တနင်္သာရီတိုင်း၊ ရေဖြူမြို့နယ်၊ နဘုလယ်တိုက်နယ်ထဲက ထား၀ယ်ရေနက်ဆိပ်ကမ်း စီမံကိန်းအပါအ၀င် ဒေသတွင်းမှာ နှောက်ယှက် ဖျက်ဆီးသူတွေကို ပြင်းပြင်းထန်ထန် ခြေမှုန်းမယ်လို့ ဆိုပြီး ပြောပါတယ်။

   ဇွန်လတုန်းက သူ့ရဲ့အခုပြောဆိုချက်အပြီးမှာပဲ စီမံကိန်းနယ်မြေထဲကို စစ်တပ်က စစ်ကြောင်းထိုးလို့ အရပ်သားအချို့ သတ်ဖြတ်ခံရတဲ့ဖြစ်စဉ်ရှိခဲ့သလို ဒေသခံတွေလည်း ဘေးလွတ်ရာ ထွက်ပြေးတိမ်းရှောင်နေရပါတယ်။

2. လွန်ခဲ့သော ၄ နာရီ ကဂျပန်ဖိုက်တာ တာခဲရု မြန်မာမှာ ကျောင်း‌ဆောင်သစ်လှူဒါန်း

   One Championship ရဲ့ Flyweight ဝိတ်တန်း ချန်ပီယံ တာခဲရုဟာ ရှမ်းပြည်နယ်၊ တောင်ကြီးမြို့မှာ စာသင်ကျောင်းလာရောက်လှူဒါန်းခဲ့ပါတယ်။

   တာခဲရုဟာ ၂၀၂၅ ခုနှစ်တုန်းက တောင်ကြီးမြို့မှာရှိတဲ့ ရွှေတောင်တန်းပရဟိတစာသင်ကျောင်း အတွက် စာသင်ကျောင်းဆောင်သစ်လှူဒါန်းခဲ့ပါတယ်။

   အဲဒီကျောင်းဆောင်သစ်ဖွင့်ပွဲအခမ်းအနားကို ဩဂုတ်လ ၁၈ ရက်နေ့မှာ ကျင်းပခဲ့ပြီး အဲဒီအခမ်းအနားကို တာခဲရုကိုယ်တိုင် တက်ရောက်လာခဲ့တာပါ။

   တာခဲရုဟာ အဲဒီစာသင်ကျောင်းမှာ မြန်မာလူငယ်တွေ နဲ့ တွေ့ဆုံပြီး ဘောက်ဆင်လေ့ကျင့်မှုတွေလည်း ပြုလုပ်ပေးခဲ့ပါတယ်။

   တာခဲရုဟာ ၂၀၂၆ ခုနှစ်၊ ဧပြီလတုန်းက ဂျပန်နိုင်ငံမှာကျင်းပတဲ့ One Samurai 1 ပြိုင်ပွဲမှာ Flyweight မွေထိုင်းချန်ပီယံ ရော့ထန် နဲ့ ယှဉ်ပြိုင်ထိုးသတ်ခဲ့ပါတယ်။

   အဲဒီပွဲမှာ တာခဲရု က ရော့ထန်ကို အနိုင်ယူပြီး ချန်ပီယံခါးပတ်နဲ့ သူ့ရဲ့ ဖိုက်တာဘဝကို အသက် ၃၄ နှစ်မှာ အနားယူခဲ့တာပါ။

   ပွဲအပြီးမှာတော့ တာခဲရုဟာ မြန်မာ့စပါးအုံ အောင်လအန်ဆန်းလိုမျိုးပဲ One Championship ရဲ့ ‘Hall Of Fame’ စာရင်းထဲမှာ ထည့်သွင်းခံခဲ့ရပါတယ်။

   ဒီမတိုင်ခင်က မြန်မာဖိုက်တာ သန့်ဇင် နဲ့ တာခဲရုတို့ ထိုးသတ်ခဲ့ကြပြီး တာခဲရုက သန့်ဇင်ကို ဒုတိယအချီမှာ အလဲထိုးပြီး အနိုင်ရခဲ့တာပါ။

   အဲဒီနောက်မှာတော့ တာခဲရုဟာ မြန်မာနိုင်ငံကို ရောက်လာပြီး စာသင်ကျောင်းဆောင်အသစ် လာလှူခဲ့တာဖြစ်ပါတယ်။

3. လွန်ခဲ့သော ၅ နာရီ ကတရုတ်၊ ထိုင်းနဲ့ စင်ကာပူမှာ ကိုဗစ်လူနာအသစ်တွေ တကျော့ပြန်မြင့်တက်နေ

   အာဆီယံနိုင်ငံတွေဖြစ်တဲ့ ထိုင်းနဲ့ စင်ကာပူအပြင် မြန်မာအိမ်နီးချင်း တရုတ်တရုတ်နိုင်ငံမှာလည်း ပြီးခဲ့တဲ့လတွေအတွင်း ကိုဗစ်ရောဂါပိုးတွေ့ရှိသူတွေ မြင့်တက်ခဲ့တယ်လို့ အဲဒီနိုင်ငံတွေရဲ့ရောဂါထိန်းချုပ်ရေးနဲ့ ကာကွယ်ရေးဌာန(CDC)တွေက ထုတ်ပြန်ထားပါတယ်။

   တရုတ်နိုင်ငံမှာဆိုရင် ဇူလိုင်လ တစ်လတည်း ကိုဗစ်ရောဂါပိုးလူနာအသစ် ၅၂၂,၀၀၀ ကျော်တွေ့ရှိခဲ့ပြီး ဒါဟာ ရောဂါကူးစက်မှု တရှိန်ထိုးမြင့်တက်လာနေတာလို့ တရုတ်နိုင်ငံ ရောဂါထိန်းချုပ်ရေးနဲ့ ကာကွယ်ရေးဗဟိုဌာန(CDC) က ထုတ်ပြန်ထားပါတယ်။

   တရုတ်နိုင်ငံအတွင်း ကိုဗစ်ရောဂါပိုးလူနာအသစ် ၅ သိန်းကျော်ထဲမှာ သေဆုံးသူတစ်ဦးရှိခဲ့တယ်လို့လည်း ဆိုပါတယ်။

   စင်ကာပူမှာ မေလ ပထမအပတ်မှာ ကိုဗစ်ရောဂါပိုးတွေ့ရှိသူ ၈,၀၀၀ ဝန်းကျင်ကနေ မေလ ၁၀ ရက်ကနေ ၁၆ ရက်အတွင်း ကိုဗစ်ရောဂါပိုးတွေ့ရှိသူ ၁၂,၇၀၀ အထိ မြင့်တက်လာခဲ့တယ်လို့ စင်ကာပူ ကူးစက်ရောဂါကာကွယ်ထိန်းချုပ်ရေးအေဂျင်စီ (CDA) က မေလ ၂၁ ရက်မှာ ထုတ်ပြန်ပါတယ်။

   မြန်မာအိမ်နီးချင်း ထိုင်းနိုင်ငံမှာဆိုရင်လည်း ၂၀၂၆ ခုနှစ်အတွင်း ကိုဗစ်ရောဂါပိုးတွေ့ရှိသူ ၃,၆၀၀ ရှိခဲ့ပြီး သေဆုံးသူတစ်ဦးရှိခဲ့တယ်လို့ ထိုင်းနိုင်ငံ၊ ရောဂါကာကွယ်ထိန်းချုပ်ရေးဌာန က မေလ ၂၄ ရက်မှာ ထုတ်ပြန်ပါတယ်။

   ကူးစက်သူ ၃,၀၀၀ ကျော်မှာ အများစုဟာ အသက် ၃၀ နှစ် ကနေ ၃၅ နှစ်အရွယ်ရှိသူတွေနဲ့ အသက် ၆၀ အထက် အရွယ်ရှိသူတွေဖြစ်တယ်လို့ဆိုပါတယ်။

   ဒီနိုင်ငံတွေမှာ ကူးစက်နေတဲ့ ကိုဗစ်ရောဂါအမျိုးအစားဟာ အိုမီခရွန် (Omicron) မျိုးကွဲ NB.1.8.1 (Nimbus) ဖြစ်တယ်လို့ ဆိုပါတယ်။

   ဒီရောဂါပိုးဟာ အရင်မျိုးစိတ်တွေနဲ့ယှဉ်ရင် ပိုပြီး ပြင်းထန်မှု မရှိသလို၊ အသက်အန္တရာယ်ခြိမ်းခြောက်မှုလည်း မရှိဘူးလို့ ဒီနိုင်ငံတွေရဲ့ရောဂါကာကွယ်ထိန်းချုပ်ရေးဌာနတွေက ပြောထားပါတယ်။

   လက်ရှိ ထိုးထားတဲ့ ကာကွယ်ဆေးတွေကလည်း ဒီရောဂါပိုးကူးစက်မှုကနေ ကာကွယ်နိုင်မယ်လို့ ဆိုပါတယ်။

4. လွန်ခဲ့သော ၆ နာရီ ကစမ်းချောင်းမြို့နယ်ရပ်ကွက်အုပ်ချုပ်ရေးမှူး ၇ ဦးကို စရဖ ဖမ်းဆီး စစ်ဆေးနေ

   ရန်ကုန်မြို့၊ စမ်းချောင်းမြို့နယ်ထဲမှာ အဆောက်အဦ ပြီးစီးကြောင်းအသိအမှတ်ပြုလွှာ(BCC) မကျဘဲ ဆောက်ထားတဲ့တိုက်တွေနဲ့ဆက်စပ်ပြီး ရပ်ကွက် ၇ ခုရဲ့အုပ်ချုပ်ရေးမှူး ၇ ဦးနဲ့ ကန်ထရိုက်တာ ၁ ဦး ဖမ်းဆီးစစ်ဆေးခံနေရတယ်လို့ ပြည်ထဲရေးဝန်ကြီးဌာန သတင်းရင်းမြစ်ဆီကနေ သိရပါတယ်။

   အုပ်ချုပ်ရေးမှူး ၇ ဦးနဲ့ ကန်ထရိုက်တာတို့ဟာ ပြီးခဲ့တဲ့ရက်ပိုင်းမှာ ဖမ်းဆီးခံရတာဖြစ်ပြီး လက်ရှိမှာ သူတို့ကို စစ်ဘက်ရေးရာလုံခြုံရေးတပ်ဖွဲ့(စရဖ)က စစ်ဆေးနေတယ်လို့လည်း သတင်းရင်းမြစ်က ပြောပါတယ်။

   အဆောက်အဦ ပြီးစီးကြောင်းအသိအမှတ်ပြုလွှာ(BCC) မကျဘဲ တိုက်ဆောက်လုပ်မှုတွေမှာ ရပ်ကွက်အုပ်ချုပ်ရေးမှူးတွေ ရဲ့ အကျင့်ပျက်ချစားမှုတွေလည်းရှိနိုင်တယ်ဆိုတဲ့ စွပ်စွဲချက်နဲ့ အခုလို စစ်ဆေးနေတာဖြစ်ပါတယ်။

   လက်ရှိ စမ်းချောင်းမြို့နယ်မှာ ခွင့်ပြုချက်မရှိဘဲ ဆောက်ထားတဲ့ အဆောက်အဦ ၃၂ လုံးခန့်ရှိတယ်ဆိုပြီး အာဏာပိုင်တွေက ဖမ်းဆီးမှုတွေ ပြုလုပ်နေတာပါ။

   တဆက်တည်းမှာပဲ စမ်းချောင်းမြို့နယ်မှာ အဆောက်အဦပြီးစီးကြောင်း အသိအမှတ်ပြုလွှာ (BCC) မကျဘဲ ဆောက်ထားတဲ့ အဆောက်အဦတွေကို စည်ပင်က သတိပေးစာတွေ ကပ်နေတယ်လို့ စမ်းချောင်းက အခန်းပိုင်ရှင်တချို့က ပြောပါတယ်။

   “ကျွန်မတို့တိုက်ကို စည်ပင်ရုံးကနေ အရေးယူထားပါတယ်ဆိုပြီး စာလာကပ်တယ်။ တိုက်ဆောက်တုန်းက ဂရန်မရှိတော့ BCC က မကျဘူး။ ဂရန်ကို အရင်လျှောက်ပြီးတော့မှ ဆောက်လို့ရမယ်လို့ ပြောပါတယ်။ ကန်ထရိုက်က ဂရန်ကို မလျှောက်ခဲ့ဘဲနဲ့ ဆောက်လိုက်တဲ့ပုံစံဖြစ်သွားတာ” လို့ အခန်းပိုင်ရှင်တစ်ဦးက ပြောပါတယ်။

   အခန်းပိုင်ရှင်တချို့ကတော့ သူတို့ တိုက်ခန်းဝယ်ယူချိန်တုန်းက ဒီအခြေအနေတွေ မသိရှိခဲ့တာကြောင့် အရေးယူခံရမယ့် အန္တရာယ်ကိုလည်းစိုးရိမ်နေတယ်လို့ ပြောပါတယ်။

   စည်ပင်သာယာရေး ဥပဒေပုဒ်မ ၆၁ (ဃ) အရ စည်ပင်က ခွင့်ပြုထားတဲ့ အဆောက်အဦပုံစံနဲ့ ကွဲလွဲတဲ့ အ‌ဆောက်အဦကို ဆောက်လုပ်ခွင့်ပိတ်ပင်ထားပါတယ်။

   နောက်ပြီး ပုဒ်မ ၆၁ (င) မှာဆိုရင် ဆောက်လုပ်ပြီးစီးထားတဲ့ အဆောက်အဦမှာ စည်ပင်ရဲ့ခွင့်ပြုချက်မရှိဘဲ ဝင်ရောက်နေထိုင်တာ၊ အသုံးပြုတာတွေကို တားမြစ်ထားပါတယ်။

   ဒီတားမြစ်ချက်တွေကို ကျူးလွန်ရင် ထောင်ဒဏ် တစ်နှစ်ဖြစ်စေ၊ အနည်းဆုံးငွေဒဏ်ကျပ်တစ်သောင်းကနေ အများဆုံး ငွေဒဏ်ကျပ်ငါးသိန်းအထိဖြစ်စေ၊ ဒဏ်ငွေနှစ်ရပ်လုံးလည်း ချမှတ်နိုင်တယ်လို့ ပြဋ္ဌာန်းထားပါတယ်။

5. လွန်ခဲ့သော ၇ နာရီ ကရုရှားနဲ့ နေပြည်တော်ကို ဘာက ပေါင်းစည်းပေးတာလဲ

   နေပြည်တော်သမ္မတ ဦးမင်းအောင်လှိုင်ရဲ့ရုရှားခရီးစဉ် ဆက်ရှိနေပါတယ်။

   မော်စကိုမြို့မှာ ရုရှား–မြန်မာ စီးပွားရေးဖိုရမ်ကို ဒီနေ့ကျင်းပဖို့ရှိပြီး ဦးမင်းအောင်လှိုင်နဲ့ သူ့၀န်ကြီး၊ ဒုတိယ ၀န်ကြီးတွေ မြန်မာစီးပွားရေးလုပ်ငန်းရှင်တွေလည်း တက်ရောက်ဖို့ရှိပါတယ်။

   ဒါပေမဲ့ အဲဒီဖိုရမ်ကို သမ္မတပူတင်တက်ရောက်ဖို့ ရှိ မရှိကိုတော့ ကရင်မလင်က မပြောထားပါဘူး။

   ဒီဖိုရမ်ကို နေပြည်တော်ရဲ့တောင်းဆိုမှုနဲ့ ကျင်းပတာဖြစ်တယ်လို့ မြန်မာ ကုန်သည်နဲ့ စက်မှုလုပ်ငန်းရှင်းများအသင်းဘက်က သတင်းရင်းမြစ်တွေက ပြောပါတယ်။

   ''တကယ်တော့ မြန်မာလုပ်ငန်းရှင်အများစုက ရုရှားနဲ့ စီးပွားရေးလုပ်ဖို့ အများကြီးစိတ်မဝင်စားဘူး။ ဒါပေမဲ့... သူတို့လိုက်ကြရတာပေါ့'' လို့ မြန်မာကုန်သည်စက်မှုအသင်း သတင်းရင်းမြစ်က ပြောပါတယ်။

   ရုရှားအပေါ် အမေရိကန်၊ ဥရောပသမဂ္ဂနဲ့ အခြားအနောက်နိုင်ငံတွေက ကျယ်ပြန့်တဲ့ စီးပွားရေးဒဏ်ခတ်မှုတွေ ချမှတ်ထားတာကြောင့် ရုရှားနဲ့ စီးပွားရေးလုပ်ကိုင်မယ့် မြန်မာလုပ်ငန်းရှင်တွေအနေနဲ့ ဘဏ္ဍာရေးဆိုင်ရာအန္တရာယ်တွေကို ထည့်သွင်းစဉ်းစားကြတာလို့ ဆိုပါတယ်။

   အပြည့်အစုံ ဒီလင့်ခ် မှာ ဖတ်ရှုနိုင်ပါတယ်။

6. လွန်ခဲ့သော ၇ နာရီ ကရန်ကုန်က ဝမ်းရောဂါပျံ့ပွားမှုကို ထိုင်း သတိထားစောင့်ကြည့်နေ

   မြန်မာနိုင်ငံ၊ ရန်ကုန်မြို့မှာ ဝမ်းပျက်ဝမ်းလျှောရောဂါပျံ့ပွားနေတာကြောင့် မြန်မာကနေ ထိုင်းနိုင်ငံထဲကို ၀င်လာမယ့်သူတွေကို လေကြောင်း၊ ရေကြောင်းနဲ့ နယ်စပ်တို့မှာ သတိထားစောင့်ကြည့်နေတဲ့အကြောင်း ထိုင်းကျန်းမာရေးဝန်ကြီးဌာနက ဒီနေ့ သတင်းထုတ်ပါတယ်။

   ထိုင်းနိုင်ငံနဲ့ မြန်မာနိုင်ငံဟာ အပြန်အလှန်ကူးလူးသွားလာမှုတွေ ရှိနေတာကြောင့် နယ်စပ်ဒေသတွေအပြင် ထိုင်းနိုင်ငံအတွင်းက ဆေးရုံတွေမှာပါ ဒီရောဂါကိုအခြေအနေကို သတိထားစောင့်ကြည့်နေတယ်လို့ ဆိုပါတယ်။

   ရောဂါသံသယရှိသူတွေ ရှိလာရင်လည်း အလျင်အမြန်တုံ့ပြန်ဆောင်ရွက်ဖို့ ပြင်ဆင်ထားတယ်လို့ ထိုင်းကျန်းမာရေးဝန်ကြီးဌာနက ပြောပါတယ်။

   ရောဂါပျံ့ပွားမှု ဗဟိုချက်ဖြစ်တဲ့ ရန်ကုန်မြို့ကို အလည်အပတ်သွားမယ့် သူတွေအနေနဲ့လည်း ကိုယ်စားသောက်မယ့်အစားအစာနဲ့ ရေတွေကို သတိပြုဖို့ တိုက်တွန်းထားပါတယ်။

   နောက်ပြီး ခရီးမသွားခင် ၂ ပတ်ကြိုပြီး ဝမ်းပျက်ဝမ်းလျှောရောဂါ ကာကွယ်ဆေးထိုးထားဖို့လည်း အကြံပြုပါတယ်။

   ထိုင်းနိုင်ငံကို ပြန်ဝင်လာသူတွေမှာ ဝမ်းပျက်ဝမ်းလျှောရောဂါလက္ခဏာတွေ တွေ့ရရင် ဆရာဝန်နဲ့ ချက်ချင်းကုသဖို့၊ ခရီးသွားရာဇဝင်တွေကိုလည်း ပေးပို့ရမယ်လို့ ဆိုပါတယ်။

   ကျန်းမာရေးဝန်ကြီးဌာနရဲ့သက်ဆိုင်ရာအဖွဲ့အစည်းတွေအနေနဲ့ ဒီရောဂါ ကာကွယ်ထိန်းချုပ်နိုင်ဖို့ မြန်မာအာဏာပိုင်တွေ၊ ကမ္ဘာ့ကျန်းမားရေးအဖွဲ့အစည်း(WHO)နဲ့ ပူးပေါင်းဆောင်ရွက်ဖို့ တိုက်တွန်းထားပါတယ်။

   ဩဂုတ်လ ၉ ရက်ကစလို့ ရန်ကုန်မြို့လယ်က လမ်းမတော်၊ လသာ၊ ပန်းပဲတန်း၊ ကျောက်တံတားမြို့နယ်တွေမှာ ဝမ်းပျက်ဝမ်းလျှောရောဂါ ပျံ့ပွားတဲ့လူနာတွေ တွေ့ခဲ့လို့ လမ်းဘေးစျေးသည် ရောင်းချတာတွေကို တားမြစ်တဲ့အထိ ဖြစ်ခဲ့ပါတယ်။

   ရန်ကုန်ပြည်သူ့ဆေးရုံမှာလည်း ဒီရောဂါနဲ့ရောက်လာတဲ့ လူနာ ၁၈၀ ကျော်လောက်အထိရှိခဲ့တာပါ။

   ဩဂုတ် ၁၈ ရက်က ကျင်းပတဲ့ ရန်ကုန်တိုင်းဒေသကြီး လွှတ်တော်အစည်းအဝေးမှာ ၀မ်းရောဂါအခြေအနေကို မေးမြန်းတဲ့အခါမှာတော့ ရန်ကုန်ဆေးရုံကြီးမှာ ၀မ်းရောဂါကြောင့် ဆေးကုသမှုခံယူနေရသူ အနည်းငယ်သာ ကျန်တော့တယ်လို့ သူက ပြောပါတယ်။

7. လွန်ခဲ့သော ၈ နာရီ ကနေပြည်တော်ခွင့်ပြုမှ ထိုင်းရောက် PV ကိုင်ဆောင်သူတွေ ပတ်စ်ပို့သက်တမ်းတိုးနိုင်မယ်

   ထိုင်းရောက် PV အမျိုးအစား နိုင်ငံကူးလက်မှတ် (ပတ်စ်ပို့) ကိုင်ဆောင်ထားသူတွေ သက်တမ်းကုန်လို့ အသစ်လဲလှယ်တဲ့အခါ နေပြည်တော်ရဲ့ ခွင့်ပြုချက်မဖြစ်မနေလိုအပ်လာနိုင်မယ်လို့ ဘန်ကောက်မြို့ မြန်မာသံရုံးရှိ ပတ်စ်ပို့အကျိုးဆောင်အသိုင်းအဝိုင်းဆီက သိရှိရပါတယ်။

   ထိုင်းနိုင်ငံမှာ PV အမျိုးအစားကိုင်ဆောင်ပြီး အလုပ်လုပ်ကိုင်သူတွေနဲ့ ကျောင်းတက်‌ရောက်နေသူတွေရဲ့ ပတ်စ်ပို့ စာအုပ်တွေ သက်တမ်းကုန်လို့ အသစ်လဲတဲ့အခါ ဒီသတ်မှတ်ချက် က အဓိကသက်ရောက်လာမယ်လို့ အကျိုးဆောင်တချို့ ကဆိုပါတယ်။

   “PV သမားတွေက သက်တမ်းကုန်လို့ ဒီမှာ အလုပ်လုပ်နေသူတွေဆို သွားပြောင်းရင် PJ ဖြစ်သွားမယ်။ အရင်က အဲဒါကို ဘန်ကောက်သံရုံးမှာပဲပြောင်းလို့ရတယ်။ အခုတော့ အဲဒီလို ပြောင်းရမယ့်သူတွေက သံရုံးက တဆင့် နေပြည်တော်ကို တင်ပြမယ်။ နေပြည်တော်က ခွင့်ပြုချက်ပြန်ကျမှ ဒီသံရုံးက သက်တမ်းတိုးပေးမယ်ဆိုတာမျိုးဖြစ်လာနိုင်တယ်” လို့ ဘန်ကောက်၊မြန်မာသံရုံးက အကျိုးဆောင်တစ်ဦးက ကနဦးသူသိထားတာကို ပြောပြပါတယ်။

   ဘန်ကောက်မြို့၊ မြန်မာသံရုံးဘက်ကတော့ ဒါနဲ့ ပတ်သက်လို့ တရားဝင်မထုတ်ပြန်သေးပါဘူး။

   ဒါဟာ အလည်အပတ်နိုင်ငံကူးလက်မှတ် နဲ့ အလုပ်ဗီဇာ (Non-B)၊ ကျောင်းသားဗီဇာ (Non-ED) ကိုင်ဆောင်တွေအပေါ်မှာလည်း သက်ရောက်မှုရှိလာနိုင်တယ်လို့ ပြောကြပါတယ်။

   “အတွင်းသတင်းပဲထွက်သေးတာပါ။ တရားဝင်စာတော့ မထွက်သေးဘူး။ ပုံမှန်ဆို သံရုံးကတော့ ကောလာဟလတွေထွက်ပြီး တစ်ပတ်အတွင်းဆို စာထုတ်ပါတယ်။စောင့်ကြည့်ရမယ်” လို့ နောက်ထပ် အကျိုးတော်ဆောင်တစ်ဦးက ပြောပါတယ်။

   ဦးမင်းအောင်လှိုင်ဟာ ဩဂုတ်လ ၇ ရက်က သူ့ရဲ့ ထိုင်းခရီးစဉ်အတွင်း ဘန်ကောက်မြို့ရှိ မြန်မာသံရုံးကို သွားရောက်ခဲ့ပါသေးတယ်။ သူသွားရောက်ပြီး ၁၂ ရက်အကြာမှာ ဒီလို သတင်းတွေ ထွက်ပေါ်လာတာဖြစ်ပါတယ်။

   မနေ့ညနေပိုင်းမှာ အကျိုးတော်ဆောင်တွေက တဆင့် ဒီသတင်းက ပျံ့နှံ့လာပြီးနောက်မှာ PV သက်တမ်းကုန်ဖို့နီးကပ်နေသူတွေနဲ့ ကျောင်းသားတွေအတွက်အခက်အခဲတွေဖြစ်လာနိုင်တယ်လို့ ပြောဆိုချက်တွေရှိနေပါတယ်။

8. လွန်ခဲ့သော ၈ နာရီ က

   မင်္ဂလာပါ။ ဩဂုတ် ၁၉ ရက် ဘီဘီစီသတင်းများ တိုက်ရိုက်တင်ဆက်မှု စတင်ပြီဖြစ်ပါတယ်။ နိုင်ငံတဝန်းနောက်ဆုံးရ သတင်းများကို တိုက်ရိုက်ထုတ်လွှင့်ချက်မှာ အချိန်နဲ့ တပြေးညီ ဖတ်ရှုနိုင်ပါတယ်။