တိုက်ရိုက်ထုတ်လွှင့်မှု, ထားဝယ်က တောင်ပြို ရေကြီးမှု သေဆုံးသူ ၁၃ ဦးထက်မနည်းရှိ - ထားဝယ်အမျိုးသားအဖွဲ့ချုပ်

တိုက်ရိုက် ထုတ်လွှင့်ချက်

1. လွန်ခဲ့သော ၁၃ မိနစ် ကသတင်းထူး, ကျောက်တော်က စျေးအနီး ဗုံးကြဲခံရမှု သေဆုံးသူ ၃၀ ကျော်ရှိ - အေအေ

   ရခိုင်ပြည်နယ်ထဲ အာရက္ခတပ်တော်(အေအေ)ထိန်းချုပ်ထားတဲ့ ကျောက်တော်မြို့အနီးနဲ့ အိန္ဒိယစျေး၀န်းကျင်ကို စစ်တပ်က ဗုံးကြဲမှုမှာ သေဆုံးသူ ၃၃ ဦးရှိတယ်လို့ အေအေက ပြီးခဲ့တဲ့ မိနစ်ပိုင်းမှာပဲ သတင်းထုတ်ပြန်ပါတယ်။

   လေကြောင်းဗုံးကြဲမှုကြောင့် ထိခိုက်ဒဏ်ရာရသူ ၃၆ ဦးအထိ ရှိတယ်လို့လည်းဆိုပါတယ်။

   မြေပြင်အခြေအနေသိတဲ့ စာရေးဆရာ ၀ေဟင်အောင်ကတော့ ရှာဖွေကယ်ဆယ်ရေးလုပ်နေတုန်းဖြစ်တာကြောင့် သေဆုံးသူအရေအတွက် တိုးလာနိုင်တယ်လို့ ပြောပါတယ်။

   ''သေဆုံး ရုပ်အလောင်း ၃၃ လောင်းကို တွေ့ထားပြီးဖြစ်ပါတယ်။ ဗုံးက ပေါင် ၅၀၀ ဗုံး ၂ လုံးကြဲသွားတာပါ။ တစ်လုံးက စျေး၀င်းထဲကို ကျတယ်။ တစ်လုံးက ကစ္ဆပနဒီ တံတားဘောင်နားကို ကျတယ်။ လူသုံးများတဲ့စျေးဖြစ်တာကြောင့် ထိခိုက်သေဆုံးသူ မြင့်တက်လာနိုင်ပါတယ်'' လို့

   စစ်တပ်ဟာ ဒီနေ့ နေ့လယ် ၁၂ နာရီကျော်မှာ စစ်တပ်ရဲ့ ဂျက်ဖိုက်တာတစ်စင်းက ကစ္ဆပနဒီတံတားအနီးက အိန္ဒိယဈေးဝင်းကို လေကြောင်းကနေ ၂ ကြိမ် ဗုံးကြဲတိုက်ခိုက်ခဲ့တာလို့ အေအေက အစောပိုင်းမှာ သတင်းထုတ်ပါတယ်။

   ဒီဈေးဟာ လူသုံးကုန်၊ စားသောက်ကုန်တွေ ကုန်တင်၊ ကုန်ချပြီး ရောင်းဝယ်နေကြတဲ့ နေရာလည်း ဖြစ်ပါတယ်။

   စစ်တပ်ရဲ့ ဗုံးကြဲတိုက်ခိုက်မှုကြောင့် အရပ်သားတွေ၊ လမ်းသွားလမ်းလာတွေနဲ့ ဈေးရောင်းဈေးဝယ်သူတွေ ထိခိုက်ဒဏ်ရာရခဲ့ပြီး သေဆုံးသူတွေလည်း ရှိတယ်လို့ အေအေက ကနဦး သတင်းထုတ်ခဲ့ပါတယ်။

   စစ်တပ်ဟာ ဒီဈေးကို ပြီးခဲ့တဲ့ ဇွန်လတုန်းကလည်း လေကြောင်းတိုက်ခိုက်ခဲ့ပြီး အခုတခေါက်က ဒုတိယအကြိမ်လေကြောင်းတိုက်ခိုက်မှုဖြစ်ပါတယ်။

   စစ်တပ်ဟာ ဒီနေ့ တစ်နေ့တည်းမှာတင် ကျောက်တော်၊ မင်းပြား၊ သံတွဲ၊ ပုဏ္ဏားကျွန်းစတဲ့ အေအေ ထိန်းချုပ်မြို့နယ်တွေအပြင် စစ်တပ်ထိန်းချုပ်ထားတဲ့ စစ်တွေမြို့နယ်တို့ကိုလည်း လေကြောင်းဗုံးကြဲတာတွေရှိတယ်လို့ နောက်ထပ် သတင်းရင်းမြစ်တစ်ဦးက ပြောပါတယ်။

   ဒါပေမဲ့ ဆက်သွယ်ရေးအခက်အခဲကြောင့် ကျောက်တော်ကလွဲပြီး ကျန်တဲ့ ၄ မြို့နယ်က လေကြောင်းဗုံးကြဲမှု အခြေအနေကို မသိရသေးဘူးလို့လည်း သူက ပြောပါတယ်။

2. လွန်ခဲ့သော ၄၄ မိနစ် ကလောင်းလုံးမြို့နယ် ကရင်ကြီးရွာမှာ ဒုတိယအကြိမ်မြေထပ်ပြို

   တနင်္သာရီတိုင်းဒေသကြီး၊ လောင်းလုံးမြို့နယ်၊ ကရင်ကြီးရွာမှာ မိုးအဆက်မပြတ်ရွာသွန်းမှုကြောင့် ဒီကနေ့မှာ ဒုတိယအကြိမ်မြေပြိုကျခဲ့တယ်လို့ ထားဝယ်အမျိုးသားအဖွဲ့ချုပ်/ ထားဝယ်တပ်တော်ရဲ့ ပြောရေးဆိုခွင့်ရှိသူ ကိုယောနသံက ပြောပါတယ်။

   “မနေ့ညက အဲဒီရွာမှာ တောင်ပြိုထားတာပါ။ ဒီနေ့မနက်ပိုင်းကလည်း မြေထပ်ပြိုပြီး ရွာအရှေ့ပိုင်းတစ်ခုလုံး ပျက်စီးသွားတယ်လို့ ကနဦးသိထားရပါတယ်” လို့ သူကပြောပါတယ်။

   စက်တင်ဘာ ၂၇ ရက်ညပိုင်းက ကရင်ကြီးကျေးရွာမှာ တောင်မြေပြိုကျမှုကြောင့် နေအိမ်အလုံး ၃၀ ကျော် ပျက်စီးသွားခဲ့ပြီး လူသေဆုံးမှုတော့ မရှိခဲ့ဘူးလို့ ထားဝယ်အမျိုးသားအဖွဲ့ချုပ်က ပြောပါတယ်။

   ဒီနေ့မနက် မြေပြိုကျမှုကြောင့် လူအထိအခိုက်သေဆုံးမှုတွေကိုတော့ မသိရသေးဘူးလို့ ဆိုပါတယ်။

   ကရင်ကြီးကျေးရွာဟာ စစ်တပ်နဲ့ တော်လှန်ရေးတပ်ဖွဲ့တွေအကြား မကြာခဏ ထိတွေ့တိုက်ပွဲတွေဖြစ်ပွားနေတဲ့ နေရာဖြစ်ပြီး လက်ရှိ ကယ်ဆယ်ရေးလုပ်ငန်းတွေကို ကိုယ်ထူကိုယ်ထ လုပ်နေကြတယ်လို့လည်း ထားဝယ်အမျိုးသားအဖွဲ့ချုပ် ပြောရေးဆိုခွင့်ရှိသူက ပြောပါတယ်။

   ဒီရွာကို ကူညီကယ်ဆယ်ရေးတွေလုပ်ဖို့ကိုလည်း ထားဝယ်အမျိုးသားအဖွဲ့ချုပ်ဘက်က ကြိုးစားနေတယ်လို့ ပြောပါတယ်။

   မောင်းမကန် နယ်မြေရဲစခန်းကလည်း စက်တင်ဘာ ၂၇ ရက်နေ့မှာ ကရင်ကြီးကျေးရွာကို ဦးတည်ပြီး စစ်ကြောင်းထွက်လာတယ်လို့ ထားဝယ်အမျိုးသားအဖွဲ့ချုပ်ရဲ့ ပြောရေးဆိုခွင့်ရှိသူ ကိုယောနသံက ပြောပါတယ်။

   ဒါဟာ စစ်ကြောင်းထိုးမလို့လား ဒါမှမဟုတ် ကူညီကယ်ဆယ်ရေးလုပ်မလို့လားဆိုတာတော့ စောင့်ကြည့်ရမယ်လို့ ထားဝယ်အမျိုးသားအဖွဲ့ချုပ်က ပြောပါတယ်။

   ပြီးခဲ့တဲ့ ရက်ပိုင်းက မိုးအဆက်မပြတ်ရွာသွန်းမှုကြောင့် လောင်းလုံးတောင်တန်းတလျှောက်မှာ တောင်မြေပြိုမှုတွေ ခပ်စိပ်စိပ်ဖြစ်နေပါတယ်။

   ဒီကနေ့အထိ စာရင်းတွေအရ လောင်းလုံးတောင်တန်းတလျှောက်က ကျေးရွာပေါင်း ၁၀ ရွာနဲ့ အထက်မှာ တောင်ပြိုမှုတွေရှိခဲ့တယ်လို့ ထားဝယ်အမျိုးသားအဖွဲ့ချုပ်က ဘီဘီစီကိုပြောပါတယ်။

3. လွန်ခဲ့သော တစ်နာရီ ကထား၀ယ် မိုးရေချိန် နှစ် ၈၀ အတွင်း အမြင့်ဆုံးရောက်

   တနင်္သာရီတိုင်း ထား၀ယ်မြို့မှာ ပြီးခဲ့တဲ့ ၂၄ နာရီအတွင်း ရွာသွန်းခဲ့တဲ့မိုးရေချိန်ဟာ နှစ် ၈၀ အတွင်း အမြင့်ဆုံးကို ရောက်ရှိခဲ့တယ်လို့ မိုးလေ၀သနဲ့ ဇလဗေဒညွှန်ကြားမှူး ဦးစီးဌာနက ပြီးခဲ့တဲ့ မိနစ်ပိုင်းကပဲ သတင်းထုတ်ပါတယ်။

   ထား၀ယ်မှာ မနေ့ စက်တင်ဘာလ ၂၇ ရက်ကနေ ဒီနေ့အထိ ရွာခဲ့တဲ့မိုးဟာ နှစ် ၈၀ အတွင်း အမြင့်ဆုံးလို့ ဆိုပါတယ်။

   လွန်ခဲ့တဲ့ နှစ် ၈၀ က ထား၀ယ်မှာ အမြင့်ဆုံးရွာခဲ့တဲ့ မိုးရေချိန်ဟာ ၁၁ လက်မကျော်ပဲ ရှိနေပေမဲ့ ပြီးခဲ့တဲ့ ၂၄ နာရီ မိုးရွာနှုန်းဟာ ၁၃ လက်မခွဲကျော်အထိရှိတယ်လို့လည်း ဆိုပါတယ်။

   ထား၀ယ်မှာ ပြီးခဲ့တဲ့နှစ်တွေအတွင်း မကြုံစဖူး မိုးရွာသွန်းမှု ကြုံရတာလို့ မြို့ခံအချို့က ဘီဘီစီကို ဒီနေ့မနက်ပိုင်းမှာ ပြောထားပါတယ်။ အခုတော့ မိုးဇလကလည်း ထား၀ယ်မှာ မိုးများတယ်လို့ သတင်းထုတ်လာတာဖြစ်ပါတယ်။

   လက်ရှိမှာ မြစ်ရေနဲ့ မိုးများတာကြောင့် ထား၀ယ်မြို့ပေါ်မှာရပ်ကွက်တွေ ရေကြီးနေပြီး မြေနိမ့်ပိုင်းအရပ်တွေမှာ နှစ်ထပ်အိမ်တွေမှာ အိမ်အောက်ထပ် ရေမြုပ်သွားတဲ့အထိ ရေကြီးတာတွေ ဖြစ်နေပါတယ်။

4. လွန်ခဲ့သော ၂ နာရီ ကအားကောင်းတဲ့မုန်တိုင်းငယ် ရန်ကုန်ကို ဖြတ်မယ်လို့ဆို

   မွန်-တနင်္သာရီကမ်းရိုးတန်းမှာ ဖြစ်နေတဲ့ အားကောင်းတဲ့လေဖိအားနည်းရပ်ဝန်းဟာ အားကောင်းတဲ့ မုန်တိုင်းငယ်အဖြစ်ပြောင်းသွားပြီး နောက် ၃၆ နာရီ အတွင်း ရန်ကုန်၊ ပဲခူး နဲ့ မကွေးတိုင်းဒေသကြီးတွေကို ဖြတ်သန်းမယ်လို့ မိုးလေဝသနဲ့ ဇလဗေဒညွှန်ကြားမှုဦးစီးဌာနကဒီကနေ့ပဲ ထုတ်ပြန်လာပါတယ်။

   အခု ကပ္ပလီပင်လယ်ပြင်နဲ့ ဆက်စပ်နေတဲ့ မုတ္တမကွေ့၊ မွန်-တနင်္သာရီကမ်းရိုးတန်းမှာ ဖြစ်ပေါ်နေတဲ့ မုန်တိုင်းငယ်ဟာ မော်လမြိုင်မြို့ရဲ့တောင်ဘက် ရေမိုင် ၅၀၊ သုံးခွမြို့ အရှေ့တောင်ဘက် ‌ရေမိုင် ၉၅ မိုင်နဲ့ ပဲခူးမြို့ရဲ့ တောင်-အရှေ့တောင်ဘက် ရေမိုင် ၁၂၀ မိုင်အကွာက ပင်လယ်ပြင်ကို ဗဟိုပြုနေတယ်လို့ ဆိုပါတယ်။

   ဒီမုန်တိုင်းငယ်ဟာ မြန်မာနိုင်ငံ၊ မုတ္တမကွေ့အနီးကို ဖြတ်ကျော်နိုင်တာကြောင့် မိုးဇလဌာနက အနီရောင်အဆင့်သတ်မှတ်လိုက်ပါတယ်။

   လက်ရှိ မုန်တိုင်းငယ်ရဲ့ အမြင့်ဆုံးလေတိုက်နှုန်းဟာ တစ်နာရီကို ၃၅ မိုင်နှုန်းဖြစ်တယ်လို့ ဆိုပါတယ်။

   ဒီမုန်တိုင်းငယ်ဟာ နောက် ၁၂ နာရီအတွင်းမှာ အားကောင်းတဲ့ မုန်တိုင်းငယ်အဖြစ်ပြောင်းသွားပြီး ရန်ကုန်တိုင်းဒေသကြီး၊ သုံးခွမြို့ နဲ့ မွန်ပြည်နယ်၊ ကျိုက်ထိုမြို့ကြားကို ဖြတ်မယ် လို့ မိုးဇလက ခန့်မှန်းပါတယ်။

   နောက် ၃၆ နာရီအတွင်းမှာတော့ ရန်ကုန်၊ ပဲခူးနဲ့ မကွေးတိုင်းဒေသကြီးတွေကို ဆက်ပြီးဖြတ်သန်းသွားမယ်လို့ ထုတ်ပြန်ထားပါတယ်။

   လက်ရှိရန်ကုန်မြို့ရဲ့ နေရာအနှံ့မှာလည်း မိုးကြီးလေကြီးတိုက်ခတ်နေတယ်လို့ မြို့ခံတွေက ပြောကြပါတယ်။

5. လွန်ခဲ့သော ၂ နာရီ ကကျောက်တော်မြို့က ဈေး၀င်းကို စစ်တပ်ဗုံးကြဲမှု ထိခိုက်သေဆုံးသူရှိ

   ရခိုင်ပြည်နယ်ထဲ အာရက္ခတပ်တော် (အေအေ) ထိန်းချုပ်ထားတဲ့ ကျောက်တော်မြို့၊ အိန္ဒိယဈေးကို စစ်တပ်က ဒီကနေ့ လေကြောင်းကနေ ဗုံးကြဲတိုက်ခိုက်ခဲ့တာကြောင့် ထိခိုက်သေဆုံးသူရှိတယ်လို့ အေအေက ကနဦး သတင်းထုတ်ပါတယ်။

   ဒီနေ့ နေ့လယ် ၁၂ နာရီကျော်မှာ စစ်တပ်ရဲ့ ဂျက်ဖိုက်တာတစ်စင်းက ကစ္ဆပနဒီတံတားအနီးက အိန္ဒိယဈေးဝင်းကို လေကြောင်းကနေ ၂ ကြိမ် ဗုံးကြဲတိုက်ခိုက်ခဲ့တာလို့ AA က ပြောပါတယ်။

   ဒီဈေးဟာ လူသုံးကုန်၊ စားသောက်ကုန်တွေ ကုန်တင်၊ ကုန်ချပြီး ရောင်းဝယ်နေကြတဲ့ နေရာလည်း ဖြစ်ပါတယ်။

   စစ်တပ်ရဲ့ ဗုံးကြဲတိုက်ခိုက်မှုကြောင့် အရပ်သားတွေ၊ လမ်းသွားလမ်းလာတွေနဲ့ ဈေးရောင်းဈေးဝယ်သူတွေ ထိခိုက်ဒဏ်ရာရခဲ့ပြီး သေဆုံးသူတွေလည်း ရှိခဲ့တယ်လို့ အေအေက ထုတ်ပြန်ပါတယ်။

   လူမှုကွန်ရက်ပေါ်မှာ ပျံ့နှံ့လာတဲ့ရုပ်သံဖိုင်တစ်ခုမှာတော့ ဆိုင်ကယ်တခြား လူတစ်ခြားဖြစ်ပြီး အမျိုးသားတစ်ဦး လဲကျနေတာကိုလည်း တွေ့ရပါတယ်။

   စစ်တပ်ဟာ ဒီဈေးကို ပြီးခဲ့တဲ့ ဇွန်လတုန်းကလည်း လေကြောင်းတိုက်ခိုက်ခဲ့ပြီး အခုတခေါက်က ဒုတိယအကြိမ်လေကြောင်းတိုက်ခိုက်မှုဖြစ်ပါတယ်။

6. လွန်ခဲ့သော ၃ နာရီ ကရုပ်သံ - ထား၀ယ်ကနေ မြင်တွေ့ရတဲ့လောင်းလုံး တောင်တန်းမြေပြိုမှု

   လောင်းလုံးတောင်တန်းမြေပြိုကျမှုကို ထား၀ယ်ဘက်ခြမ်းကနေ ရိုက်ကူးထားတဲ့ ရုပ်သံတစ်ခုကို ဒေသခံတစ်ဦးက ဘီဘီစီကို ပေးပို့လာပါတယ်။

   တနင်္သာရီတိုင်း၊ ထား၀ယ်ခရိုင်ထဲက လောင်းလုံးမြို့နယ်ထဲ စက်တင်ဘာ ၂၆ ရက်နဲ့ ၂၇ ရက်မှာဖြစ်ပွားတဲ့ လောင်းလုံးတောင်တန်း မြေပြိုကျမှုတွေမှာ သေဆုံးသူ ၁၃ ဦးအထိရှိလာတယ်လို့ ထား၀ယ်အမျိုးသားအဖွဲ့ချုပ်က ပြောပါတယ်။

   အင်း၀တောင်နဲ့ သဲပုံရွာရှိတဲ့မင်းရပ်တောင်တို့မှာလည်း မြေပြိုကျနေတာကို ရုပ်သံထဲမှာ မြင်နိုင်ပါတယ်။

   လောင်းလုံးတောင်တန်း နေရာအချို့မှာ မြေပြိုပြီး တောင်ကျရေတွေ စီးကျနေတာကိုလည်း မြင်ရတယ်လို့ ဒေသခံက ရုပ်သံထဲမှာ ပြောထားပါတယ်။

7. လွန်ခဲ့သော ၄ နာရီ ကသတင်းထူး, ထားဝယ်ဒေသ တောင်ပြို ရေကြီးမှု လူသေဆုံးမှု ၁၃ ဦးအထိရှိလာ, ကျေးရွာပေါင်း ၆၀ ကျော်ရေဘေးသင့်

   တနင်္သာရီတိုင်းဒေသကြီး၊ ထားဝယ်ဒေသမှာ စက်တင်ဘာ ၂၆ ရက်ကစလို့ မိုးအဆက်မပြတ်ရွာသွန်းမှုကြောင့် ကျေးရွာပေါင်း ၆၀ ကျော် ရေဘေးသင့်နေပြီး လူသေဆုံးမှု ၁၃ ဦးအထိ ရှိလာပြီလို့ ထားဝယ်အမျိုးသားအဖွဲ့ချုပ်/ထားဝယ်တပ်တော် ရဲ့ ပြောရေးဆိုခွင့်ရှိသူ ကိုယောနသံက ဘီဘီစီကို ပြောပါတယ်။

   “လောင်းလုံးမြို့နယ်မှာ အနည်းဆုံး ၁၀ ဦး၊ ထားဝယ်မြို့နယ်မှာ ၂ ဦး နဲ့ သရက်ချောင်းမြို့နယ်မှာ ၁ ဦး၊ စုစုပေါင်း ၁၃ ဦးသေဆုံးခဲ့တာကို ကျွန်တော်တို့ အတည်ပြုထားနိုင်ပါတယ်” လို့ ကိုယောနသံက ပြောပါတယ်။

   မိုင်ပေါင်း ၅၀ ကျော်ရှည်လျားတဲ့ လောင်းလုံးတောင်တန်းတလျှောက်မှာလည်း မြေပြိုမှုတွေဆက်တိုက် ဖြစ်နေလို့ ကယ်ဆယ်ရေးလုပ်ငန်းတွေ လုပ်ဖို့ ဝန်နဲ့ အားမမျှတာတွေဖြစ်နေတယ်လို့ မြေပြင်ကယ်ဆယ်ရေးအဖွဲ့နဲ့ ချိတ်ဆက်ပေးနေသူတစ်ဦးက ဘီဘီစီကို ပြောပါတယ်။

   “လောင်းလုံးတောင်ကြောတလျှောက်မှာ ရွာပေါင်း ၅၀ လောက်ရှိတယ်။ အခုက တလျှောက်လုံးမြေပြိုနေတာ။ ကယ်ဆယ်ရေးလာလုပ်နေတဲ့ ရွာတွေက ၄၊ ၅၊ ၆ ရွာလောက်ပဲရှိသေးတယ်။ အဲဒါကြောင့် တခြားရွာတွေက ကိုယ်ထူကိုယ်ထ လုပ်နေရတယ်” လို့ သူက ပြောပါတယ်။

   လက်ရှိ ရေဘေးကြောင့် ထားဝယ်ဒေသမှာ ပျောက်ဆုံးနေသူဦး‌ရေကလည်း အယောက် ၃၀ နဲ့ အထက်မှာ ရှိနေတယ်လို့ ထားဝယ်အမျိုးသားအဖွဲ့ချုပ်ဆီကနေ သိရပါတယ်။

   နောက်ပြီး တောင်ပြိုမှုတွေကြောင့်လည်း နေအိမ်အလုံးပေါင်း ၅၀ ကျော် နဲ့ တံတား ၁၀ စင်းလောက် ပျက်စီးသွားခဲ့တယ်လို့ ဆိုပါတယ်။

8. လွန်ခဲ့သော ၄ နာရီ ကရေဘေး - ရေကြီးမှု ဘာကြောင့်ဖြစ်တာလဲ၊ ရေကြီးလာရင် ဘာတွေလုပ်ရမလဲ

   ရာသီဥတုပြောင်းလဲမှုကြောင့် မိုးကြီးတဲ့အဖြစ်က ကမ္ဘာနေရာ အနှံ့အပြားမှာ အရင်ကထက် ပိုဖြစ်လာကြောင်း လေ့လာမှုတွေက တဆင့် တွေ့လာရသလို ဒီလို အဖြစ်တွေက ရှေ့မှာ ပိုပြီးဆက်ဖြစ်လာနိုင်တယ်လို့ ပညာရှင်တွေက သတိပေးနေပါတယ်။

   ၂၀၂၄ အတွင်းမှာ အာဖဂန်နစ္စတန်၊ ဘရာဇီး၊ အင်ဒိုနီးရှား၊ ကင်ညာ၊ အိုမန်၊ ယူအေအီး အာရပ်စော်ဘွားများနိုင်ငံတို့ အပါအဝင် နိုင်ငံအများအပြားမှာ ရေကြီးတဲ့ဒဏ်ကို ခံခဲ့ကြရပါတယ်။

   အဲဒီ ရေကြီးတဲ့ အဖြစ်တိုင်းမှာ ပျက်စီးမှုက အကြီးအမားဖြစ်ခဲ့သလို လူထောင်ပေါင်းများစွာ အိုးအိမ်မဲ့ ဖြစ်ခဲ့ရပါတယ်။

   ဘာ့ကြောင့်ရေကြီးလာတာလဲ၊ ရေကြီးတာက ဘာလို့ ပိုဆိုးလာနေတာလဲ၊ ရေကြီးလာရင် ဘာတွေလုပ်နိုင်မလဲ၊ တခြားသူတွေကို ဘယ်လိုကူနိုင်မလဲ ဆိုတာတွေကို ဒီမှာ ကြည့်ရအောင်ပါ။

9. လွန်ခဲ့သော ၅ နာရီ ကသတင်းထူး, မွန် - တနင်္သာရီကမ်းရိုးတန်းက လေဖိအားနည်းရပ်၀န်း မုန်တိုင်းငယ်အဖြစ် အားကောင်းလာနိုင်

   မွန် - တနင်္သာရီ ကမ်းရိုးတန်းမှာဖြစ်ပေါ်နေတဲ့ အားကောင်းတဲ့လေဖိအားနည်းရပ်၀န်းဟာ လာမယ့် ၂၄ နာရီအတွင်း မုန်တိုင်းငယ်အဖြစ် ပိုအားကောင်းလာနိုင်တယ်လို့ မိုးလေ၀သနဲ့ ဇလဗေဒ ညွှန်ကြားမှု ဦးစီးဌာနက ပြီးခဲ့တဲ့မိနစ်ပိုင်းက သတင်းထုတ်ပြန်ပါတယ်။

   လက်ရှိမှာ အားကောင်းတဲ့ လေဖိအားနည်းရပ်၀န်းဟာ မုတ္တမကွေ့၊ မွန်- တနင်္သာရီ ကမ်းရိုးတန်းမှာ ဆက်လက် တည်ရှိနေတယ်လို့ ဆိုပါတယ်။

   ဒီလေဖိအားနည်းရပ်၀န်းဟာ လာမယ့် ၂၄ နာရီအတွင်း မုန်တိုင်းငယ်ဖြစ်လာနိုင်တဲ့အခါ ကပ္ပလီပင်လယ်ပြင်မြောက်ပိုင်းနဲ့ သူနဲ့ဆက်စပ်တဲ့ ဧရာဝတီမြစ်ဝကျွန်းပေါ်ဒေသတွေကို ဖြတ်ကျော်နိုင်တယ်လို့လည်း ခန့်မှန်းပါတယ်။

   ဒါကြောင့် ရန်ကုန်ကနေ တနင်္သာရီ ကမ်းရိုးတန်းတလျှောက်နဲ့ ရန်ကုန်ကနေ ရခိုင်ကမ်းရိုးတန်းတလျှောက် နေရာအနှံ့အပြား မိုးထစ်ချုန်းရွာပြီး ဒေသအလိုက် မိုးကြီးနိုင်တယ်လို့လည်း မိုးဇလက ခန့်မှန်းပါတယ်။

10. လွန်ခဲ့သော ၆ နာရီ ကရေဘေးသင့် သရက်ချောင်းမြို့နယ်မှာ မ‌ရွေ့မပြောင်းနိုင်တဲ့ သက်ကြီးရွယ်အိုတွေ ပိတ်မိနေ

    တနင်္သာရီတိုင်း၊ သရက်ချောင်းမြို့နယ်မှာ ကျေးရွာ ဒါဇင်နဲ့ ချီရေနစ်မြုပ်နေပြီး သက်ကြီးရွယ်အိုတွေ နေအိမ်တွေထဲ ပိတ်မိနေတယ်လို့ မိသားစုဝင်တချို့က ဘီဘီစီကို ပြောပါတယ်။

    သရက်ချောင်းမြို့နယ်၊ ရောင်းမော်ရွာတောင်ပိုင်း၊ ညောင်ပင်ကြီးရွာရှင်နတ်ကွန်းအနီး တောင်ပိုင်းလမ်း အိမ်အမှတ် ၁၃၅ မှာဆိုရင် အသက် ၈၉ နှစ်ရွယ် အဘွားအိုတစ်ဦး၊ လမ်းမလျှောက်နိုင်တဲ့ အသက် ၅၆ နှစ်အရွယ် အမျိုးသမီးတစ်ဦးနဲ့ အသက် ၅ နှစ်အရွယ်ကလေးတစ်ဦး ပိတ်မိနေတယ်လို့ မိသားစုဝင်တစ်ဦးက ပြောပါတယ်။

    ဒီရွာဟာ ထားဝယ်က နာမည်ကြီး ရှင်ကိုးရှင်ဘုရားထဲက ရှင်မုတ္ထီးရွာရဲ့မျက်နှာချင်းဆိုင်ရွာ ဖြစ်တယ်လို့ ဆိုပါတယ်။

    “ရေက အခုမနက်မှ ရုတ်တရက်တက်လာတာဆိုတော့ ပြောင်းရွှေ့ဖို့ ဘယ်လိုမှ မမှီလောက်ဘူး။ အိမ်က နှစ်ထပ်အိမ်ပါ။ သူတို့က ခြေမသန်ကြတော့ အောက်မှာပဲနေကြပါတယ်။ အပေါ်ကိုတက်ဖို့ ဘယ်လိုမှ အဆင်ပြေမယ်မထင်ဘူး။ သားတွေကလည်း အကုန်နိုင်ငံခြားမှာပါ” လို့ မိသားစုဝင်တစ်ဦးက ပြောပါတယ်။

    အနီးတဝိုက်ကနေအိမ်တွေမှာလည်း ပိတ်မိနေသူတွေ ရှိနေတယ်လို့ သူက ဆိုပါတယ်။

    ဒီရွာဟာ အတွင်းကျတဲ့ရွာဖြစ်တာကြောင့် ကယ်ဆယ်ရေးတွေရောက်လာဖို့ကလည်း ခက်ခဲနေတယ်လို့ ဆိုပါတယ်။

    လက်ရှိ ရေကြီးမှုကြောင့် သရက်ချောင်းမြို့နယ်မှာ မနေ့ကစလို့ ဆက်သွယ်ရေးတွေလည်း ပြတ်တောက်နေတယ်လို့ ဆိုပါတယ်။

    လွန်ခဲ့တဲ့ နှစ်ရက်လောက်က မိသားစုနဲ့ နောက်ဆုံး အဆက်အသွယ်ရခဲ့ပြီး အဲဒီအချိန်မှာ အိမ်ထဲရေတွေ ဝင်ရောက်နေပြီလို့ ပြောပါတယ်။ အဲဒီနောက်ပိုင်းမှာတော့ အိမ်နဲ့ အဆက်အသွယ်ပြတ်တောက် သွားခဲ့တယ်လို့ ဆိုပါတယ်။

    လက်ရှိ သရက်ချောင်းမြို့နယ်ထဲက ရောင်းမော်၊ ညောင်ဇင်၊ ကြာအင်း၊ ဥတ္တူ၊ ကင်းရှေ့၊ မိုးရွှေကုန်း၊ စော်ဖျား၊ ကျောက်လှေကား၊ ထီးဖဒို၊ ရှင်မုတ္ထီး၊ ရန်တောင်၊ သင်းကျွန်း၊ သရက်နှစ်ခွ၊ သရက်ချောင်းမြို့မရပ်ကွက်၊ ကျောက်မြောင်းရပ်ကွက်၊ ပန်းတောရပ်ကွက်၊ တီတွတ်ပြင်ရွာ(လမ်းအနောက်ဘက်) နဲ့ ပဲဒက်ရွာတွေမှာ ရေကြီးမှုဖြစ်နေတယ်လို့ ဒေသတွင်း သတင်းဌာန Dawei Watch က ဖော်ပြပါတယ်။

    သရောက်ချောင်းမြို့ပေါ်မှာလည်း ရေတွေ ဖုံးလွှမ်းနေပြီလို့ တနင်္သာရီတိုင်းအစိုးရအဖွဲ့က ကြေညာထားပါတယ်။

    Petro Green ဆီဆိုင်ရှေ့ကနေ မြို့တော်ခန်းမရှေ့အထိ အကွာအဝေး ပေ ၂၀၀ ခန့်မှာ ရေအမြင့်က ၁ ပေခန့်မှာ ရှိနေတယ်လို့ ထုတ်ပြန်ထားပါတယ်။

    ထားဝယ်-မြိတ် ကားလမ်းပေါ်မှာလည်း ရေတွေ ဖုံးလွှမ်းနေတယ်လို့ တနင်္သာရီတိုင်းအစိုးရအဖွဲ့က ကြေညာပါတယ်။

11. လွန်ခဲ့သော ၆ နာရီ ကဘန်ကောက်မှာ မိုးဖွဲရွာ၊ အထူးပိတ်ရက် ၂ ရက်စတင်

    မြန်မာက တနင်္သာရီကမ်းရိုးတန်းကို ဖြတ်ကျော်တိုက်ခတ်နေတဲ့ လေဖိအားနည်း ရပ်၀န်းဟာ ထိုင်းနိုင်ငံ၊ ဘန်ကောက်မြို့ ကောင်းကင်မှာ ပြီးခဲ့တဲ့သီတင်းပတ်ကုန်ပိုင်းမှာ စတင်ခဲ့တာဖြစ်ပါတယ်။

    ဒီအခြေအနေကြောင့် မြို့တော်ဘန်ကောက်မှာ မကြုံစဖူး ရေကြီးရေလျှံမှုတွေဖြစ်ခဲ့လို့ ထိုင်းအစိုးရဟာ ဒီနေ့နဲ့ မနက်ဖြန်ကို အထူးအားလပ်ရက် ၂ ရက်ဖြစ် သတ်မှတ်ပါတယ်။

    ရေကြီးနေတာကြောင့်ဖြစ်တဲ့ ခရီးသွားရတာ ကမောက်ကမဖြစ်တာကို လျှော့ချဖို့နဲ့ လူထုကို ကာကွယ်ရေးအတွက် အခုလိုဆုံးဖြတ်တာလို့ဆိုပါတယ်။

    လက်ရှိမှာ ဘန်ကောက်မြို့မှာ ပြီးခဲ့တဲ့ သောကြာနေ့ကစလို့ နာရီ ၅၀ ကျော်ကြာ အဆက်မပြတ်ရွာခဲ့တဲ့မိုးကြောင့် တင်ကျန်ခဲ့တဲ့ရေတွေကို စက်တွေနဲ့စုပ်ထုတ်နေဆဲဖြစ်ပါတယ်။

    မိုးရေတွေ တဖြည်းဖြည်းလျော့လာပြီဖြစ်ပေမဲ့ ရေလွှမ်းမှုအဆိုးဆုံးခံခဲ့ရတဲ့ လမ်းမကြီး ၂၀ ကျော်ထဲက ၉ လမ်းမှာ ရေတွေ တင်နေဆဲဖြစ်တာကြောင့် ဆိုင်ကယ်တွေ မဖြတ်သန်းဖို့ အာဏာပိုင်တွေက ဒီနေ့ မနက်ပိုင်းမှာ သတင်းထုတ်ပြန်ပါတယ်။

    လေဖိအားနည်းရပ်၀န်းဟာ ထိုင်းကိုဖြတ်ကျော်ပြီးတဲ့နောက် ပြီးခဲ့တဲ့ စနေနေ့ နှောင်းပိုင်းကတည်းက မြန်မာနိုင်ငံ၊ တနင်္သာရီကမ်းရိုးတန်းကို ဖြတ်ကျော် ၀င်ရောက်နေတာဖြစ်ပါတယ်။

    ဒီအရှိန်ကြောင့် မိုးများပြီး ထားဝယ်ခရိုင်ထဲက လောင်းလုံးမြို့နယ်မှာ လောင်းလုံးတောင်တန်း မြေပြိုကျမှုတွေဖြစ်နေပါတယ်။

12. လွန်ခဲ့သော ၇ နာရီ ကမိုးများလို့ ထားဝယ်မြို့ပေါ်အထိ ရေတက်လာပြီး နေအိမ်တွေ ရေမြုပ်

    တနင်္သာရီတိုင်းထဲ မိုးအဆက်မပြတ်ရွာသွန်းနေလို့ ရေကြီးတာကြုံနေရတဲ့ ထားဝယ်ခရိုင်ထဲမှာ မြေပြိုတာတွေ ဖြစ်နေချိန်မှာပဲ ထားဝယ်မြို့ပေါ်မှာလည်း ဒီကနေ့မနက်ကစလို့ မြို့ပေါ်ရပ်ကွက်တွေအထိ ရေတက်လာလို့ နေအိမ်တွေနစ်မြုပ်နေတယ်လို့ ပရဟိအသင်းတွေက ပြောပါတယ်။

    “အခု ရေက လုံးခနဲတက်လာနေတာ။ မြို့ပေါ်ရပ်ကွက်တွေအထိ ဝင်နေပြီ” လို့ ထားဝယ်မြို့က ပရဟိအသင်းရဲ့ တာဝန်ရှိသူက ပြောပါတယ်။

    လက်ရှိ ကရပ်ပြင် ၊ ကညုံ ၊ ရှမ္မလည်ဆွဲ ၊ ကြက်စားပြင် နဲ့ ဘုမ္မော် ရပ်ကွက်တွေဟာ တစ်ထပ်နေအိမ်တချို့ ရေနစ်မြုပ်နေပြီလို့ ထားဝယ်သတင်းတွေကို အဓိက ရေးသားဖော်ပြတဲ့ Dawei Watch သတင်းဌာနက ဖော်ပြပါတယ်။

    ‌မိုးများလို့ ရေကြီးတာနဲ့ လောင်းလုံးတောင်တန်းကနေ မြေပြိုမှု ဒဏ်ကို အဆိုးဆုံးခံရနေတဲ့ လောင်းလုံးမြို့နယ်၊ ကဒတ်ငယ်ရွာမှာလည်း မနေ့ညပိုင်းက ဘုန်းကြီးကျောင်းတစ်ကျောင်းပေါ် မြေပြိုကျလို့ နေအိမ် ၅ လုံးထက်မနည်းပျက်စီးသွားလို့ ဇမ္ဗူသီရိအရေးပေါ်ကယ်ဆယ်ရေးအဖွဲ့က ပြောပါတယ်။

    “သေဆုံးသူတွေလည်းရှိတယ်။ လူတွေလည်း အဲဒီမှာ ပိတ်မိနေတယ်။ ကျွန်တော်တို့ အခုကယ်ဖို့ လုပ်နေတယ်” လို့ ဇမ္ဗူသီရိအ‌ရေးပေါ်ကယ်ဆယ်ရေးအဖွဲ့ဝင်တစ်ဦးက ပြောပါတယ်။

    လောင်းလုံးမြို့နယ်မှာ မိုးဆက်ရွာနေပြီး ရေအမြင့်ကလည်း လူ့အရပ်တစ်ရပ်စာနီးပါးလောက်ဖြစ်နေတယ်လို့ သူကပြောပါတယ်။

    ထိုင်းနိုင်ငံ၊ ဘန်ကောက်မြို့မှာ ဖြစ်ပေါ်ခဲ့တဲ့ လေဖိအားနည်းရပ်ဝန်းဟာ တနင်္သာရီ ကမ်းရိုးတန်းကို ဖြတ်ချိန် ထားဝယ်ဒေသမှာ မိုးကြီးပြီး ရေကြီးမှုကြုံနေရတာလို့ မိုးလေဝသနှင့် ဇလဗေဒညွှန်ကြားမှုဦးစီးဌာနက ထုတ်ပြန်ထားပါတယ်။

    စက်တင်ဘာ ၂၆ ရက်ကဆိုရင် ထားဝယ်မြို့မှာ စံချိန်တင် မိုးရေလက်မ ၁၁.၀၂ လက်မ အထိ ရှိခဲ့တယ်လို့ မိုးဇလက ထုတ်ပြန်ပါတယ်။

    လက်ရှိမှာ အဲဒီလေဖိအားနည်း ရပ်၀န်းဟာ မွန်-တနင်္သာရီကမ်းရိုးတန်းမှာ အားကောင်းနေပြီး နောက် ၂၄ နာရီမှာ မြောက်-အနောက်မြောက်ကို ရွေ့နိုင်ပြီး မုန်တိုင်းငယ်အဖြစ် ကပ္ပလီပင်လယ်ပြင်မြောက်ပိုင်းနဲ့ ဧရာဝတီမြစ်ဝကျွန်းပေါ်‌ဒေသကို ဖြတ်သန်းနိုင်တယ်လို့ မိုးဇလက အစောပိုင်းကပဲ သတင်းထုတ်ပါတယ်။

13. လွန်ခဲ့သော ၇ နာရီ က

    မင်္ဂလာပါ။ စက်တင်ဘာ ၂၈ ရက် ဘီဘီစီသတင်းများ တိုက်ရိုက်တင်ဆက်မှု စတင်ပြီဖြစ်ပါတယ်။ နိုင်ငံတဝန်းနောက်ဆုံးရ သတင်းများကို တိုက်ရိုက်ထုတ်လွှင့်ချက်မှာ အချိန်နဲ့ တပြေးညီ ဖတ်ရှုနိုင်ပါတယ်။