အောက်တိုဘာ ၃ ရက် သတင်းများအနှစ်ချုပ် - လောင်းလုံ တောကျဲရွာ တောင်မပြိုခင်နဲ့ တောင်ပြိုပြီးအခြေအနေတွေ
ဓာတ်ပုံ ရင်းမြစ်, TSBM
စက်တင်ဘာ ၂၆ ရက်ညပိုင်းကစပြီး တောင်ပြိုတာကြုံရတဲ့ လောင်းလုံမြို့နယ် တောကျဲရွာက တောင်မပြိုခင် ပကတိအခြေအနေနဲ့ တောင်ပြိုပြီးနောက်ပိုင်း အခြေအနေကို TSBM ထားဝယ်ဒေသကူညီရေး mission ရဲ့ နည်းပညာအဖွဲ့ က ရိုက်ကူးထုတ်ပြန်လာပါတယ်။
စက်တင်ဘာ ၂၅ ကနေ စရွာလိုက်တဲ့ မိုးရေတွေနဲ့ တောင်ရဲ့ဖြစ်တည်မှု မြေနဲ့အောက်ခံကျောက်၊ သစ်ပင်နဲ့ ရေကြောတွေဟာ အခြေအနေတစ်ခုမှာ ခံနိုင်ရည်ကျော်ပြီး မူလပုံပျက်ကာ မြေပြိုမှုဖြစ်ပွားတာလို့ အဖွဲ့က ဆိုပါတယ်။
ဒီရွာက အိမ်ခြေ ၃၆ လုံးဟာ မြေအောက်ရောက်သွားခဲ့ပြီး ၁၂ လုံးကတော့ မြေအောက်မရောက်ပေမဲ့ ပျက်စီးခဲ့ပါတယ်။
သစ်ပင်တွေဖုံးလွှမ်းနေခဲ့တဲ့ တောင်ကြောတွေနေရာမှာ မြေပြိုမှုကြောင့် အပင်တွေပျောက်ပြီး တောင်ကြောတလျှောက် မြေတွေ အကြောင်းလိုက်ပြိုကျနေတာတွေ့ရပါတယ်။ တောကျဲရွာမှာ မြေပြိုကျတာ ဒါမှမဟုတ် မြေအောက် ဖုံးလွှမ်းသွားတဲ့ဧရိယာ ၂၀.၆ ဟက်တာအထိရှိပါတယ်။ ရွာရဲ့မြောက်ပိုင်း၊ အနောက်ခြမ်းမှာ မြေပြိုရာ လမ်းကြောင်းနှစ်ခုဟာ တစ်ခုတည်းအဖြစ် ပေါင်းစည်းသွားပြီး လမ်းမအထိ ဖုံးလွှမ်းသွားခဲ့ပါတယ်။
အဲဒီမြေပြိုလမ်းကြောင်းအောက်မှာ အိမ် ၂၉ လုံးက မြေကြီးအောက်ရောက်သွားခဲ့ရပါတယ်။ ဒီမြေပြိုမှုမှာ ၅ ဦးသေဆုံးတယ်လို့ ကယ်ဆယ်ရေးအဖွဲ့ဘက်ကဆိုပါတယ်။
ချင်းပြည်မှာမိုးများပြီး တံတားနဲ့လမ်းပိုင်း ၁၀ နေရာထက်မနည်းပျက်စီး
ဓာတ်ပုံ ရင်းမြစ်, Ministry Of Social Development, Government Of Chinland
အမျိုးသား ၁ ဦးရေစီးနဲ့မြောပါသေဆုံး
ချင်းပြည်နယ်ထဲမှာ မိုးရက်ဆက်ရွာသွန်းပြီး ရေတိုက်စားလို့ အရေးကြီး တံတားနဲ့လမ်းပိုင်း ၁၀ နေရာထက်မနည်း ပျက်စီးတယ်လို့ ချင်းတော်လှန်ရေးအဖွဲ့တွေနဲ့ဖွဲ့စည်းထားတဲ့ ချင်းပြည်အစိုးရရဲ့ တာဝန်ရှိသူတစ်ဦးက ဘီဘီစီကိုပြောပါတယ်။
"တံတားက ၆ စင်းထက်မနည်းပျက်ပါတယ်။ လမ်းတွေ၊ ဆေးရုံတွေလည်းပါတယ်။ ထန်တလန်နဲ့ ဖလမ်းအစပ်မှာ အမျိုးသားတစ်ယောက်ရေထဲပါသွားပြီ သေဆုံးတာရှိပါတယ်" လို့ ချင်းပြည်အစိုးရအဖွဲ့ရဲ့ တာဝန်ရှိသူက ပြောပါတယ်။ ရေကြီးရေလျှံတာနဲ့ မြေပြိုတာကို ထန်တလန်နဲ့ ဟားခါးမြို့နယ်က ချင်းပြည်အစိုးရထိန်းချုပ်နယ်မြေတွေမှာ ကြုံနေရတာပါ။
CDF ထန်တလန်ရဲ့ထုတ်ပြန်ချက်အရ ထန်တလန်မြို့နယ်ထဲက လမ်း ၇ လမ်း ပျက်စီးပြီး လမ်းပိတ်ဆို့နေတာ၊ ပျက်စီးတာက ၁၀ နေရာရှိနေတာပါ။
ဒါ့အပြင်ဆေးရုံ၊ဆေးခန်းတွေ၊ လူနေအိမ်၊ စာသင်ဆောင်တွေ၊ ကိုယ်ထူကိုယ်ထလျှပ်စစ်ဓာတ်အားပေးနေရာတွေပါ ပျက်စီးပြီးဒေသခံလူထု ဒုက္ခရောက်နေတယ်လို့ ချင်းပြည်အစိုးရရဲ့ လူမှုဖွံ့ဖြိုးရေးဝန်ကြီးဌာနက အောက်တိုဘာ ၁ ရက်မှာ ထုတ်ပြန်ပါတယ်။
ချင်းပြည်နယ်ဟာ လမ်းပန်းဆက်သွယ်ရေးအခက်အခဲကြောင့် ပြည်ပကထက် ကုန်ဈေးနှုန်း ၃ ဆကနေ ၅ ဆပိုမိုမြင့်မားတယ်လို့ ဒေသခံတချို့က ဘီဘီစီကိုပြောပါတယ်။ ဒီနှစ်မိုးတွင်းမှာ မကွေးနဲ့ချင်းအစပ်က လမ်းပိုင်းတွေပျက်စီးပြီး သယ်ယူပို့ဆောင်ရေးခက်ခဲတာကြောင့် ကုန်ဈေးနှုန်းမနှစ်ကထက် မြင့်တက်နေတယ်လို့လည်း ချင်းတောင်ပိုင်းက ဒေသခံတစ်ဦးက ပြောပါတယ်။ ချင်းမြောက်ပိုင်းက ရေဘေးကြောင့် လမ်းနဲ့ တံတားပျက်စီးမှုတွေဟာ ဒေသခံတွေအပေါ် သက်ရောက်မှုများနိုင်တာဖြစ်ပါတယ်။
ရသေ့တောင်မှာ လေကြောင်းဗုံးကြဲခံရ
ဓာတ်ပုံ ရင်းမြစ်, ရခိုင်မျိုးချစ်လူငယ်ဖောင်ဒေးရှင်း
နောက်ဆုံးရ သတင်းနဲ့ မျက်မှောက်ရေးရာအစီအစဉ်များ
ပေါ့ဒ်ကတ်စ်အစီအစဉ်များ
End of podcast promotion
ရခိုင်ပြည်နယ်က ရသေ့တောင်မြို့နယ်ကို ဒီမနက်ပိုင်းမှာ စစ်တပ်က လေကြောင်း ဗုံးကြဲသွားတယ်လို့ မြေပြင်အခြေအနေသိရှိသူက ဘီဘီစီကိုပြောပါတယ်။
အရပ်သားထိခိုက်သေဆုံးမှုကိုတော့ အတိအကျမသိရသေးဘူးလို့ဆိုပါတယ်။
အာရက္ခတပ်တော် အေအေရဲ့ထုတ်ပြန်ချက်အရ ရသေ့တောင်မြို့နယ်က ကူတောင်ရွာကို စက်တင်ဘာ ၃၀ ရက်လည်း ဂျက်ဖိုက်တာ ၂ စီးနဲ့ ဗုံးကြဲတာကြောင့် လင်မယားနှစ်ဦးမှာ အမျိုးသား သေဆုံးပြီး အမျိုးသမီးက ဒဏ်ရာရပါတယ်။
ဒီရက်ပိုင်းမှာ ဆက်တိုက်ဗုံးကြဲခံနေရတဲ့ ပုဏ္ဏားကျွန်းမြို့နယ်ထဲကို မနေ့ညတုန်းကလည်း လေကြောင်းဗုံးကြဲသွားတယ်လို့ စစ်တပ်ရဲ့လေကြောင်းတိုက်ခိုက်မှုကို စောင့်ကြည့်နေတဲ့ ဝေဟင်အဖွဲ့ကထုတ်ပြန်ပါတယ်။
ဒီတိုက်ခိုက်မှုရဲ့ ထိခိုက်မှုကိုတော့ ပုဏ္ဏားကျွန်းလူငယ်အဖွဲ့ကိုဘီဘီစီက ဆက်သွယ် မေးမြန်းထားပါတယ်။
အဲဒီနေ့ မနက်ပိုင်းကလည်း ပုဏ္ဏားကျွန်းမြို့နယ်၊ အောင်ဖြူပြင်ရွာက ကားပြင်ဆိုင်ကို လေကြောင်းဗုံးကြဲခံရလို့ ပိုင်ရှင်ရဲ့ဇနီးနဲ့ အလုပ်သမားတို့ ဒဏ်ရာရတယ်လို့ အေအေကထုတ်ပြန်ထားတာပါ။
ရခိုင်ပြည်နယ်ထဲမှာ ၆ ရက်အတွင်း မြို့နယ် ၅ ခုမှာ လေကြောင်းတိုက်ခိုက်မှုကြောင့် ၅၁ ဦးသေဆုံးပြီး ၆၉ ဦးထိခိုက်ဒဏ်ရာရတာကို အေအေရဲ့အချက်အလက်အရသိရပါတယ်။
ဒီထဲမှာ အရပ်သား ၅၀ အစုလိုက်သေဆုံးပြီး ၅၇ ဦးထိခိုက်ခဲ့တဲ့ ကျောက်တော်အိန္ဒိယဈေးနဲ့ ကစ္ဆပနဒီတံတားဝန်းကျင်တိုက်ခိုက်မှုဟာ အများဆုံးထိခိုက်သေဆုံးမှု ဖြစ်ပါတယ်။
