Cerddoriaeth a thechnegau sain mewn testun gweledol
Yn y ffilm hon cawn gyflwyniad i’r gwahanol fathau o gerddoriaeth a thechnegau sain sy’n gallu cael eu defnyddio mewn rhaglenni a ffilmiau er mwyn creu effaith.
Gwylio fideo: Technegau cerddoriaeth a sain
Sut mae cerddoriaeth a thechnegau sain yn cael eu defnyddio a pham eu bod yn effeithiol
Pan fyddi di’n trafod cyfres deledu neu ffilm, bydd angen i ti feddwl am y technegau gwahanol sy’n cael eu defnyddio gan y cyfarwyddwr, ac esbonio pam eu bod nhw’n effeithiol. Yn y ffilm yma, byddwn ni’n canolbwyntio ar y defnydd o gerddoriaeth a sain.
Beth am ddechrau gyda’r gyfres Hafiach. Dyma’r criw yn sefyll eu harholiad olaf ar ddechrau’r gyfres.
Sylwais di ar y cloc yn tician? Mae’r sain yn cynyddu yn ystod yr olygfa. Mae hyn yn effeithiol oherwydd ei fod yn adlewyrchu’r panig y mae’r cymeriadau’n ei deimlo.
Gall rhythm cyson a chryf greu tensiwn hefyd, fel yn y clip hwn o’r gyfres Craith. Mae’r curiad yn adeiladu at yr uchafbwynt o weld y ferch wrth y rhaeadr.
Yn ogystal â chreu a chynnal tensiwn, mae cerddoriaeth a sain yn gallu torri’r tensiwn hefyd.
Yn y clip hwn o gyfres dditectif Y Gwyll, mae’r gerddoriaeth gyflym yn dod i stop yn annisgwyl. Mae hon yn dechneg glyfar oherwydd wrth i’r gerddoriaeth orffen, mae’r tensiwn yn torri, ac mae’r gwylwyr yn gwybod bod y perygl drosodd am nawr.
Gall sain a cherddoriaeth gyfleu dicter hefyd. Drwy gydol yr olygfa hon clywn un cord, anghytsain, statig yn mynd yn uwch ac yn uwch. Mae’r dechneg hon yn gweithio’n dda oherwydd fod y sain yn adlewyrchu’r ffaith fod dicter y cymeriad yn cynyddu.
Mae diffyg cerddoriaeth hefyd yn gallu creu tensiwn. Dyma olygfa agoriadol y gyfres dditectif, Craith. Ar y dechrau, does dim cerddoriaeth, dim ond sŵn y car ar y ffordd. Mae’r distawrwydd yma yn gwneud i’r gwylwyr deimlo bod rhywbeth ar fin digwydd…
Pan fyddi di’n paratoi ar gyfer yr arholiad, ceisia feddwl - pa gerddoriaeth neu dechnegau sain sy’n cael eu defnyddio a pham eu bod yn effeithiol?
Crynodeb o'r fideo
Mae’r ffilm hon yn dangos sut y mae gwahanol synau’n cael eu defnyddio’n fwriadol er mwyn cyfleu naws neu awyrgylch benodol o fewn golygfa.
Rhai technegau sy’n cael eu defnyddio er mwyn creu effaith yw:
- cynyddu neu leihau sain
- cyflymu neu arafu’r gerddoriaeth
- diffyg sain
Ystyria, beth all y gerddoriaeth neu’r sain ei ddweud wrthyt ti am deimladau’r cymeriadau?
Er enghraifft, yn y sioe Hafiach, mae disgyblion yn eistedd mewn neuadd arholiad ac mae cloc yn tician yn y cefndir. Wrth i’r olygfa barhau, mae sŵn y tician yn cynyddu. Mae’r cyfarwyddwr wedi penderfynu gwneud hyn er mwyn cyfleu panig y cymeriadau a’r brys sydd arnyn nhw i orffen yr arholiad o fewn yr amser.
