MM Abiy Ahmad daawwannaa hojiif Jibuutii galan

Haguuggii Tamsaasa Kallattii

1. 24 Fuulbaana 2026''Qaamoleen dantaa Oromoof qabsaa'an ulee diinaa ta'uurraa of qusachuu qabu''- ABO

   

   Addi Bilisummaa Oromoo (ABO) qaamoleen dantaa Oromoof qabsoofna jedhan ''ulee diinaa ta'uurraa akka of qusatan'' akeekkachiise.

   Ibsa baase keessatti ''qaamoleen dantaa Oromoof qabsoofna jedhan sirna cunqursaa kaleessa ummatni keenya wareegama guddaa itti kafalee of irraa darbate bifa haaraan deebisanii Oromiyaatti harkisan itti gaafatama seenaa jalaa akka hin baane beekuudhaan, deemsa fokkisaa fi qaanfachiisaa akkanaa irraa akka if qusatan,'' hubachiiseera.

   ABOn qaamolee kunneen maqaa eeruu baatus, jaarmiyaa maqaa Oromoon socho'u keessaa tibbana hidhattoota kaan waliin qindoomina kan uume Waraana Bilisummaa Oromoo- ABO-WBO dha.

   Qindoominni hidhattoonni torba uuman garee hidhataa Faannoo, kan godinaalee Wallaggaa fi Horroo Guduruu Wallaggaa keessatti dararaa uummatarratti raawwachuun himataman of keessatti hammata.

   ABO-WBO hidhattoota kunneen waliin qindoomina uumuun namoota hedduu mufachiiseera. ABOnis kanneen mufatan keessaa tokko ta'uu ibsa kanarraa ni hubatama.

   Dhimma kanarratti kan gaafataman gorsaa Ajajaa Olaanaa ABO-WBO Marroo Dirribaa kan ta'an Obbo Jireenyaa Guddataa, tumsi kun adeemsarratti malee tokkoomuu miti jedhan.

   ''Tumsi nuti tolchine adeemsa [procedural] malee... Tokkoffaa, tokko taatan jechuun dogoggora guddaadha. Adeemsa ittiin mariin gaggeeffamu, adeemsa ittiin ummanni keenya bilisa ta'ee gahee mataa isaa ofii isaatiin murteeffatu sana lafa keenye.''

   ''Tumsa Kaabaa'' jechuun kan ibse ABOn imallii fi akeekni isaa Oromiyaa dirree waraanaa taasisuun, dhumaatii kan daranii fi hiraara gara biraa ummata keenyatti fiduudha'' jedhe.

   Akkasumas ''mirgoota haga ammaa gonfataman sharafuu, Oromiyaa deebisanii dhuunfatuun dinagdee biyyaa saamuu, balaa hin hawwamnee fi hin eegamne dachee keenyaa fi ummata keenyatti fiduuf kan sossohamudha,'' jechuun ibse.

   Kanaaf ''ummatni Oromoo mirga saboota Oromiyaa keessaa kabajaa fi tiksaa, garaagarummaa siyaasaa tokko malee qe’ee fi daangaa isaa jabaatee akka tikfatu,'' dhaame.

   Lola Oromiyaa keessaa lubbuu lammiilee hedduu galaafate kanatti furmaata barbaaduuf, araarri dhugaa fi haqa qabeessi dhibamuun lolichi bifa jijjiirrataa akka deemu taasiseera jedhe dhaabi kun.

   ''Kana waan ta’eef, mootummaan paartii Badhaadhinaa (PP), lola Oromiyaa keessaaf furmaata waaraa argamsiisuuf, araara dhugaaf balbala banuu akka qabu ABOn gadi jabeessee gaafata,'' jedhe.

2. 23 Fuulbaana 2026'Aanga'oonni TPLF har'a haleellaa bal'aa banuun isaanii murtee dogoggoraati' - Ambaasaaddara US

   

   Madda suuraa, ENA

   Itoophiyaatti ambaasaaddarri US Ervin J Maasingaa waan tibbana Tigraay fi Affaar keessatti deemaa jiru ilaalchisuun ibsa kenneen:

   "Aanga'oonni TPLF kan jalqaba bara kanaa Yunaayitid Isteetis qoqqobbii irra keesse har'a haleellaa bal'aa banuun murtee dogoggora fudhachuu isaanii arguukootti gaddeera," jedhe.

   Ambaasaaddar Masingaan itti dabaluun, aanga'oonni TPLF kunneen marii Gamtaan Afrikaa (AU) pirezidant Obasaanjoo jalatti yaalaa jiru diduun lola mo'achuu hin dandeenyetti seenuun ummatichaaf waan fayyadu hin qabu jedhe.

   Gareen hidhattootaa biroo gocha akkasii kanarraa fagaachuun abshaalummaadha kan jedhe Ambaasaaddar Masingaan, "US ammallee aanga'oota dabalataa Itoophiyaa gara daandii dogongoraatti dhiiban qoqqobuuf tooftaa kan qabdu yoo ta'u ani ammallee mariin siyaasaa amansiisaa ta'e karaa sirriidha jedheen amana," jedhe.

   Humnoota mootummaa federaalaa fi finciltoota Tigraay gidduutti waraanni jalqabuu isaa ibsi har'a gama lamaanirraa kenname ifa godheera.

   Kaaba Itoophiyaatti humnoota federaalaa fi hidhattoota Tigraay gidduutti waraanni jalqabuun himame

3. 23 Fuulbaana 2026Pireezidantiin Iraan 'weerartoonni akka gaabban goona' jechuun Kora UN irratti dubbatan

   

   Madda suuraa, UN TV Grab

   Kora waliigalaa Dhaabbata Biyyoota Gamtoomanii irratti haasaa kan taasisan pireezidantiin Iraan Maasuud Peesheskiyaan fedhiin biyya isaanii meeshaa waraanaa niwkilaaraa ijaaruu akka hin taane ibsuun, saayinsiin niwkilaaraa fi teeknolojiin nagaaqabeessa ijaaruun garuu hin dhaabbatu jedhan.

   ''Iraan beekumsi niwkilaaraa to'annoo biyyoota muraasa jala tahuu hin fudhattu,'' jedhan.

   Dabaluunis Iraan eegumsa nageenya galaanarraa ''eenyuyyuu akka irraa fudhatu hin eeyyamtu,'' jechuun eeraniiru.

   ''Ofirraa ittisuuf taanaan waraana hin sodaannu. Marii nagaas moggaatti hin dhiisnu,'' jedhaniiru.

   Pireezidantichi ''humna kan barbaannu ofirraa ittisuuf malee biyyoota kaan weeraruuf miti,'' jechuun dubbataniiru.

   ''Boombii atoomikii kan qabu Israa'el dha, qorattoonni garuu Iraan deemu,'' jechuun korichatti dubbii isaanii dhageessisaniiru.

   Kana malees ''Israa'el ni ajjeefti, qoqqobbiin garuu Iraan irratti kaa'ama,'' jechuun qeeqaniiru.

   Pireezidantiin Ameerikaa Donaaldi Tiraamp kora kanarratti Iraan ''balleessuuf' dhaadatanii ture.

   Pireezidantiin Iraan ''kuni mallattoo humnaa dhiibbaa geessisuuf taasifamu dha,'' jechuunis deebii kennaniiru.

   Biyya isaanii irratti dhiibbaa gochuuf yaalamus ''Iraan weerartoonni akka gaabban gooti,'' jechuu dhaadataniiru.

   Dhimma Bahagidduugalaanis ''biyyi kamiyyuu qofaatti nagaansaa hin eegamu. Nagaa kan argannoo waloodhaan, yeroo nagaa dhabnus akkasuma walumaan rakkanna,'' jedhaniiru.

4. 23 Fuulbaana 2026Neetaniyaahuun haasaa pireezadantiin Faransaay Kora UN irratti taasisan 'jibbisiisaa' jedhan

   

   Madda suuraa, Reuters

   Ministirri Mummee Israa'el Beenjaamiin Netaaniyaahuu haasaa Pireezidantiin Faransaay Imaanu'el Maakiroon Kora UN irratti taasisan qeeqan.

   Maakiroon tarkaanfii Israa'el Weesti Baanki keessatti fudhachaa jirtu qeeqaniiru.

   Haamaas lafa warra Falasxiin Isaraa'el qabattee jirtu keessatti sochii murteessaa qabaachuu baatus Isaraa'el garuu tarkaanfii fudhachuu itti fufteetti jedhan.

   Tahus Netaaniyaahuun dubbii Maakiroon kana mormuun Hamaas Weest Baanki keessatti haleellaa baayyee geggeesseera jechuun haasaa pireezidantichaa 'jibbisiisaa' ittiin jedhan.

   Muddamni kuni garaagarummaa dippiloomaasii biyyoota lameen gidduu waggoota dhihoon as mudataa jiru hammeesseera.

   Faransaay furmaati biyyoota lamaa Israa'elif Filisxeem gidduutti akka bu'u barbaaddi. Yeroo garii ammoo tarkaanfii Israa'el Gaazaa keessatti taasiftus fudhattu ni qeeqxi, kanammoo hogganooti Israa'el ni mormu.

5. 23 Fuulbaana 2026Ameerikaan lola Yaman gidduu akka hin galle Huutiin akeekkachiise

   

   Madda suuraa, EPA

   Gorsaan waraanaa garee hidhattootaa Huutii Ameerikaan Saa'udii deeggaruun yoo gidduugalteef Baab el Mendeb banuuf yoo yaalte buufataalee waraanaa biyyattii Baha Gidduugalaa keessa jiran haleella jedhe.

   ''...Ameerikaan gidduugaltummaa waraanaa ykn Baab el Mendeb to'achuuf yoo yaalii taasifte akka sarara diimaa darbiteettii ilaalla,'' jedhe hoggantichi Abdel Mohaammad al Tawaar afgaaffii AFP waliin taasiseen. ''Isa kanaaf ni lolla,'' jedhe.

   Gareen hidhataa Iraaniin deeggaramu bo'oo Galaana Diimaa addunyaatti quunnamsiisu to'achuun booda Saa'udi Arbiyaan Ameerikaafi hawaasa idladdunyaa irraa deeggarsa gaafataa jirti.

   Saa'ud Arabiyaa biyya addunyaa alergii boba'aa guddaa qabdu kana Huutiin Baab el Mendeb cufuun dhiibbaa irratti taasisaa jira.

   Lola Ameerikaa fi US gidduutti hammaateen Ulaa Hormuz cufamuun dabaluu gatii boba'aaf sababa taheera.

6. 23 Fuulbaana 2026Ameerikaan hogganaa waraanaa Sudaan viizaa dhowwatte

   

   Madda suuraa, Getty Images

   Hogganaa waraanaa Sudaan Abdel Fattaa al Burhaan Kora Waliigalaa UN Niiw Yorkitti adeemsifamu irratti haasaa taasisuuf eegaman Ameerikaan viizaa dhowwatte.

   Akka Rooyitaris gabaasetti murtoon kuni yaada Ameerikaan dhukaasa dhaabuu guyyaa 90 dhiyeessiteen walqabata. Yaadichas dhimma Afrikaa fi Arabaa irratti kan gorsan Masaad Boloosiintu dhiyeesse. Kunis lola dhaabuu, deeggarsa namoomaaf karaa banuufi mariin akka jalqabu waamicha dhiyeessa.

   Waraanni Sudaan Burhaaniin hogganamu garuu yaada dhiyaate irratti komii qabu, sababiin ammoo kanaan dura dhukaasa dhaabuun taasifame RSF humna akka jabeeffatu taasise jedhu.

   Dubbiihimaan UN Isteefaan Dujaariik hogganaan olaanaa UN Antooniyoo Guuteeres dhimmachaan waan yaadda'aniif qondaalota US qunnamaniiru jedhe. Hirmaannaan biyyoota miseensa UN hundi hojimaata dhaabichaaf murteessaadha jedhe.

   Dhaabbata Biyyoota Gamtoomanitti bakka bu'aan Al Haariitii Idriis, Guuteeres akka gidduugalan gaafateera.

   Sudaan Ameerikaan biyyooti miseensaa kora UN irratti akka argaman dirqama viizaa kennuu qabdi, hogganichis ulaagaa isaanirraa eegamu guutaniiru jedhe

   Ameerikaan gamasheen waraanni Sudaan akkasumas humni adda RSF biyyattii hogganuuf bu''ura seeraa hin qabani jechuun inumaa Waashingitan qaamota wal lolan hunda irratti dhiibbaa jabeessiti jette.

   Murtoon kuni Ameerikaan mirga namoomaa sarbeera, tattaaffii nagaa buusuuf gufachiiseera jechuun Burhaan irratti bara 2025 dhorkaa kaahuun booda dhagahame.

7. 23 Fuulbaana 2026Itoophiyaatti ALItti Fulbaana 25 mootummaan haaraan akka hundaa'u Manni Maree Bakka Bu'oota Uummataa beeksise

   

   Madda suuraa, House of peoples' Representatives of FDRE

   Itoophiyaatti ALItti gaafa Fulbaana 25, 2019 mootummaan haaraan akka hundaa'u Manni Maree Bakka Bu'oota Uummataa ifa godhe.

   Af-yaa'ii mana marichaa Taaggasaa Caafoo waabeffachuun miidiyaan biyya keessaa EBC'n akka gabaasetti, guyyaa jedhame kana mootummaa haaraa hundeessuu qofa osoo hin taane manni marichaas guyyaa itti banamuudha.

   Filannoo biyyaalessaa marsaa 7ffaa kan injifate Paartiin Badhaadhinaa Fulbaana 25 mootummaa haaraa hundeessa.

   Manni Maree Bakka Bu'oota Uummataa guyyaa itti mootummaan haaran hundaa'ufi manni marichaa itti banamuuf qophii barbaachisu hunda xumuruu kan ibsan Taaggasaa Caafoo, mootummaan haaraa hundaa'u, waggoota shanan itti aananiif biyyaafi uummata gaggeessuuf guyyaa itti kakuu galanii imaanaa itti fudhatan ta'uus ibsan.

8. 23 Fuulbaana 2026Tiraamp gaggeessitoota Iraan erga akeekkachiisee booda qondaalonni biyyoota lamaanii Niwu Yoorkitti mariyatan

   

   Madda suuraa, EPA

   Tiraamp Yaa'ii Waliigalaa UN irratti waraanni Iraan hin furamu taanan "Iraan nan balleessa" jedhee dhaadachuu booda qondaalonni olaanoon Iraanifi US Niwu Yoorkitti marii gaggeessan.

   Qondaalonni USfi Iraan yaa'ii UN gaggeeffamaa jiru cinaatti sa'aatii dheeraa fudhatanii mariyachuutu gabaafame.

   Biyyoota lamaan jaarsummaan kan walitti fide Kaatar yoo taatu, maricharratti waanti irratti waliigalame hin jiru.

   Iraan bakka bu'uun kan hirmaatan ministiira dhimma alaa kan ta'an Abbaas Araagchiifi Ergamaa Addaa US kan ta'an Istiiv Wiitkoofidha.

   USfi Iraan erga Waxabajjii darbee as yeroo jalqabaaf qaaman wal-arganii mariyachuu isaaniti. Guraandhala 28 USfi Israa'el wal-ta'uun Iraanirratti haleellaa banuu hordofee Iraanis misaa'elaafi dirooniin deebii kennaa turte.

   Dabaluunis Ulaa Hormuuz cufuun dhiyeessii boba'aa addunyaa danquun gatiin boba'aa addunyaas akka danqamu gochuu dandeesseti. Erga waraanni eegalee as yaaliin dippilomaasii garaa garaa godhamus hanga ammaa waliigaltee qabatamaarra hin geenye.

   Tiraamp yeroo garaa garaatti Iraanirratti dhaadataa ture. Yaa'ii UN gaggeeffamaa jirurrattis akeekkachiisuma wal-fakkaataa Iraanirratti dubbate. "Iraan waliigalteerra hin geessu taanan, ni balleessina" jechuun duubbate.

9. 23 Fuulbaana 2026US Giriinlaand keessatti buufata waraanaa lama ijaaruuf waliigalte

   

   Madda suuraa, Reuters

   US waliigaltee haaraa Giriinlaandifi Deenmaark waliin taasifteen buufata waraanaa haaraa lama ijaarufi.

   Tiraamp marsaa lammataa akkuma Waayit Haawus seeneen Giriinlaand US jala galchuuf akka hojjatu ibsaa ture.

   Kanarraa ka'uun Giriinlaand of jalatti kan bulchitu Deenmaark waliin ataakaaroo keessa galanii turan. Haa ta'u garuu marii US, Deenmaark fi Giriinlaand taasisaniin US buufata waraanaa duraan achii qabdurratti dabalataan lama akka ijaartu waliigalaniiru.

   US waliigaltee haaraa mallatteessiteen, Giriinlaand daangaa walabaa Deenmaark ta'uu itti waliigalteetti.

   Giriinlaand of dandeessee kan of bulchitu taatus, Deenmaark jalatti bulti. USfi Deenmaark waliigalticha osoo hin mallatteessin dura Tiraamp haasaa taasiseen, "bakka mijataa ta'etti buufata waraanaa guddaa ijaaruuf adeemsa isaa hatattamaan ni eegalla" jedhe.

   Ministiirri Muummee Deenmaark Mette Firedirksan ammoo, "Waliigaltichi USdhaaf, Deenmaarkifi Giriinlaadiif bu'a qabeessadha" jechuun Awurooppaaf illee waan gaarii akka ta'e dubbatan.

   Ministiirri Muummee Giriinlaand Jeens Firedirik Nelsan haasaa taasisaniin, waliigalticha gareen hunduu kan itti mo'atee ta'uu ibsan.

   Giriinlaand US wajjin walii hin galtu yoo ta'e, humna waraanaan to'achuu akka danda'u akeekkachiisaa ture. Tiraamp Giriinlaand nageenya biyyaalessaa UStiif bakka murteessituu ta'uu eeruni kan to'achuuf itti gamaa ture.

   Waliigalteen US, Giriinlaandifi Deenmaark waliif mallatteessan kun muddama waggaa oliif ture kan qabbaneessudha.

10. 22 Fuulbaana 2026Tiraamp baajatni UN %15 hir'achuufi hojjettoonni dhaabichaa kumaatamaan arii'amuu himan

    

    Madda suuraa, Reuters

    Pireezidantiin Ameerikaa Donaaldi Tiraamp mootummaan isaanii mootummoota biroo waliin tahuun seenaa Dhaabbata Biyyoota Gamtoomanii keessatti sirreefamni bal'aa taasifamuu himan.

    Tiraamp kora waliigalaa mana maree nageenyaa Dhaabbata Biyyoota Gamtoomanii irratti haasaa taasisaniin baajatni dhaabbatichaa bara warra Awurooppaa baranaan yeroo jalqabaaf dhibbeentaa 15 hir'ifamuufi hojjettoonni 4000 arii'amus himaniiru.

    Pireezidantichi dhaabbati kuni ''humna ajaa'ibaa'' akka qabu himuun garuu ''ajandaa warraa siyaasa bitaa baachuu dhaabuu qaba,'' jedhaniiru.

    Tiraamp bara aangoo marsaa lammataan tarkaanfiiwwan gurgurddaa kan fudhatan yoo tahu, Ameerikaa miseensummaa dhaabota idiladdunyaa keessaa baasuun ammoo isa tokkodha.

    Dhaabota tarkaanfin pireezidantichaa irra bu'ee keessaa kanneen 66 tahan Dhaabbata Biyyoota Gamtoomanii waliin hidhata kan qabanidha.

    Yeroo tarkaanfiin kuni fudhatamu ibsa kennameen ''dhaaboti kunneen bu'aa Ameerikaaf kan hojjetan waan hin taaneefi bu'aa qabeessa kan hin taane, ajandaa dhokataa kan tarkaanfachiisan,'' jedhamee ture.

11. 22 Fuulbaana 2026Afrikaan mana maree nageenyaa UN keessatti teessoo dhaabbataa akka qabaattu Guuteeres gaafatan

    

    Madda suuraa, EPA

    Hogganaan Olaanaa Biyyoota Gamtoomani (UN) Antooniyoo Guuteeres Afrikaan Mana-maree Nageenyaa dhaabbichaa keessatti teessoo dhaabbataa akka argattu gaafatan.

    Hogganaan Olaanaa kuni kora waliigalaa UN har'a jalqabe irratti haasaa baniinsaa yeroo taasisanidha dhimma kanarratti kan dubbatan.

    Guteerees dubbii isaanii keessatti Afrikaan mana maree nageenyaa keessatti yoo xiqqate teessoon tokko akka kennamuuf jala muranii dubbataniiru.

    ''Jaarraa 21ffaa keessatti Afrikaan mana maree nageenyaa keessaa bakka bu'aa dhabuun dhimma haqaafi sababa hin qabne dha,'' jechuun geeddaramuu akka qabu dubbatan.

    Hogganaan olaanaa kuni bara darbes ''bara 1945 irraa qabee haalli addunyaa geeddarameera, tahus manni maree nageenyaa bakka bu'oota qabuun jijjiirama otoo hin agarsiisiin akkuma itti fufetti jira,'' jechuun waamicha walfakkaataa dhiyeessanii ture.

    Manni maree nageenyaa miseensota dhaabbataa shan kan qabu yoo tahu isaanis:Chaayinaa, Faransaay, Raashiyaa, UK fi Ameerikaa dha.

    Kanaanis caasaan mana marichaa haala yeroo Waraana Addunyaa Lammaffaa Afrikaan kolonii jala turte kan agarsiisa jedhamuun qeeqamaa ture.

    Manni maree kuni miseensota dhaabbataa hin taane kan naannolee addunyaa garagaraa bakka bu'an kudhan qabaatus akka miseensota afran teessoo dhaabbataa qabanii mirga sagalee sagaleen haquu hin qaban.

    Gamtaan Afrikaa bakka buutota dhaabbataa lamaafi miseensota dhaabbtaa hin taane lama akka qabaatus yeroo dheeraaf dhiibbaan taasifamaa ture.

    Mana maree nageenyaa kana keessatti biyyooti, dhaaboti fi namoonni dhuunfaa missensa tahan qoqqobbii idiladdunyaa, garee nagaa kabachiisuuf eeyyama kennuu akasumas lolli gaafa jiraatu deebiin akkamii kennamuu qaba kan jedhus murteesssu.

12. 22 Fuulbaana 2026Arteettaan kontiraata haaraa Arsennaal waliin isa tursiisu mallatteesse

    

    Madda suuraa, Getty Images

    Manaajariin Arsenaal Mikeel Arteettaan kontiraata haaraa kilaba shaampiyoonaa Piriimer Liigii kanaa waliin isa tursiisu mallatteessuuf waliigalteerra gaheera.

    Kontiraati haaraa kun Arteettaaf faayidaa inni argatu foyyeesseeraaf jedhameera.

    Kontiraatni isaa dhuma bara kanaa kan xumuramu Arteettaan, marii ji'ootaaf tureen booda mallatteessuuf waliigalteerra gahuu isaa hordofee waggoota baayyeetiif Arsenaal waliin akka itti fufutu eegama.

    Kontiraata haaraa kanaan hangamiif akka turu ifatti himamuu baatullee, akka waliigaltee kanaatti Arteettaan erga Mudde bara 2019 Arsenaal dhufee kaasee walumaa galatti waggoota 10 akka kilbicha waliin isa tursiisu abdatama.

    Gabaasaaleen akka mul'isanitti, kontiraatni kun miindaa isaa foyyeessuufi bu'aa inni galmeessurratti hundaa'uun maallaqni dabalataa ni kaffalamaaf.

    Dhiyeenya kana waa'ee fuuldura isaa kan dubbate Arteettaan, Arsenaal turuuf gammachuu akka qabuufi kilabicha waliin turuudhaafis shakkii tokkollee akka hin qabne hime.

    Odeeffannoo bal'aaf:

    Arteettaa: 'Kallattii jireenyaa koo kan jijjiirte haadha manaa kooti'

13. 22 Fuulbaana 2026Hoggantoota biyyoota addunyaa Kora Waliigalaa UN irratti hirmaachuuf Niiwu Yoork galan

    Hoggantoonni biyyoota gara garaa Kora Waliigalaa Dhaabbata Biyyoota Gamtoomanii (UN) irratti argamuuf waajira muummee Dhaabbatichaa Niiwu Yoorkitti argamu galaa jiru.

    Suura kana ilaalaa.

    

    Madda suuraa, Reuters

    

    Madda suuraa, AFP via Getty Images

    

    Madda suuraa, AFP via Getty Images

    

    Madda suuraa, AFP via Getty Images

14. 22 Fuulbaana 2026Haleellaa Sa'udiin Yeman irratti raawwatteen namoonni nagaa 20 ajjeefaman

    

    Madda suuraa, EPA

    Sa'udi Arabiyaan sa'atii 24 darbe keessatti haleellaa Yaman irratti raawatteen namoonni nagaa 20 ajjeefamuufi miidhaan irra gahuu miidiyaaleen warra Huutii waliin hidhata qaban beeksisan.

    Dubbiihimaan Huutii Saa'udi Arabiyaa erga lolli hammaatee haleellaa qilleensaafi misaayeelaa 900 qubsuma isaanii irratti raawwachuu himaniiru.

    Mootummaan Yaman hawaasa idiladdunyaa biraa beekamtii qabu gamasaan haleellaa raawwateef deebii kennuuf bulchiinsa Balaahaajii irratti haleellaa raawwateen namoonni nagaa du'aniiru jechuun himataniiru.

    Warri Huutii garuu haleellaan Saa'uudii namoota nagaa Yaman irratti kan xiyyeefate tahuu ibsuun lolli jalqabuun booda gochaan hammaachuu himeera.

    Garee hidhataa kana kan deeggartu Iraanis Saa'udii Arabiyaan bulchiinsota Yaman irratti haleellaa raawwaattu akka dhaabdu yaadachiifteetti.

    Dhimma kanarratti odeeffannoo bal'aa argachuuf:

    Hidhattoonni Huutii Yaman keessaa eenyu?

    Huutiin Yaman Sa'ud Arabiyaa waliin lola seenuuf jedhuu?

    Hidhattooti Huutii magaalaa guddoo Sa'udi Arabiyaatti misaa'ela dhukaasuu himan

15. 22 Fuulbaana 2026Ameerikaan Iraan waliin mariyachuuf qophii ta'uu himte

    

    Madda suuraa, EPA/Shutterstock

    Ministirri dhimma alaa Ameerikaa Maarkoo Ruubiyoo Kora Waliigalaa Dhaabbata Biyyoota Gamtoomanii (UN) Niiwu Yoorkitti gaggeeffamaa jiru cinaatti aanga'oota Iraan waliin dubbachuuf qophii ta'uu isaa ibseera.

    Ruubiyoon, "ammatti wanti karoorfame waan jiru natti hin fakkaatu, haata'u malee marii akkanaa kanaaf dhugaadhumatti nuti qophiidha. Keessattii wal arganii waliin dubbachuun bu'aa kan fidu yoo ta'eefi dhumarratti kaayyoo yaadame abdiin milkeessuu jiraannaan" jedheera.

    Kaayyoon guddaa jechuun Ruubiyoon kan ibse, Iraan meeshaa waraanaa niwkilaaraa akka hidhachuu hin dandeenye gochuudha.

    Ministirri dhimma alaa Iraan Abbaas Arraagchii Wixata darberraa kaasee NIiwu Yoorkitti kan argamu yoo ta'u, Pirezidantiin Iraan Masud Pezeeshkiyaanis kora waliigalaa kanarratti hirmaachuuf gara Niiwu Yoorkitti imaleera.

    Guyyoota lama dura pirezidant Doonaald Tiraamp pirezidantii Iraan Masuud Pezeeshikiyaan waliin wal arguuf qophii ta'uu isaa Fox News'tti dubbatee ture.

    Korri waliigalaa UN kun har'a kan jalqabame yoo ta'u, bakka bu'oonni Iraan haasaa akka taasisan ni eegama.

16. 22 Fuulbaana 2026Iraan 'qoqqobbii irra jirurraa aara galfachuuf' Hormuuz banuuf yaada dhiyeessite

    

    Madda suuraa, Reuters

    Maddi oduu Jappaan Kyodo jedhamu akka gabaasetti, Iraan kaayyoo dhiibbaa qoqqobbii diinagdee isheerra jirurraa aara galfachuuf jedhuun, yaada Ulaa Hormuuz guyyoota torba keessatti banuu Ameerikaaf dhiyeessite.

    Akka gabaasa kanaatti, tarkaanfiin kun qaama carraaqqii Teehraan Waashingiteen waliin gara mariitti deebiyuun walitti bu'iinsi garee lamaan gidduu jiru akka dhaabbachu gochuuti.

    Maddi oduu kun madda aanga'aa Iraan maqaan hin dhoofne waabeffachuun akka ibsetti, yaadni dhiyaate kun Mana-maree Nageenyaa Biyyaalessaa Olaanaa Iraan fi Mojtaabaa Kameeniitiin mirkanaa'eera.

    Akka gabaasichi jedhutti taanaan, ergaan kun karaa dippilomaatota jaarsummaarratti hojjetaniin Waashingiteen qaqqabeera.

    Aanga'aan kun milkaa'inni carraaqqii dippilomaasii kun "garaa irraa ta'uufi qophii ta'uu" Ameerikaarratti hundaa'a jechuun, Iraan mallattoon mariitti deebiyamuu jiraatee oppereeshiniin waraanaa Ulaa Hormuuz dhababatee, uggurri ulaawwan galaanaa Iraanirra kaa'amanis kaafamanii arguu abdachaa jirti jedhe.

    Haata'u malee, aanga'aan kun carraan pirezidantiin Iraan Masuud Pezeeshkiyaan fi Pirezidantii Ameerikaa Doonaald Tiraamp wal arguu danda'u hamii jedhu waakkateera.

    Odeeffannoo bal'aa kanaan walqabatn biroof:

    Ameerikaan kaayyoo waraana Iraanitti banteef galmaan ga'atteettii?

    Ameerikaan Odoola Iraan Kaargi akkamitti to'achuu dandeessi?

    Iraan waraana Ameerikaa waliin gaggeessitu yeroo hangamiif itti fufsiisuu dandeessi?

17. 22 Fuulbaana 2026Turkiitti haleellaa mana barumsaatti dhiyootti raawwatameen namoonni 11 miidhaman

    

    Madda suuraa, Getty Images

    Turkiitti dhukaasa mana barumsaatti dhiyootti mudateen namoonni 11 miidhamuu poolisiin beeksise.

    Kibxata ganama namni meeshaa hidhate tokko haleellaa baneen namoota miidhaman keessaa lama haala yaaddessaa keessa jiraachuun isaanii ibsameera.

    Haleellaan kun kan raawwatame mana barumsaa ogummaa fi teekinikaa Insii Usmeezii jedhamu kutaa bulchiinsa Maaniisaa gama Lixaatti argamutti dhiyootti yoo ta'u, kanneen miidhaan irra gahe hunduu barattootadha jedhameera.

    Haleellaa kana raawwateera jedhamee kan shakkame ol adeemaan umuriin isaa waggaa 15 ta'e tokko to'annoo jala ooluu poolisiin ibseera.

    Shakkamaan kun meeshaa akkuma hidhatetti daandii namni irra hin jirre qabatee gara mana barumsaatti yeroo deemuufi deebiyee fiige eyeroo miliqutti viidiyoowwan kaameraa nageenyaarraa argaman mul'isaniiru.

    Haati, abbaafi abbaa meeshaa sanaa akka ta'e kan ibsame akaakayyuun waan mudate kanaan wal qabsiisee to'annoo jala oolfamuu isaanii ministirri haqaa biyyattii Akiin Gurleek dubbateera.

    Kaayyoon haleellaa kanaa maal akka ta'e hanga ammaatti ifa miti.

    Ministieerri barnoota abiyyattii "taateen kun biyya keenya, keessumaa hawaasa barnootaa hedduu kan gaddisiisedha," jedheera.

    Ministeerichi itti dabaluun qorattoonni biyyaalessaa sadii gara kutaa bulchiinsaa Maaniisaatti ergamuu isaaii ibsaniiru.

    Turkii keessatti bara kana keessa qofa mana barumsaatti haleellaan yeroo raawwatamu kun isa sadaffaadha.

    Haleellaan ammaa kun kan raawwatame yeroo mootummaan haleellaa kana fakkaatu dabalaa dhufe dhaabsisuuf yaalaa jiruttidha.

18. 22 Fuulbaana 2026Ertiraan US waliin hariiroo boqonnaa haaraa eegaluuf qophii ta'uu beeksifte

    

    Madda suuraa, SM

    Asmaraan hariiroo boqonnaa haaraa US waliin eegaluuf qophii ta'uu beeksifte.

    Ministiirri Odeeffannoo Ertiraa Yamaanaa Gabra Masqal gaazexaa al-Sharq al-Awsat jedhamu waliin turtii taasisaniin, US Ertiraa irraa qoqqobbii kaasuun hariiroo biyyoota lamaanii ilaalchisee "waanti gaariin jiraachuu agarsiistudha" jedhan.

    Tarkaanfiin US dhiyeenya fudhatte hariiroo biyyoota lamaaniif boqonnaa haaraa uumuu akka danda'us akeekan.

    Keessumaa hariiroon biyyoota lamaanii investimentiifi daldalaa fa'aarratti xiyyeeffachuun akka fooyya'uu malus dubbatan.

    Waraana Kaaba Itoophiyaa keessatti hirmaachuushee hordofee US Ertiraa irra qoqqobbii kaa'uunshee ni yaadatama.

    Yamaanaa Gabra Masqal garuu qoqqobbiin US waggaa shaniif Ertiraa irra keesse "bifa kamiinuu fudhatama kan hin qabneefi diinagdee biyya keenyarraan dhiibbaa kan gaheedha" jedhan.

    US dhiyeenya qoqqobbicha kaasuun hawaasa idiladdunyaaf ergaa murteessaa kan kenneedha jechuun tarkaanfiin itti aanu dhiibbaa siyaasaa Ertiraa irra jiru kaasuun hariiroo biyyoota lamaanii caalmatti akka haaressu abdii qabaachuus ibsaniiru.

    Xinxaaltonni akka jedhanitti, US Ertiraa irraa qoqqobbii kaasuun naannoo Galaana Diimaafi Gaanfa Affrikaarratti ijjannoo qabdu jijjiiruufi Ertiraa waliin hariiroo cimsachuu barbaaddi.

19. 22 Fuulbaana 2026Gareen maqaa ONLFn socho'an qindoomina hidhattoonni uuman irratti yaada garagaraa kennan

    

    Madda suuraa, SM

    Hidhattoonni Itoophiyaa keessa socho'an torba qindoomina faallaa mootummaa dhaabbatu uumuu ibsan keessatti maqaan hidhattoota torbaa eerameera.

    Isaan keessaa tokko Adda Bilisa Baasaa Biyyaalessaa Ogaaden (ONLF) yoo ta'u, gareewwan maqaa kana qaban qindoomina kanarratti yaada garagaraa dhiheessaniiru.

    Gareen kun siyaasa karaa nagaa keessatti hirmaachuuf bara 2018 mootummaa waliin waliigaltee mallatteessee kan ture yoo ta'u, ergasii garuu dhibdee uumameen lamatti ba'eera.

    Gareen ''mootummaan waliigaltee sana kabajuu dhabuu,'' himachuun qabsoo hidhannootti deebi'e qindoomina kanatti akka waliigalu BBC Afaan Somaaleetti himeera.

    Dubbi himaan garee ONLF kanaa Abdiqaadir Adaanii Hirmoogee qindoomina jedhame kanarratti yaada BBC Afaan Somaaleef kenneen gareen amma qindaa'e kun kanaan duras uummata biyyattii tokkoomsuuf hojjetaa ture jedhe.

    ''Galmi keenya uummati keenya akka mirga dimokiraasii fi hiree ofii murteeffachuu mirkaneeffatan gochuudha,'' jedhe.

    ''Uummanni keenya dhiibbaa mootummaa [badhaadhinaa] jalaa ba'uun akka ofiin of bulchan, diinagdee, bulchiinsa, lafaa fi misooma isaaniirraa akka fayyadaman gochuudha.''

    Qindoominni kun mariif qophaa'uu kan ibse dubbi himaan kun, miseensonni isaas galma hedame milkeessuuf qindoominaan hojjechuuf qophiidha jedhe.

    Gareen ONLF karaa nagaan siyaasa Itoophiyaa keessatti hirmaachaa jiraachuu himu ammoo ''maqaa paartii kanaa qindoomina haaraa kanatti maxxansuun odeeffannoo tamsa'aa jiru'' kuffiseera.

    ''ONLF qindoomina humnoota hidhattootaa Itoophiyaa maqaa of baraaruu jedhuun hundaa'e keessatti dabalameera odeeffannoon jedhu dhara,'' jedhe ibsa baaseen.

    Ibsichi dabaluun ''gareen maqaa ONLF himatuu fi nama Abdirahmaan Sheek Mahdii jedhamuun hoogganamu paarticha keessatti osoo aangoo bu'uura seeraa qabu hin qabaatin seeraan ala maqichatti fayyadamaa jira,'' jechuun himate.

    Kanaafuu ibsi maqaa nama kanaan miidiyaa hawaasummaarra deemaa jiru ''ONLF karaa nagaa fi seera qabeessaan socho'u, kan beekamtii qabu bakka hin bu'u,'' jedhe.

    Duraan mootummaa Itoophiyaan garee shororkeessitootaa jalatti ramadamee kan ture ONLF, erga mootummaa MM Abiy Ahmad waliin waliigaltee mallatteessee karaa nagaan siyaasa keessatti hirmaachaa jiraachuu fi uummata Somaalees fayyadaa jiraachuu ibse.

    Ergasii naannoon Somaalee nageenya, misoomaa fi bilisummaa siyaasaa argateera jedhe ONLF ibsa isaa keessatti.

    Garee maqaa isaatiin socho'uun adeemsa galma paartichaan faallaa ta'e deemu akka balaaleffatus ibse.

    Hidhattoonni Itoophiyaa torba mootummaa loluuf qindoomina uumuu ibsan

20. 22 Fuulbaana 2026Miidiyaaleen US heddu ibsa Tiraamp irratti hirmaachuu lagatan

    

    Madda suuraa, EPA

    Tiraamp Jimaata darbe CNN dabalatee miidiyaalee biyyattii Politico fi MS NOW jedhaman Waayit Haawus seenanii akka hin gabaasne ugguruu hordofee, miidiyaaleen US heddu ibsa Tiraamp kaleessa kenne lagatan.

    Miidiyaaleen Waayit Haawus akka hin seenne ugguraman "odeeffannoo sobaa facaasu" jechuuni ture Tiraamp.

    Haa ta'u garuu dhaabbilee miidiyaa Waayit Haawus seenanii akka hin gabaasne ugguraman kunneen, Tiraamp irratti himata akka banan ibsanii ture.

    Tarkaanfii Waayit Haawus fudhate kana hordofee Niwu Yoork Taayims fi Washingtan Post dabalatee miidiyaaleen biyyattii gurguddoon ibsa Tiraamp Jimaata har'aatti beellamame irratti akka hin hirmaanne beekamee jira.

    Miidiyaaleen ibsa isaa lagachuu ilaalchisee Tiraamp yaada kenneen baay'ee akka hin yaaddofne dubbate.

    "Hin argamnu jedhanii lagachuusaanii baay'ee nama dhiba. Garuummoo na lagachuu hin danda'an, kanaaf waa'eensaa baay'edhuma na hin dhiphisu," jechuun dubbate.

    CNN dabalatee miidiyaaleen Waayit Haawus akka hin seenne dhorkaman sadan, Wiixata Mana Murtii Distiriiktii Waashingtanitti Tiraamp irratti himata banuun dhagahame.