Апрелда Путиннинг аралашуви билангина АвтоВАЗ касоддан сақлаб қолинганди

АвтоВАЗ 27600 иш ўринларини қисқартиришини эълон қилган. Бу корхона ишчиларининг бир чорагидан кўпроғидир, аммо ундан ҳам кўпроқ иш жойлари қисқартирилиши мумкин эди.

Аввалига 36 минг киши ишидан айрилиши режаланганди, бироқ касаба уюшмалари билан музокаралар ортидан ширкат раҳбарияти бу миқдорни камайтиришга рози бўлган.

Йирик қисқартиришларга автоконцерн маҳсулоти савдосининг кескин тушиб кетиши сабаб бўлмоқда. Йилнинг биринчи ярмида ширкат фақат 44 фоиз маҳсулотини сота олган.

АвтоВАЗ эскпорти ҳам кескин сусайган: ўтган йилги шу даврда сотилган 76,5 минг автомобиль билан солиштирганда ширкат жорий йилнинг саккиз ойи давомида фақат 22,2 минг автомобиль экспорт қилган.

Ундан ташқари, АвтоВАЗ ўз дилерларини йўқотишда давом этаяпти. Яқинда унинг дилерларидан бири Ростокино-Lada Сбербанкка қарзини тўлай олмай ўзини банкрот дея эълон қилган.

"Бугунда АвтоВАЗда 102 минг одам ишлайди. Ишчиларнинг бу каби сони самарали ва даромадли ишлаб чиқаришга кафолат бўла олмайди," - деб айтган ширкат раиси. Унга кўра, бўшатилган ишчиларнинг 13 минг нафари нафақага чиқарилади, 5,5 минги эса ҳали нафақа ёшига етмаган.

Ишдан четлатилган яна 9 минг кишидан 6 мингги, раҳбарият ишонтиришича, 2012 йилда корхонага қайтиш имконига эга бўладилар.

Август ойида АвтоВАЗ бирорта ҳам автомобиль ишлаб чиқармаган, у февраль ойигача қисқартирилган тартибда ишлаши режаланган.

Бу дегани февралгача ишчилар ўз маошларининг фақат ярмини олишларига тўғри келади.

"Единство" мустақил касаба уюшмаси ширкат маъмуриятининг баёнотидан норози бўлиб қолаётир. Иш жойларининг қисқартирилишига қарши навбатдаги норозилик намойиши 28 сентябрда бўлиб ўтиши мўлжалланган.