Дмитрий Медведев Россиянинг учинчи президентидир

Россиянинг янги сайланган Президенти Дмитрий Медведев Кремлда ўтган тантанали маросимда қасамёдга келтирилди.

Янги президентнинг инаугурация маросимига икки ярим мингга яқин одам таклиф этилган, бу - Владимир Путин 2004 йилда қасамёдга келтирилганида иштирок этганлар сонидан 800 кишига кўпдир.

Меҳмонлар орасида СССРнинг биринчи ва охирги Президенти Михаил Горбачев ва Россиянинг биринчи Президенти Борис Ельциннинг беваси Наина Ельциналар бор.

Тантанали маросим Россиянинг марказий телеканаллари орқали тўғридан-тўғри олиб кўрсатилди.

Президент сифатидаги илк нутқида жаноб Медведев фуқаролик ҳуқуқлари ва иқтисодий эркинликларни кенгайтиришни ўзининг устивор вазифаси, деб атади.

Меросхўрлик

Кремлдаги тантанали маросим чоғида Путин ва Медведев қисқа нутқ ирод қилишди.

Путиннинг сўзларига кўра, Медведевнинг президентлик лавозимида иш бошлаши мамлакатдаги барча сиёсий кучлар учун "бирлаштирувчи лаҳза" бўлиши керак.

"Янги президентнинг иш бошлаши жуда ҳам масъулиятли босқич, бу бутун минтақалар, сиёсий кучлар ва фуқаролик жамияти учун бирлаштирувчи лаҳза бўлиши керак", -деб айтди у.

Жаноб Путиннинг таъкидлашича, "ҳозир фуқароларнинг манфаатларидан келиб чиққан ҳолда, танлаб олинган йўлда давом этиш жуда муҳим".

Унга кўра, "Россияда юқори давлат ҳғокимиятини янгилаш жараёни, умумият-ла, ниҳоясига етган".

Ўзининг қасамёд нутқида жаноб Медведев "қонун устуворлигини таъминлаш зарурати" ҳақида гапирди.

Янги президент ҳуқуқий тизимнинг етуклиги ва амалийлигини нафақат "иқтисод ривожланиши, тадбиркорликни қўллаб-қувватлаш ва корупцияга қарши курашнинг муҳим шарти", балки "Россиянинг жаҳон ҳамжамиятидаги ролининг мустаҳкамланиши"да муҳим омил, деб атади.

Жаноб Медведев ўзининг янги лавозимида "Владимир Путиннинг қўллаб-қувватловига умид қилишини" айтди.

Хўжайин ким?

Шундай қилиб, Президент Путин Россиянинг буюк давлат сифатидаги мавқеъи қайта тиклана бошлаган саккиз йиллик бошқарувидан сўнг, ҳокимиятни узоқ йиллар ўзининг қўл остида ишлаган шахс-Дмитрий Медведевга топширди.

Аммо жаноб Путин нафақага чиқаётгани йўқ, у ҳокимиятинг марказида-бош вазир лавозимида қоладиган.

Қасамёд маросимидан кейиноқ жаноб Медведев парламентнинг қуйи палатаси- Думага жаноб Путиннинг бош вазирликка номзодини расман тавсия этган.

Бу эса Кремлнинг асл хўжайини ким бўлади, деган саволни келтириб чиқарган.

42 ёшли Дмитрий Медведев Россиянинг учинчи президенти бўлади.

У 2 мартда ўтган сайловларда ҳокимиятдаги "Ягона Россия" партиясидан номзод бўлган ва 70 фоиздан кўпроқ овоз олган.

Аммо кузатувчилар сайловларда рақобатнинг бўлмаганини айтишади.

Ғарблик таҳлилчилар Президент Путин маълум муддат ҳокимият жиловини ўз қўлида ушлаб туриши ва Дмитрий Медведев устидан катта таъсирга эга бўлишини айтишмоқда.