’یہ اسرائیلی جارحیت کے حوالے سے ایک نیا جرم ہے‘

اسرائیلی فوج کے مطابق اس کے فوجی قصبے کے وسطی علاقے میں معمول کی کارروائیوں میں مصروف تھے کہ انہوں نے ایک مسلح شخص کی نشاندہی کی جسے انہوں نے گولی مار دی۔

تاہم عینی شاہدین کا کہنا ہے کہ ہلاک ہونے والا شخص ایک چھبیس سالہ دکاندار تھا جو اپنی دکان میں ہی ہلاک ہوا اور زخمی ہونے والا شخص مرنے والے کا بھائی ہے۔

اس سے پہلے نابلوس میں ہی اس وقت متعدد دکانوں اور گھروں کو نقصان پہنچا جو اسرائیلی فوج نے کنکریٹ کی رکاوٹوں کو دھماکے سے اڑا دیا۔شہر کے میئر کے مطابق ان دھماکوں کے نتیجے میں بجلی اور پانی کی فراہمی معطل ہو گئی جبکہ چند شہریوں کو معمولی زخم آئے۔

فلسطین کے وزیرِ اطلاعات مصطفٰی برغوتی نے نابلوس میں اسرائیلی کارروائیوں کو’ فلسطینی انتظامیہ اور عوام کے خلاف اسرائیلی جارحیت کے حوالے سے ایک نیا جرم‘ قرار دیا ہے۔

رام اللہ میں بی بی سی کے نمائندے علیم مقبول کے مطابق اسرائیلی فوجی مشتبہ شدت پسندوں کی تلاش میں اکثر نابلوس میں کارروائیاں کرتے رہتے ہیں۔