Iain Eàirdsidh Mac a' Mhaoilein

Anns an t-seirbheis cluinnidh sibh na laoidhean 's na leughaidhean a leanas:
Còisir Eaglais Naomh Barr ann am Barraigh a' seinn 'A Thighearna a Chruthaich is a Dhealbh Mi' agus 'Seo an Gaol mar Meud na Mara'.
Donaidh M MacLeod le 'Cia Domhain Gràdh an Athar Dhuinn' agus Rosemary Ward le taic bho Billy Mac a' Phi le 'Coiseachd Dlùth'.

Leughaidhean: Marcus 2: 1-12 & 11: 25
Mata 18: 21-22

Rugadh agus thogadh Iain Eàirdsidh ann an Cill Donain ann an Uibhist a Deas agus chaidh e dhan sgoil an sin agus an Dalabrog. Às an sin, chaidh e gu Colaiste Blairs ann an Obar Dheathain agus à sin gu Colaiste Rìoghail na Sagartachd anns an Spàinn airson sia bliadhna. Thàinig e a-mach na shagart anns an Ògmhios, 1971. Bha e na shagart ann an Dùn Omhain, Eilean Bhòid, Dalabrog agus Èirisgeidh. Bha Iain Eàirdsidh ag obair mar Oifigear Leigheis-inntinn ann an Lodainn an Iar a' cuideachadh daoine le trioblaidean inntinn agus ag oideachadh 's a' toirt comhairle do dhaoine eile ann a bhith a' dèiligeadh ri daoine le trioblaidean inntinn. Tha e a-nis air a dhreuchd làn-ùine a leigeil seachad.
Tha e a' fuireach aig Ceann a Deas Drochaid na Banrigh le bhean, Màiri, agus am mac Mata. Phòs an nighean aca Harriett as t-Samhradh anns an Eadailt. Nuair a bhios ùine aige dha fhèin is toigh leis a bhith siubhal a-null thairis, gu h-àraid dhan Eadailt, far a bheil taigh aca ann am baile beag iomallach. Air a shlighe a dh'obair, bhiodh e ag èisteachd ri clàraidhean den chànan Eadailtis 's a' feuchainn ri gnìomhairean Eadailtis ionnsachadh - gu mì-fhortanach bidh an fheadhainn Eadailteach agus Spàinnteach a' dol an lùib a chèile gu math tric, ach tha e còrdadh ris gu mòr a bhith dèanamh seo. Bidh e cuideachd a' cur ùine seachad air a' chùrsa golf agus a' dèanamh tòimhseachain-tarsainn agus ag eadar-theangachadh pìosan beaga an siud 's an seo dhan Ghàidhlig.
Bidh Iain Eàirdsidh os cionn nan seirbheisean Gàidhlig ann an Eaglais nam Manach Liath ann an Dùn Èideann uair sa h-uile sia gu ochd seachdainean.