10/11/2017

Dà uair a thìde de shàr cheòl is còmhradh còmhla ri Iain Mac 'ille Mhìcheil, a' craoladh beò à stiùdio a' BhBC ann an Glaschu. An t-seachdain-sa bidh Iain a' cur fàilt' air Christine Primrose - aon de ne seinneadairean Gàidhlig as cliùitiche a-riamh a chur a guth air clàr. 'S ann an Càrlabhagh air taobh an iar Eilean Leòdhais a rugadh Christine NicLeòid, agus tha i air a bhith a' seinn òrain traidiseanta Gàidhlig bho bha i na nighinn bheag. Ann an 1982, nuair nach robh na bha sin de dh'ùidh aig a' mhòr-shluagh ann an ceòl Gàidhlig, nochd a' chiad chlàr aice, Àite Mo Ghàoil. Thug an cruinneachadh ùr ìnnleachdach seo, ceòl traidiseanta Gàidhlig gu aire luchd-èisteachd na b' fharsainge. Bho'n uairsin tha Christine air an cothrom fhaighinn a bhith ag obair cuide ri luchd-ciùil cliùiteach mar Bhlàr Dùghlas agus Alasdair Friseal, agus tha ì air a bhith a' seinn ann an iomadh dùthaich air feadh an t-saoghail. As t-Samhradh 2017, às dèidh ùine gun a bhith a' clàradh, dh'fhoillsich Christine - Gràdh is Gonadh - Guth Ag Aithris (Love and Loss - A Lone Voice) cruinneachadh de dh'òrain ghaoil Ghàidhlig a tha i a' seinn gun taic ciùil. Anns an Dàmhair, chaidh a h-ìnntrigeadh ann an Talla nan Laoch Ciùil Traidiseanta ann an Alba. Agus air oidhche na Nollaige am bliadhna, thèid prògram a chraoladh air BBC ALBA, ag ìnnse làn sgeòil Christine - bho Chàrlabhagh gu ruige baile mòr New York, far am bheil a mac Iain sa theaghlach nise tàmh. Cluinnidh sinn a cuid seanchas, agus ceithir de na roghainnean ciùil pearsanta aice. A bharrachd air a sin, bidh measgachadh math de cheòl is òrain air a thaghadh dhuinn le Iain fhèin, a' toirt a-steach cuid de na guthan 'Country' is fheàrr a th'ann.