ظاهر طنين د افغانستان په اړه گڼ شمېر څېړنيزې مقالې خپرې کړي دي

ښاغلى طنين په ملگرو ملتو کې د افغانستان په دايمي نمايندگۍ کې د عبدالغفور روان فرهادي پر ځاى ټاکل شوى دى.

روان فرهادي د ډاکټر نجيبالله د حکومت تر ړنگېدو را رورسته په ملگرو ملتو کې د افغانستان سفير و. د افغانستان د بهرنيو چارو د وزارت په وينا، ښاغلى طنين به د راروانې نومبر له مياشتې څخه خپله نوې دنده پيل کړي.

ظاهر طنين په ١٩٥٦ ميلادي کال کې د افغانستان په کاپيسا ولايت زوکړى دى.

نوموړي په ١٩٨٠م کال کې په کابل پوهنتون کې د ډاکټر په توگه طبي زدکړې پاى ته ورسولې. ښاغلى طنين د افغانستان د ډيموکراټيک حزب او وطن گوند د واکمنۍ پر مهال په کابل کې ژورنالسټ و.

نوموړى په ١٩٩٥م کې د بي بي سي په فارسي او پښتو څانگه کې د پروډيوسر په توگه کار پيل کړى او وروسته د "بي بي سي د افغانستان لپاره" د خپرونو دمشر په توگه وټاکل شو.

د بي بي سي لپاره د نوموړي په لومړيو کارونو کې د "افغانستان په شلمه پېړۍ کې" د شفاهي تاريخ په اړه د راډيويي پروگرامونو د لړۍ جوړول راځي. دغه پروگرامونه په ٢٠٠٥م د کتاب په بڼه کې چاپ شول.

ظاهر طنين د افغانستان په اړه گڼ شمېر څېړنيزې مقالې په لوېديځو مطبوعاتو کې خپرې کړي دي. په افغانستان کې د کمونيسټ گوند واکمنې (١٩٧٨ تر ١٩٩٢)" هغه څېړنيزه رساله ده چې ښاغلي طنين له پروفيسر فرېډ هاليډې سره په گډه چمتو کړى ده.